Sujān-Rasakhān · 21–40

कहा रसखानि सुख संपत्ति समार कहा, कहा तन जोगी ह्वै लगाए अंग छार को। कहा साधे पंचानल, कहा सोए बीच नल, कहा जीति लाए राज सिंधु आर-पार को। जप बार-बार तप संजम वयार-व्रत, तीरथ हजार अरे बूझत लबार को। कीन्‍हौं नहीं प्‍यार नहीं सैयो दरबार, चित्‍त, चाह्यौ न निहार्यौ जौ पै नंद के कुमार को

kahā rasakhāni sukha saṃpatti samāra kahā, kahā tana jogī hvai lagāe aṃga chāra ko| kahā sādhe paṃcānala, kahā soe bīca nala, kahā jīti lāe rāja siṃdhu āra-pāra ko| japa bāra-bāra tapa saṃjama vayāra-vrata, tīratha hajāra are būjhata labāra ko| kīnhauṃ nahīṃ pyāra nahīṃ saiyo darabāra, citta, cāhyau na nihāryau jau pai naṃda ke kumāra ko

कंचन के मंदिरनि दीठि ठहराति नाहिं, सदा दीपमाल लाल-मनिक-उजारे सों। और प्रभुताई अब कहाँ लौं बखानौं प्रति - हारन की भीर भूप, टरत न द्वारे सों। गंगाजी में न्‍हाइ मुक्‍ताहलहू लुटाइ, वेद, बीस बार गाइ, ध्‍यान कीजत, सबारे सों। ऐरे ही भए तो नर कहा रसखानि जो पै, चित्‍त दै न कीनी प्रीति पीतपटवारे सों

kaṃcana ke maṃdirani dīṭhi ṭhaharāti nāhiṃ, sadā dīpamāla lāla-manika-ujāre soṃ| aura prabhutāī aba kahā~ lauṃ bakhānauṃ prati - hārana kī bhīra bhūpa, ṭarata na dvāre soṃ| gaṃgājī meṃ nhāi muktāhalahū luṭāi, veda, bīsa bāra gāi, dhyāna kījata, sabāre soṃ| aire hī bhae to nara kahā rasakhāni jo pai, citta dai na kīnī prīti pītapaṭavāre soṃ

एक सु तीरथ डोलत है इक बार हजार पुरान बके हैं। एक लगे जप में तप में इक सिद्ध समाधिन में अटके हैं। चेत जु देखत हौ रसखान सु मूढ़ महा सिगरे भटके हैं। साँचहि वे जिन आपुनपौ यह स्‍याम गुपाल पै वारि दके हैं

eka su tīratha ḍolata hai ika bāra hajāra purāna bake haiṃ| eka lage japa meṃ tapa meṃ ika siddha samādhina meṃ aṭake haiṃ| ceta ju dekhata hau rasakhāna su mūr̤ha mahā sigare bhaṭake haiṃ| sā~cahi ve jina āpunapau yaha syāma gupāla pai vāri dake haiṃ

सुनियै सब की कहिये न कछू रहियै इमि भव-बागर मैं। करियै ब्रत नेम सचाई लिये जिन तें तरियै मन-सागर मैं। मिलियै सब सों दुरभाव बिना रहिये सतसंग उजागर मैं। रसखानि गुबिंदहिं यौ भजियै जिमि नागरि को चित गागर मैं

suniyai saba kī kahiye na kachū rahiyai imi bhava-bāgara maiṃ| kariyai brata nema sacāī liye jina teṃ tariyai mana-sāgara maiṃ| miliyai saba soṃ durabhāva binā rahiye satasaṃga ujāgara maiṃ| rasakhāni gubiṃdahiṃ yau bhajiyai jimi nāgari ko cita gāgara maiṃ

है छल की अप्रतीत की मू‍रति मोद बढ़ावै विनोद कलाम में। हाथ न ऐसे कछू रसखान तू क्‍यों बहकै विष पीवत काम में। है कुच कंचन के कलसा न ये आम की गाँठ मठीक की चाम में। बैनी नहीं मृगनैनिन की ये नसैनी लगी यमराज के धाम में

hai chala kī apratīta kī mūrati moda bar̤hāvai vinoda kalāma meṃ| hātha na aise kachū rasakhāna tū kyoṃ bahakai viṣa pīvata kāma meṃ| hai kuca kaṃcana ke kalasā na ye āma kī gā~ṭha maṭhīka kī cāma meṃ| bainī nahīṃ mṛganainina kī ye nasainī lagī yamarāja ke dhāma meṃ

मोर के चंदन मौर बन्‍यौ दिन दूलह है अली नंद को नंदन। श्री वृषभानुसुता दुलही दिन जोरि बनी बिधना सुखकंदन। आवै कह्यौ न कछू रसखानि हो दोऊ बंधे छबि प्रेम के फंदन। जाहि बिलोकें सबै सुख पावत ये ब्रजजीवन है दुखदंदन

mora ke caṃdana maura banyau dina dūlaha hai alī naṃda ko naṃdana| śrī vṛṣabhānusutā dulahī dina jori banī bidhanā sukhakaṃdana| āvai kahyau na kachū rasakhāni ho doū baṃdhe chabi prema ke phaṃdana| jāhi bilokeṃ sabai sukha pāvata ye brajajīvana hai dukhadaṃdana

मोहिनी मोहन सों रसखानि अचानक भेंट भई बन माहीं। जेठ की घाम भई सुखघाम आनंद हौ अंग ही अंग समाहीं। जीवन को फल पायौ भटू रस-बातन केलि सों तोरत नाहीं। कान्‍ह को हाथ कंधा पर है मुख ऊपर मोर किरीट की छाहीं

mohinī mohana soṃ rasakhāni acānaka bheṃṭa bhaī bana māhīṃ| jeṭha kī ghāma bhaī sukhaghāma ānaṃda hau aṃga hī aṃga samāhīṃ| jīvana ko phala pāyau bhaṭū rasa-bātana keli soṃ torata nāhīṃ| kānha ko hātha kaṃdhā para hai mukha ūpara mora kirīṭa kī chāhīṃ

लाड़ली लाल लसैं लखि वै अलि कुंजनि पुंजनि मैं छबि गाढ़ी। उजरी ज्‍यों बिजुरी सी जुरी चहुं गुजरी केलि-कला सम बाढ़ी। त्‍यौ रसखानि न जानि परै सुखिया तिहुं लौकन की अति बाढ़ी। बालक लाल लिए बिहर छहरैं बर मोरमुखी सिर ठाड़ी

lār̤alī lāla lasaiṃ lakhi vai ali kuṃjani puṃjani maiṃ chabi gār̤hī| ujarī jyoṃ bijurī sī jurī cahuṃ gujarī keli-kalā sama bār̤hī| tyau rasakhāni na jāni parai sukhiyā tihuṃ laukana kī ati bār̤hī| bālaka lāla lie bihara chaharaiṃ bara moramukhī sira ṭhār̤ī

लाल की आज छटी ब्रज लोग अनंदित नंद बढ़्यौ अन्‍हवावत। चाइन चारु बधाइन लै चहुं और कुटुंब अघात न यावत। नाचत बाल बड़े रसखान छके हित काहू के लाज न आवत। तैसोइ मात पिताउ लह्यौ उलह्यो कुलही कुल ही पहिरावत

lāla kī āja chaṭī braja loga anaṃdita naṃda bar̤hyau anhavāvata| cāina cāru badhāina lai cahuṃ aura kuṭuṃba aghāta na yāvata| nācata bāla bar̤e rasakhāna chake hita kāhū ke lāja na āvata| taisoi māta pitāu lahyau ulahyo kulahī kula hī pahirāvata

'ता' जसुदा कह्यो धेनु की ओठ ढिंढोरत ताहि फिरैं हरि भूलैं। ढूँवनि कूँ पग चारि चलै मचलैं रज मांहि विथूरि दुकूलैं। हेरि हँसे रसखान तबै उर भाल तैं टारि कै बार लटूलैं। सो छवि देखि अनंदन नंदजू अंगन अंग समात न कूलैं

'tā' jasudā kahyo dhenu kī oṭha ḍhiṃḍhorata tāhi phiraiṃ hari bhūlaiṃ| ḍhū~vani kū~ paga cāri calai macalaiṃ raja māṃhi vithūri dukūlaiṃ| heri ha~se rasakhāna tabai ura bhāla taiṃ ṭāri kai bāra laṭūlaiṃ| so chavi dekhi anaṃdana naṃdajū aṃgana aṃga samāta na kūlaiṃ

आजु गई हुती भोर ही हौं रसखान रई वटि नंद के भौनहिं। वाकौ जियौ जुग लाख करोर जसोमति को सुख जात कह्यौ नहिं। तेल लगाइ लगाइ कै अँजन भौंहें बनाइ बनाइ डिठौनहिं। डालि हमेलनि हार निहारत वारत ज्‍यों चुचकारत छौनहिं

āju gaī hutī bhora hī hauṃ rasakhāna raī vaṭi naṃda ke bhaunahiṃ| vākau jiyau juga lākha karora jasomati ko sukha jāta kahyau nahiṃ| tela lagāi lagāi kai a~jana bhauṃheṃ banāi banāi ḍiṭhaunahiṃ| ḍāli hamelani hāra nihārata vārata jyoṃ cucakārata chaunahiṃ

धूरि भरे अति शोभित श्‍यामजू तैसी बनी सिर सुंदर चोटी। खेलत खात फिरै अँगना पर पैंजनी बाजति पौरी कछोटी। वा छबि को रसखानि बिलोकत वारत काम कला निज-कोटी। काग के भाग बड़े सजनी हरि-हाथ सों ले गयौ माखन रोटी

dhūri bhare ati śobhita śyāmajū taisī banī sira suṃdara coṭī| khelata khāta phirai a~ganā para paiṃjanī bājati paurī kachoṭī| vā chabi ko rasakhāni bilokata vārata kāma kalā nija-koṭī| kāga ke bhāga bar̤e sajanī hari-hātha soṃ le gayau mākhana roṭī

मोतिन लाल बनी नट के, लटकी लटवा लट घूँघरवारी। अंग ही अंग जराव लसै अरु सीस लसै पगिया जरतारी। पूरब पुन्‍यनि तें रसखानि सु मोहिनी मूरति आनि निहारी। चारयौ दिसानि की लै छबि आनि के झाँकै झरोखे मैं बाँके बिहारी

motina lāla banī naṭa ke, laṭakī laṭavā laṭa ghū~gharavārī| aṃga hī aṃga jarāva lasai aru sīsa lasai pagiyā jaratārī| pūraba punyani teṃ rasakhāni su mohinī mūrati āni nihārī| cārayau disāni kī lai chabi āni ke jhā~kai jharokhe maiṃ bā~ke bihārī

आवत हैं बन तें मनमोहन गाइन संग लसै ब्रज-ग्‍वाला। बेनु बजावत गावत गीत अभीत इतै करिगौ कछु ख्‍याला। हेरत टेरि थकै जहुं ओर तैं झाँकि झरोखन तें ब्रज-बाला। देखि सुर आनन कों रसखानि तज्‍यौ सब द्यौस को ताप-कसाला

āvata haiṃ bana teṃ manamohana gāina saṃga lasai braja-gvālā| benu bajāvata gāvata gīta abhīta itai karigau kachu khyālā| herata ṭeri thakai jahuṃ ora taiṃ jhā~ki jharokhana teṃ braja-bālā| dekhi sura ānana koṃ rasakhāni tajyau saba dyausa ko tāpa-kasālā

गोरज विराजै भाल लहलही बनमाल, आगे गैयाँ पाछें ग्‍वाल मृदु तानि री। तैसी धुनि बाँसुरी को मधुर मधुर जैसी, बंग चितवनि मंद मंद मुसकानि री। कदम विपट के निकट तटनी के तट, अटा चढ़ि चाटि पीत पट फहरानि री। रस बरसावै तन तपनि बुझावै नैन, प्राननि रिझावै वह आवै रसखानि री

goraja virājai bhāla lahalahī banamāla, āge gaiyā~ pācheṃ gvāla mṛdu tāni rī| taisī dhuni bā~surī ko madhura madhura jaisī, baṃga citavani maṃda maṃda musakāni rī| kadama vipaṭa ke nikaṭa taṭanī ke taṭa, aṭā car̤hi cāṭi pīta paṭa phaharāni rī| rasa barasāvai tana tapani bujhāvai naina, prānani rijhāvai vaha āvai rasakhāni rī

अति सुंदर री ब्रजराजकुमार महा मृदु बोलनि बोलत है। लखि नैन की कोर कटाक्ष चलाइ कै लाज की गाँठन खोलत हैं। सुनि री सजनी अलबेलो लला वह कुंजनि कुंजनि डोलत है। रसखानि लखें मन बूड़ि गयौ मधि रूप के सिंधु कलोकत है

ati suṃdara rī brajarājakumāra mahā mṛdu bolani bolata hai| lakhi naina kī kora kaṭākṣa calāi kai lāja kī gā~ṭhana kholata haiṃ| suni rī sajanī alabelo lalā vaha kuṃjani kuṃjani ḍolata hai| rasakhāni lakheṃ mana būr̤i gayau madhi rūpa ke siṃdhu kalokata hai

नैन लख्‍यौ जब कुंजनि तैं बनिकै निकस्‍यौ भटक्‍यौ मटक्‍यौ री। सोहत कैसो हरा टटक्‍यौ अठ कैसो किरीट लसै लटक्‍यौ री। को रसखानि फिरै भटक्‍यौ हटक्‍यौ ब्रज लोग फिरै भटक्‍यौ री। रूप सबै हरि वा नट को हियरे अटक्‍यौ अटक्‍यौ अटक्‍यो री

naina lakhyau jaba kuṃjani taiṃ banikai nikasyau bhaṭakyau maṭakyau rī| sohata kaiso harā ṭaṭakyau aṭha kaiso kirīṭa lasai laṭakyau rī| ko rasakhāni phirai bhaṭakyau haṭakyau braja loga phirai bhaṭakyau rī| rūpa sabai hari vā naṭa ko hiyare aṭakyau aṭakyau aṭakyo rī

नैननि बंक बिसाल के बाननि झेलि सकै अस कौन नवेली। बेचत है हिय तीछन कोर सुमार गिरी तिय कोटिक हेली। छौड़ै नही छिनहूं रसखानि सु लागी फिरै द्रुम सों जनु बेली। रौरि परी छबि की ब्रजमंडल कुंडल गंडनि कुंतल केली

nainani baṃka bisāla ke bānani jheli sakai asa kauna navelī| becata hai hiya tīchana kora sumāra girī tiya koṭika helī| chaur̤ai nahī chinahūṃ rasakhāni su lāgī phirai druma soṃ janu belī| rauri parī chabi kī brajamaṃḍala kuṃḍala gaṃḍani kuṃtala kelī

अलबेली बिलोकनि बोलनि औ अलबेलियै लोल निहारन की। अलबेली सी डोलनि गंडनि पै छबि सों मिली कुंडल बारन की। भटू ठाढ़ौ लख्‍यौ छबि कैसे कहौं रसखानि गहें द्रुम डारन की। हिय मैं जिय मैं मुसकानि रसी गति को सिखवै निरवारन की

alabelī bilokani bolani au alabeliyai lola nihārana kī| alabelī sī ḍolani gaṃḍani pai chabi soṃ milī kuṃḍala bārana kī| bhaṭū ṭhār̤hau lakhyau chabi kaise kahauṃ rasakhāni gaheṃ druma ḍārana kī| hiya maiṃ jiya maiṃ musakāni rasī gati ko sikhavai niravārana kī

बाँको बड़ी अँखियाँ बड़रारे कपोलनि बोलनि कौं कल बानी। सुंदर रासि सुधानिधि सो मुख मूरति रंग सुधारस-सानी। ऐसी नवेली ने देखे कहूँ ब्रजराज लला अति ही सुखदानी। डालनि है बन बीथिन मैं रसखानि मनोहर रूप-लुभानी

bā~ko bar̤ī a~khiyā~ bar̤arāre kapolani bolani kauṃ kala bānī| suṃdara rāsi sudhānidhi so mukha mūrati raṃga sudhārasa-sānī| aisī navelī ne dekhe kahū~ brajarāja lalā ati hī sukhadānī| ḍālani hai bana bīthina maiṃ rasakhāni manohara rūpa-lubhānī