Sujān-Rasakhān · 61–80

खंजन मीन सरोजन को मृग को मद गंजन दीरघ नैना। कंजन ते निकस्‍यौ मुसकात सु पान पर्यौ मुख अमृत बैना।। जाइ रटे मन प्रान बिलोचन कानन में रचि मानत चैना। रसखानि कर्यौ घर मो हिय में निसिवासर एक पलौ निकसै ना

khaṃjana mīna sarojana ko mṛga ko mada gaṃjana dīragha nainā| kaṃjana te nikasyau musakāta su pāna paryau mukha amṛta bainā|| jāi raṭe mana prāna bilocana kānana meṃ raci mānata cainā| rasakhāni karyau ghara mo hiya meṃ nisivāsara eka palau nikasai nā

मन लीनो प्‍यारे चितै, पै छटाँक नहिं देत। यहै कहा पाटी पढ़ी, दल को पीछो लेत

mana līno pyāre citai, pai chaṭā~ka nahiṃ deta| yahai kahā pāṭī par̤hī, dala ko pīcho leta

मो मन मानिक ले गयौ, चिते चोर नंदनंद। अब बेमन मैं क्‍या करूँ, परी फेर के फंद

mo mana mānika le gayau, cite cora naṃdanaṃda| aba bemana maiṃ kyā karū~, parī phera ke phaṃda

नैन दलालनि चौहटें, मन मानिक पिय हाथ। रसखाँ ढोल बजाइके, बेच्‍यौ हिय जिय साथ

naina dalālani cauhaṭeṃ, mana mānika piya hātha| rasakhā~ ḍhola bajāike, becyau hiya jiya sātha

प्रीतम नंदकिशोर, जा दिन तें नेननि लग्‍यौ। मन पावन चित्‍त चोर, पलक ओट नहिं सहि सकौं

prītama naṃdakiśora, jā dina teṃ nenani lagyau| mana pāvana citta cora, palaka oṭa nahiṃ sahi sakauṃ

मैन मनोहर नैन बड़े सखि सैननि ही मनु मेरो हर्यौ है। गेह को काज तज्‍यौ रसखानि हिये ब्रजराजकुमार अर्यौ है।। आसन-बासन सास के आसन पाने न सासन रंग पर्यौ है। नैननि बंक बिसाल की जोहनि मत्‍त महा मन मत कर्यौ है

maina manohara naina bar̤e sakhi sainani hī manu mero haryau hai| geha ko kāja tajyau rasakhāni hiye brajarājakumāra aryau hai|| āsana-bāsana sāsa ke āsana pāne na sāsana raṃga paryau hai| nainani baṃka bisāla kī johani matta mahā mana mata karyau hai

भटू सुंदर स्‍याम सिरोमनि मोहन जोहन मैं चित्‍त चोरत है। अबलोकन बंक बिलोचन मैं ब्रजबालन के दृग जोरत है। रसखानि महावत रूप सलोने को मारग तें मन मोरत है। ग्रह काज समाज सबै कुल लाज लला ब्रजराज को तोरत है

bhaṭū suṃdara syāma siromani mohana johana maiṃ citta corata hai| abalokana baṃka bilocana maiṃ brajabālana ke dṛga jorata hai| rasakhāni mahāvata rūpa salone ko māraga teṃ mana morata hai| graha kāja samāja sabai kula lāja lalā brajarāja ko torata hai

आली लाल घन सों अति सुंदर तैसो लसे पियरो उपरैना। गंडनि पै छलकै छवि कुंडल मंडित कुंतल रूप की सैना। दीरघ बंक बिलोकनि की अबलोकनि चोरति चित्‍त को चैना। मो रसखानि रट्यौ चित्‍त री मुसकाइ कहे अधरामृत बैना

ālī lāla ghana soṃ ati suṃdara taiso lase piyaro uparainā| gaṃḍani pai chalakai chavi kuṃḍala maṃḍita kuṃtala rūpa kī sainā| dīragha baṃka bilokani kī abalokani corati citta ko cainā| mo rasakhāni raṭyau citta rī musakāi kahe adharāmṛta bainā

वह नंद को साँवरो छैल अली अब तौ अति ही इतरान लग्‍यौ। नित घाटन बाटन कुंजन मैं मोहिं देखत ही नियरान लग्‍यौ। रसखानि बखान कहा करियै तकि सैननि सों मुसकान लग्‍यौ। तिरछी बरखी सम मारत है दृग-बान कमान मुकान लग्‍यौ

vaha naṃda ko sā~varo chaila alī aba tau ati hī itarāna lagyau| nita ghāṭana bāṭana kuṃjana maiṃ mohiṃ dekhata hī niyarāna lagyau| rasakhāni bakhāna kahā kariyai taki sainani soṃ musakāna lagyau| tirachī barakhī sama mārata hai dṛga-bāna kamāna mukāna lagyau

मोहन रूप छकी बन डोलति घूमति री तजि लाज बिचारें। बंक बिलोकनि नैन बिसाल सु दंपति कोर कटाछन मारैं।। रंगभरी मुख की मुसकान लखे सखी कौन जु देह सम्‍हारे। ज्‍यौं अरबिंद हिमंत-करी झकझोरि कैं तोरि मरोरि कैं डारैं

mohana rūpa chakī bana ḍolati ghūmati rī taji lāja bicāreṃ| baṃka bilokani naina bisāla su daṃpati kora kaṭāchana māraiṃ|| raṃgabharī mukha kī musakāna lakhe sakhī kauna ju deha samhāre| jyauṃ arabiṃda himaṃta-karī jhakajhori kaiṃ tori marori kaiṃ ḍāraiṃ

आज गई ब्रजराज के मंदिर स्‍याम बिलोक्‍यौ री माई। सोइ उठ्यौ पलिका कल कंचन बैठ्यो महा मनहार कन्‍हाई।। ए सजनी मुसकान लख्‍यौ रसखानि बिलोकनि बंक सुहाई। मैं तब ते कुलकानि तजौ सुबजी ब्रजमंडल मांह दुहाई

āja gaī brajarāja ke maṃdira syāma bilokyau rī māī| soi uṭhyau palikā kala kaṃcana baiṭhyo mahā manahāra kanhāī|| e sajanī musakāna lakhyau rasakhāni bilokani baṃka suhāī| maiṃ taba te kulakāni tajau subajī brajamaṃḍala māṃha duhāī

मोहन के मन की सब जानति जोहन के मोहि मग लियौ मन। मोहन सुंदर आनन चंद तें कुंजनि देख्‍यौ में स्‍याम‍ सिरोमन। ता दिन तें मेरे नैननि लाज तजी कुलकानि की डोलत हौं बन। कैसी करौं रसखानि लगी जक री पकरी पिय के हित को पन

mohana ke mana kī saba jānati johana ke mohi maga liyau mana| mohana suṃdara ānana caṃda teṃ kuṃjani dekhyau meṃ syāma siromana| tā dina teṃ mere nainani lāja tajī kulakāni kī ḍolata hauṃ bana| kaisī karauṃ rasakhāni lagī jaka rī pakarī piya ke hita ko pana

लोक की लाज तज्‍यौ तबहिं जब देख्‍यो सखी ब्रजचंद सलौनो। खंजन मीन सरोजन की छबि गंजन नैन लला दिन होनो। हेर सम्‍हारि सकै रसखानि सो कौन तिया वह रूप सुठोनो। भौंह कमान सौं जोहन को सर बेधत प्राननि नंद को छोनो

loka kī lāja tajyau tabahiṃ jaba dekhyo sakhī brajacaṃda salauno| khaṃjana mīna sarojana kī chabi gaṃjana naina lalā dina hono| hera samhāri sakai rasakhāni so kauna tiyā vaha rūpa suṭhono| bhauṃha kamāna sauṃ johana ko sara bedhata prānani naṃda ko chono

वा मुख की मुसकान भटू अँखियानि तें नेकु टरै नहिं टारी। जौ पलकैं पल लागति हैं पल ही पल माँझ पुकारैं पुकारी। दूसरी ओर तें नेकु चितै इन नैनन नेम गह्यौ बजमारी। प्रेम की बानि की जोग कलानि गही रसखानि बिचार बिचारी

vā mukha kī musakāna bhaṭū a~khiyāni teṃ neku ṭarai nahiṃ ṭārī| jau palakaiṃ pala lāgati haiṃ pala hī pala mā~jha pukāraiṃ pukārī| dūsarī ora teṃ neku citai ina nainana nema gahyau bajamārī| prema kī bāni kī joga kalāni gahī rasakhāni bicāra bicārī

कातिग क्‍वार के प्रात सरोज किते बिकसात निहारे। डीठि परे रतनागर के दरके बहु दामिड़ बिंब बिचारे।। लाल सु जीव जिते रसखानि दरके गीत तोलनि मोलनि भारे। राधिका श्रीमुरलीधर की मधुरी मुसकानि के ऊपर बारे

kātiga kvāra ke prāta saroja kite bikasāta nihāre| ḍīṭhi pare ratanāgara ke darake bahu dāmir̤a biṃba bicāre|| lāla su jīva jite rasakhāni darake gīta tolani molani bhāre| rādhikā śrīmuralīdhara kī madhurī musakāni ke ūpara bāre

बंक बिलोचन हैं दुख-मोचन दीरघ रोचन रंग भरे हैं। घमत बारुनी पान कियें जिमि झूमत आनन रूप ढरै हैं। गंडनि पै झलकै छबि कुंडल नागरि-नैन बिलोकि भरे हैं। बालनि के रसखानि हरे मन ईषद हास के पानि परे हैं

baṃka bilocana haiṃ dukha-mocana dīragha rocana raṃga bhare haiṃ| ghamata bārunī pāna kiyeṃ jimi jhūmata ānana rūpa ḍharai haiṃ| gaṃḍani pai jhalakai chabi kuṃḍala nāgari-naina biloki bhare haiṃ| bālani ke rasakhāni hare mana īṣada hāsa ke pāni pare haiṃ

अब ही खरिक गई, गाइ के दुहाइबे कौं, बावरी ह्वै आई डारि दोहनी यौ पानि की। कोऊ कहै छरी कोऊ मौन परी कोऊ, कोऊ कहै भरी गति हरी अँखियानि की।। सास व्रत टानै नंद बोलत सयाने धाइ दौरि-दौरि मानै-जानै खोरि देवतानि की। सखी सब हँसैं मुरझानि पहिचानि कहूँ, देखी मुसकानि वा अहीर रसखानि की

aba hī kharika gaī, gāi ke duhāibe kauṃ, bāvarī hvai āī ḍāri dohanī yau pāni kī| koū kahai charī koū mauna parī koū, koū kahai bharī gati harī a~khiyāni kī|| sāsa vrata ṭānai naṃda bolata sayāne dhāi dauri-dauri mānai-jānai khori devatāni kī| sakhī saba ha~saiṃ murajhāni pahicāni kahū~, dekhī musakāni vā ahīra rasakhāni kī

मैन-मनोहर बैन बजै सु सजे तन सोहत पीत पटा है। यौं दमकै चमकै झमकैं दुति दामिनि की मनौ स्‍याम घटा है। ए सजनी ब्रजराजकुमार अटा चढ़ि फेरत लाल बटा है। रसखानि महा मधुरी मुख की मुसकानि करै कुलकानि कटा है

maina-manohara baina bajai su saje tana sohata pīta paṭā hai| yauṃ damakai camakai jhamakaiṃ duti dāmini kī manau syāma ghaṭā hai| e sajanī brajarājakumāra aṭā car̤hi pherata lāla baṭā hai| rasakhāni mahā madhurī mukha kī musakāni karai kulakāni kaṭā hai

जा दिन तें मुसकानि चुभी चित ता दिन तें निकसी न निकारी। कुंडल लोल कपोल महा छबि कुंजन तें निकस्‍यो सुखकारी।। हौ सखि आवत ही दगरें पग पैंड़ तजी रिझई बनवारी। रसखानि परी मुस‍कानि के पाननि कौन गनै कुलकानि विचारी

jā dina teṃ musakāni cubhī cita tā dina teṃ nikasī na nikārī| kuṃḍala lola kapola mahā chabi kuṃjana teṃ nikasyo sukhakārī|| hau sakhi āvata hī dagareṃ paga paiṃr̤a tajī rijhaī banavārī| rasakhāni parī musakāni ke pānani kauna ganai kulakāni vicārī

काननि दै अँगुरी रहिहौं जबहीं मुरली धुनि मंद बजैहै। मोहनी ताननि सों रसखानि अटा चढ़ि गोधन गैहै तौ गैहै।। टेरि कहौं सिगरे ब्रज लोगनि काल्हि कोऊ सु कितौ समुझैहै। माइ री वा मुख की मुसकानि सम्‍हारी न जैहे न जैहे न जैहे

kānani dai a~gurī rahihauṃ jabahīṃ muralī dhuni maṃda bajaihai| mohanī tānani soṃ rasakhāni aṭā car̤hi godhana gaihai tau gaihai|| ṭeri kahauṃ sigare braja logani kālhi koū su kitau samujhaihai| māi rī vā mukha kī musakāni samhārī na jaihe na jaihe na jaihe