Padas 256–270

मधुकर! होहु यहाँ तें न्यारे। तुम देखत तन अधिक तपत है अरु नयनन के तारे॥ अपनो जोग सैंति धरि राखौ, यहाँ लेत को, डारे? तोरे हित अपने मुख करिहैं मीठे तें नहिं खारे॥ हमरे गिरिवरधर के नाम गुन बसे कान्ह उर बारे। सूरदास हम सबै एकमत, तुम सब खोटे कारे

madhukara! hohu yahā~ teṃ nyāre| tuma dekhata tana adhika tapata hai aru nayanana ke tāre|| apano joga saiṃti dhari rākhau, yahā~ leta ko, ḍāre? tore hita apane mukha karihaiṃ mīṭhe teṃ nahiṃ khāre|| hamare girivaradhara ke nāma guna base kānha ura bāre| sūradāsa hama sabai ekamata, tuma saba khoṭe kāre

मधुप! बिराने लोग बटाऊँ। दिन दस रहत काज अपने को तजि गए फिरे न काऊ॥ प्रथम सिद्धि पठई हरि हमको, आयौ ज्ञान अगाऊ। हमको जोग, भोग कुब्जा को, वाको यहै सुभाऊ॥ कीजै कहा नंदनन्दन को जिनके है सतभाऊ। सूरदास प्रभु तन मन अरप्यो प्रान रहैं कै जाऊ

madhupa! birāne loga baṭāū~| dina dasa rahata kāja apane ko taji gae phire na kāū|| prathama siddhi paṭhaī hari hamako, āyau jñāna agāū| hamako joga, bhoga kubjā ko, vāko yahai subhāū|| kījai kahā naṃdanandana ko jinake hai satabhāū| sūradāsa prabhu tana mana arapyo prāna rahaiṃ kai jāū

मधुकर! महाप्रबीन सयाने। जानत तीन लोक की बातैं अबलन काज अयाने॥ जे कच कनक-कचोरा भरि भरि मेलत तेल फुलेल। तिन केसन को भस्म बतावत, टेसू कैसो खेल॥ जिन केसन कबरी गहि सुन्दर अपने हाथ बनाई॥ तिनको जटा धरन को, ऊधो कैसे कै कहि आई? जिन स्रबनन ताटंक, खुभी अरु करनफूल खुटिलाऊ। तिन स्रबनन कसमीरी मुद्रा लटकन, चीर झलाऊ॥ भाल तिलक, काजर चख, नाला नकबेसरि, नथ फूली। ते सब तजि हमरे मेलन को उज्वल भस्मी खूली॥ कंठ सुमाल हार मनि, मुक्ता, हीरा, रतन अपार। ताही कंठ बाँधिबे के हित सिंगी जोगसिंगार॥ जिहि मुख मीत सुभाखत गावत करत परस्पर हास। ता मुख मौन गहे क्यों जीवैं, घूटैं ऊरध स्वास? कंचुकि छीन, उबटि घसि चन्दन, सारी सारस चन्द। अब कँथा एकै अति गूदर क्यों पहिरैं, मतिमन्द? ऊधो, उठो सबै पा लागैं, देख्यो ज्ञान तुम्हारो। सूरदास मुख बहुरि देखिहैं जीजौ कान्ह हमारो

madhukara! mahāprabīna sayāne| jānata tīna loka kī bātaiṃ abalana kāja ayāne|| je kaca kanaka-kacorā bhari bhari melata tela phulela| tina kesana ko bhasma batāvata, ṭesū kaiso khela|| jina kesana kabarī gahi sundara apane hātha banāī|| tinako jaṭā dharana ko, ūdho kaise kai kahi āī? jina srabanana tāṭaṃka, khubhī aru karanaphūla khuṭilāū| tina srabanana kasamīrī mudrā laṭakana, cīra jhalāū|| bhāla tilaka, kājara cakha, nālā nakabesari, natha phūlī| te saba taji hamare melana ko ujvala bhasmī khūlī|| kaṃṭha sumāla hāra mani, muktā, hīrā, ratana apāra| tāhī kaṃṭha bā~dhibe ke hita siṃgī jogasiṃgāra|| jihi mukha mīta subhākhata gāvata karata paraspara hāsa| tā mukha mauna gahe kyoṃ jīvaiṃ, ghūṭaiṃ ūradha svāsa? kaṃcuki chīna, ubaṭi ghasi candana, sārī sārasa canda| aba ka~thā ekai ati gūdara kyoṃ pahiraiṃ, matimanda? ūdho, uṭho sabai pā lāgaiṃ, dekhyo jñāna tumhāro| sūradāsa mukha bahuri dekhihaiṃ jījau kānha hamāro

मधुकर! कौन देस तें आए? जब तें क्रूर गयो लै मोहन तब तें भेद न पाए॥ जाने सखा साधु हरिजू के अवधि बदन को आए। अब या भाग, नन्दनन्दन को या स्वामित को पाए॥ आसन, ध्यान, वायु-अवरोधन, अलि, तन मन अति भाए। है बिचित्र अति, गुनत सुलच्छन गुनी जोगमत गाए॥ मुद्रा, सिंगी, भस्म, त्वचा मृग, ब्रजजुवती-तन ताए। अतसी कुसुमबरन मुख मुरली सूर स्याम किन लाए?

madhukara! kauna desa teṃ āe? jaba teṃ krūra gayo lai mohana taba teṃ bheda na pāe|| jāne sakhā sādhu harijū ke avadhi badana ko āe| aba yā bhāga, nandanandana ko yā svāmita ko pāe|| āsana, dhyāna, vāyu-avarodhana, ali, tana mana ati bhāe| hai bicitra ati, gunata sulacchana gunī jogamata gāe|| mudrā, siṃgī, bhasma, tvacā mṛga, brajajuvatī-tana tāe| atasī kusumabarana mukha muralī sūra syāma kina lāe?

मधुकर! कान्ह कही नहिं होहीं। यह तौ नई सखी सिखई है निज अनुराग बरोही॥ सँचि राखी कूबरी-पीठि पै ये बातैं चकचोही। स्याम सुगाहक पाय, सखी री, छार दिखायो मोही॥ नागरमनि जे सोभा-सागर जग जुवती हँसि मोही। लियो रूप है ज्ञान ठगौरी, भलो ठग्यो ठग वोही। है निर्गुन सरवरि कुबरी अब घटी करी हम जोही॥ सूर सो नागरि जोग दीन जिन तिनहिं आज सब सोही

madhukara! kānha kahī nahiṃ hohīṃ| yaha tau naī sakhī sikhaī hai nija anurāga barohī|| sa~ci rākhī kūbarī-pīṭhi pai ye bātaiṃ cakacohī| syāma sugāhaka pāya, sakhī rī, chāra dikhāyo mohī|| nāgaramani je sobhā-sāgara jaga juvatī ha~si mohī| liyo rūpa hai jñāna ṭhagaurī, bhalo ṭhagyo ṭhaga vohī| hai nirguna saravari kubarī aba ghaṭī karī hama johī|| sūra so nāgari joga dīna jina tinahiṃ āja saba sohī

मधुकर! अब धौं कहा कर्यो चाहत? ये सब भईं चित्र की पुतरी सून्य सरीरहिं दाहत॥ हमसों तोसों बैर कहा, अलि, स्याम अजान ज्यों राहत। झारि झूरि मन तो हरि लै गए बहुरि पयारहि गाहत॥ अब तौ तोहिं मरुत को गहिबो कह स्रम करि तू लैहै? सूर कोट-मध्य तू ह्वै रह, अपनो कियो तू पैहै

madhukara! aba dhauṃ kahā karyo cāhata? ye saba bhaīṃ citra kī putarī sūnya sarīrahiṃ dāhata|| hamasoṃ tosoṃ baira kahā, ali, syāma ajāna jyoṃ rāhata| jhāri jhūri mana to hari lai gae bahuri payārahi gāhata|| aba tau tohiṃ maruta ko gahibo kaha srama kari tū laihai? sūra koṭa-madhya tū hvai raha, apano kiyo tū paihai

मधुकर! आवत यहै परेखो। जब बारे तब आस बड़े की, बड़े भए सो देखो! जोग-जज्ञ, तप, दान, नेम-ब्रत करत रहे पितु-मात। क्यों हूँ सुत जो बढ्यो कुसल सों, कठिन मोह की बात॥ करनी प्रगट प्रीति पिक-कीरति अपने काज लौं भीर। काज सर्यो दुख गयो कहाँ धौं, कहँ बायस को बीर॥ जहँ जहँ रहौ राज करौ तहँ तहँ लेव कोटि सिर भार। यह असीस हम देति सूर सुनु न्हात खसै जनि बार

madhukara! āvata yahai parekho| jaba bāre taba āsa bar̤e kī, bar̤e bhae so dekho! joga-jajña, tapa, dāna, nema-brata karata rahe pitu-māta| kyoṃ hū~ suta jo baḍhyo kusala soṃ, kaṭhina moha kī bāta|| karanī pragaṭa prīti pika-kīrati apane kāja lauṃ bhīra| kāja saryo dukha gayo kahā~ dhauṃ, kaha~ bāyasa ko bīra|| jaha~ jaha~ rahau rāja karau taha~ taha~ leva koṭi sira bhāra| yaha asīsa hama deti sūra sunu nhāta khasai jani bāra

मधुकर! प्रीति किए पछितानी। हम जानी ऐसी निबहैगी उन कछु औरै ठानी॥ कारे तन को कौन पत्यानो? बोलत मधुरी बानी। हमको लिखि लिखि जोग पठावत आपु करत रजधानी। सूनी सेज स्याम बिनु मोको तलफत रैनि बिहानी। सूर स्याम प्रभु मिलिकै बिछुरे तातें मति जु हिरानी

madhukara! prīti kie pachitānī| hama jānī aisī nibahaigī una kachu aurai ṭhānī|| kāre tana ko kauna patyāno? bolata madhurī bānī| hamako likhi likhi joga paṭhāvata āpu karata rajadhānī| sūnī seja syāma binu moko talaphata raini bihānī| sūra syāma prabhu milikai bichure tāteṃ mati ju hirānī

मधुकर की संगति तें जनियत बंस अपन चितयो। बिन समझे कह चहति सुन्दरी सोई मुख-कमल गह्यो॥ ब्याधनाद कह जानै हरिनी करसायल की नारि? आलापहु, गावहु, कै नाचहु दावँ परे लै मारि॥ जुआ कियो ब्रजमंडल यह हरि जीति अबिधि सों खेलि। हाथ परी सो गही चपल तिय, रखी सदन में हेलि॥ ऊनो कर्म कियो मातुल बधि मदिरा-मत्त प्रमाद। सूर स्याम एते औगुन में निर्गुन तें अति स्वाद

madhukara kī saṃgati teṃ janiyata baṃsa apana citayo| bina samajhe kaha cahati sundarī soī mukha-kamala gahyo|| byādhanāda kaha jānai harinī karasāyala kī nāri? ālāpahu, gāvahu, kai nācahu dāva~ pare lai māri|| juā kiyo brajamaṃḍala yaha hari jīti abidhi soṃ kheli| hātha parī so gahī capala tiya, rakhī sadana meṃ heli|| ūno karma kiyo mātula badhi madirā-matta pramāda| sūra syāma ete auguna meṃ nirguna teṃ ati svāda

मधुकर! चलु आगे तें दूर। जोग सिखावन को हमैं आयो बड़ो निपट तू क्रूर॥ जा घट रहत स्यामघन सुन्दर सदा निरन्तर पूर। ताहि छाँड़ि क्यों सून्य अराधैं, खोवैं अपनो मूर? ब्रज में सब गोपाल-उपासी, कोउ न लगावै धूर। अपनो नेम सदा जो निबाहै सोई कहावै सूर

madhukara! calu āge teṃ dūra| joga sikhāvana ko hamaiṃ āyo bar̤o nipaṭa tū krūra|| jā ghaṭa rahata syāmaghana sundara sadā nirantara pūra| tāhi chā~r̤i kyoṃ sūnya arādhaiṃ, khovaiṃ apano mūra? braja meṃ saba gopāla-upāsī, kou na lagāvai dhūra| apano nema sadā jo nibāhai soī kahāvai sūra

मधुकर! सुनहु लोचन-बात। बहुत रोके अंग सब पै नयन उड़ि उड़ि जात॥ ज्यों कपोत बियोग-आतुर भ्रमत है तजि धाम। जात दृग त्यों, फिरि न आवत बिना दरसे स्याम॥ रहे मूँदि कपाट पल दोउ, भए घूँघट-ओट। स्वास कढ़ि तौ जात तितही निकसि मन्मथ फोट॥ स्रवन सुनि जस रहत हरि को, मन रहत धरि ध्यान। रहत रसना नाम रटि, पै इनहिं दरसन हान॥ करत देह बिभाग भोगहिं, जो कछू सब लेत। सूर दरसन हीं बिना यह पलक चैन न देत

madhukara! sunahu locana-bāta| bahuta roke aṃga saba pai nayana ur̤i ur̤i jāta|| jyoṃ kapota biyoga-ātura bhramata hai taji dhāma| jāta dṛga tyoṃ, phiri na āvata binā darase syāma|| rahe mū~di kapāṭa pala dou, bhae ghū~ghaṭa-oṭa| svāsa kar̤hi tau jāta titahī nikasi manmatha phoṭa|| sravana suni jasa rahata hari ko, mana rahata dhari dhyāna| rahata rasanā nāma raṭi, pai inahiṃ darasana hāna|| karata deha bibhāga bhogahiṃ, jo kachū saba leta| sūra darasana hīṃ binā yaha palaka caina na deta

मधुकर! जो हरि कही करैं। राजकाज चित दयो साँवरे, गोकुल क्यों बिसरैं? जब लौं घोष रहे हम तब लौं संतत सेवा कीन्ही? बारक कहे उलूखल बाँधे, वहै कान्ह जिय लीन्ही॥ जौ पै कोटि करैं ब्रजनायक बहुतै राजकुमारी। तौ ये नंद पिता कहँ मिलिहैं अरु जसुमति महतारी? गोबर्द्धन कहँ गोपबृन्द सब, कहँ गोरस सद पैहो? सूरदास अब सोई करिए बहुरि हरिहि लै ऐहो

madhukara! jo hari kahī karaiṃ| rājakāja cita dayo sā~vare, gokula kyoṃ bisaraiṃ? jaba lauṃ ghoṣa rahe hama taba lauṃ saṃtata sevā kīnhī? bāraka kahe ulūkhala bā~dhe, vahai kānha jiya līnhī|| jau pai koṭi karaiṃ brajanāyaka bahutai rājakumārī| tau ye naṃda pitā kaha~ milihaiṃ aru jasumati mahatārī? gobarddhana kaha~ gopabṛnda saba, kaha~ gorasa sada paiho? sūradāsa aba soī karie bahuri harihi lai aiho

मधुकर! भल आए बलवीर। दुर्लभ दरसन सुलभ पाए जान क्यों परपीर? कहत बचन, बिचारि बिनवहिं सोधियों उन पाहिं। प्रानपति की प्रीति, ऊधो! है कि हम सों नाहिं? कौन तुम सों कहैं, मधुकर! कहन जोगै नाहिं। प्रीति की कछु रीति न्यारी जानिहौ मन माहिं। नयन नींद न परै निसिदिन बिरह बाढ्यो देह। कठिन निर्दय नंद के सुत जोरि तोर्यो नेह॥ कहा तुम सों कहैं, षटपद! हृदय गुप्त कि बात। सूर के प्रभु क्यों बनैं जो करैं अबला घात?

madhukara! bhala āe balavīra| durlabha darasana sulabha pāe jāna kyoṃ parapīra? kahata bacana, bicāri binavahiṃ sodhiyoṃ una pāhiṃ| prānapati kī prīti, ūdho! hai ki hama soṃ nāhiṃ? kauna tuma soṃ kahaiṃ, madhukara! kahana jogai nāhiṃ| prīti kī kachu rīti nyārī jānihau mana māhiṃ| nayana nīṃda na parai nisidina biraha bāḍhyo deha| kaṭhina nirdaya naṃda ke suta jori toryo neha|| kahā tuma soṃ kahaiṃ, ṣaṭapada! hṛdaya gupta ki bāta| sūra ke prabhu kyoṃ banaiṃ jo karaiṃ abalā ghāta?

मधुकर! यह कारे की रीति। मन दै हरत परायो सर्बस करै कपट की प्रीति। ज्यों षटपद अम्बुज के दल में बसत निसा रति मानी। दिनकर उए अनत उड़ि बैठैं फिर न करत पहिचानि॥ भवन भुजंग पिटारे पाल्यो ज्यों जननी जनि तात। कुल-करतूति जाति नहिं कबहूं सहज सो डसि भजि जात॥ कोकिल काग कुरंग स्याम की छन छन सुरति करावत। सूरदास, प्रभु को मुख देख्यो निसदिन ही मोहिं भावत

madhukara! yaha kāre kī rīti| mana dai harata parāyo sarbasa karai kapaṭa kī prīti| jyoṃ ṣaṭapada ambuja ke dala meṃ basata nisā rati mānī| dinakara ue anata ur̤i baiṭhaiṃ phira na karata pahicāni|| bhavana bhujaṃga piṭāre pālyo jyoṃ jananī jani tāta| kula-karatūti jāti nahiṃ kabahūṃ sahaja so ḍasi bhaji jāta|| kokila kāga kuraṃga syāma kī chana chana surati karāvata| sūradāsa, prabhu ko mukha dekhyo nisadina hī mohiṃ bhāvata

मधुप! तुम कहा यहै गुन गावहु। यह प्रिय कथा नगर-नारिन सों कहौं जहाँ कछु पावहु। जानत मरम नंदनंदन को, और प्रसंग चलावहु। हम नाहीं कमलिनि-सी भोरी करि चतुरई मनावहु॥ जनि परसौं अलि! चरन हमारे बिरह-ताप उपजावहु। हम नाहीं कुबिजा-सी भोरी, करि चातुरी दिखावहु॥ अति बिचित्र लरिका की नाईं गुरु दिखाय बहरावहु। सूरदास प्रभु नागरमनि सों कोउ बिधि आनि मिलाबहु

madhupa! tuma kahā yahai guna gāvahu| yaha priya kathā nagara-nārina soṃ kahauṃ jahā~ kachu pāvahu| jānata marama naṃdanaṃdana ko, aura prasaṃga calāvahu| hama nāhīṃ kamalini-sī bhorī kari caturaī manāvahu|| jani parasauṃ ali! carana hamāre biraha-tāpa upajāvahu| hama nāhīṃ kubijā-sī bhorī, kari cāturī dikhāvahu|| ati bicitra larikā kī nāīṃ guru dikhāya baharāvahu| sūradāsa prabhu nāgaramani soṃ kou bidhi āni milābahu