Sujān-Rasakhān · 221–240

मो हित तो हित है रसखान छपाकर जानहिं जान अजानहिं। सोच चबाव चल्‍यौ चहुँधा चलि री चलि रीखत रोहि निदानहिं। जो चहियै लहियै भरि चाहि हिये उहियै हित काज कहा नहिं। जान दे सास रिसान दै नंदहिं पानि दे मोहि तू कान दै तानहिं

mo hita to hita hai rasakhāna chapākara jānahiṃ jāna ajānahiṃ| soca cabāva calyau cahu~dhā cali rī cali rīkhata rohi nidānahiṃ| jo cahiyai lahiyai bhari cāhi hiye uhiyai hita kāja kahā nahiṃ| jāna de sāsa risāna dai naṃdahiṃ pāni de mohi tū kāna dai tānahiṃ

तेरी गलीन मैं जा दिन ते निकसे मन मोहन गोधन गावत। ये ब्रज लोग सो कौन सी बात चलाइ कै जो नहिं नैन चलावत। वे रसखानि जो रीझहैं नेकु तौ रीझि कै क्‍यों न बनाइ रिझावत। बावरी जौ पै कलंक लग्‍यौ तो निसंक है क्‍यौं नहीं अंक लगावत

terī galīna maiṃ jā dina te nikase mana mohana godhana gāvata| ye braja loga so kauna sī bāta calāi kai jo nahiṃ naina calāvata| ve rasakhāni jo rījhahaiṃ neku tau rījhi kai kyoṃ na banāi rijhāvata| bāvarī jau pai kalaṃka lagyau to nisaṃka hai kyauṃ nahīṃ aṃka lagāvata

जाहु न कोऊ सखी जमुना जल रोके खड़ो मग नंद को लाला। नैन नचाइ चलाइ चितै रसखानि चलावत प्रेम को भाला। मैं जु गई हुती बैरन बाहर मेरी करी गति टूटि गौ माला। होरी भई कै हरी भए लाल कै लाल गुलाल पगी ब्रजमाला

jāhu na koū sakhī jamunā jala roke khar̤o maga naṃda ko lālā| naina nacāi calāi citai rasakhāni calāvata prema ko bhālā| maiṃ ju gaī hutī bairana bāhara merī karī gati ṭūṭi gau mālā| horī bhaī kai harī bhae lāla kai lāla gulāla pagī brajamālā

अरी अनोखी बाम, तू आई गौने नई। बाहर धरसि न पाय, है छलिया तुव ताक मैं

arī anokhī bāma, tū āī gaune naī| bāhara dharasi na pāya, hai chaliyā tuva tāka maiṃ

बिहरैं पिय प्‍यारी सनेह सने छहरैं चुनरी के फवा कहरैं। सिहरैं नव जोबन रंग अनंग सुभंग अपांगनि की गहरैं। बहरें रसखानि नदी रस की लहरैं बनिता कुल हू भहरैं। कहरैं बिरही जन आतप सों लहरैं लली लाल लिये पहरैं

biharaiṃ piya pyārī saneha sane chaharaiṃ cunarī ke phavā kaharaiṃ| siharaiṃ nava jobana raṃga anaṃga subhaṃga apāṃgani kī gaharaiṃ| bahareṃ rasakhāni nadī rasa kī laharaiṃ banitā kula hū bhaharaiṃ| kaharaiṃ birahī jana ātapa soṃ laharaiṃ lalī lāla liye paharaiṃ

सोई हुती पिय की छतियाँ लगि बाल प्रबीन महा मुद मानै। केस खुले छहरैं बहरैं फहरैं छबि देखत मैन अमानै। वा रस मैं रसखानि पगी रति रैन जगी अँखियाँ अनुमानै। चंद पै बिंब औ बिंब कैरव कैरव पै मुकता प्रयानै

soī hutī piya kī chatiyā~ lagi bāla prabīna mahā muda mānai| kesa khule chaharaiṃ baharaiṃ phaharaiṃ chabi dekhata maina amānai| vā rasa maiṃ rasakhāni pagī rati raina jagī a~khiyā~ anumānai| caṃda pai biṃba au biṃba kairava kairava pai mukatā prayānai

अंगनि अंग मिलाइ दोऊ रसखानि रहे लिपटे तरु घाहीं। संगनि संग अनंग को रंग सुरंग सनी पिय दै गल बाहीं। बैन ज्‍यौं मैन सु ऐन सनेह को लूटि रहे रति अंदर जाहीं। नीबी गहै कुच कंचन कुंभ कहै बनिता पिय नाही जु नाहीं

aṃgani aṃga milāi doū rasakhāni rahe lipaṭe taru ghāhīṃ| saṃgani saṃga anaṃga ko raṃga suraṃga sanī piya dai gala bāhīṃ| baina jyauṃ maina su aina saneha ko lūṭi rahe rati aṃdara jāhīṃ| nībī gahai kuca kaṃcana kuṃbha kahai banitā piya nāhī ju nāhīṃ

आज अचानक राधिका रूप-निधान सों भेंट भई बन माहीं। देखत दीठि परे रसखानि मिले भरि अंक दिये गलबाहीं। प्रेम-पगी बतियाँ दुहुँ घाँ की दुहुँ कों लगीं अति ही जित चाहीं। मोहिनी मंत्र बसीकर जंत्र हटा पिय की तिय की नहिं नाही

āja acānaka rādhikā rūpa-nidhāna soṃ bheṃṭa bhaī bana māhīṃ| dekhata dīṭhi pare rasakhāni mile bhari aṃka diye galabāhīṃ| prema-pagī batiyā~ duhu~ ghā~ kī duhu~ koṃ lagīṃ ati hī jita cāhīṃ| mohinī maṃtra basīkara jaṃtra haṭā piya kī tiya kī nahiṃ nāhī

वह सोई हुती परजंक लली लला लोनो सु आह भुजा भरिकै। अकुलाइ कै चौंकि उठी सु डरी निकरी चहैं अंकनि तें फरिकै। झटका झटकी मैं फटौ पटुका दर की अंगिया मुकता झरिकै। मुख बोल कढ़े रिस से रसखानि हटौ जू लला निबिया धरिकै

vaha soī hutī parajaṃka lalī lalā lono su āha bhujā bharikai| akulāi kai cauṃki uṭhī su ḍarī nikarī cahaiṃ aṃkani teṃ pharikai| jhaṭakā jhaṭakī maiṃ phaṭau paṭukā dara kī aṃgiyā mukatā jharikai| mukha bola kar̤he risa se rasakhāni haṭau jū lalā nibiyā dharikai

अँखियाँ अँखियाँ सों सकाइ मिलाइ हिलाइ रिझाइ हियो हरिबो। बतिया चित चोरन चेटक सी रस चारु चरित्रन ऊचिरबो। रसखानि के प्रान सुधा भरिबो अधरान पै त्‍यौं अधरा धरिबो। इतने सब मैन के मोहिनी जंत्र पै मंत्र वसीकर सो करिबौ

a~khiyā~ a~khiyā~ soṃ sakāi milāi hilāi rijhāi hiyo haribo| batiyā cita corana ceṭaka sī rasa cāru caritrana ūcirabo| rasakhāni ke prāna sudhā bharibo adharāna pai tyauṃ adharā dharibo| itane saba maina ke mohinī jaṃtra pai maṃtra vasīkara so karibau

बागन का को जाओ पिया, बैठी ही बाग लगाभ दिखाऊँ। एड़ी अनाकर सी मौरि रही, बरियाँ दोउ चंपे की डार नवाऊँ। छातनि मैं रस के निबुआ अरु घूँघट खोलि कै दाख चखाऊँ। टाँगन के रस चसके रति फूलनि की रसखानि लूटाऊँ

bāgana kā ko jāo piyā, baiṭhī hī bāga lagābha dikhāū~| er̤ī anākara sī mauri rahī, bariyā~ dou caṃpe kī ḍāra navāū~| chātani maiṃ rasa ke nibuā aru ghū~ghaṭa kholi kai dākha cakhāū~| ṭā~gana ke rasa casake rati phūlani kī rasakhāni lūṭāū~

फूलत फूल सवै बन बागन बोलत मौर बसंत के आवत। कोयल की किलकारी सुनै सब कंत बिदेहन तें सब धावत। ऐसे कठोर महा रसखान जु नेकुह मोरी ये पीर न पावत। हक ही सालत है हिय में जब बैरिन कोयल कूक सुनावत

phūlata phūla savai bana bāgana bolata maura basaṃta ke āvata| koyala kī kilakārī sunai saba kaṃta bidehana teṃ saba dhāvata| aise kaṭhora mahā rasakhāna ju nekuha morī ye pīra na pāvata| haka hī sālata hai hiya meṃ jaba bairina koyala kūka sunāvata

रसखान सुनाह वियोग के ताप मलीन महा दुति देह तिया की। पंकज सौ मुख गौ मुरझाय लगी लपटैं बरै स्‍वाँस हिया की। ऐसे में आवत कान्‍ह सुने हुलसै सुतनी तरकी अंगिया की। यों जन जोति उठी तन की उकसाय दई मनौ बाती दिया की

rasakhāna sunāha viyoga ke tāpa malīna mahā duti deha tiyā kī| paṃkaja sau mukha gau murajhāya lagī lapaṭaiṃ barai svā~sa hiyā kī| aise meṃ āvata kānha sune hulasai sutanī tarakī aṃgiyā kī| yoṃ jana joti uṭhī tana kī ukasāya daī manau bātī diyā kī

बिरहा की जू आँच लगी तन में तब जाय परी जमुना जल में। बिरहानल तैं जल सूखि गयौ मछली बहीं छांड़ि गई तल में। जब रेत फटी रु पताल गई तब सेस जर्यौ धरती-तल में। रसखान तबै इहि आँच मिटे तब आय कै स्‍याम लगैं गल मैं

birahā kī jū ā~ca lagī tana meṃ taba jāya parī jamunā jala meṃ| birahānala taiṃ jala sūkhi gayau machalī bahīṃ chāṃr̤i gaī tala meṃ| jaba reta phaṭī ru patāla gaī taba sesa jaryau dharatī-tala meṃ| rasakhāna tabai ihi ā~ca miṭe taba āya kai syāma lagaiṃ gala maiṃ

बाल गुलाब के नीर उसीर सों पीर न जाइ हियैं, जिन ढारी। कंज की माल करौ जू बिछावत होत कहा पुनि चंदन गारौ। एते इलाज बिकाज करौं रसखानि कों काहे कों जारे पै जारौ। चाहत हौ जु छिवायौ भटू तौ दिखाबौं बड़ी बड़ी आँखनवारो

bāla gulāba ke nīra usīra soṃ pīra na jāi hiyaiṃ, jina ḍhārī| kaṃja kī māla karau jū bichāvata hota kahā puni caṃdana gārau| ete ilāja bikāja karauṃ rasakhāni koṃ kāhe koṃ jāre pai jārau| cāhata hau ju chivāyau bhaṭū tau dikhābauṃ bar̤ī bar̤ī ā~khanavāro

काह कहूँ रतियाँ की कथा बतियाँ कहि आवत है न कछू री। आइ गोपाल लियौ भरि अंक कियौ मनभायौ पियौ रस कू री। ताहि दिना सों गड़ी अँखियाँ रसखानि मेरे अंग अंग मैं पूरी। पै न दिखाई परै अब बाबरी दै कै बियोग बिथा मजूरी

kāha kahū~ ratiyā~ kī kathā batiyā~ kahi āvata hai na kachū rī| āi gopāla liyau bhari aṃka kiyau manabhāyau piyau rasa kū rī| tāhi dinā soṃ gar̤ī a~khiyā~ rasakhāni mere aṃga aṃga maiṃ pūrī| pai na dikhāī parai aba bābarī dai kai biyoga bithā majūrī

काह कहूँ सजनी संग की रजनी नित बीतै मुकुंद कोंटे री। आवन रोज कहैं मनभावन आवन की न कबौ करी फेरी। सौतिन-भाग बढ़्यौ ब्रज मैं जिन लूटत हैं निसि रंग घनेरी। मो रसखानि लिखी बिधना मन मारिकै आयु बनी हौं अहेरी

kāha kahū~ sajanī saṃga kī rajanī nita bītai mukuṃda koṃṭe rī| āvana roja kahaiṃ manabhāvana āvana kī na kabau karī pherī| sautina-bhāga bar̤hyau braja maiṃ jina lūṭata haiṃ nisi raṃga ghanerī| mo rasakhāni likhī bidhanā mana mārikai āyu banī hauṃ aherī

आये कहा करि कै कहिए वृषमान लली सों लला दृग जोरत। ता दिन तें अँसुवान की धार रुकी नहीं जद्यपि लोग निहोरत। बेगि चलो रसखान बलाइ लौं क्‍यों अभिमानन भौंह मरोरत। प्‍यारे! सुंदर होय न प्‍यारी अबै पल अधिक में ब्रज बोरत

āye kahā kari kai kahie vṛṣamāna lalī soṃ lalā dṛga jorata| tā dina teṃ a~suvāna kī dhāra rukī nahīṃ jadyapi loga nihorata| begi calo rasakhāna balāi lauṃ kyoṃ abhimānana bhauṃha marorata| pyāre! suṃdara hoya na pyārī abai pala adhika meṃ braja borata

गोकुल के बिछुरे को सखी दुख प्रान ते नेकु गयौ नहीं काढ़्यौ। सो फिर कोस हजार तें आय कै रूप दिखाय दधे पर दाध्‍यौ। सो फिर द्वारिका ओर चले रसखान है सोच यहै जिय गाढ़्यौ। कौन उपाय किये करि है ब्रज में बिरहा कुरुक्षेत्र को बाढ़्यौ

gokula ke bichure ko sakhī dukha prāna te neku gayau nahīṃ kār̤hyau| so phira kosa hajāra teṃ āya kai rūpa dikhāya dadhe para dādhyau| so phira dvārikā ora cale rasakhāna hai soca yahai jiya gār̤hyau| kauna upāya kiye kari hai braja meṃ birahā kurukṣetra ko bār̤hyau

गोकुल नाथ बियोग प्रलै जिमि गोपिन नंद जसोमति जू पर। बाहि गयौ अँसुवान प्रवाह भयौ जल में ब्रजलोक तिहू पर। तीरथराज सी राधिका सु तो रसखान मनौं ब्रज भू पर। पूरन ब्रह्म ह्वै ध्‍यान रह्यौ पिय औधि अखैबट पात के ऊपर

gokula nātha biyoga pralai jimi gopina naṃda jasomati jū para| bāhi gayau a~suvāna pravāha bhayau jala meṃ brajaloka tihū para| tīratharāja sī rādhikā su to rasakhāna manauṃ braja bhū para| pūrana brahma hvai dhyāna rahyau piya audhi akhaibaṭa pāta ke ūpara