Padas 46–60

अब कत सुरति होति है, राजन्? दिन दस प्रीति करी स्वारथ-हित रहत आपने काजन॥ सबै अयानि भईं सुनि मुरली ठगी कपट की छाजन। अब मन भयो सिंधु के खग ज्यों फिरि फिरि सरत जहाजन॥ वह नातो टूटो ता दिन तें सुफलकसुत-सँग भाजन। गोपीनाथ कहाय सूर प्रभु कत मारत हौ लाजन

aba kata surati hoti hai, rājan? dina dasa prīti karī svāratha-hita rahata āpane kājana|| sabai ayāni bhaīṃ suni muralī ṭhagī kapaṭa kī chājana| aba mana bhayo siṃdhu ke khaga jyoṃ phiri phiri sarata jahājana|| vaha nāto ṭūṭo tā dina teṃ suphalakasuta-sa~ga bhājana| gopīnātha kahāya sūra prabhu kata mārata hau lājana

लिखि आई ब्रजनाथ की छाप। बाँधे फिरत सीस पर ऊधो देखत आवै ताप॥ नूतन रीति नंदनंदन की घरघर दीजत थाप। हरि आगे कुब्जा अधिकारी, तातें है यह दाप॥ आए कहन जोग अवराधो अबिगत-कथा की जाप। सूर सँदेसो सुनि नहिं लागै कहौ कौन को पाप?

likhi āī brajanātha kī chāpa| bā~dhe phirata sīsa para ūdho dekhata āvai tāpa|| nūtana rīti naṃdanaṃdana kī gharaghara dījata thāpa| hari āge kubjā adhikārī, tāteṃ hai yaha dāpa|| āe kahana joga avarādho abigata-kathā kī jāpa| sūra sa~deso suni nahiṃ lāgai kahau kauna ko pāpa?

फिरि फिरि कहा सिखावत बात? प्रातकाल उठि देखत, ऊधो, घर घर माखन खात॥ जाकी बात कहत हौ हमसों सो है हमसों दूरि। ह्याँ है निकट जसोदानँदन प्रान-सजीवनमूरि॥ बालक संग लये दधि चोरत खात खवावत ड़ोलत। सूर सीस सुनि चौंकत नावहिं अब काहे न मुख बोलत?

phiri phiri kahā sikhāvata bāta? prātakāla uṭhi dekhata, ūdho, ghara ghara mākhana khāta|| jākī bāta kahata hau hamasoṃ so hai hamasoṃ dūri| hyā~ hai nikaṭa jasodāna~dana prāna-sajīvanamūri|| bālaka saṃga laye dadhi corata khāta khavāvata r̤olata| sūra sīsa suni cauṃkata nāvahiṃ aba kāhe na mukha bolata?

अपने सगुन गोपालै, माई! यहि बिधि काहे देत? ऊधो की ये निरगुन बातैं मीठी कैसे लेत। धर्म, अधर्म कामना सुनावत सुख औ मुक्ति समेत॥ काकी भूख गई मनलाडू सो देखहु चित चेत। सूर स्याम तजि को भुस फटकै मधुप तिहारे हेत?

apane saguna gopālai, māī! yahi bidhi kāhe deta? ūdho kī ye niraguna bātaiṃ mīṭhī kaise leta| dharma, adharma kāmanā sunāvata sukha au mukti sameta|| kākī bhūkha gaī manalāḍū so dekhahu cita ceta| sūra syāma taji ko bhusa phaṭakai madhupa tihāre heta?

हमको हरि की कथा सुनाव। अपनी ज्ञानकथा हो, ऊधो! मथुरा ही लै जाव॥ नागरि नारि भले बूझैंगी अपने वचन सुभाव। पा लागों, इन बातनि, रे अलि! उनहीं जाय रिझाव॥ सुनि, प्रियसखा स्यामसन्दर के जो पै जिय सति भाव। हरिमुख अति आरत इन नयननि बारक बहुरि दिखाव॥ जो कोउ कोटि जतन करै, मधुकर, बिरहिनि और सुहाव? सूरदास मीन को जल बिनु नाहिंन और उपाव

hamako hari kī kathā sunāva| apanī jñānakathā ho, ūdho! mathurā hī lai jāva|| nāgari nāri bhale būjhaiṃgī apane vacana subhāva| pā lāgoṃ, ina bātani, re ali! unahīṃ jāya rijhāva|| suni, priyasakhā syāmasandara ke jo pai jiya sati bhāva| harimukha ati ārata ina nayanani bāraka bahuri dikhāva|| jo kou koṭi jatana karai, madhukara, birahini aura suhāva? sūradāsa mīna ko jala binu nāhiṃna aura upāva

अलि हो! कैसे कहौं हरि के रूप-रसहि? मेरे तन में भेद बहुत बिधि रसना न जानै नयन की दसहि॥ जिन देखे ते आहिं बचन बिनु, जिन्हैं बचन दरसन न तिसहि। बिन बानी भरि उमगि प्रेमजल सुमिरि वा सगुन-जसहि॥ चार बार पछितात यहै मन कहा करै जो बिधि न बसहि। सूरदास अँगन की यह गति को समुझावै पाछपद पसुहि?*

ali ho! kaise kahauṃ hari ke rūpa-rasahi? mere tana meṃ bheda bahuta bidhi rasanā na jānai nayana kī dasahi|| jina dekhe te āhiṃ bacana binu, jinhaiṃ bacana darasana na tisahi| bina bānī bhari umagi premajala sumiri vā saguna-jasahi|| cāra bāra pachitāta yahai mana kahā karai jo bidhi na basahi| sūradāsa a~gana kī yaha gati ko samujhāvai pāchapada pasuhi?*

हमारे हरि हारिल की लकरी। मन बच क्रम नँदनँदन सों उर यह दृढ़ करि पकरी॥ जागत सोवत, सपने सौंतुख कान्ह कान्ह जक री। सुनतहि जोग लगत ऐसो अलि! ज्यों करुई ककरी॥ सोई ब्याधि हमैं लै आए देखी सुनी न करी। यह तौ सूर तिन्हैं लै दीजै जिनके मन चकरी

hamāre hari hārila kī lakarī| mana baca krama na~dana~dana soṃ ura yaha dṛr̤ha kari pakarī|| jāgata sovata, sapane sauṃtukha kānha kānha jaka rī| sunatahi joga lagata aiso ali! jyoṃ karuī kakarī|| soī byādhi hamaiṃ lai āe dekhī sunī na karī| yaha tau sūra tinhaiṃ lai dījai jinake mana cakarī

फिरि फिरि कहा सिखावत मौन? दुसह बचन अलि यों लागत उर ज्यों जारे पर लौन॥ सिंगी, भस्म, त्वचामृग, मुद्रा, अरु अवरोधन पौन। हम अबला अहीर, सठ मधुकर! घर बन जानै कौन॥ यह मत लै तिनहीं उपदेसौ जिन्हैं आजु सब सोहत। सूर आज लौं सुनी न देखी पोत सूतरी पोहत

phiri phiri kahā sikhāvata mauna? dusaha bacana ali yoṃ lāgata ura jyoṃ jāre para launa|| siṃgī, bhasma, tvacāmṛga, mudrā, aru avarodhana pauna| hama abalā ahīra, saṭha madhukara! ghara bana jānai kauna|| yaha mata lai tinahīṃ upadesau jinhaiṃ āju saba sohata| sūra āja lauṃ sunī na dekhī pota sūtarī pohata

प्रेमरहित यह जोग कौन क़ाज गायो? दीनन सों निठुर बचन कहे कहा पायो? नयनन निज कमलनयन सुन्दर मुख हेरो। मूँदन ते नयन क़हत कौन ज्ञान तेरो? तामें कहु मधुकर! हम कहा लैन जाहीं। जामें प्रिय प्राननाथ नँदनन्दन नाहीं? जिनके तुम सखा साधु बातें कहु तिनकी। जीवैं सुनि स्यामकथा दासी हम जिनकी॥ निरगुन अबिनासी गुन आनि आनि भाखौ। सूरदास जिय के जिय कहाँ कान्ह राखौ?

premarahita yaha joga kauna qāja gāyo? dīnana soṃ niṭhura bacana kahe kahā pāyo? nayanana nija kamalanayana sundara mukha hero| mū~dana te nayana qahata kauna jñāna tero? tāmeṃ kahu madhukara! hama kahā laina jāhīṃ| jāmeṃ priya prānanātha na~danandana nāhīṃ? jinake tuma sakhā sādhu bāteṃ kahu tinakī| jīvaiṃ suni syāmakathā dāsī hama jinakī|| niraguna abināsī guna āni āni bhākhau| sūradāsa jiya ke jiya kahā~ kānha rākhau?

जनि चालौ, अलि, बात पराई। ना कोउ कहै सुनै या ब्रज में नइ कीरति सब जाति हिराई॥ बूझैं समाचार मुख ऊधो कुल की सब आरति बिसराई। भले संग बसि भई भली मति, भले मेल पहिचान कराई॥ सुन्दर कथा कटुक सी लागति उपजत उर उपदेस खराई। उलटो न्याव सूर के प्रभु को बहे जात माँगत उतराई

jani cālau, ali, bāta parāī| nā kou kahai sunai yā braja meṃ nai kīrati saba jāti hirāī|| būjhaiṃ samācāra mukha ūdho kula kī saba ārati bisarāī| bhale saṃga basi bhaī bhalī mati, bhale mela pahicāna karāī|| sundara kathā kaṭuka sī lāgati upajata ura upadesa kharāī| ulaṭo nyāva sūra ke prabhu ko bahe jāta mā~gata utarāī

याकी सीख सुनै ब्रज को, रे? जाकी रहनि कहनि अनमिल, अलि, कहत समुझि अति थोरे॥ आपुन पद-मकरंद-सुधारस हृदय रहत नित बोरे। हमसों कहत बिरस समझौ, है गगन कूप खनि खोरे। धान को गाँव पयार तें जानौ ज्ञान बिषयरस भोरे। सूर सो बहुत कहे न रहै रस गूलर को फल फोरे

yākī sīkha sunai braja ko, re? jākī rahani kahani anamila, ali, kahata samujhi ati thore|| āpuna pada-makaraṃda-sudhārasa hṛdaya rahata nita bore| hamasoṃ kahata birasa samajhau, hai gagana kūpa khani khore| dhāna ko gā~va payāra teṃ jānau jñāna biṣayarasa bhore| sūra so bahuta kahe na rahai rasa gūlara ko phala phore

निरखत अंक स्यामसुन्दर के बारबार लावति छाती। लोचन-जल कागद-मसि मिलि कै ह्वै गइ स्याम स्याम की पाती॥ गोकुल बसत संग गिरिधर के कबहुं बयारि लगी नहिं ताती। तब की कथा कहा कहौं, ऊधो, जब हम बेनुनाद सुनि जाती॥ हरि के लाड़ गनति नहिं काहू निसिदिन सुदिन रासरसमाती। प्राननाथ तुम कब धौं मिलौगे सूरदास प्रभु बालसँघाती

nirakhata aṃka syāmasundara ke bārabāra lāvati chātī| locana-jala kāgada-masi mili kai hvai gai syāma syāma kī pātī|| gokula basata saṃga giridhara ke kabahuṃ bayāri lagī nahiṃ tātī| taba kī kathā kahā kahauṃ, ūdho, jaba hama benunāda suni jātī|| hari ke lār̤a ganati nahiṃ kāhū nisidina sudina rāsarasamātī| prānanātha tuma kaba dhauṃ milauge sūradāsa prabhu bālasa~ghātī

मोहिं अलि दुहूं भाँति फल होत। तब रस-अधर लेति मुरली, अब भई कूबरी सौत॥ तुम जो जोगमत सिखवन आए भस्म चढ़ावन अँग। इन बिरहिन में कहुँ कोउ देखी सुमन गुहाये मंग? कानन मुद्रा पहिरि मेखली धरे जटा आधारी। यहाँ तरल तरिवन कहँ देखे अरु तनसुख की सारी॥ परम बियोगिनि रटति रैन दिन धरि मनमोहन-ध्यान। तुम तो चलो वेगि मधुबन को जहाँ जोग को ज्ञान॥ निसिदिन जीजतु है या ब्रज में देखि मनोहर रूप। सूर जोग लै घर घर डोलौ, लेहु लेहु धरि सूप

mohiṃ ali duhūṃ bhā~ti phala hota| taba rasa-adhara leti muralī, aba bhaī kūbarī sauta|| tuma jo jogamata sikhavana āe bhasma car̤hāvana a~ga| ina birahina meṃ kahu~ kou dekhī sumana guhāye maṃga? kānana mudrā pahiri mekhalī dhare jaṭā ādhārī| yahā~ tarala tarivana kaha~ dekhe aru tanasukha kī sārī|| parama biyogini raṭati raina dina dhari manamohana-dhyāna| tuma to calo vegi madhubana ko jahā~ joga ko jñāna|| nisidina jījatu hai yā braja meṃ dekhi manohara rūpa| sūra joga lai ghara ghara ḍolau, lehu lehu dhari sūpa

बिलग जनि मानौ हमरी बात। डरपति बचन कठोर कहति, मति बिनु पति यों उठि जात। जो कोउ कहत जरे अपने कछु फिरि पाछे पछितात। जो प्रसाद पावत तुम ऊधो कृस्न नाम लै खात॥ मन जु तिहारो हरिचरनन तर अचल रहत दिनरात। 'सूर स्याम तें जोग अधिक' केहि कहि आवत यह बात?

bilaga jani mānau hamarī bāta| ḍarapati bacana kaṭhora kahati, mati binu pati yoṃ uṭhi jāta| jo kou kahata jare apane kachu phiri pāche pachitāta| jo prasāda pāvata tuma ūdho kṛsna nāma lai khāta|| mana ju tihāro haricaranana tara acala rahata dinarāta| 'sūra syāma teṃ joga adhika' kehi kahi āvata yaha bāta?

अपनी सी कठिन करत मन निसिदिन। कहि कहि कथा, मधुप, समुझावति तदपि न रहत नंदनंदन बिन॥ बरजत श्रवन सँदेस, नयन जल, मुख बतियाँ कछु और चलावत। बहुत भाँति चित धरत निठुरता सब तजि और यहै जिय आवत॥ कोटि स्वर्ग सम सुख अनुमानत हरि-समीप-समता नहिं पावत। थकित सिंधु-नौका के खग ज्यों फिरि फिरि फेरि वहै गुन गावत॥ जे बासना न बिदरत अंतर तेइ तेइ अधिक अनूअर दाहत। सूरदास परिहरि न सकत तन बारक बहुरि मिल्यो है चाहत

apanī sī kaṭhina karata mana nisidina| kahi kahi kathā, madhupa, samujhāvati tadapi na rahata naṃdanaṃdana bina|| barajata śravana sa~desa, nayana jala, mukha batiyā~ kachu aura calāvata| bahuta bhā~ti cita dharata niṭhuratā saba taji aura yahai jiya āvata|| koṭi svarga sama sukha anumānata hari-samīpa-samatā nahiṃ pāvata| thakita siṃdhu-naukā ke khaga jyoṃ phiri phiri pheri vahai guna gāvata|| je bāsanā na bidarata aṃtara tei tei adhika anūara dāhata| sūradāsa parihari na sakata tana bāraka bahuri milyo hai cāhata