Sujān-Rasakhān · 241–256

ए सजनी जब तें मैं सुनी मथुरा नगरी बरषा रितु आई। लै रसखान सनेह की ताननि कोकिल मोर मलार मचाई। साँझ तें भोर लौं भोर तें साँझ लौं गोपिन चातक ज्‍यौं रट लाई। एरी सखी कहिये तो कहाँ लगि बैर अहीर ने पीर न पाई

e sajanī jaba teṃ maiṃ sunī mathurā nagarī baraṣā ritu āī| lai rasakhāna saneha kī tānani kokila mora malāra macāī| sā~jha teṃ bhora lauṃ bhora teṃ sā~jha lauṃ gopina cātaka jyauṃ raṭa lāī| erī sakhī kahiye to kahā~ lagi baira ahīra ne pīra na pāī

मग हेरत धू धरे नैन भए रसना रट वा गुन गावन की। अंगुरी-गनि हार थकी सजनी सगुनौती चलै नहि पावन की। पथिकौ कोऊ ऐसाजु नाहिं कहै सुधि है रसखान के आवन की। मनभावन आवन सावन में कहीं औधि करी डग बावन की

maga herata dhū dhare naina bhae rasanā raṭa vā guna gāvana kī| aṃgurī-gani hāra thakī sajanī sagunautī calai nahi pāvana kī| pathikau koū aisāju nāhiṃ kahai sudhi hai rasakhāna ke āvana kī| manabhāvana āvana sāvana meṃ kahīṃ audhi karī ḍaga bāvana kī

वा रसखानि गुनौं सुनि के हियरा अत टूक ह्वै फाटि गयौ है। जानति हैं न कछू हम ह्याँ उनवाँ पढ़ि मंत्र कहा धौं दयौ है। साँची कहैं जिय मैं निज जानि कै जानति हैं जस जैसो लयौ है। लोग लुगाई सबै ब्रज माँहि कहैं हरि चेरी को चेरो भयो है

vā rasakhāni gunauṃ suni ke hiyarā ata ṭūka hvai phāṭi gayau hai| jānati haiṃ na kachū hama hyā~ unavā~ par̤hi maṃtra kahā dhauṃ dayau hai| sā~cī kahaiṃ jiya maiṃ nija jāni kai jānati haiṃ jasa jaiso layau hai| loga lugāī sabai braja mā~hi kahaiṃ hari cerī ko cero bhayo hai

जानै कहा हम मूढ़ सवै समझीन तबै जबहीं बनि आई। सोचत हैं मन ही मन मैं अब कीजै कस बनियाँ जुगँवाई। नीचो भयौ ब्रज को सब सीस मलीन भई रसखानि दुहाई। चेरी को चेटक देखहु ही हाई चेरो कियौ धौं कहा पढ़ि माई

jānai kahā hama mūr̤ha savai samajhīna tabai jabahīṃ bani āī| socata haiṃ mana hī mana maiṃ aba kījai kasa baniyā~ juga~vāī| nīco bhayau braja ko saba sīsa malīna bhaī rasakhāni duhāī| cerī ko ceṭaka dekhahu hī hāī cero kiyau dhauṃ kahā par̤hi māī

काइ सौं माई वह करियै सहियै सोई जो रसखान सहावैं। नेय कहा जब और कियौं तब नाचियै सोई जौ नचावैं। चाहत है हम और कहा सखि क्‍यों हू कहू पिय देखन पावैं। चरियै सौं जगुपाल रच्‍यौ तौं भली ही सबै मिलि चेरी कहावें

kāi sauṃ māī vaha kariyai sahiyai soī jo rasakhāna sahāvaiṃ| neya kahā jaba aura kiyauṃ taba nāciyai soī jau nacāvaiṃ| cāhata hai hama aura kahā sakhi kyoṃ hū kahū piya dekhana pāvaiṃ| cariyai sauṃ jagupāla racyau tauṃ bhalī hī sabai mili cerī kahāveṃ

भेती जू पें कुबरी ह्याँ सखी भरी लातन मूका बकोटती लेती। लेती निकारि हिये की सबै नक छेदि कौड़ी पिराइ कै देती। देती नचाइ कै नाच वा राँड कौं लाल रिझावन को फल सेती। सेती सदाँ रसखानि लियें कुबरी के करेजनि सूलसी भेती

bhetī jū peṃ kubarī hyā~ sakhī bharī lātana mūkā bakoṭatī letī| letī nikāri hiye kī sabai naka chedi kaur̤ī pirāi kai detī| detī nacāi kai nāca vā rā~ḍa kauṃ lāla rijhāvana ko phala setī| setī sadā~ rasakhāni liyeṃ kubarī ke karejani sūlasī bhetī

कंस के क्रोध की फैलि रही सिगरे ब्रजमंडल माँझ फुकार सी। आइ गए कछनी कछिकै तबहीं नट-नागरे नंद कुमार-सी। द्वैरद को रद खैंचि लियौ रसखान हिये माहि लाई विमार-सी। लीनी कुठौर लगी लखि तोरि कलंक तमाल तें कीरति-डार सी

kaṃsa ke krodha kī phaili rahī sigare brajamaṃḍala mā~jha phukāra sī| āi gae kachanī kachikai tabahīṃ naṭa-nāgare naṃda kumāra-sī| dvairada ko rada khaiṃci liyau rasakhāna hiye māhi lāī vimāra-sī| līnī kuṭhaura lagī lakhi tori kalaṃka tamāla teṃ kīrati-ḍāra sī

जोग सिखावत आवत है वह कौन कहावत को है कहाँ को। जानति हैं बर नागर है पर नेकहु भेद लख्‍यौ नहिं ह्याँ को। जानति ना हम और कछू मुख देखि जियै नित नंदलला को। जात नहीं रसखानि हमैं तजि राखनहारी है मोरपखा को

joga sikhāvata āvata hai vaha kauna kahāvata ko hai kahā~ ko| jānati haiṃ bara nāgara hai para nekahu bheda lakhyau nahiṃ hyā~ ko| jānati nā hama aura kachū mukha dekhi jiyai nita naṃdalalā ko| jāta nahīṃ rasakhāni hamaiṃ taji rākhanahārī hai morapakhā ko

अंजन मंजन त्‍यागौ अली अंग धारि भभूत करौ अनुरागै। आपुन भाग कर्यौ सजनी इन बावरे ऊधो जू को कहाँ लागै। चाहै सो और सबै करियै जू कहै रसखान सयानप आगै। जो मन मोहन ऐसी बसी तो सबै री कहौ मुय गोरस जागै

aṃjana maṃjana tyāgau alī aṃga dhāri bhabhūta karau anurāgai| āpuna bhāga karyau sajanī ina bāvare ūdho jū ko kahā~ lāgai| cāhai so aura sabai kariyai jū kahai rasakhāna sayānapa āgai| jo mana mohana aisī basī to sabai rī kahau muya gorasa jāgai

लाज के लेप चढ़ाइ कै अंग पची सब सीख को मंत्र सुनाइ कै। गारुड़ ह्वै ब्रज लोग भक्‍यौ करि औषद बेसक सौहैं दिखाइ कै। ऊधौ सौं रसखानि कहै लिन चित्‍त धरौ तुम एते उधाइ कै। कारे बिसारे को चाहैं उतर्यौ अरे बिख बाबरे राख लगाइ कैं

lāja ke lepa car̤hāi kai aṃga pacī saba sīkha ko maṃtra sunāi kai| gārur̤a hvai braja loga bhakyau kari auṣada besaka sauhaiṃ dikhāi kai| ūdhau sauṃ rasakhāni kahai lina citta dharau tuma ete udhāi kai| kāre bisāre ko cāhaiṃ utaryau are bikha bābare rākha lagāi kaiṃ

सार की सारी सो पारीं लगै धरिबे कहै सीस बघंबर पैया। हाँसी सो दासी सिखाई लई है बेई जु बेई रसखानि कन्‍हैया। जोग गयौ कुबजा की कलानि मैं री कब ऐहै जसोमति मैया। हाहा न ऊधौ कुढ़ाऔ हमें अब हीं कहि दै ब्रज बाजे बधैया

sāra kī sārī so pārīṃ lagai dharibe kahai sīsa baghaṃbara paiyā| hā~sī so dāsī sikhāī laī hai beī ju beī rasakhāni kanhaiyā| joga gayau kubajā kī kalāni maiṃ rī kaba aihai jasomati maiyā| hāhā na ūdhau kur̤hāau hameṃ aba hīṃ kahi dai braja bāje badhaiyā

या लकुटी अरु कामरिया पर राज तिहुँ परु को तजि डारौं। आठहु सिद्ध निवौ निधि को सुख नंद की गाइ चराइ बिसारौं। ए रसखानि जबैं इन नैनन ते ब्रज के बन बाग तड़ाग निहारौं। कोटिक ये कलधौत के धाम करील की कुंजन ऊपर बारौं

yā lakuṭī aru kāmariyā para rāja tihu~ paru ko taji ḍārauṃ| āṭhahu siddha nivau nidhi ko sukha naṃda kī gāi carāi bisārauṃ| e rasakhāni jabaiṃ ina nainana te braja ke bana bāga tar̤āga nihārauṃ| koṭika ye kaladhauta ke dhāma karīla kī kuṃjana ūpara bārauṃ

ग्‍वालन संग जैबो बन एबौ सु गायन संग, हेरि तान गैबो हा हा नैन कहकत हैं। ह्याँ के गज मोती माल वारौं गुंज मालन पै, कुंज सुधि आए हाय प्रान धरकत हैं। गोबर को गारौ सु तो मोहि लागै प्‍यारी कहा, भयौ मौन सोने के जटित मरकत हैं। मंदर ते ऊँचे यह मंदिर है द्वारिका के, ब्रज के खिरक मेरे हिये खरकत हैं

gvālana saṃga jaibo bana ebau su gāyana saṃga, heri tāna gaibo hā hā naina kahakata haiṃ| hyā~ ke gaja motī māla vārauṃ guṃja mālana pai, kuṃja sudhi āe hāya prāna dharakata haiṃ| gobara ko gārau su to mohi lāgai pyārī kahā, bhayau mauna sone ke jaṭita marakata haiṃ| maṃdara te ū~ce yaha maṃdira hai dvārikā ke, braja ke khiraka mere hiye kharakata haiṃ

इक ओर किरीट लसै दुसरी दिसि नागन के गन गाजत री। मुरली मधुरी धुनि आधिक ओठ पै आधिक नंद से बाजत री। रसखानि पितंबर एक कंधा पर एक वाघंबर राजत री। कोउ देखउ संगम लै बुड़की निकसे यहि मेख सों छाजत री

ika ora kirīṭa lasai dusarī disi nāgana ke gana gājata rī| muralī madhurī dhuni ādhika oṭha pai ādhika naṃda se bājata rī| rasakhāni pitaṃbara eka kaṃdhā para eka vāghaṃbara rājata rī| kou dekhau saṃgama lai bur̤akī nikase yahi mekha soṃ chājata rī

बैद की औषध खाइ कछू न करै बहु संजम री सुनि मोसें। तो जल-पान कियौ रसखानि सजीवन जानि लियौ रस तोसें। ए री सुधामई भागीरथी नित पथ्‍य अपथ्‍य बनै तोहिं पोसें। आक धतूरो चबात फिरै बिख खात फिरै सिब तेरै भरोसे

baida kī auṣadha khāi kachū na karai bahu saṃjama rī suni moseṃ| to jala-pāna kiyau rasakhāni sajīvana jāni liyau rasa toseṃ| e rī sudhāmaī bhāgīrathī nita pathya apathya banai tohiṃ poseṃ| āka dhatūro cabāta phirai bikha khāta phirai siba terai bharose

यह देखि धतूरे के पात चबात औ गात सों धूलि लगावत है। चहुँ ओर जटा अटकै लटके फनि सों कफनी फहरावत हैं। रसखानि सोई चितवै चित दै तिनके दुखदंद भजावत हैं। गज खाल की माल विसाल सो गाल बजावत आवत हैं

yaha dekhi dhatūre ke pāta cabāta au gāta soṃ dhūli lagāvata hai| cahu~ ora jaṭā aṭakai laṭake phani soṃ kaphanī phaharāvata haiṃ| rasakhāni soī citavai cita dai tinake dukhadaṃda bhajāvata haiṃ| gaja khāla kī māla visāla so gāla bajāvata āvata haiṃ