Sujān-Rasakhān · 121–140

मोर-पखा सिर ऊपर राखिहौं गुंज की माला गरें पहिरौंगी। ओढ़ि पितंबर लै लकुटी बन गोधन ग्‍वारनि संग फिरौंगी।। भाव तो वोहि मेरो रसखानि सो तेरे कहें सब स्‍वाँग करौंगी। या मुरली मुरलीधर की अधरान धरीं अधरा न धरौंगी।।121।

mora-pakhā sira ūpara rākhihauṃ guṃja kī mālā gareṃ pahirauṃgī| or̤hi pitaṃbara lai lakuṭī bana godhana gvārani saṃga phirauṃgī|| bhāva to vohi mero rasakhāni so tere kaheṃ saba svā~ga karauṃgī| yā muralī muralīdhara kī adharāna dharīṃ adharā na dharauṃgī||121|

आपनो सो ढोटा हम सब ही को जानत हैं, दोऊ प्रानी सब ही के काज नित धावहीं। ते तौ रसखानि जब दूर तें तमासो देखैं, तरनितनूजा के निकट नहिं आवहीं आन दिन बात अनहितुन सों कहौं कहा, हितू जेऊ आए ते ये लोचन रावहीं। कहा कहौं आली खाली देत सग ठाली पर, मेरे बनमाली कों न काली तें छुरावहीं

āpano so ḍhoṭā hama saba hī ko jānata haiṃ, doū prānī saba hī ke kāja nita dhāvahīṃ| te tau rasakhāni jaba dūra teṃ tamāso dekhaiṃ, taranitanūjā ke nikaṭa nahiṃ āvahīṃ āna dina bāta anahituna soṃ kahauṃ kahā, hitū jeū āe te ye locana rāvahīṃ| kahā kahauṃ ālī khālī deta saga ṭhālī para, mere banamālī koṃ na kālī teṃ churāvahīṃ

लोग कहैं ब्रज के सिगरे रसखानि अनंदित नंद जसोमति जू पर। छोहरा आजु नयो जनम्‍यौ तुम सो कोऊ भाग भरयौ नहिं भू पर। वारि कै दाम सँवार करौ अपने अपचाल कुचाल ललू पर। नाचत रावरो लाल गुजाल सो काल सों व्‍याल-कपाल के ऊपर

loga kahaiṃ braja ke sigare rasakhāni anaṃdita naṃda jasomati jū para| choharā āju nayo janamyau tuma so koū bhāga bharayau nahiṃ bhū para| vāri kai dāma sa~vāra karau apane apacāla kucāla lalū para| nācata rāvaro lāla gujāla so kāla soṃ vyāla-kapāla ke ūpara

एक समै जमुना-जल मैं सब मज्‍जन हेत धसीं ब्रज-गोरी। त्‍यौं रसखानि गयौ मनमोहन लै कर चीर कदंब की छोरी।। न्‍हाइ जबै निकसी बनिता चहुँ ओर चितै चित रोष करो री। हार हियें भरि भावन सों पट दीने लला बचनामृत धोरी

eka samai jamunā-jala maiṃ saba majjana heta dhasīṃ braja-gorī| tyauṃ rasakhāni gayau manamohana lai kara cīra kadaṃba kī chorī|| nhāi jabai nikasī banitā cahu~ ora citai cita roṣa karo rī| hāra hiyeṃ bhari bhāvana soṃ paṭa dīne lalā bacanāmṛta dhorī

प्रान वही जू रहैं रिझि वा पर रूप वही जिहि वाहि रिझायौ। सीस वही जिन वे परसे पर अंक वही जिन वा परसायौ।। दूध वही जु दुहायौ री वाही दही सु सही जु वही ढरकायौ। और कहाँ लौं कहौं रसखानि री भाव वही जु वही मन भायौ

prāna vahī jū rahaiṃ rijhi vā para rūpa vahī jihi vāhi rijhāyau| sīsa vahī jina ve parase para aṃka vahī jina vā parasāyau|| dūdha vahī ju duhāyau rī vāhī dahī su sahī ju vahī ḍharakāyau| aura kahā~ lauṃ kahauṃ rasakhāni rī bhāva vahī ju vahī mana bhāyau

देखन कौं सखी नैन भए न सबै बन आवत गाइन पाछैं। कान भए प्रति रोम नहीं सुनिबे कौं अमीनिधि बोलनि आछैं।। ए सजनी न सम्‍हारि भरै वह बाँकी बिलोकनि कोर कटाछै। भूमि भयौ न हियो मेरी आली जहाँ हरि खेलत काछनी काछै

dekhana kauṃ sakhī naina bhae na sabai bana āvata gāina pāchaiṃ| kāna bhae prati roma nahīṃ sunibe kauṃ amīnidhi bolani āchaiṃ|| e sajanī na samhāri bharai vaha bā~kī bilokani kora kaṭāchai| bhūmi bhayau na hiyo merī ālī jahā~ hari khelata kāchanī kāchai

मोरपखा मुरली बनमाल लखें हिय कों हियरा उमह्यौ री। ता दिन ते इन बैरिनि को कहि कौन न बोल कुबोल सह्यौ री।। तौ रसखानि सनेह लग्‍यौ कोउ एक कह्यौ कोउ लाख कह्यौ री।। और तो रंग रह्यौ न रह्यौ इक रंग रँगी सोह रंग रह्यौरी

morapakhā muralī banamāla lakheṃ hiya koṃ hiyarā umahyau rī| tā dina te ina bairini ko kahi kauna na bola kubola sahyau rī|| tau rasakhāni saneha lagyau kou eka kahyau kou lākha kahyau rī|| aura to raṃga rahyau na rahyau ika raṃga ra~gī soha raṃga rahyaurī

बन बाग तड़ागनि कुंजगली अँखियाँ मुख पाइहैं देखि दई। अब गोकुल माँझ बिलोकियैगी बह गोप सभाग-सुभाय रई।। मिलिहै हँसि गाइ कबै रसखानि कबै ब्रजबालनि प्रेम भई। वह नील निचोल के घूँघट की छबि देखबी देखन लाज लई

bana bāga tar̤āgani kuṃjagalī a~khiyā~ mukha pāihaiṃ dekhi daī| aba gokula mā~jha bilokiyaigī baha gopa sabhāga-subhāya raī|| milihai ha~si gāi kabai rasakhāni kabai brajabālani prema bhaī| vaha nīla nicola ke ghū~ghaṭa kī chabi dekhabī dekhana lāja laī

काल्हि पर्यौ मुरली-धन मैं रसखानि जू कानन नाम हमारो। ता दिन तें नहिं धीर रखौ जग जानि लयौ अति कीनौ पँवारो। गाँवन गाँवन मैं अब तौ बदनाम भई सब सों कै किनारो। तौ सजनी फिरि फेरि कहौं पिय मेरो वही जग ठोंकि नगारो

kālhi paryau muralī-dhana maiṃ rasakhāni jū kānana nāma hamāro| tā dina teṃ nahiṃ dhīra rakhau jaga jāni layau ati kīnau pa~vāro| gā~vana gā~vana maiṃ aba tau badanāma bhaī saba soṃ kai kināro| tau sajanī phiri pheri kahauṃ piya mero vahī jaga ṭhoṃki nagāro

देखि हौं आँखिन सों पिय कों अरु कानन सों उन बैन को प्‍यारी। बाँके अनंगनि रंगनि की सुरभीनी सुगंधनि नाक मैं डारी। त्‍यौं रसखानि हिये मैं धरौं वहि साँवरी मूरति मैन उजारी। गाँव भरौ कोउ नाँव धरौं पुनि साँवरी हों बनिहों सुकुमारी

dekhi hauṃ ā~khina soṃ piya koṃ aru kānana soṃ una baina ko pyārī| bā~ke anaṃgani raṃgani kī surabhīnī sugaṃdhani nāka maiṃ ḍārī| tyauṃ rasakhāni hiye maiṃ dharauṃ vahi sā~varī mūrati maina ujārī| gā~va bharau kou nā~va dharauṃ puni sā~varī hoṃ banihoṃ sukumārī

तुम चाहो सो कहौ हम तो नंदवारै के संग ठईं सो ठईं। तुम ही कुलबीने प्रवीने सबै हम ही कुछ छाँड़ि गईं सो गईं। रसखान यों प्रीत की रीत नई सुकलंक की मोटैं लईं सो लईं। यह गाँव के बासी हँसे सो हँसे हम स्‍याम की दासी भईं सो भईं

tuma cāho so kahau hama to naṃdavārai ke saṃga ṭhaīṃ so ṭhaīṃ| tuma hī kulabīne pravīne sabai hama hī kucha chā~r̤i gaīṃ so gaīṃ| rasakhāna yoṃ prīta kī rīta naī sukalaṃka kī moṭaiṃ laīṃ so laīṃ| yaha gā~va ke bāsī ha~se so ha~se hama syāma kī dāsī bhaīṃ so bhaīṃ

मोर पखा धरे चारिक चारु बिराजत कोटि अमेठनि फैंटो। गुंज छरा रसखान बिसाल अनंग लजावत अंग करैटो। ऊँचे अटा चढ़ि एड़ी ऊँचाइ हितौ हुलसाय कै हौंस लपेटो। हौं कब के लखि हौं भरि आँखिन आवत गोधन धूरि धूरैटो

mora pakhā dhare cārika cāru birājata koṭi ameṭhani phaiṃṭo| guṃja charā rasakhāna bisāla anaṃga lajāvata aṃga karaiṭo| ū~ce aṭā car̤hi er̤ī ū~cāi hitau hulasāya kai hauṃsa lapeṭo| hauṃ kaba ke lakhi hauṃ bhari ā~khina āvata godhana dhūri dhūraiṭo

कुंजनि कुंजनि गुंज के पुंजनि मंजु लतानि सौं माल बनैबो। मालती मल्लिका कुंद सौं गूंदि हरा हरि के हियरा पहिरैबौ। आली कबै इन भावने भाइन आपुन रीझि कै प्‍यारे रिझैबो। माइ झकै हरि हाँकरिबो रसखानि तकै फिरि के मुसकेबो

kuṃjani kuṃjani guṃja ke puṃjani maṃju latāni sauṃ māla banaibo| mālatī mallikā kuṃda sauṃ gūṃdi harā hari ke hiyarā pahiraibau| ālī kabai ina bhāvane bhāina āpuna rījhi kai pyāre rijhaibo| māi jhakai hari hā~karibo rasakhāni takai phiri ke musakebo

सब धीरज क्‍यों न धरौं सजनी पिय तो तुम सों अनुरागइगौ। जब जोग संजोग को आन बनै तब जोग विजोग को मानेइगौ। निसचै निरधार धरौ जिय में रसखान सबै रस पावेइगौ। जिनके मन सो मन लागि रहै तिनके तन सौं तन लागेइगो

saba dhīraja kyoṃ na dharauṃ sajanī piya to tuma soṃ anurāgaigau| jaba joga saṃjoga ko āna banai taba joga vijoga ko māneigau| nisacai niradhāra dharau jiya meṃ rasakhāna sabai rasa pāveigau| jinake mana so mana lāgi rahai tinake tana sauṃ tana lāgeigo

उनहीं के सनेहन सानी रहैं उनहीं के जु नेह दिवानी रहैं। उनहीं की सुनै न औ बैन त्‍यौं सैंन सों चैन अनेकन ठानी रहैं। उनहीं संग डोलन मैं रसखान सबै सुखसिंध अघानी रहैं। उनहीं बिन ज्‍यों जलहीन ह्वै मीन सी आँखि अंसुधानी रहैं

unahīṃ ke sanehana sānī rahaiṃ unahīṃ ke ju neha divānī rahaiṃ| unahīṃ kī sunai na au baina tyauṃ saiṃna soṃ caina anekana ṭhānī rahaiṃ| unahīṃ saṃga ḍolana maiṃ rasakhāna sabai sukhasiṃdha aghānī rahaiṃ| unahīṃ bina jyoṃ jalahīna hvai mīna sī ā~khi aṃsudhānī rahaiṃ

चंदन खोर पै चित्‍त लगाय कै कुंजन तें निकस्‍यौ मुसकातो। राजत है बनमाल गले अरु मोरपखा सिर पै फहरातो। मैं जब तें रसखान बिलोकति हो कजु और न मोहि सुहातो। प्रीति की रीति में लाज कहा सखि है सब सों बड़ नेह को नातो

caṃdana khora pai citta lagāya kai kuṃjana teṃ nikasyau musakāto| rājata hai banamāla gale aru morapakhā sira pai phaharāto| maiṃ jaba teṃ rasakhāna bilokati ho kaju aura na mohi suhāto| prīti kī rīti meṃ lāja kahā sakhi hai saba soṃ bar̤a neha ko nāto

कौन को लाल सलोनो सखी वह जाकी बड़ी अँखियाँ अनियारी। जोहन बंक बिसाल के बाननि बेधत हैं घट तीछन भारी। रसखानि सम्‍हारि परै नहिं चोट सु कोटि उपाय करें सुखकारी। भाल लिख्‍यौ विधि हेत को बंधन खोलि सकै ऐसो को हितकारी

kauna ko lāla salono sakhī vaha jākī bar̤ī a~khiyā~ aniyārī| johana baṃka bisāla ke bānani bedhata haiṃ ghaṭa tīchana bhārī| rasakhāni samhāri parai nahiṃ coṭa su koṭi upāya kareṃ sukhakārī| bhāla likhyau vidhi heta ko baṃdhana kholi sakai aiso ko hitakārī

आली पग रंगे जे रंग साँवरे मो पै न आवत लालची नैना। धावत हैं उतहीं जित मोहन रोके रुके नहिं घूँघट रोना। काननि कौं कल नाहिं परै सखी प्रेम सों भीजे सुनैं बिन नैना। रसखानि भई मधु की मछियाँ अब नेह को बंधन क्‍यों हूँ छुटे ना।।138।

ālī paga raṃge je raṃga sā~vare mo pai na āvata lālacī nainā| dhāvata haiṃ utahīṃ jita mohana roke ruke nahiṃ ghū~ghaṭa ronā| kānani kauṃ kala nāhiṃ parai sakhī prema soṃ bhīje sunaiṃ bina nainā| rasakhāni bhaī madhu kī machiyā~ aba neha ko baṃdhana kyoṃ hū~ chuṭe nā||138|

श्री वृसभान की छान धुजा अटकी लरकान तें आन लई री। वा रसखान के पानि की जानि छुड़ावति राधिका प्रेममई री। जीवन मुरि सी नेज लिए इनहूँ चितयौ ऊनहूँ चितई री। लाल लली दृग जोरत ही सुरझानि गुड़ी उरझाय दई री

śrī vṛsabhāna kī chāna dhujā aṭakī larakāna teṃ āna laī rī| vā rasakhāna ke pāni kī jāni chur̤āvati rādhikā premamaī rī| jīvana muri sī neja lie inahū~ citayau ūnahū~ citaī rī| lāla lalī dṛga jorata hī surajhāni gur̤ī urajhāya daī rī

आब सबै ब्रज गोप लली ठिठकौं ह्वै गली जमुना-जल न्‍हाने। औचक आइ मिले रसखानि बजावत बेनु सुनावत ताने। हा हा करी सिसकीं सिगरी मति मैन हरी हियरा हुलसाने। चूमें दिवानी अमानी चकोर सों ओर सों दोऊ चलैं दृग बाने

āba sabai braja gopa lalī ṭhiṭhakauṃ hvai galī jamunā-jala nhāne| aucaka āi mile rasakhāni bajāvata benu sunāvata tāne| hā hā karī sisakīṃ sigarī mati maina harī hiyarā hulasāne| cūmeṃ divānī amānī cakora soṃ ora soṃ doū calaiṃ dṛga bāne