Sujān-Rasakhān · 181–200

आजु भटू इक गोपकुमार ने रास रच्‍यौ इक गोप के द्वारे। सुंदर बानिक सों रसखानि बन्‍यौ वह छोहरा भाग हमारे। ए बिधना! जो हमैं हँसतीं अब नेकु कहूँ उतकों पग धारैं। ताहि बदौं फिरि आबे घरै बिनही तन औ मन जौवन बारैं

āju bhaṭū ika gopakumāra ne rāsa racyau ika gopa ke dvāre| suṃdara bānika soṃ rasakhāni banyau vaha choharā bhāga hamāre| e bidhanā! jo hamaiṃ ha~satīṃ aba neku kahū~ utakoṃ paga dhāraiṃ| tāhi badauṃ phiri ābe gharai binahī tana au mana jauvana bāraiṃ

आज भटू मुरली-बट के तट नंद के साँवरे रास रच्‍यौ री। नैननि सैननि बैननि सों नहिं कोऊ मनोहर भाव बच्‍यौ री। जद्यपि राखन कौं कुल कानि सबै ब्रज-बालन प्रान पच्‍यौ री। तद्यपि वा रसखानि के हाथ बिकानी कौं अंत लच्‍यौ पै लच्‍यौ री

āja bhaṭū muralī-baṭa ke taṭa naṃda ke sā~vare rāsa racyau rī| nainani sainani bainani soṃ nahiṃ koū manohara bhāva bacyau rī| jadyapi rākhana kauṃ kula kāni sabai braja-bālana prāna pacyau rī| tadyapi vā rasakhāni ke hātha bikānī kauṃ aṃta lacyau pai lacyau rī

कीजै कहा जु पै लोग चबाव सदा करिबौ करि हैं बजमारौ। सीत न रोकत राखत कागु सुगावत ताहिरी गावन हारौ। आव री सीरी करैं अँखिया रसखान धनै धन भाग हमारौ। आवत है फिरि आज बन्‍यौ वह राति के रास को नाचन हारौ

kījai kahā ju pai loga cabāva sadā karibau kari haiṃ bajamārau| sīta na rokata rākhata kāgu sugāvata tāhirī gāvana hārau| āva rī sīrī karaiṃ a~khiyā rasakhāna dhanai dhana bhāga hamārau| āvata hai phiri āja banyau vaha rāti ke rāsa ko nācana hārau

सासु अछै बरज्‍यौ बिटिया जु बिलोके अतीक लजावत है। मौहि कहै जु कहूँ वह बात कही यह कौन कहावत है। चाहत काहू के मूँड़ चढ़यौ रसखान झुकै झुकि आवत है। जब तैं वह ग्‍वाल गली में नच्‍यौ तब तै वह नाच नचावत है

sāsu achai barajyau biṭiyā ju biloke atīka lajāvata hai| mauhi kahai ju kahū~ vaha bāta kahī yaha kauna kahāvata hai| cāhata kāhū ke mū~r̤a car̤hayau rasakhāna jhukai jhuki āvata hai| jaba taiṃ vaha gvāla galī meṃ nacyau taba tai vaha nāca nacāvata hai

देखत सेज बिछी री अछी सु बिछी विष सो भिदिगो सिगरे तन। ऐसी अचेत गिरी नहिं चेत उपाय करे सिगरी सजनी जन। बोली सयानी सखि रसखानि बचै यौं सुनाइ कह्यौ जुवती गन। देखन कौं चलियै री चलौ सब रस रच्‍यौ मनमोहन जू बन

dekhata seja bichī rī achī su bichī viṣa so bhidigo sigare tana| aisī aceta girī nahiṃ ceta upāya kare sigarī sajanī jana| bolī sayānī sakhi rasakhāni bacai yauṃ sunāi kahyau juvatī gana| dekhana kauṃ caliyai rī calau saba rasa racyau manamohana jū bana

खेलत फाग लख्‍यौ पिय प्‍यारी को ता मुख की उपमा किहिं दीजै। देखत ही बनि आवै भलै रसखान कहा है जो बार न कीजै। ज्‍यौं ज्‍यौं छबीली कहै पिचकारी लै एक लई यह दूसरी लीजै। त्‍यौं त्‍यौं छबीलो छकै छबि छाक सों हेरै हँसे न टरै खरौ भीजै

khelata phāga lakhyau piya pyārī ko tā mukha kī upamā kihiṃ dījai| dekhata hī bani āvai bhalai rasakhāna kahā hai jo bāra na kījai| jyauṃ jyauṃ chabīlī kahai picakārī lai eka laī yaha dūsarī lījai| tyauṃ tyauṃ chabīlo chakai chabi chāka soṃ herai ha~se na ṭarai kharau bhījai

खेलत फाग सुहागभरी अनुरागहिं लालन कौं झरि कै। मारत कुंकुम केसरि के पिचकारिन मैं रंग को भरि कै। गेरत लाल गुलाल लली मन मोहिनी मौज मिटा करि कै। जात चली रसखानि अली मदमत्‍त मनी-मन कों हरि कै

khelata phāga suhāgabharī anurāgahiṃ lālana kauṃ jhari kai| mārata kuṃkuma kesari ke picakārina maiṃ raṃga ko bhari kai| gerata lāla gulāla lalī mana mohinī mauja miṭā kari kai| jāta calī rasakhāni alī madamatta manī-mana koṃ hari kai

फागुन लाग्यौ सखि जब तें, तब तें ब्रजमंडल धूम मच्‍यौ है। नारि नवेली बचैं नहिं एक बिसेख यहै सबै प्रेम अच्‍यौ है। साँझ सकारे वही रसखानि सुरंग गुलाल लै खेल रच्‍यौ है। को सजनी निलजी न भई अब कौन भटू जिहिं मान बच्‍यौ है

phāguna lāgyau sakhi jaba teṃ, taba teṃ brajamaṃḍala dhūma macyau hai| nāri navelī bacaiṃ nahiṃ eka bisekha yahai sabai prema acyau hai| sā~jha sakāre vahī rasakhāni suraṃga gulāla lai khela racyau hai| ko sajanī nilajī na bhaī aba kauna bhaṭū jihiṃ māna bacyau hai

आई खेलि होरी ब्रजगोरी वा किसोरी संग। अंग अंग अंगनि अनंग सरकाइ गौ। कुंकुम की मार वा पै रंगति उद्दार उड़े, बुक्‍का औ गुलाल लाल लाल बरसाइगौ। छौड़े पिचकारिन वपारिन बिगोई छौड़ै, तोड़ै हिय-हार धार रंग तरसाइ गौ। रसिक सलोनो रिझवार रसखानि आजु, फागुन मैं औगुन अनेक दरसाइ गौ

āī kheli horī brajagorī vā kisorī saṃga| aṃga aṃga aṃgani anaṃga sarakāi gau| kuṃkuma kī māra vā pai raṃgati uddāra ur̤e, bukkā au gulāla lāla lāla barasāigau| chaur̤e picakārina vapārina bigoī chaur̤ai, tor̤ai hiya-hāra dhāra raṃga tarasāi gau| rasika salono rijhavāra rasakhāni āju, phāguna maiṃ auguna aneka darasāi gau

गोकुल को ग्‍वाल काल्हि चौमुंह की ग्‍वालिन सों, चाचर रचाइ एक धूमहिं मचाइ गौ। हियो हुलसाइ रसखानि तान गाइ बाँकी, सहज सुभाइ सब गाँव ललचाइ गौ। पिचका चलाइ और जुवती भिंजाइ नेह, लोचन नचाइ मेरे अगहि नचाइ गौ। सासहिं नचाइ भोरी नंदहि नचाइ खोरी, बैरनि सचाइ गोरी मोहि सकुचाइ गौ

gokula ko gvāla kālhi caumuṃha kī gvālina soṃ, cācara racāi eka dhūmahiṃ macāi gau| hiyo hulasāi rasakhāni tāna gāi bā~kī, sahaja subhāi saba gā~va lalacāi gau| picakā calāi aura juvatī bhiṃjāi neha, locana nacāi mere agahi nacāi gau| sāsahiṃ nacāi bhorī naṃdahi nacāi khorī, bairani sacāi gorī mohi sakucāi gau

आवत लाल गुलाल लियें मग सूने मिली इस नार नवीनी। त्‍यौं रसखानि लगाइ हियें मौज कियौ मन माहिं अधीनी। सारी फटी सुकुमारी हटी अंगिया दर की सरकी रगभीनी। गाल गुलाल लगाइ लगाइ कै अंक रिझाइ बिदा करि दीनी

āvata lāla gulāla liyeṃ maga sūne milī isa nāra navīnī| tyauṃ rasakhāni lagāi hiyeṃ mauja kiyau mana māhiṃ adhīnī| sārī phaṭī sukumārī haṭī aṃgiyā dara kī sarakī ragabhīnī| gāla gulāla lagāi lagāi kai aṃka rijhāi bidā kari dīnī

लीने अबीर भरे पिचका रसखानि खरौ बहु भाय भरौ जू। मार से गोपकुमार कुमार से देखत ध्‍यान टरौ न टरौ जू। पूरब पुन्‍यनि हाथ पर्यौ तुम राज करौ उठि काज करौ जू। ताहि सरौ लखि लाज जरौ इहि पाख पतिव्रत ताख धरौ जू

līne abīra bhare picakā rasakhāni kharau bahu bhāya bharau jū| māra se gopakumāra kumāra se dekhata dhyāna ṭarau na ṭarau jū| pūraba punyani hātha paryau tuma rāja karau uṭhi kāja karau jū| tāhi sarau lakhi lāja jarau ihi pākha pativrata tākha dharau jū

मिलि खेलत फाग बढ़्यौ अनुराग सुराग सनी सुख की रमकैं। करि कुंकुम लै कर कंजमुखी प्रिय के दृग लावन कौं धमकैं। रसखानि गुलाल की धूँधर मैं ब्रजबालन की दुति यौ दमकैं। मनौ सावन माँझ ललाई के मांज चहूँ दिसि तें चपला चमकैं

mili khelata phāga bar̤hyau anurāga surāga sanī sukha kī ramakaiṃ| kari kuṃkuma lai kara kaṃjamukhī priya ke dṛga lāvana kauṃ dhamakaiṃ| rasakhāni gulāla kī dhū~dhara maiṃ brajabālana kī duti yau damakaiṃ| manau sāvana mā~jha lalāī ke māṃja cahū~ disi teṃ capalā camakaiṃ

आजु बरसाने बरसाने सब आनंद सों, लाड़िली बरस गाँठि आई छबि छाई है। कौतुक अपार घर घर रंग बिसतार, रहत निहारि सुध बुध बिसराई है। आये ब्रजराज ब्रजरानी दधि दानी संग, अति ही उमंगे रूप रासि लूटि पाई है। गुनी जन गान धन दान सनमान, बाजे- पौरनि निसान रसखान मन भाई है

āju barasāne barasāne saba ānaṃda soṃ, lār̤ilī barasa gā~ṭhi āī chabi chāī hai| kautuka apāra ghara ghara raṃga bisatāra, rahata nihāri sudha budha bisarāī hai| āye brajarāja brajarānī dadhi dānī saṃga, ati hī umaṃge rūpa rāsi lūṭi pāī hai| gunī jana gāna dhana dāna sanamāna, bāje- paurani nisāna rasakhāna mana bhāī hai

कैंधो रसखान रस कोस दृग प्‍यास जानि, आनि के पियूष पूष कीनो बिधि चंद घर। कँधों मनि मानिक बैठारिबै को कंचन मैं, जरिया जोबन जिन गढ़िया सुघर घर। कैंधों काम कामना के राजत अधर चिन्‍ह, कैंधों यह भौर ज्ञान बोहित गुमान हर। एरी मेरी प्‍यारी दुति कोटि रति रंभा की, वारि डारों तेही चित चोरनि चिबुक पर

kaiṃdho rasakhāna rasa kosa dṛga pyāsa jāni, āni ke piyūṣa pūṣa kīno bidhi caṃda ghara| ka~dhoṃ mani mānika baiṭhāribai ko kaṃcana maiṃ, jariyā jobana jina gar̤hiyā sughara ghara| kaiṃdhoṃ kāma kāmanā ke rājata adhara cinha, kaiṃdhoṃ yaha bhaura jñāna bohita gumāna hara| erī merī pyārī duti koṭi rati raṃbhā kī, vāri ḍāroṃ tehī cita corani cibuka para

श्री मुख यों न बखान सकै वृषभान सुता जू को रूप उजारो। हे रसखान तू ज्ञान संभार तरैनि निहार जू रीझन हारो। चारु सिंदूर को लाल रसाल लसै ब्रज बाल को भाल टिकारो। गोद में मानौं बिराजत है घनस्‍याम के सारे को सारे को सारो

śrī mukha yoṃ na bakhāna sakai vṛṣabhāna sutā jū ko rūpa ujāro| he rasakhāna tū jñāna saṃbhāra taraini nihāra jū rījhana hāro| cāru siṃdūra ko lāla rasāla lasai braja bāla ko bhāla ṭikāro| goda meṃ mānauṃ birājata hai ghanasyāma ke sāre ko sāre ko sāro

अति लाल गुलाल दुकूल ते फूल अली! अति कुंतल रासत है। मखतूल समान के गुंज घरानि मैं किंसुक की छवि छाजत है।। मुकता के कंदब ते अंब के मोर सुने सुर कोकिल लाजत है। यह आबनि प्‍यारी जू की रसखानि बसंत-सी आज बिराजत है

ati lāla gulāla dukūla te phūla alī! ati kuṃtala rāsata hai| makhatūla samāna ke guṃja gharāni maiṃ kiṃsuka kī chavi chājata hai|| mukatā ke kaṃdaba te aṃba ke mora sune sura kokila lājata hai| yaha ābani pyārī jū kī rasakhāni basaṃta-sī āja birājata hai

न चंदन खैर के बैठी भटू रही आजु सुधा की सुता मनसी। मनौ इंदुबधून लजावन कों सब ज्ञानिन काढ़ि धरी गन सी। रसखानि बिराजति चौकी कुचौ बिच उत्‍तमताहि जरी तन सी। दमकै दृग बान के घायन कों गिरि सेत के सधि के जीवन सी

na caṃdana khaira ke baiṭhī bhaṭū rahī āju sudhā kī sutā manasī| manau iṃdubadhūna lajāvana koṃ saba jñānina kār̤hi dharī gana sī| rasakhāni birājati caukī kucau bica uttamatāhi jarī tana sī| damakai dṛga bāna ke ghāyana koṃ giri seta ke sadhi ke jīvana sī

आज सँवारति नेकु भटू तन, मंद करी रति की दुति लाजै। देखत रीझि रहे रसखानि सु और छटा विधिना उपराजै। आए हैं न्‍यौतें तरैयन के मनो संग पतंग पतंग जू राजै। ऐसें लसै मुकुतागन मैं तित तेरे तरौना के तीर बिराजै

āja sa~vārati neku bhaṭū tana, maṃda karī rati kī duti lājai| dekhata rījhi rahe rasakhāni su aura chaṭā vidhinā uparājai| āe haiṃ nyauteṃ taraiyana ke mano saṃga pataṃga pataṃga jū rājai| aiseṃ lasai mukutāgana maiṃ tita tere taraunā ke tīra birājai

प्‍यारी की चारु सिंगार तरंगनि जाय लगी रति की दुति कूलनि। जोबन जेब कहा कहियै उर पै छवि मंजु अनेक दुकूलनि। कंचुकी सेत मैं जावक बिंदु बिलोकि मरैं मघवानि की सूलनि। पूजे है आजु मनौ रसखान सु भूत के भूप बंधूक के फूलनि

pyārī kī cāru siṃgāra taraṃgani jāya lagī rati kī duti kūlani| jobana jeba kahā kahiyai ura pai chavi maṃju aneka dukūlani| kaṃcukī seta maiṃ jāvaka biṃdu biloki maraiṃ maghavāni kī sūlani| pūje hai āju manau rasakhāna su bhūta ke bhūpa baṃdhūka ke phūlani