Sujān-Rasakhān · 101–120

आज महूं दधि बेचन जात ही मोहन रोकि लियौ मग आयौ। माँगत दान में आन लियौ सु कियो निलजी रस जोवन खायौ।। काह कहूँ सिगरी री बिथा रसखानि लियौ हँसि के मुसकायौ। पाले परी मैं अकेली लली, लला लाज लियो सु कियौ मनभायौ।।101।

āja mahūṃ dadhi becana jāta hī mohana roki liyau maga āyau| mā~gata dāna meṃ āna liyau su kiyo nilajī rasa jovana khāyau|| kāha kahū~ sigarī rī bithā rasakhāni liyau ha~si ke musakāyau| pāle parī maiṃ akelī lalī, lalā lāja liyo su kiyau manabhāyau||101|

पहलें दधि लैं गई गोकुल में चख चारि भए नटनागर पै। रसखानि करी उनि मैनमई कहैं दान दे दान खरे अर पै।। नख तें सिख नील निचोल पलेटे सखी सम भाँति कँपे र पै।। मनौ दामिनि सावन के घन में निकसे नहीं भीतर ही तरपै

pahaleṃ dadhi laiṃ gaī gokula meṃ cakha cāri bhae naṭanāgara pai| rasakhāni karī uni mainamaī kahaiṃ dāna de dāna khare ara pai|| nakha teṃ sikha nīla nicola paleṭe sakhī sama bhā~ti ka~pe ra pai|| manau dāmini sāvana ke ghana meṃ nikase nahīṃ bhītara hī tarapai

दानी नए भए माँगत दान सुने जु है कंस तौ बाँधे न जैहौ। रोकत हौं बन में रसखानि पसारत हाथ महा दुख पैहो। टूटें छरा बछरादिक गोधन जो धन है सु सबै पुनि रेहौ। जै है जो भूषन काहू तिया को तो मौल छलाके लला न बिकैहौ

dānī nae bhae mā~gata dāna sune ju hai kaṃsa tau bā~dhe na jaihau| rokata hauṃ bana meṃ rasakhāni pasārata hātha mahā dukha paiho| ṭūṭeṃ charā bacharādika godhana jo dhana hai su sabai puni rehau| jai hai jo bhūṣana kāhū tiyā ko to maula chalāke lalā na bikaihau

छीर जौ चाहत चीर गहैं एजू लेउ न केतिक छीर अचैहौ। चाखन के मिस माखन माँगत खाउ न माखन केतिक खैहौ। जानति हौं जिय की रसखानि सु काहे कौ एतिक बात बढ़ैहौ। गोरस के मिस जो रस चाहत सो रस कान्‍हजू नेकु न पैहौ

chīra jau cāhata cīra gahaiṃ ejū leu na ketika chīra acaihau| cākhana ke misa mākhana mā~gata khāu na mākhana ketika khaihau| jānati hauṃ jiya kī rasakhāni su kāhe kau etika bāta bar̤haihau| gorasa ke misa jo rasa cāhata so rasa kānhajū neku na paihau

लंगर छैलहि गोकुल मैं मग रोकत संग सखा ढिंग तै हैं। जाहि न ताहि दिखावत आँखि सु कौन गई अब तोसों करे हैं। हाँसीं में हार हट्यौ रसखानि जु जौं कहूँ नेकु तगा टुटि जै हैं। एकहि मोती के मोल लला सिगरे ब्रज हाटहि हाट बिकै हैं

laṃgara chailahi gokula maiṃ maga rokata saṃga sakhā ḍhiṃga tai haiṃ| jāhi na tāhi dikhāvata ā~khi su kauna gaī aba tosoṃ kare haiṃ| hā~sīṃ meṃ hāra haṭyau rasakhāni ju jauṃ kahū~ neku tagā ṭuṭi jai haiṃ| ekahi motī ke mola lalā sigare braja hāṭahi hāṭa bikai haiṃ

काहू को माखन चाखि गयौ अरु काहू को दूध दही ढरकायौ। काहू को चीर लै रूप चढ़्यौ अरु काहू को गुंजछरा छहरायौ। मानै नही बरजें रसखानि सु जानियै राज इन्‍हैं घर आयौ। आवरी बूझैं जसोमति सों यह छोहरा जायौ कि मेव मंगायौ

kāhū ko mākhana cākhi gayau aru kāhū ko dūdha dahī ḍharakāyau| kāhū ko cīra lai rūpa car̤hyau aru kāhū ko guṃjacharā chaharāyau| mānai nahī barajeṃ rasakhāni su jāniyai rāja inhaiṃ ghara āyau| āvarī būjhaiṃ jasomati soṃ yaha choharā jāyau ki meva maṃgāyau

दूध दुह्यौ सीरो पर्यौ तातो न जमायौ कर्यौ, जामन दयौ सो धर्यौ, धर्यौई खटाइगौ। आन हाथ आन पाइ सबही के तब ही तें, जब ही तें रसखानि ताननि सुनाइगौ। ज्‍यौं ही नर त्‍यौंहों नारी तैसीयै तरुन बारी, कहिये कहा री सब ब्रिज बिललाइगौ। जानियै न माली यह छोहरा जसोमति को, बाँसुरी बजाइ गौ कि विष बगराइगौ

dūdha duhyau sīro paryau tāto na jamāyau karyau, jāmana dayau so dharyau, dharyauī khaṭāigau| āna hātha āna pāi sabahī ke taba hī teṃ, jaba hī teṃ rasakhāni tānani sunāigau| jyauṃ hī nara tyauṃhoṃ nārī taisīyai taruna bārī, kahiye kahā rī saba brija bilalāigau| jāniyai na mālī yaha choharā jasomati ko, bā~surī bajāi gau ki viṣa bagarāigau

जल की न घट भरैं मग की न पग धरैं, घर की न कछु करैं बैठी भरैं साँसुरी। एकै सुनि लोट गईं एकै लोट-पोट भईं, एकनि के दृगनि निकसि आग आँसु री। कहै रसखानि सो सबै ब्रज बनिता वधि, बधिक कहाय हाय भ्‍ई कुल हाँसु री। करियै उपायै बाँस डारियै कटाय, नाहिं उपजैगौ बाँस नाहिं बाजे फेरि बाँसुरी

jala kī na ghaṭa bharaiṃ maga kī na paga dharaiṃ, ghara kī na kachu karaiṃ baiṭhī bharaiṃ sā~surī| ekai suni loṭa gaīṃ ekai loṭa-poṭa bhaīṃ, ekani ke dṛgani nikasi āga ā~su rī| kahai rasakhāni so sabai braja banitā vadhi, badhika kahāya hāya bhī kula hā~su rī| kariyai upāyai bā~sa ḍāriyai kaṭāya, nāhiṃ upajaigau bā~sa nāhiṃ bāje pheri bā~surī

चंद सों आनन मैन-मनोहर बैन मनोहर मोहत हौं मन बंक बिलोकनि लोट भई रसखानि हियो हित दाहत हौं तन। मैं तब तैं कुलकानि की मैंड़ नखी जु सखी अब डोलत हों बन। बेनु बजावत आवत है नित मेरी गली ब्रजराज को मोहन

caṃda soṃ ānana maina-manohara baina manohara mohata hauṃ mana baṃka bilokani loṭa bhaī rasakhāni hiyo hita dāhata hauṃ tana| maiṃ taba taiṃ kulakāni kī maiṃr̤a nakhī ju sakhī aba ḍolata hoṃ bana| benu bajāvata āvata hai nita merī galī brajarāja ko mohana

बाँकी बिलोकनि रंगभरी रसखानि खरी मुसकानि सुहाई। बोलत बोल अमीनिधि चैन महारस-ऐन सुनै सुखदाई।। सजनी पुर-बीथिन मैं पिय-गोहन लागी फिरैं जित ही तित धाई। बाँसुरी टेरि सुनाइ अली अपनाइ लई ब्रजराज कन्‍हाई

bā~kī bilokani raṃgabharī rasakhāni kharī musakāni suhāī| bolata bola amīnidhi caina mahārasa-aina sunai sukhadāī|| sajanī pura-bīthina maiṃ piya-gohana lāgī phiraiṃ jita hī tita dhāī| bā~surī ṭeri sunāi alī apanāi laī brajarāja kanhāī

डोरि लियौ मन मोरि लियो चित जोह लियौ हित तोरि कै कानन। कुंजनि तें निकस्‍यौ सजनी मुसकाइ कह्यो वह सुंदर आनन।। हों रसखानि भई रसमत्‍त सखी सुनि के कल बाँसुरी कानन। मत्‍त भई बन बीथिन डोलति मानति काहू की नेकु न आनन

ḍori liyau mana mori liyo cita joha liyau hita tori kai kānana| kuṃjani teṃ nikasyau sajanī musakāi kahyo vaha suṃdara ānana|| hoṃ rasakhāni bhaī rasamatta sakhī suni ke kala bā~surī kānana| matta bhaī bana bīthina ḍolati mānati kāhū kī neku na ānana

मेरो सुभाव चितैबे को माइ री लाल निहारि कै बंसी बजाई। वा दिन तें मोहि लागी ठगौरी सी लोग कहैं कोई बाबरी आई।। यौं रसखानि घिर्यौ सिगरो ब्रज जानत वे कि मेरो जियराई। जौं कोउ चाहै भलौ अपने तौ सनेह न काहू सों कीजियौ माई

mero subhāva citaibe ko māi rī lāla nihāri kai baṃsī bajāī| vā dina teṃ mohi lāgī ṭhagaurī sī loga kahaiṃ koī bābarī āī|| yauṃ rasakhāni ghiryau sigaro braja jānata ve ki mero jiyarāī| jauṃ kou cāhai bhalau apane tau saneha na kāhū soṃ kījiyau māī

मोहन की मुरली सुनिकै वह बौरि ह्वै आनि अटा चढ़ि झाँकी। गोप बड़ेन की डीठि बचाई कै डीठि सों डीठिं मिली दुहुं झांकी। देखत मोल भयौ अंखियान को को करै लाज कुटुंब पिता की। कैसे छुटाइै छुटै अंटकी रसखानि दुहुं की बिलौकनि बाँकी

mohana kī muralī sunikai vaha bauri hvai āni aṭā car̤hi jhā~kī| gopa bar̤ena kī ḍīṭhi bacāī kai ḍīṭhi soṃ ḍīṭhiṃ milī duhuṃ jhāṃkī| dekhata mola bhayau aṃkhiyāna ko ko karai lāja kuṭuṃba pitā kī| kaise chuṭāiai chuṭai aṃṭakī rasakhāni duhuṃ kī bilaukani bā~kī

बंसी बजावत आनि कढ़ौ सो गली मैं अली! कछु टोना सौ डारे। हेरि चिते, तिरछी करि दृष्टि चलौ गयौ मोहन मूठि सी मारे।। ताही घरी सों परी धरी सेज पै प्‍यारी न बोलति प्रानहूं वारे। राधिका जी है तो जी हैं सबे नतो पीहैं हलाहल नंद के द्वारे

baṃsī bajāvata āni kar̤hau so galī maiṃ alī! kachu ṭonā sau ḍāre| heri cite, tirachī kari dṛṣṭi calau gayau mohana mūṭhi sī māre|| tāhī gharī soṃ parī dharī seja pai pyārī na bolati prānahūṃ vāre| rādhikā jī hai to jī haiṃ sabe nato pīhaiṃ halāhala naṃda ke dvāre

कर काननि कुंडल मोरपखा उर पै बनमाल बिराजति है। मुरलीकर मैं अधरा मुसकानि-तरंग महा छबि छाजति है। रसखानि लखें तन पीत पटा सत दामिनि सी दुति लाजति है। वहि बाँसुरी की धुनि कान परे कुलकानि हियो तजि भाजति है

kara kānani kuṃḍala morapakhā ura pai banamāla birājati hai| muralīkara maiṃ adharā musakāni-taraṃga mahā chabi chājati hai| rasakhāni lakheṃ tana pīta paṭā sata dāmini sī duti lājati hai| vahi bā~surī kī dhuni kāna pare kulakāni hiyo taji bhājati hai

काल्हि भटू मुरली-धुनि में रसखानि लियौ कहुं नाम हमारौ। ता छिन ते भई बैरिनि सास कितौ कियौ झाँकन देति न द्वारौ। होत चवाव बलाई सों आलो जो भरि शाँखिन भेटिये प्‍यारौ। बाट परी अब री ठिठक्‍यो हियरे अटक्‍यौ पियरे पटवारौ

kālhi bhaṭū muralī-dhuni meṃ rasakhāni liyau kahuṃ nāma hamārau| tā china te bhaī bairini sāsa kitau kiyau jhā~kana deti na dvārau| hota cavāva balāī soṃ ālo jo bhari śā~khina bheṭiye pyārau| bāṭa parī aba rī ṭhiṭhakyo hiyare aṭakyau piyare paṭavārau

आज भटू इक गोपबधू भई बावरी नेकु न अंग सम्‍हारै। माई सु धाइ कै टौना सो ढूँढ़ति सास सयानी-सवानी पुकारै। यौं रसखानि घिरौ सिगरौ ब्रज आन को आन उपाय बिचारै। कोउ न कान्‍हर के कर ते वहि बैरिनि बाँसरिया गाहि जारै

āja bhaṭū ika gopabadhū bhaī bāvarī neku na aṃga samhārai| māī su dhāi kai ṭaunā so ḍhū~r̤hati sāsa sayānī-savānī pukārai| yauṃ rasakhāni ghirau sigarau braja āna ko āna upāya bicārai| kou na kānhara ke kara te vahi bairini bā~sariyā gāhi jārai

कान्ह भये बस बाँसुरी के, अब कौन सखी हमको चहिहै। निसि द्यौस रहे यह आस लगी, यह सौतिन सांसत को सहिहै। जिन मोहि लियो मनमोहन को, 'रसखानि' सु क्यों न हमैं दहिहै। मिलि आवो सबै कहुं भाग चलैं, अब तो ब्रज में बाँसुरी रहिहै

kānha bhaye basa bā~surī ke, aba kauna sakhī hamako cahihai| nisi dyausa rahe yaha āsa lagī, yaha sautina sāṃsata ko sahihai| jina mohi liyo manamohana ko, 'rasakhāni' su kyoṃ na hamaiṃ dahihai| mili āvo sabai kahuṃ bhāga calaiṃ, aba to braja meṃ bā~surī rahihai

ब्रज की बनिता सब घेरि कहैं, तेरो ढारो बिगारो कहा कस री। अरी तू हमको जम काल भई नैक कान्‍ह इही तौ कहा रस री।। रसखानि भली विधि आनि बनी बसिबो नहीं देत दिसा दस री। हम तो ब्रज को बसिबोई तजौ बस री ब्रज बेरिन तू बस री

braja kī banitā saba gheri kahaiṃ, tero ḍhāro bigāro kahā kasa rī| arī tū hamako jama kāla bhaī naika kānha ihī tau kahā rasa rī|| rasakhāni bhalī vidhi āni banī basibo nahīṃ deta disā dasa rī| hama to braja ko basiboī tajau basa rī braja berina tū basa rī

बजी है बजी रसखानि बजी सुनिकै अब गोपकुमारी न जीहै। न जीहै कोऊ जो कदाचित कामिनी कान मैं बाकी जु तान कु पी है।। कुपी है विदेस संदेस न पावति मेरी डब देह को मौन सजी है। सजी है तै मेरो कहा बस है सुतौ बैरिनि बाँसुरी फेरि बजी है

bajī hai bajī rasakhāni bajī sunikai aba gopakumārī na jīhai| na jīhai koū jo kadācita kāminī kāna maiṃ bākī ju tāna ku pī hai|| kupī hai videsa saṃdesa na pāvati merī ḍaba deha ko mauna sajī hai| sajī hai tai mero kahā basa hai sutau bairini bā~surī pheri bajī hai