Sujān-Rasakhān · 161–180

ब्रषभान के गेह दिवारी के द्यौस अ‍हीर अहीरनि भीर भई। जितही तितही धुनि गोधन की सब ही ब्रज ह्वै रह्यौ राग मई।। रसखान तबै हरि राधिका यों कछु सैननि ही रस बेल बई। उहि अंजन आँखिन आँज्‍यौ भटू इत कुंकुम आड़ लिलार दई

braṣabhāna ke geha divārī ke dyausa ahīra ahīrani bhīra bhaī| jitahī titahī dhuni godhana kī saba hī braja hvai rahyau rāga maī|| rasakhāna tabai hari rādhikā yoṃ kachu sainani hī rasa bela baī| uhi aṃjana ā~khina ā~jyau bhaṭū ita kuṃkuma ār̤a lilāra daī

बात सुनी न कहूँ हरि की न कहूँ हरि सों मुख बोल हँसी है। काल्हि ही गोरस बेचन कौं निकसी ब्रजवासिनि बीच लसी है। आजु ही बारक 'लेहु दही' कहि कै कछु नैनन मे बिहसी है। बैरिनि वाहि भई मुसकानि जु वा रसखानि के प्रान बसी है

bāta sunī na kahū~ hari kī na kahū~ hari soṃ mukha bola ha~sī hai| kālhi hī gorasa becana kauṃ nikasī brajavāsini bīca lasī hai| āju hī bāraka 'lehu dahī' kahi kai kachu nainana me bihasī hai| bairini vāhi bhaī musakāni ju vā rasakhāni ke prāna basī hai

ग्‍वालिन द्वैक भुजान गहैं रसखानि कौं लाईं जसोमति पाहैं। लूटत हैं कहैं ये बन मैं मन मैं कहैं ये सुख लूट कहाँ हैं।। अंग ही अंग ज्‍यौं ज्‍यौं ही लगैं त्‍यौं त्‍यौं ही न अंग ही अंग समाहैं। वे पछलैं उलटै पग एक तौ वे पछलैं उलटै पग जाहैं

gvālina dvaika bhujāna gahaiṃ rasakhāni kauṃ lāīṃ jasomati pāhaiṃ| lūṭata haiṃ kahaiṃ ye bana maiṃ mana maiṃ kahaiṃ ye sukha lūṭa kahā~ haiṃ|| aṃga hī aṃga jyauṃ jyauṃ hī lagaiṃ tyauṃ tyauṃ hī na aṃga hī aṃga samāhaiṃ| ve pachalaiṃ ulaṭai paga eka tau ve pachalaiṃ ulaṭai paga jāhaiṃ

दूर तें आई दुरे हीं दिखाइ अटा चढ़ि जाइ गह्यौ तहाँ आरौ। चित कहूँ चितवै कितहूँ, चित्‍त और सौं चाहि करै चखवारौ। रसखानि कहै यहि बीच अचानक जाइ सिढ़ी चढ़ि खास पुकारो। रूखि गई सुकुवार हियो हनि सैन पटू कह्यौ स्‍याम सिधारौ

dūra teṃ āī dure hīṃ dikhāi aṭā car̤hi jāi gahyau tahā~ ārau| cita kahū~ citavai kitahū~, citta aura sauṃ cāhi karai cakhavārau| rasakhāni kahai yahi bīca acānaka jāi sir̤hī car̤hi khāsa pukāro| rūkhi gaī sukuvāra hiyo hani saina paṭū kahyau syāma sidhārau

बंक बिलोकनि हँसनि मुरि, मधुर बैन रसखानि। मिले रसिक रसराज दोउ, हरखि हिये रसखानि

baṃka bilokani ha~sani muri, madhura baina rasakhāni| mile rasika rasarāja dou, harakhi hiye rasakhāni

वह गोधन गावत गोधन मैं जब तें इहि मारग ह्वै निकस्‍यौ। तब ते कुलकानि कितीय करौ यह पापी हियो हुलस्‍यौ हुलस्‍यौ। अब तौ जू भईसु भई नहिं होत है लोग अजान हँस्‍यौ सुहँस्‍यौ। कोउ पीर न जानत सो तिनके हिय मैं रसखानि बस्‍यौ

vaha godhana gāvata godhana maiṃ jaba teṃ ihi māraga hvai nikasyau| taba te kulakāni kitīya karau yaha pāpī hiyo hulasyau hulasyau| aba tau jū bhaīsu bhaī nahiṃ hota hai loga ajāna ha~syau suha~syau| kou pīra na jānata so tinake hiya maiṃ rasakhāni basyau

वा मुसकान पै प्रान दियौ जिय जान दियौ वहि तान पै प्‍यारी। मान दियौ मन मानिक के संग वा मुख मंजु पै जोबनवारी। वा तन कौं रसखानि पै री ताहि दियौ नहि ध्‍यान बिचारी। सो मुंह मौरि करी अब का हुए लाल लै आज समाज में ख्‍वारी

vā musakāna pai prāna diyau jiya jāna diyau vahi tāna pai pyārī| māna diyau mana mānika ke saṃga vā mukha maṃju pai jobanavārī| vā tana kauṃ rasakhāni pai rī tāhi diyau nahi dhyāna bicārī| so muṃha mauri karī aba kā hue lāla lai āja samāja meṃ khvārī

मोहन सों अटक्‍यौ मनु री कल जाते परै सोई क्‍यौं न बतावै। व्‍याकुलता निरखे बिन मूरति भागति भूख न भूषन भावै। देखे तें नैकु सम्‍हार रहै न तबै झुकि के लखि लोग लजावै। चैन नहीं रसखानि दुहुँ विधि भूली सबैं न कछू बनि आवें

mohana soṃ aṭakyau manu rī kala jāte parai soī kyauṃ na batāvai| vyākulatā nirakhe bina mūrati bhāgati bhūkha na bhūṣana bhāvai| dekhe teṃ naiku samhāra rahai na tabai jhuki ke lakhi loga lajāvai| caina nahīṃ rasakhāni duhu~ vidhi bhūlī sabaiṃ na kachū bani āveṃ

भई बावरी ढूँढ़ति वाहि तिया अरी लाल ही लाल भयौ कहा तेरो। ग्रीवा तें छूटि गयौ अबहीं रसखानि तज्‍यौ घर मारग हेरो। डरियैं कहै माय हमारौ बुरी हिय नेकु न सुनो सहै छिन मेरो। काहे को खाइबो जाइबो है सजनी अनखाइबो सीस सहेरो

bhaī bāvarī ḍhū~r̤hati vāhi tiyā arī lāla hī lāla bhayau kahā tero| grīvā teṃ chūṭi gayau abahīṃ rasakhāni tajyau ghara māraga hero| ḍariyaiṃ kahai māya hamārau burī hiya neku na suno sahai china mero| kāhe ko khāibo jāibo hai sajanī anakhāibo sīsa sahero

मो मन मोहन कों मिलि कै सबहीं मुसकानि दिखाइ दई। वह मोहनी मूरति रूपमई सबहीं जितई तब हौं चितई।। उन तौ अपने घर की रसखानि चलौ बिधि राह लई। कछु मोहिं को पाप पर्यौ पल मैं पग पावत पौरि पहार भई

mo mana mohana koṃ mili kai sabahīṃ musakāni dikhāi daī| vaha mohanī mūrati rūpamaī sabahīṃ jitaī taba hauṃ citaī|| una tau apane ghara kī rasakhāni calau bidhi rāha laī| kachu mohiṃ ko pāpa paryau pala maiṃ paga pāvata pauri pahāra bhaī

डोलिबो कुंजनि कुंजनि को अरु बेनु बजाइबौ धेनु चरैबो। मोहिनी ताननि सों रसखानि सखानि के संग को गोधन गैबो। ये सब डारि दिए मन मारि विसारि दयौ सगरौ सुख पैबौ। भूलत क्‍यों करि नेहन ही को 'दही' करिबो मुसकाई चितैबो

ḍolibo kuṃjani kuṃjani ko aru benu bajāibau dhenu caraibo| mohinī tānani soṃ rasakhāni sakhāni ke saṃga ko godhana gaibo| ye saba ḍāri die mana māri visāri dayau sagarau sukha paibau| bhūlata kyoṃ kari nehana hī ko 'dahī' karibo musakāī citaibo

प्रेम मरोरि उठै तब ही मन पाग मरोरनि में उरझावै। रूसे से ह्वै दृग मोसों रहैं लखि मोहन मूरति मो पै न आवै।। बोले बिना नहिं चैन परै रसखानि सुने कल श्रीनन पावै। भौंह मरोरिबो री रूसिबो झुकिबो पिय सों सजनी निखरावै

prema marori uṭhai taba hī mana pāga marorani meṃ urajhāvai| rūse se hvai dṛga mosoṃ rahaiṃ lakhi mohana mūrati mo pai na āvai|| bole binā nahiṃ caina parai rasakhāni sune kala śrīnana pāvai| bhauṃha maroribo rī rūsibo jhukibo piya soṃ sajanī nikharāvai

बागन में मुरली रसखान सुनी सुनिकै जिय रीझ पचैगो। धीर समीर को नीर भरौं नहिं माइ झकै और बबा सकुचैगो।। आली दुरेधे को चोटनि नैम कहो अब कौन उपाय बचैगौ। जायबौ भाँति कहाँ घर सों परसों वह रास परोस रचैगौ

bāgana meṃ muralī rasakhāna sunī sunikai jiya rījha pacaigo| dhīra samīra ko nīra bharauṃ nahiṃ māi jhakai aura babā sakucaigo|| ālī duredhe ko coṭani naima kaho aba kauna upāya bacaigau| jāyabau bhā~ti kahā~ ghara soṃ parasoṃ vaha rāsa parosa racaigau

बेनु बजावत गोधन गावत ग्‍वालन संग गली मधि आयौ। बाँसुरी मैं उनि मेरोई नाँव सुग्‍वालिनि के मिस टेरि सुनायौ।। ए सजनी सुनि सास के त्रासनि नंद के पास उसास न आयौ। कैसी करौ रसखानि नहिं हित चैनन ही चितचोर चुरायौ

benu bajāvata godhana gāvata gvālana saṃga galī madhi āyau| bā~surī maiṃ uni meroī nā~va sugvālini ke misa ṭeri sunāyau|| e sajanī suni sāsa ke trāsani naṃda ke pāsa usāsa na āyau| kaisī karau rasakhāni nahiṃ hita cainana hī citacora curāyau

एरी चतुर सुजान भयौ अजान हि जान कै। तजि दीनी पहचान, जान अपनी जान कौं

erī catura sujāna bhayau ajāna hi jāna kai| taji dīnī pahacāna, jāna apanī jāna kauṃ

पूरब पुन्‍यनि तें चितई जिन ये अँखियाँ मुसकानि भरी जू। कोऊ रहीं पुतरी सी खरी कोऊ घाट डरी कोऊ बाट परी जू। जे अपने घरहीं रसखानि कहैं अरु हौंसनि जाति मरी जू। लाख जे बाल बिहाल करी ते निहाल करी न विहाल करी जू

pūraba punyani teṃ citaī jina ye a~khiyā~ musakāni bharī jū| koū rahīṃ putarī sī kharī koū ghāṭa ḍarī koū bāṭa parī jū| je apane gharahīṃ rasakhāni kahaiṃ aru hauṃsani jāti marī jū| lākha je bāla bihāla karī te nihāla karī na vihāla karī jū

आजु री नंदलला निकस्‍यौ तुलसीबन तें बन कैं मुसकातो। देखें बनै न बनै कहतै अब सो सुख जो मुख मैं न समातो। हौं रसखानि बिलोकिबे कौं कुलकानि के काज कियौ हिय हातो। आइ गई अलबेली अचानक ए भटू लाज को काज कहा तो

āju rī naṃdalalā nikasyau tulasībana teṃ bana kaiṃ musakāto| dekheṃ banai na banai kahatai aba so sukha jo mukha maiṃ na samāto| hauṃ rasakhāni bilokibe kauṃ kulakāni ke kāja kiyau hiya hāto| āi gaī alabelī acānaka e bhaṭū lāja ko kāja kahā to

अति लोक की लाज समूह में छौंरि के राखि थकी वह संकट सों। पल मैं कुलमानि की मेड नखी नहिं रोकी रुकी पल के पट सों। रसखानि सु केतो उचाटि रही उचटी न संकोच की औचट सों। अलि कोटि कियो हटकी न रही अटकी अँलिया लटकी औचट सों

ati loka kī lāja samūha meṃ chauṃri ke rākhi thakī vaha saṃkaṭa soṃ| pala maiṃ kulamāni kī meḍa nakhī nahiṃ rokī rukī pala ke paṭa soṃ| rasakhāni su keto ucāṭi rahī ucaṭī na saṃkoca kī aucaṭa soṃ| ali koṭi kiyo haṭakī na rahī aṭakī a~liyā laṭakī aucaṭa soṃ

अधर लगाइ रस प्‍याइ बाँसुरी बजाइ, मेरो नाम गाइ हाइ जादू कियौ मन मैं। नटखट नवल सुधर नंदनंदन ने, करि कै अचेत चेत हरि कै जतन मैं। झटपट उलट पुलट पट परिधान, जानि लागीं लाजन पै सबै बाम बन मैं। रस रास सरस रँगीलो रसखानि आनि, जानि जोरि जुगुति बिलास कियौ जन मैं

adhara lagāi rasa pyāi bā~surī bajāi, mero nāma gāi hāi jādū kiyau mana maiṃ| naṭakhaṭa navala sudhara naṃdanaṃdana ne, kari kai aceta ceta hari kai jatana maiṃ| jhaṭapaṭa ulaṭa pulaṭa paṭa paridhāna, jāni lāgīṃ lājana pai sabai bāma bana maiṃ| rasa rāsa sarasa ra~gīlo rasakhāni āni, jāni jori juguti bilāsa kiyau jana maiṃ

काछ नयौ इकतौ बर जेउर दीठि जसोमति राज कर्यौ री। या ब्रज-मंडल में रसखान कछू तब तें रस रास पर्यौ री। देखियै जीवन को फल आजु ही लाजहिं काल सिंगार हौं बोरी। केते दिनानि पै जानति हो अंखियान के भागनि स्‍याम नच्‍चौरी

kācha nayau ikatau bara jeura dīṭhi jasomati rāja karyau rī| yā braja-maṃḍala meṃ rasakhāna kachū taba teṃ rasa rāsa paryau rī| dekhiyai jīvana ko phala āju hī lājahiṃ kāla siṃgāra hauṃ borī| kete dināni pai jānati ho aṃkhiyāna ke bhāgani syāma naccaurī