Sujān-Rasakhān · 141–160

छूट्यौ गृह काज लोक लाज मन मोहिनी को, भूल्‍यौ मन मोहन को मुरली बजाइबौ। देखो रसखान दिन द्वै में बात फैलि जै है, सजनी कहाँ लौं चंद हाथन दुराइबौ। कालि ही कालिंदी कूल चितयौ अचानक ही, दोउन की दोऊ ओर मुरि मुसकाइबौ। दोऊ परै पैंया दोऊ लेत हैं बलैया, इन्‍हें भूल गई गैया उन्‍हें गागर उठाइबौ

chūṭyau gṛha kāja loka lāja mana mohinī ko, bhūlyau mana mohana ko muralī bajāibau| dekho rasakhāna dina dvai meṃ bāta phaili jai hai, sajanī kahā~ lauṃ caṃda hāthana durāibau| kāli hī kāliṃdī kūla citayau acānaka hī, douna kī doū ora muri musakāibau| doū parai paiṃyā doū leta haiṃ balaiyā, inheṃ bhūla gaī gaiyā unheṃ gāgara uṭhāibau

मंजु मनोहर मूरि लखैं तबहीं सबहीं पतहीं तज दीनी। प्राण पखेरू परे तलफें वह रूप के जाल मैं आस-अधीनी। आँख सों आँख लड़ी जबहीं तब सों ये रहैं अँसुधा रंग भीनी। या रसखानि अधीन भई सब गोप-लली तजि लाज नवीनी

maṃju manohara mūri lakhaiṃ tabahīṃ sabahīṃ patahīṃ taja dīnī| prāṇa pakherū pare talapheṃ vaha rūpa ke jāla maiṃ āsa-adhīnī| ā~kha soṃ ā~kha lar̤ī jabahīṃ taba soṃ ye rahaiṃ a~sudhā raṃga bhīnī| yā rasakhāni adhīna bhaī saba gopa-lalī taji lāja navīnī

नंद को नंदन है दुखकंदन प्रेम के फंदन बाँधि लई हों। एक दिन ब्रजराज के मंदिर मेरी अली इक बार गई हौं। हेर्यौ लला लचकाइ कै मोतन जोहन की चकडोर भई हौं। दौरी फिरौं दृग डोरन मैं हिय मैं अनुराग की बेलि बई हौं

naṃda ko naṃdana hai dukhakaṃdana prema ke phaṃdana bā~dhi laī hoṃ| eka dina brajarāja ke maṃdira merī alī ika bāra gaī hauṃ| heryau lalā lacakāi kai motana johana kī cakaḍora bhaī hauṃ| daurī phirauṃ dṛga ḍorana maiṃ hiya maiṃ anurāga kī beli baī hauṃ

तीरथ भीर में भूलि परी अली छूट गइ नेकु धाय की बाँही। हौं भटकी भटकी निकसी सु कुटुंब जसोमति की जिहिं धाँही। देखत ही रसखान मनौ सु लग्‍यौ ही रह्यौ कब कों हियराँही। भाँति अनेकन भूली हुती उहि द्यौस कौ भूलनि भूलत नाँहीं

tīratha bhīra meṃ bhūli parī alī chūṭa gai neku dhāya kī bā~hī| hauṃ bhaṭakī bhaṭakī nikasī su kuṭuṃba jasomati kī jihiṃ dhā~hī| dekhata hī rasakhāna manau su lagyau hī rahyau kaba koṃ hiyarā~hī| bhā~ti anekana bhūlī hutī uhi dyausa kau bhūlani bhūlata nā~hīṃ

समुझे न कछू अजहूँ हरि सो अज नैन नचाइ नचाइ हँसै। नित सास की सीखै उन्‍मात बनै दिन ही दिन माइ की कांति नसै। चहूँ ओर बबा की सौ, सोर सुनैं मन मेतेऊ आवति री सकसै। पै कहा करौं या रसखानि बिलोकि हियो हुलसै हुलसै हुलसै

samujhe na kachū ajahū~ hari so aja naina nacāi nacāi ha~sai| nita sāsa kī sīkhai unmāta banai dina hī dina māi kī kāṃti nasai| cahū~ ora babā kī sau, sora sunaiṃ mana meteū āvati rī sakasai| pai kahā karauṃ yā rasakhāni biloki hiyo hulasai hulasai hulasai

मारग रोकि रह्यौ रसखानि के कान परी झनकार नई है। लोक चितै चित दै चितए नख तैं मनन माहिं निहाल भई है। ठोढ़ी उठाई चितै मुसकाई मिलाइ कै नैन लगाई लई है। जो बिछिया बजनी सजनी हम मोल लई पुनि बेचि दई है

māraga roki rahyau rasakhāni ke kāna parī jhanakāra naī hai| loka citai cita dai citae nakha taiṃ manana māhiṃ nihāla bhaī hai| ṭhor̤hī uṭhāī citai musakāī milāi kai naina lagāī laī hai| jo bichiyā bajanī sajanī hama mola laī puni beci daī hai

जमुना-तट बीर गई जब तें तब तें जग के मन माँझ तहौं। ब्रज मोहन गोहन लागि भटू हौं लूट भई लूट सी लाख लहौं। रसखान लला ललचाइ रहे गति आपनी हौं कहि कासों कहौं। जिय आवत यों अबतों सब भाँति निसंक ह्वै अंक लगाय रहौं

jamunā-taṭa bīra gaī jaba teṃ taba teṃ jaga ke mana mā~jha tahauṃ| braja mohana gohana lāgi bhaṭū hauṃ lūṭa bhaī lūṭa sī lākha lahauṃ| rasakhāna lalā lalacāi rahe gati āpanī hauṃ kahi kāsoṃ kahauṃ| jiya āvata yoṃ abatoṃ saba bhā~ti nisaṃka hvai aṃka lagāya rahauṃ

औचक दृष्टि परे कहु कान्‍ह जू तासो कहै ननदी अनुरागी। सो सुनि सास रही मुख मोहिं जिठानी फिरै जिय मैं रिस पागी। नीके निहारि कै देखे न आँखिन हौं कबहूँ भरि नैन न जागी। मो पछितावो यहै जु सखी कि कलंक लग्‍यौ पर अंक न लागी

aucaka dṛṣṭi pare kahu kānha jū tāso kahai nanadī anurāgī| so suni sāsa rahī mukha mohiṃ jiṭhānī phirai jiya maiṃ risa pāgī| nīke nihāri kai dekhe na ā~khina hauṃ kabahū~ bhari naina na jāgī| mo pachitāvo yahai ju sakhī ki kalaṃka lagyau para aṃka na lāgī

सास की सासनहीं चलिबो चलियै निसिद्यौस चलावे जिही ढंग। आली चबाव लुगाइन के डर जाति नहीं न नदी ननदी-संग। भावती औ अनभावती भीर मैं छवै न गयौ कबहूँ अंग सों अंग। घैरु करैं घरुहाई सबै रसखानि सौं मो सौं कहा कहा न भयो रंग

sāsa kī sāsanahīṃ calibo caliyai nisidyausa calāve jihī ḍhaṃga| ālī cabāva lugāina ke ḍara jāti nahīṃ na nadī nanadī-saṃga| bhāvatī au anabhāvatī bhīra maiṃ chavai na gayau kabahū~ aṃga soṃ aṃga| ghairu karaiṃ gharuhāī sabai rasakhāni sauṃ mo sauṃ kahā kahā na bhayo raṃga

घर ही घर घैरु घनौ घरिहि घरिहाइनि आगें न साँस भरौं। लखि मेरियै ओर रिसाहिं सबैं सतराहिं जौं सौं हैं अनेक करौं। रसखानि तो काज सबैं ब्रज तौ मेरौ बेरी भयौ कहि कासों लरौं। बिनु देखे न क्‍यों हूँ निमेषै लगैं तेरे लेखें न हू या परेखें मरौं

ghara hī ghara ghairu ghanau gharihi gharihāini āgeṃ na sā~sa bharauṃ| lakhi meriyai ora risāhiṃ sabaiṃ satarāhiṃ jauṃ sauṃ haiṃ aneka karauṃ| rasakhāni to kāja sabaiṃ braja tau merau berī bhayau kahi kāsoṃ larauṃ| binu dekhe na kyoṃ hū~ nimeṣai lagaiṃ tere lekheṃ na hū yā parekheṃ marauṃ

स्‍याम सघन घन घेरि कै, रस बरस्‍यौ रसखानि। भई दिवानी पानि करि, प्रेम-मद्य मन मानि

syāma saghana ghana gheri kai, rasa barasyau rasakhāni| bhaī divānī pāni kari, prema-madya mana māni

कोउ रिझावन कौ रसखानि कहै मुकतानि सौं माँग भरौंगी। कोऊ कहै गहनो अंग-अंग दुकूल सुगंध पर्यौ पहिरौंगी। तूँ न कहै न कहैं तौं कहौं हौं कहूँ न कहाँ तेरे पाँय परौंगी। देखहि तूँ यह फूल की माल जसोमति-लाल-निहाल करौंगी

kou rijhāvana kau rasakhāni kahai mukatāni sauṃ mā~ga bharauṃgī| koū kahai gahano aṃga-aṃga dukūla sugaṃdha paryau pahirauṃgī| tū~ na kahai na kahaiṃ tauṃ kahauṃ hauṃ kahū~ na kahā~ tere pā~ya parauṃgī| dekhahi tū~ yaha phūla kī māla jasomati-lāla-nihāla karauṃgī

प्‍यारी पै जाइ कितौ परि पाइ पची समझाइ सखी की सौं बेना। बारक नंदकिशोर की ओर कह्यौ दृग छोर की कोर करै ना। ह्वै निकस्‍यौ रसखान कहू उत डीठ पर्यौ पियरौं उपरै ना। जीव सो पाय गई पचिवाय कियौ रुचि नेह गए लचि नैंना

pyārī pai jāi kitau pari pāi pacī samajhāi sakhī kī sauṃ benā| bāraka naṃdakiśora kī ora kahyau dṛga chora kī kora karai nā| hvai nikasyau rasakhāna kahū uta ḍīṭha paryau piyarauṃ uparai nā| jīva so pāya gaī pacivāya kiyau ruci neha gae laci naiṃnā

सखियाँ मनुहारि कै हारि रही भृकुटी को न छोर लली नचयौ। चहुवा घनघोर नयौ उनयौ नभ नायक ओर चित्‍ते चितयौ। बिकि आप गई हिय मोल लियौ रसखान हितू न हियों रिझयौ। सिगरो दुःख तीछन कोटि कटाछन काटि कै सौतिन बाँटि दियौ

sakhiyā~ manuhāri kai hāri rahī bhṛkuṭī ko na chora lalī nacayau| cahuvā ghanaghora nayau unayau nabha nāyaka ora citte citayau| biki āpa gaī hiya mola liyau rasakhāna hitū na hiyoṃ rijhayau| sigaro duḥkha tīchana koṭi kaṭāchana kāṭi kai sautina bā~ṭi diyau

खेलै अलीजन के गन मैं उत प्रीतम प्‍यारे सों नेह नवीनो। बैननि बोघ करै इत कौं उत सैननि मोहन को मन लीनो। नैनति की चलिबी कछु जानि सखी रसखानि चितैवे कौं कीनो। जा लखि पाइ जंभाइ गई चुटकी चटकाइ विदा करि दीनो

khelai alījana ke gana maiṃ uta prītama pyāre soṃ neha navīno| bainani bogha karai ita kauṃ uta sainani mohana ko mana līno| nainati kī calibī kachu jāni sakhī rasakhāni citaive kauṃ kīno| jā lakhi pāi jaṃbhāi gaī cuṭakī caṭakāi vidā kari dīno

मोहन के मन भाइ गयौ इक भाइ सों ग्‍वालिनै गोधन बायो। ताकों लग्‍यौ चट, चौहट सों दुरि औचक गात सों गात छबायौ। रसखानि लही इनि चातुरता चुपचाप रही जब लों घर आयो। नैन नचाई चित्‍तै मुसकाइ सू ओठ ह्वै जाइ अँगूठा दिखायौ

mohana ke mana bhāi gayau ika bhāi soṃ gvālinai godhana bāyo| tākoṃ lagyau caṭa, cauhaṭa soṃ duri aucaka gāta soṃ gāta chabāyau| rasakhāni lahī ini cāturatā cupacāpa rahī jaba loṃ ghara āyo| naina nacāī cittai musakāi sū oṭha hvai jāi a~gūṭhā dikhāyau

कान परे मृदु बैन मरु करि मौन रहौ पल आधिक साधे। नंद बबा घर कों अकुलाय गई दधि लैं बिरहानल दाधे। पाय दुहूननि प्राननि प्रान सों लाज दबै चितये दृग आने। नैननि ही रसखान सनेह सही कियो लेउ दही कहि राधे

kāna pare mṛdu baina maru kari mauna rahau pala ādhika sādhe| naṃda babā ghara koṃ akulāya gaī dadhi laiṃ birahānala dādhe| pāya duhūnani prānani prāna soṃ lāja dabai citaye dṛga āne| nainani hī rasakhāna saneha sahī kiyo leu dahī kahi rādhe

केसरिया पट, केसरि खौर, बनौ गर गुंज को हार ढरारो। को हौ जू आपनी या छवि सों जुखरे अँगना प्रति डीठि न डारो। आनि बिकाऊ से होई रहे रसखानि कहै तुम्‍ह रौकि दुवारो। 'है तो बिकाऊँ जौ लेत बनैं हँसबोल निहारो है मोल हमारो

kesariyā paṭa, kesari khaura, banau gara guṃja ko hāra ḍharāro| ko hau jū āpanī yā chavi soṃ jukhare a~ganā prati ḍīṭhi na ḍāro| āni bikāū se hoī rahe rasakhāni kahai tumha rauki duvāro| 'hai to bikāū~ jau leta banaiṃ ha~sabola nihāro hai mola hamāro

एक समय इक ग्‍वालिनि कों ब्रजजीवन खेलत दृष्टि पर्यौ है। बाल प्रबीन सकै करि कै सरकाइ के मौरन चीर धर्यौ है। यौं रस ही रस ही रसखानि सखी अपनीमन भायो कर्यौ है। नंद के लाड़िले ढाँकि दै सीस इहा हमरो बरु हाथ भर्यौ है

eka samaya ika gvālini koṃ brajajīvana khelata dṛṣṭi paryau hai| bāla prabīna sakai kari kai sarakāi ke maurana cīra dharyau hai| yauṃ rasa hī rasa hī rasakhāni sakhī apanīmana bhāyo karyau hai| naṃda ke lār̤ile ḍhā~ki dai sīsa ihā hamaro baru hātha bharyau hai

मैं रसखान की खेलनि जीति के मालती माल उतार लई री। मैरीये जानि कै सूधि सबै चुप है रही काहु न खई री। भावते स्‍वेद की, बास सखी ननदी पहिचानि प्रचंड भई री। मैं लखिबो के अँखियाँ मुसकाय लचाय नचाइ दई री

maiṃ rasakhāna kī khelani jīti ke mālatī māla utāra laī rī| mairīye jāni kai sūdhi sabai cupa hai rahī kāhu na khaī rī| bhāvate sveda kī, bāsa sakhī nanadī pahicāni pracaṃḍa bhaī rī| maiṃ lakhibo ke a~khiyā~ musakāya lacāya nacāi daī rī