Sujān-Rasakhān · 81–100

आजु सखी नंद-नंदन की तकि ठाढ़ौ हों कुंजन की परछाहीं। नैन बिसाल की जोहन को सब भेदि गयौ हियरा जिन माहीं। घाइल धूमि सुमार गिरी रसखानि सम्‍हारति अँगनि जाहीं। एते पै वा मुसकानि की डौंड़ी बजी ब्रज मैं अबला कित जाहीं

āju sakhī naṃda-naṃdana kī taki ṭhār̤hau hoṃ kuṃjana kī parachāhīṃ| naina bisāla kī johana ko saba bhedi gayau hiyarā jina māhīṃ| ghāila dhūmi sumāra girī rasakhāni samhārati a~gani jāhīṃ| ete pai vā musakāni kī ḍauṃr̤ī bajī braja maiṃ abalā kita jāhīṃ

ए सजनी लोनो लला, लखौ नंद के गेह। चितयौ मृदु मुस्‍काइ कै, हरी सबै सुधि देह

e sajanī lono lalā, lakhau naṃda ke geha| citayau mṛdu muskāi kai, harī sabai sudhi deha

जोहन नंदकुमार कों, गई नंद के गेह। मोहिं देखि मुसकाइ कै, बरस्‍यौ मेह सनेह

johana naṃdakumāra koṃ, gaī naṃda ke geha| mohiṃ dekhi musakāi kai, barasyau meha saneha

मोरपखा सिर कानन कुंडल कुंतल सों छबि गंडनि छाई। बंक बिसाल रसाल बिलोचन हैं दुखमौचन मोहन माई। आली नवीन यह घन सो तन पीट घट ज्‍यौं पठा बनि आई। हौं रसखानि जकी सी रही कछु टोना चलाइ ठगौरी सी लाई

morapakhā sira kānana kuṃḍala kuṃtala soṃ chabi gaṃḍani chāī| baṃka bisāla rasāla bilocana haiṃ dukhamaucana mohana māī| ālī navīna yaha ghana so tana pīṭa ghaṭa jyauṃ paṭhā bani āī| hauṃ rasakhāni jakī sī rahī kachu ṭonā calāi ṭhagaurī sī lāī

जा दिन तें वह नंद को छोहरा या बन धेनु चराइ गयौ है। मोहनी ताननि गोधन गावत बेन बजाइ रिझाइ गयौ है। बा दिन सों कछु टोना सो कै रसखानि हिये मैं समाइ गयौ है। कोऊ न काहू की कानि करै सिगरौ ब्रज वीर! बिकाइ गयौ है

jā dina teṃ vaha naṃda ko choharā yā bana dhenu carāi gayau hai| mohanī tānani godhana gāvata bena bajāi rijhāi gayau hai| bā dina soṃ kachu ṭonā so kai rasakhāni hiye maiṃ samāi gayau hai| koū na kāhū kī kāni karai sigarau braja vīra! bikāi gayau hai

आयो हुतो नियरे रसखानि कहा कहौं तू न गई वहि ठैया। या ब्रज में सिगरी बनिता सब बारति प्राननि लेति बलैया। कोऊ न काहु की कानि करैं कछु चेटक सो जु कियौ जदुरैंया। गाइगौ तान जमाइगौ नेह रिझाइगौ प्रान चराइगौ गैया

āyo huto niyare rasakhāni kahā kahauṃ tū na gaī vahi ṭhaiyā| yā braja meṃ sigarī banitā saba bārati prānani leti balaiyā| koū na kāhu kī kāni karaiṃ kachu ceṭaka so ju kiyau jaduraiṃyā| gāigau tāna jamāigau neha rijhāigau prāna carāigau gaiyā

कौन ठगौरी भरी हरि आजु बजाई है बाँसुनिया रंग-भीनी। तान सुनीं जिनहीं तिनहीं तबहीं तित साज बिदा कर दीनी। घूमैं घरी नंद के द्वार नवीनी कहा कहूँ बाल प्रवीनी। या ब्रज-मंडल में रसखानि सु कौन भटू जू लटू नहिं कीनी

kauna ṭhagaurī bharī hari āju bajāī hai bā~suniyā raṃga-bhīnī| tāna sunīṃ jinahīṃ tinahīṃ tabahīṃ tita sāja bidā kara dīnī| ghūmaiṃ gharī naṃda ke dvāra navīnī kahā kahū~ bāla pravīnī| yā braja-maṃḍala meṃ rasakhāni su kauna bhaṭū jū laṭū nahiṃ kīnī

बाँकी धरै कलगी सिर ऊपर बाँसुरी-तान कटै रस बीर के। कुंडल कान लसैं रसखानि विलोकन तीर अनंग तुनीर के। डारि ठगौरी गयौ चित चोरि लिए है सबैं सुख सोखि सरीर के। जात चलावन मो अबला यह कौन कला है भला वे अहीर के

bā~kī dharai kalagī sira ūpara bā~surī-tāna kaṭai rasa bīra ke| kuṃḍala kāna lasaiṃ rasakhāni vilokana tīra anaṃga tunīra ke| ḍāri ṭhagaurī gayau cita cori lie hai sabaiṃ sukha sokhi sarīra ke| jāta calāvana mo abalā yaha kauna kalā hai bhalā ve ahīra ke

कौन की नागरि रूप की आगरि जाति लिए संग कौन की बेटी। जाको लसै मुख चंद-समान सु कोमल अँगनि रूप-लपेटी। लाल रही चुप लागि है डीठि सु जाके कहूँ उर बात न मेटी। टोकत ही टटकार लगी रसखानि भई मनौ कारिख-पेटी

kauna kī nāgari rūpa kī āgari jāti lie saṃga kauna kī beṭī| jāko lasai mukha caṃda-samāna su komala a~gani rūpa-lapeṭī| lāla rahī cupa lāgi hai ḍīṭhi su jāke kahū~ ura bāta na meṭī| ṭokata hī ṭaṭakāra lagī rasakhāni bhaī manau kārikha-peṭī

कराकृत कुंडल गुंज की माल के लाल लसै पग पाँवरिया। बछरानि चरावन के मिस भावतो दै गयौ भावती भाँवरिया। रसखानि बिलोकत ही सिगरी भईं बावरिया ब्रज-डाँवरिया। सजती ईहिं गोकुल मैं विष सो बगरायौ हे नंद की साँवरिया

karākṛta kuṃḍala guṃja kī māla ke lāla lasai paga pā~variyā| bacharāni carāvana ke misa bhāvato dai gayau bhāvatī bhā~variyā| rasakhāni bilokata hī sigarī bhaīṃ bāvariyā braja-ḍā~variyā| sajatī īhiṃ gokula maiṃ viṣa so bagarāyau he naṃda kī sā~variyā

नवरंग अनंग भरी छवि सौं वह मूरति आँखि गड़ी ही रहैं बतिया मन की मन ही मैं रहे घतिया उर बीच अड़ी ही रहैं। तबहूँ रसखानि सुजान अली नलिनी दल बूँद पड़ी ही रहै। जिय की नहिं जानत हौं सजनी रजनी अँसुवान लड़ी ही रहै

navaraṃga anaṃga bharī chavi sauṃ vaha mūrati ā~khi gar̤ī hī rahaiṃ batiyā mana kī mana hī maiṃ rahe ghatiyā ura bīca ar̤ī hī rahaiṃ| tabahū~ rasakhāni sujāna alī nalinī dala bū~da par̤ī hī rahai| jiya kī nahiṃ jānata hauṃ sajanī rajanī a~suvāna lar̤ī hī rahai

मैन मनोहर ही दुख दंदन है सुख कंदन नंद को नंदा। बंक बिलोचन की अवलोकनि है दुख योजन प्रेम को फंदा। जा को लखैं मुख रूप अनुपम होत पराजय कोटिक चंदा। हौं रसखानि बिकाइ गई उन मोल लई सजनी सुख चंदा

maina manohara hī dukha daṃdana hai sukha kaṃdana naṃda ko naṃdā| baṃka bilocana kī avalokani hai dukha yojana prema ko phaṃdā| jā ko lakhaiṃ mukha rūpa anupama hota parājaya koṭika caṃdā| hauṃ rasakhāni bikāi gaī una mola laī sajanī sukha caṃdā

सोहत है चँदवा सिर मोर के तैसिय सुंदर पाग कसी है। तैसिय गोरज भाल बिराजति जैसी हियें बनमाल लसी है। रसखानि बिलोकत बौरी भई दृगमूँदि कै ग्‍वालि पुकारि हँसी है। खोलि री नैननि, खोलौं कहा वह मूरति नैनन माँझ बसी है

sohata hai ca~davā sira mora ke taisiya suṃdara pāga kasī hai| taisiya goraja bhāla birājati jaisī hiyeṃ banamāla lasī hai| rasakhāni bilokata baurī bhaī dṛgamū~di kai gvāli pukāri ha~sī hai| kholi rī nainani, kholauṃ kahā vaha mūrati nainana mā~jha basī hai

सुनि री! पिय मोहन की बतियाँ अति दीठ भयौ नहिं कानि करै। निसि बासरु औसर देत नहीं छिनहीं छिन द्वार ही आनि अरै। निकसी मति नागरि डौंड़ी बजी ब्रज मंडल मैं यह कौन भरै। अब रूप की रौर परी रसखानि रहै तिय कौऊ न माँझ धरै

suni rī! piya mohana kī batiyā~ ati dīṭha bhayau nahiṃ kāni karai| nisi bāsaru ausara deta nahīṃ chinahīṃ china dvāra hī āni arai| nikasī mati nāgari ḍauṃr̤ī bajī braja maṃḍala maiṃ yaha kauna bharai| aba rūpa kī raura parī rasakhāni rahai tiya kauū na mā~jha dharai

रंग भर्यौ मुसकान लला निकस्‍यौ कल कुंजन ते सुखदाई। मैं तबही निकसी घर ते तनि नैन बिसाल की चोट चलाई।। घूमि गिरी रसखानि तब हरिनी जिमि बान लगैं गिर जाई। टूटि गयौ घर को सब बंधन छूटिगौ आरज लाज बड़ाई

raṃga bharyau musakāna lalā nikasyau kala kuṃjana te sukhadāī| maiṃ tabahī nikasī ghara te tani naina bisāla kī coṭa calāī|| ghūmi girī rasakhāni taba harinī jimi bāna lagaiṃ gira jāī| ṭūṭi gayau ghara ko saba baṃdhana chūṭigau āraja lāja bar̤āī

खंजन नैन फँदे पिंजरा छबि नाहिं रहैं थिर कैसे हुं भाई। छूटि गई कुलकानि सखी रसखानि लखी मुसकानि सुहाई।। चित्र कढ़े से रहे मेरे नैन न बैन कढ़े मुख दीनी दुहाई। कैसी करौं कित जाऊँ अली सब बोलि उठैं यह बावरी आई

khaṃjana naina pha~de piṃjarā chabi nāhiṃ rahaiṃ thira kaise huṃ bhāī| chūṭi gaī kulakāni sakhī rasakhāni lakhī musakāni suhāī|| citra kar̤he se rahe mere naina na baina kar̤he mukha dīnī duhāī| kaisī karauṃ kita jāū~ alī saba boli uṭhaiṃ yaha bāvarī āī

कुंजगली मैं अली निकसी तहाँ साँकरे ढोटा कियौ भटभेरो। माई री वा मुख की मुसकान गयौ मन बूढ़ि फिरै नहिं फेरो।। डोरि लियौ दृग चोरि लियौ चित डार्यौ है प्रेम को फंद घनेरो। कैसा करौं अब क्‍यों निकसों रसखानि पर्यौ तन रूप को घेरो

kuṃjagalī maiṃ alī nikasī tahā~ sā~kare ḍhoṭā kiyau bhaṭabhero| māī rī vā mukha kī musakāna gayau mana būr̤hi phirai nahiṃ phero|| ḍori liyau dṛga cori liyau cita ḍāryau hai prema ko phaṃda ghanero| kaisā karauṃ aba kyoṃ nikasoṃ rasakhāni paryau tana rūpa ko ghero

देख्‍यौ रूप अपार, मोहन सुंदर स्‍याम को। वह ब्रजराज कुमार, हिय जिय नैननि में बस्‍यौ

dekhyau rūpa apāra, mohana suṃdara syāma ko| vaha brajarāja kumāra, hiya jiya nainani meṃ basyau

अंत ते न आयौ याही गाँवरे को जायौ, माई बाप रे जिवायौ प्‍याइ दूध बारे बारे को। सोई रसखानि पहिचानि कानि छांड़ि चाहे, लोचन नचावत नचया द्वारे द्वारे को। मैया की सौं सोच कछू मटकी उतारे को न, गोरस के ढारे को न चीर चीर डारे को। यहै दुख भारी गहै डगर हमारी माँझ, नगर हमारे ग्‍वाल बगर हमारे को

aṃta te na āyau yāhī gā~vare ko jāyau, māī bāpa re jivāyau pyāi dūdha bāre bāre ko| soī rasakhāni pahicāni kāni chāṃr̤i cāhe, locana nacāvata nacayā dvāre dvāre ko| maiyā kī sauṃ soca kachū maṭakī utāre ko na, gorasa ke ḍhāre ko na cīra cīra ḍāre ko| yahai dukha bhārī gahai ḍagara hamārī mā~jha, nagara hamāre gvāla bagara hamāre ko

एक ते एक लौं कानन में रहें ढीठ सखा सब लीने कन्‍हाई। आवत ही हौं कहाँ लौं कहीं कोउ कैसे सहै अति की अधिकाई।। खायौ दही मेरो भाजन फोर्यौ न छाड़त चीर दिवाएँ दुहाई। सोंह जसोमति की रसखानि ते भागें मरु करि छूटन पाई

eka te eka lauṃ kānana meṃ raheṃ ḍhīṭha sakhā saba līne kanhāī| āvata hī hauṃ kahā~ lauṃ kahīṃ kou kaise sahai ati kī adhikāī|| khāyau dahī mero bhājana phoryau na chār̤ata cīra divāe~ duhāī| soṃha jasomati kī rasakhāni te bhāgeṃ maru kari chūṭana pāī