Sujān-Rasakhān · 201–220

बाँकी मरोर गटी भृकुटीन लगीं अँखियाँ तिरछानि तिया की। क सी लाँक भई रसखानि सुदामिनी तें दुति दूनी हिमा की। सोहैं तरंग अनंग को अंगनि ओप उरोज उठी छलिया की। जोबनि जोति सु यौं दमकै उकसाइ दइ मनो बाती दिया की

bā~kī marora gaṭī bhṛkuṭīna lagīṃ a~khiyā~ tirachāni tiyā kī| ka sī lā~ka bhaī rasakhāni sudāminī teṃ duti dūnī himā kī| sohaiṃ taraṃga anaṃga ko aṃgani opa uroja uṭhī chaliyā kī| jobani joti su yauṃ damakai ukasāi dai mano bātī diyā kī

वासर तूँ जु कहूँ निकरै रबि को रथ माँझ आकाश अरै री। रैन यहै गति है रसखानि छपाकर आँगन तें न टरै री। यौस निस्‍वास चल्‍यौई करै निसि द्यौस की आसन पाय धरै री। तेजो न जात कछू दिन राति बिचारे बटोही की बाट परै री

vāsara tū~ ju kahū~ nikarai rabi ko ratha mā~jha ākāśa arai rī| raina yahai gati hai rasakhāni chapākara ā~gana teṃ na ṭarai rī| yausa nisvāsa calyauī karai nisi dyausa kī āsana pāya dharai rī| tejo na jāta kachū dina rāti bicāre baṭohī kī bāṭa parai rī

को लसै मुख चंद समान कमानी सी भौंह गुमान हरै। दीरघ नैन सरोजहुँ तैं मृग खंजन मीन की पाँत दरै। रसखान उरोज निहारत ही मुनि कौन समाधि न जाहि टरै। जिहिं नीके नवै कटि हार के भार सों तासों कहैं सब काम करै

ko lasai mukha caṃda samāna kamānī sī bhauṃha gumāna harai| dīragha naina sarojahu~ taiṃ mṛga khaṃjana mīna kī pā~ta darai| rasakhāna uroja nihārata hī muni kauna samādhi na jāhi ṭarai| jihiṃ nīke navai kaṭi hāra ke bhāra soṃ tāsoṃ kahaiṃ saba kāma karai

प्रेम कथानि की बात चलैं चमकै चित चंचलता चिनगारी। लोचन बंक बिलोकनि लोलनि बोलनि मैं बतियाँ रसकारी। सोहैं तरंग अनंग को अंगनि कोमल यौं झमकै झनकारी। पूतरी खेलत ही पटकी रसखानि सु चौपर खेलत प्‍यारी

prema kathāni kī bāta calaiṃ camakai cita caṃcalatā cinagārī| locana baṃka bilokani lolani bolani maiṃ batiyā~ rasakārī| sohaiṃ taraṃga anaṃga ko aṃgani komala yauṃ jhamakai jhanakārī| pūtarī khelata hī paṭakī rasakhāni su caupara khelata pyārī

वारति जा पर ज्‍यौ न थकै चहुँ ओर जिती नृप ती धरती है। मान सखै धरती सों कहाँ जिहि रूप लखै रति सी रती है। जा रसखान‍ बिलोकन काजू सदाई सदा हरती बरती है। तो लगि ता मन मोहन कौं अँखियाँ निसि द्यौस हहा करती है

vārati jā para jyau na thakai cahu~ ora jitī nṛpa tī dharatī hai| māna sakhai dharatī soṃ kahā~ jihi rūpa lakhai rati sī ratī hai| jā rasakhāna bilokana kājū sadāī sadā haratī baratī hai| to lagi tā mana mohana kauṃ a~khiyā~ nisi dyausa hahā karatī hai

मान की औधि है आधी घरी अरी जौ रसखानि डरै हित कें डर। कै हित छोड़िये पारियै पाइनि एसे कटाछन हीं हियरा-हर। मोहनलाल कों हाल बिलोकियै नेकु कछू किनि छ्वै कर सों कर। ना करिबे पर वारे हैं प्रान कहा करि हैं अब हाँ करिबे पर

māna kī audhi hai ādhī gharī arī jau rasakhāni ḍarai hita keṃ ḍara| kai hita chor̤iye pāriyai pāini ese kaṭāchana hīṃ hiyarā-hara| mohanalāla koṃ hāla bilokiyai neku kachū kini chvai kara soṃ kara| nā karibe para vāre haiṃ prāna kahā kari haiṃ aba hā~ karibe para

तू गरबाइ कहा झगर रसखानि तेरे बस बाबरो होसै। तौ हूँ न छाती सिराइ अरी करि झार इतै उतै बाझिन कोसै। लालहि लाल कियें अँखियाँ गहि लालहि काल सौं क्‍यौ भई रोसै। ऐ बिधना तू कहा री पढ़ी बस राख्‍यौ गुपालहिं लाल भरोसै

tū garabāi kahā jhagara rasakhāni tere basa bābaro hosai| tau hū~ na chātī sirāi arī kari jhāra itai utai bājhina kosai| lālahi lāla kiyeṃ a~khiyā~ gahi lālahi kāla sauṃ kyau bhaī rosai| ai bidhanā tū kahā rī par̤hī basa rākhyau gupālahiṃ lāla bharosai

पिय सों तुम मान कर्यौ कत नागरि आजु कहा किनहूँ सिख दीनी। ऐसे मनोहर प्रीतम के तरुनी बरुनी पग पोछ नवीनी।। सुंदर हास सुधानिधि सो मुख नैननि चैन महारस भीनी।। रसखानि न लागत तोहिं कछू अब तेरी तिया किनहूँ मति दीनी

piya soṃ tuma māna karyau kata nāgari āju kahā kinahū~ sikha dīnī| aise manohara prītama ke tarunī barunī paga pocha navīnī|| suṃdara hāsa sudhānidhi so mukha nainani caina mahārasa bhīnī|| rasakhāni na lāgata tohiṃ kachū aba terī tiyā kinahū~ mati dīnī

डहडही बैरी मंजु डार सहकार की पै, चहचही चुहल चहूकित अलीन की। लहलही लोनी लता लपटी तमालन पै, कहकही तापै कोकिला की काकलीन की।। तहतही करि रसखानि के मिलन हेत, बहबही बानि तजि मानस मलीन की। महमही मंद-मंद मारुत मिलनि तैसी, गहगही खिलनि गुलाब की कलीन को

ḍahaḍahī bairī maṃju ḍāra sahakāra kī pai, cahacahī cuhala cahūkita alīna kī| lahalahī lonī latā lapaṭī tamālana pai, kahakahī tāpai kokilā kī kākalīna kī|| tahatahī kari rasakhāni ke milana heta, bahabahī bāni taji mānasa malīna kī| mahamahī maṃda-maṃda māruta milani taisī, gahagahī khilani gulāba kī kalīna ko

जो कबहूँ मग पाँव न देतु सु तो हित लालन आपुन गौनै। मेरो कह्यौ करि मान तजौ कहि मोहन सों बलि बोल सलौने। सौहें दिबावत हौं रसखानि तूँ सौंहैं करै किन लाखनि लौने। नोखी तूँ मानिन मान कर्यौ किन मान बसत मैं कीनी है कौनै

jo kabahū~ maga pā~va na detu su to hita lālana āpuna gaunai| mero kahyau kari māna tajau kahi mohana soṃ bali bola salaune| sauheṃ dibāvata hauṃ rasakhāni tū~ sauṃhaiṃ karai kina lākhani laune| nokhī tū~ mānina māna karyau kina māna basata maiṃ kīnī hai kaunai

सोई है रास मैं नैसुक नाच कै नाच नचायौ कितौ सबकों जिन। सोई है री रसखानि किते मनुहारिन सूँघे चितौत न हो छिन।। तौ मैं धौं कौन मनोहर भाव बिलोकि भयौ बस हाहा करी तिन। औसर ऐसौ मिलै न मिलै फिर लगर मोड़ो कनौड़ौ करै छिन

soī hai rāsa maiṃ naisuka nāca kai nāca nacāyau kitau sabakoṃ jina| soī hai rī rasakhāni kite manuhārina sū~ghe citauta na ho china|| tau maiṃ dhauṃ kauna manohara bhāva biloki bhayau basa hāhā karī tina| ausara aisau milai na milai phira lagara mor̤o kanaur̤au karai china

तौ पहिराइ गई चुरिया तिहिं को घर बादरी जाय भरै री। वा रसखान कों ऐतौ अधीन कैं मान करै चलि जाहि परै री। आबन कों पुततीत हठा करैं नैं‍ननि धारि अखंड ढरैरी। हाथ निहारि निहारि लला मनिहारिन की मनुहारि करै री

tau pahirāi gaī curiyā tihiṃ ko ghara bādarī jāya bharai rī| vā rasakhāna koṃ aitau adhīna kaiṃ māna karai cali jāhi parai rī| ābana koṃ putatīta haṭhā karaiṃ naiṃnani dhāri akhaṃḍa ḍharairī| hātha nihāri nihāri lalā manihārina kī manuhāri karai rī

मेरी सुनौ मति आइ अली उहाँ जौनी गली हरि गावत है। हरि है बिलोकति प्राननि कों पुनि गाढ़ परें घर आवत है।। उन तान की तान तनी ब्रज मैं रसखानि समान सिखावत है। तकि पाय घरौं रपटाय नहीं वह चारो सो डारि फँदावत है

merī sunau mati āi alī uhā~ jaunī galī hari gāvata hai| hari hai bilokati prānani koṃ puni gār̤ha pareṃ ghara āvata hai|| una tāna kī tāna tanī braja maiṃ rasakhāni samāna sikhāvata hai| taki pāya gharauṃ rapaṭāya nahīṃ vaha cāro so ḍāri pha~dāvata hai

काहे कूँ जाति जसोमति के गृह पोच भली घर हूँ तो रई ही। मानुष को डसिबौ अपुनो हँसिबौ यह बात उहाँ न नई ही। बैरिनि तौ दृग-कोरनि में रसखान जो बात भई न भई ही। माखन सौ मन लैं यह क्‍यों वह माखनचोर के ओर नई ही

kāhe kū~ jāti jasomati ke gṛha poca bhalī ghara hū~ to raī hī| mānuṣa ko ḍasibau apuno ha~sibau yaha bāta uhā~ na naī hī| bairini tau dṛga-korani meṃ rasakhāna jo bāta bhaī na bhaī hī| mākhana sau mana laiṃ yaha kyoṃ vaha mākhanacora ke ora naī hī

हेरति बारहीं यार उसै तुव बाबरी बाल, कहा धौ करैगी। जौं कबहूँ रसखानि लखै फिर क्‍यों हूँ न बीर ही धीर धरैगी। मानि ऐ काहू की कानि नहीं, जब रूपी ठगी हति रंग ढरैगी। यातैं कहौं सिख मानि भटू यह हेरनि तेरे ही पैड़े परैगी

herati bārahīṃ yāra usai tuva bābarī bāla, kahā dhau karaigī| jauṃ kabahū~ rasakhāni lakhai phira kyoṃ hū~ na bīra hī dhīra dharaigī| māni ai kāhū kī kāni nahīṃ, jaba rūpī ṭhagī hati raṃga ḍharaigī| yātaiṃ kahauṃ sikha māni bhaṭū yaha herani tere hī pair̤e paraigī

बाँके कटाक्ष चितैबो सिख्‍यौ बहुधा बरज्‍यौ हित कै हितकारी। तू अपने ढंग की रसखानि सिखावनि देति न हौं पचिहारी। कौन की सीख सिखीं सजनी अजहूँ तजि दै बलि जाउँ तिहारी। नंद के नंदन के फंद अजूँ परि जैहै अनोखी निहारिनिहारी

bā~ke kaṭākṣa citaibo sikhyau bahudhā barajyau hita kai hitakārī| tū apane ḍhaṃga kī rasakhāni sikhāvani deti na hauṃ pacihārī| kauna kī sīkha sikhīṃ sajanī ajahū~ taji dai bali jāu~ tihārī| naṃda ke naṃdana ke phaṃda ajū~ pari jaihai anokhī nihārinihārī

बैरिन तूँ बरजी न रहै अबही घर बाहिर बैरु बढ़ैगौ। टौना सुनंद छुटोना पढ़ै सजनी तुहि देखि बिसेषि पढ़ैगौ। हँसि है सखि गोकुल गाँव सतै रसखानि तबै यह लोक रढ़ैगौ। बैरु चढ़ै धरहिं रहि बैठि अटा न एढ़ै बघनाम चढ़ैगौ

bairina tū~ barajī na rahai abahī ghara bāhira bairu bar̤haigau| ṭaunā sunaṃda chuṭonā par̤hai sajanī tuhi dekhi biseṣi par̤haigau| ha~si hai sakhi gokula gā~va satai rasakhāni tabai yaha loka rar̤haigau| bairu car̤hai dharahiṃ rahi baiṭhi aṭā na er̤hai baghanāma car̤haigau

गोरस गाँव ही मैं बिचिबो तचिबौ नहीं नंद-मुखानल झारन। गैल गहें चलियै रसखानि तौ पाप बिना डरियै किहि कारन। नाहि री ना भटू, क्‍यों करि कै बन पैठत पाइवी लाज सम्‍हारन। कुंजनि नंदकुमार बसै तहाँ मार बसै कचनार की डारन

gorasa gā~va hī maiṃ bicibo tacibau nahīṃ naṃda-mukhānala jhārana| gaila gaheṃ caliyai rasakhāni tau pāpa binā ḍariyai kihi kārana| nāhi rī nā bhaṭū, kyoṃ kari kai bana paiṭhata pāivī lāja samhārana| kuṃjani naṃdakumāra basai tahā~ māra basai kacanāra kī ḍārana

बार ही गोरस बेंचि री आजु तू माइ के मूढ़ चढ़ै कत मौंड़ी। आवत जात ही होइगी साँझ भटू जमुना मतरौंड लौ औंड़ी। पार गए रसखानि कहै अँखियाँ कहूँ होहिंगी प्रेम कनौड़ी। राधे बलाइ ल्‍लौं जाइगी बाज अबै ब्रजराज सनेह की डौंड़ी

bāra hī gorasa beṃci rī āju tū māi ke mūr̤ha car̤hai kata mauṃr̤ī| āvata jāta hī hoigī sā~jha bhaṭū jamunā matarauṃḍa lau auṃr̤ī| pāra gae rasakhāni kahai a~khiyā~ kahū~ hohiṃgī prema kanaur̤ī| rādhe balāi llauṃ jāigī bāja abai brajarāja saneha kī ḍauṃr̤ī

ब्‍याहीं अनब्‍याहीं ब्रज माहीं सब चाही तासौं, दूनी सकुचाहीं दीठि परै न जुन्‍हैया की। नेकु मुसकानि रसखानि को बिलोकति ही, चेरी होति एक बार कुंजनि दिखैया की। मेरो कह्यौ मानि अंत मेरो गुन मानिहै री, प्रात खात जात न सकात सोहैं मैया की। माई की अटंक तौ लौं सासु की हटक जौ लौं, देखी ना लटक मेरे दूलह कन्‍हैया की

byāhīṃ anabyāhīṃ braja māhīṃ saba cāhī tāsauṃ, dūnī sakucāhīṃ dīṭhi parai na junhaiyā kī| neku musakāni rasakhāni ko bilokati hī, cerī hoti eka bāra kuṃjani dikhaiyā kī| mero kahyau māni aṃta mero guna mānihai rī, prāta khāta jāta na sakāta sohaiṃ maiyā kī| māī kī aṭaṃka tau lauṃ sāsu kī haṭaka jau lauṃ, dekhī nā laṭaka mere dūlaha kanhaiyā kī