Sujān-Rasakhān · 1–20

मानुस हौं तो वही रसखान, बसौं मिलि गोकुल गाँव के ग्वारन। जो पसु हौं तो कहा बस मेरो, चरौं नित नंद की धेनु मँझारन॥ पाहन हौं तो वही गिरि को, जो धर्यो कर छत्र पुरंदर कारन। जो खग हौं तो बसेरो करौं मिलि कालिंदीकूल कदम्ब की डारन॥

mānusa hauṃ to vahī rasakhāna, basauṃ mili gokula gā~va ke gvārana| jo pasu hauṃ to kahā basa mero, carauṃ nita naṃda kī dhenu ma~jhārana|| pāhana hauṃ to vahī giri ko, jo dharyo kara chatra puraṃdara kārana| jo khaga hauṃ to basero karauṃ mili kāliṃdīkūla kadamba kī ḍārana||

जो रसना रस ना बिलसै तेहि देहु सदा निदा नाम उचारन। मो कत नीकी करै करनी जु पै कुंज-कुटीरन देहु बुहारन। सिद्धि समृद्धि सबै रसखानि नहौं ब्रज रेनुका-संग-सँवारन। खास निवास लियौ जु पै तो वही कालिंदी-कूल-कदंब की डारन

jo rasanā rasa nā bilasai tehi dehu sadā nidā nāma ucārana| mo kata nīkī karai karanī ju pai kuṃja-kuṭīrana dehu buhārana| siddhi samṛddhi sabai rasakhāni nahauṃ braja renukā-saṃga-sa~vārana| khāsa nivāsa liyau ju pai to vahī kāliṃdī-kūla-kadaṃba kī ḍārana

बैन वही उनकौ गुन गाइ, औ कान वही उन बैन सों सानी। हाथ वही उन गात सरैं, अरु पाइ वही जु वही अनुजानी॥ जान वही उन प्रानके संग, औ मान वही जु करै मनमानी। त्यों रसखानि वही रसखानि, जु है रसखानि, सो है रसखानी॥

baina vahī unakau guna gāi, au kāna vahī una baina soṃ sānī| hātha vahī una gāta saraiṃ, aru pāi vahī ju vahī anujānī|| jāna vahī una prānake saṃga, au māna vahī ju karai manamānī| tyoṃ rasakhāni vahī rasakhāni, ju hai rasakhāni, so hai rasakhānī||

कहा करै रसखानि को, को चुगुल लबार। जो पै राखनहार हे, माखन-चाखनहार

kahā karai rasakhāni ko, ko cugula labāra| jo pai rākhanahāra he, mākhana-cākhanahāra

विमल सरस रसखानि मिलि, भई सकल रसखानि। सोई नव रसखानि कों, चित चातक रसखानि

vimala sarasa rasakhāni mili, bhaī sakala rasakhāni| soī nava rasakhāni koṃ, cita cātaka rasakhāni

सरस नेह लवलीन नव, द्वै सुजानि रसखानि। ताके आस बिसास सों पगे प्रान रसखानि

sarasa neha lavalīna nava, dvai sujāni rasakhāni| tāke āsa bisāsa soṃ page prāna rasakhāni

संकर से सुर जाहि भजैं चतुरानन ध्‍यानन धर्म बढ़ावैं। नैंक हियें जिहि आनत ही जड़ मूढ़ महा रसखान कहावैं। जा पर देव अदेव भू-अंगना वारत प्रानन प्रानन पावैं। ताहि अहीर की छोहरियाँ छछिया भरि छाछ पै नाच नचावैं

saṃkara se sura jāhi bhajaiṃ caturānana dhyānana dharma bar̤hāvaiṃ| naiṃka hiyeṃ jihi ānata hī jar̤a mūr̤ha mahā rasakhāna kahāvaiṃ| jā para deva adeva bhū-aṃganā vārata prānana prānana pāvaiṃ| tāhi ahīra kī chohariyā~ chachiyā bhari chācha pai nāca nacāvaiṃ

सेष, गनेस, महेस, दिनेस, सुरेसहु जाहि निरंतर गावैं। जाहि अनादि अनंत अखंड अछेद अभेद सुबेद बतावैं। नारद से सुक ब्‍यास रहैं पचि हारे तऊ पुनि पार न पावैं। ताहि अहीर की छोहरियाँ छछिया भरि छाछ पै नाच नचावैं

seṣa, ganesa, mahesa, dinesa, suresahu jāhi niraṃtara gāvaiṃ| jāhi anādi anaṃta akhaṃḍa acheda abheda subeda batāvaiṃ| nārada se suka byāsa rahaiṃ paci hāre taū puni pāra na pāvaiṃ| tāhi ahīra kī chohariyā~ chachiyā bhari chācha pai nāca nacāvaiṃ

गावैं गुनि गनिका गंधरब्‍ब और सारद सेष सबै गुन गावत। नाम अनंत गनंत गनेस ज्‍यौं ब्रह्मा त्रिलोचन पार न पावत। जोगी जती तपसी अरु सिद्ध निरंतर जाहि समायि लगावत। ताहि अहीर की छोहरियाँ छछिया भरि छाछ पै नाच नचावत

gāvaiṃ guni ganikā gaṃdharabba aura sārada seṣa sabai guna gāvata| nāma anaṃta ganaṃta ganesa jyauṃ brahmā trilocana pāra na pāvata| jogī jatī tapasī aru siddha niraṃtara jāhi samāyi lagāvata| tāhi ahīra kī chohariyā~ chachiyā bhari chācha pai nāca nacāvata

लाय समाधि रहे ब्रह्मादिक योगी भये पर अंत न पावैं। साँझ ते भोरहिं भोर ते साँझति सेस सदा नित नाम जपावैं। ढूँढ़ फिरै तिरलोक में साख सुनारद लै कर बीन बजावैं। ताहि अहीर की छोहरियाँ छछिया भरि छाछ पै नाच नचावैं

lāya samādhi rahe brahmādika yogī bhaye para aṃta na pāvaiṃ| sā~jha te bhorahiṃ bhora te sā~jhati sesa sadā nita nāma japāvaiṃ| ḍhū~r̤ha phirai tiraloka meṃ sākha sunārada lai kara bīna bajāvaiṃ| tāhi ahīra kī chohariyā~ chachiyā bhari chācha pai nāca nacāvaiṃ

गुंज गरें सिर मोरपखा अरु चाल गयंद की मो मन भावै। साँवरो नंदकुमार सबै ब्रजमंडली में ब्रजराज कहावै। साज समाज सबै सिरताज औ लाज की बात नहीं कहि आवै। ताहि अहीर की छोहरियाँ छछिया भरि छाछ पै नाच नचावै

guṃja gareṃ sira morapakhā aru cāla gayaṃda kī mo mana bhāvai| sā~varo naṃdakumāra sabai brajamaṃḍalī meṃ brajarāja kahāvai| sāja samāja sabai siratāja au lāja kī bāta nahīṃ kahi āvai| tāhi ahīra kī chohariyā~ chachiyā bhari chācha pai nāca nacāvai

ब्रह्म मैं ढूँढ़्यौ पुरानन गानन बेद-रिचा सुनि चौगुन चायन। देख्‍यौ सुन्‍यौ कबहूँ न कितूँ वह सरूप औ कैसे सुभायन। टेरत हेरत हारि पर्यौ रसखानि बतायौ न लोग लुगायन। देखौ दुरौ वह कुंज-कुटीर में बैठी पलोटत राधिका-पायन

brahma maiṃ ḍhū~r̤hyau purānana gānana beda-ricā suni cauguna cāyana| dekhyau sunyau kabahū~ na kitū~ vaha sarūpa au kaise subhāyana| ṭerata herata hāri paryau rasakhāni batāyau na loga lugāyana| dekhau durau vaha kuṃja-kuṭīra meṃ baiṭhī paloṭata rādhikā-pāyana

कंस कुढ़्यौ सुन बानी आकास की ज्‍यावनहारहिं मारन धायौ। भादव साँवरी आठई कों रसखान महाप्रभु देवकी जायौ। रैनि अँधेरी में लै बसुदेव महायन में अरगै धरि आयौ। काहु न चौजुग जागत पायौ सो राति जसोमति सोवत पायौ

kaṃsa kur̤hyau suna bānī ākāsa kī jyāvanahārahiṃ mārana dhāyau| bhādava sā~varī āṭhaī koṃ rasakhāna mahāprabhu devakī jāyau| raini a~dherī meṃ lai basudeva mahāyana meṃ aragai dhari āyau| kāhu na caujuga jāgata pāyau so rāti jasomati sovata pāyau

संभु धरै ध्‍यान जाको जपत जहान सब, तातें न महान और दूसर अवरेख्‍यौ मैं। कहै दसखान वही बालक सरूप धरै, जाको कछु रूप रंग अद्भुत अवलेख्‍यौ मैं। कहा कहूँ आली कछु कहती बनै न दसा, नंद जी के अंगना में कौतुक एक देख्‍यौ मैं। जगत को ठाटी महापुरुष विराटी जो, निरंजन निराटी ताहि माटी खात देख्‍यौ मैं

saṃbhu dharai dhyāna jāko japata jahāna saba, tāteṃ na mahāna aura dūsara avarekhyau maiṃ| kahai dasakhāna vahī bālaka sarūpa dharai, jāko kachu rūpa raṃga adbhuta avalekhyau maiṃ| kahā kahū~ ālī kachu kahatī banai na dasā, naṃda jī ke aṃganā meṃ kautuka eka dekhyau maiṃ| jagata ko ṭhāṭī mahāpuruṣa virāṭī jo, niraṃjana nirāṭī tāhi māṭī khāta dekhyau maiṃ

वेई ब्रह्म ब्रह्मा जाहि सेवत हैं रैन-दिन, सदासिव सदा ही धरत ध्‍यान गाढ़े हैं। वेई विष्‍नु जाके काज मानी मूढ़ राजा रंक, जोगी जती ह्वै कै सीत सह्यौ अंग डाढ़े हैं। वेई ब्रजचंद रसखानि प्रान प्रानन के, जाके अभिलाख लाख-लाख भाँति बाढ़े हैं। जसुधा के आगे बसुधा के मान-मौचन से, तामरस-लोचन खरोचन को ठाढ़े हैं

veī brahma brahmā jāhi sevata haiṃ raina-dina, sadāsiva sadā hī dharata dhyāna gār̤he haiṃ| veī viṣnu jāke kāja mānī mūr̤ha rājā raṃka, jogī jatī hvai kai sīta sahyau aṃga ḍār̤he haiṃ| veī brajacaṃda rasakhāni prāna prānana ke, jāke abhilākha lākha-lākha bhā~ti bār̤he haiṃ| jasudhā ke āge basudhā ke māna-maucana se, tāmarasa-locana kharocana ko ṭhār̤he haiṃ

सेष सुरेस दिनेस गनेस अजेस धनेस महेस मनावौ। कोऊ भवानी भजौ मन की सब आस सबै विधि जोई पुरावौ। कोऊ रमा भजि लेहु महाधन कोऊ कहूँ मन वाँछित पावौ। पै रसखानि वही मेरा साधन और त्रिलौक रहौ कि बसावौ

seṣa suresa dinesa ganesa ajesa dhanesa mahesa manāvau| koū bhavānī bhajau mana kī saba āsa sabai vidhi joī purāvau| koū ramā bhaji lehu mahādhana koū kahū~ mana vā~chita pāvau| pai rasakhāni vahī merā sādhana aura trilauka rahau ki basāvau

द्रौपदी अरु गनिका गज गीध अजामिल सों कियो सो न निहारो। गौतम-गेहिनी कैसी तरी, प्रहलाद को कैसे हर्यो दुख भारो। काहे कौं सोच करै रसखानि कहा करि है रबिनंद विचारो। ताखन जाखन राखियै माखन-चाखनहारो सो राखनहारो

draupadī aru ganikā gaja gīdha ajāmila soṃ kiyo so na nihāro| gautama-gehinī kaisī tarī, prahalāda ko kaise haryo dukha bhāro| kāhe kauṃ soca karai rasakhāni kahā kari hai rabinaṃda vicāro| tākhana jākhana rākhiyai mākhana-cākhanahāro so rākhanahāro

देस बदेस के देखे नरेसन रीझ की कोऊ न बूझ करैगो। तातें तिन्‍हैं तजि जानि गिरयौ गुन सौगुन गाँठि परैगो। बाँसुरीबारो बड़ो रिझवार है स्‍याम जु नैसुक ढार ढरैगौ। लाड़लौ छैल वही तौ अहीर को पीर हमारे हिये की हरैगौ

desa badesa ke dekhe naresana rījha kī koū na būjha karaigo| tāteṃ tinhaiṃ taji jāni girayau guna sauguna gā~ṭhi paraigo| bā~surībāro bar̤o rijhavāra hai syāma ju naisuka ḍhāra ḍharaigau| lār̤alau chaila vahī tau ahīra ko pīra hamāre hiye kī haraigau

संपति सौं सकुचाइ कुबेरहिं रूप सौ दीनी चिनौती अनंगहिं। भोग कै कै ललचाइ पुरंदर जोग कै गंगलई धर मंगहिं। ऐसे भए तौ कहा रसखानि रसै रसना जौ जु मुक्ति-तरंगहिं। दै चित ताके न रंग रच्‍यौ जु रह्यौ रचि राधिका रानी के रंगहिं

saṃpati sauṃ sakucāi kuberahiṃ rūpa sau dīnī cinautī anaṃgahiṃ| bhoga kai kai lalacāi puraṃdara joga kai gaṃgalaī dhara maṃgahiṃ| aise bhae tau kahā rasakhāni rasai rasanā jau ju mukti-taraṃgahiṃ| dai cita tāke na raṃga racyau ju rahyau raci rādhikā rānī ke raṃgahiṃ

कंचन-मंदिर ऊँचे बनाइ कै मानिक लाइ सदा झलकैयत। प्रात ही तें सगरी नगरी नग मोतिन ही की तुलानि तुलैयत। जद्यपि दीन प्रजान प्रजापति की प्रभुता मधवा ललचैयत। ऐसे भए तौ कहा रसखानि जौ साँवरे ग्‍वार सों नेह न लैयत

kaṃcana-maṃdira ū~ce banāi kai mānika lāi sadā jhalakaiyata| prāta hī teṃ sagarī nagarī naga motina hī kī tulāni tulaiyata| jadyapi dīna prajāna prajāpati kī prabhutā madhavā lalacaiyata| aise bhae tau kahā rasakhāni jau sā~vare gvāra soṃ neha na laiyata