Sujān-Rasakhān · 41–60

दृग इतने खिंचे रहैं कानन लौं लट आनन पै लहराइ रही। छकि छेंल छबील छटा छहराह कै कौतुक कोटि दिखाइ रही।। झुकि झूमि झमाकनि चूमि अमी चरि चाँदनी चंद चुराइ रहा। मन भाइ रही रसखानि महा छबि मोहन की तरसाइ रही

dṛga itane khiṃce rahaiṃ kānana lauṃ laṭa ānana pai laharāi rahī| chaki cheṃla chabīla chaṭā chaharāha kai kautuka koṭi dikhāi rahī|| jhuki jhūmi jhamākani cūmi amī cari cā~danī caṃda curāi rahā| mana bhāi rahī rasakhāni mahā chabi mohana kī tarasāi rahī

लाल लसै सब के सबके पट कोटि सुगंधनि भीने। अंगनि अंग सजे सब ही रसखानि अनेक जराउ नवीने। मुकता गलमाल लसै सब ग्‍वार कुवार सिंगार सो कीने। पै सिगरे ब्रज के हरि ही हरि ही कै हरैं हियरा हरि लीने

lāla lasai saba ke sabake paṭa koṭi sugaṃdhani bhīne| aṃgani aṃga saje saba hī rasakhāni aneka jarāu navīne| mukatā galamāla lasai saba gvāra kuvāra siṃgāra so kīne| pai sigare braja ke hari hī hari hī kai haraiṃ hiyarā hari līne

वह घेरनि धेनु अबेर सबेरनि फेरीन लाल लकुट्टनि की। वह तीछन चच्‍छु कटाछन की छबि मोरनि भौंह भृकुट्टनि की।। वह लाल की चाल चुभी चित मैं रसखानि संगीत उघुट्टनि की। वह पीत पटक्‍कनि की चटकानि लटक्‍कनि मोर मुकुट्टनि की

vaha gherani dhenu abera saberani pherīna lāla lakuṭṭani kī| vaha tīchana cacchu kaṭāchana kī chabi morani bhauṃha bhṛkuṭṭani kī|| vaha lāla kī cāla cubhī cita maiṃ rasakhāni saṃgīta ughuṭṭani kī| vaha pīta paṭakkani kī caṭakāni laṭakkani mora mukuṭṭani kī

साँझ समै जिहि देखति ही तिहि पेखन कौं मन मौं ललकै री। ऊँची अटान चढ़ी ब्रजबाम सुलाज सनेह दुरै उझकै री।। गोधन धूरि की धूंधरि मैं तिनकी छबि यौं रसखानि तकै री। पावक के गिरि तें बुधि मानौ चुँवा-लपटी लपकै ललटै री

sā~jha samai jihi dekhati hī tihi pekhana kauṃ mana mauṃ lalakai rī| ū~cī aṭāna car̤hī brajabāma sulāja saneha durai ujhakai rī|| godhana dhūri kī dhūṃdhari maiṃ tinakī chabi yauṃ rasakhāni takai rī| pāvaka ke giri teṃ budhi mānau cu~vā-lapaṭī lapakai lalaṭai rī

देखिक रास महाबन को इस गोपवधू कह्यौ एक बनू पर। देखति हौ सखि मार से गोप कुमार बने जितने ब्रज-भू पर। तीछें निटारि लखौ रसखानि सिंगार करौ किन कोऊ कछू पर। फेरि फिरैं अँखियाँ ठहराति हैं कारे पितंबर वारे के ऊपर

dekhika rāsa mahābana ko isa gopavadhū kahyau eka banū para| dekhati hau sakhi māra se gopa kumāra bane jitane braja-bhū para| tīcheṃ niṭāri lakhau rasakhāni siṃgāra karau kina koū kachū para| pheri phiraiṃ a~khiyā~ ṭhaharāti haiṃ kāre pitaṃbara vāre ke ūpara

दमकैं रवि कुंडल दामिनि से धुरवा जिमि गोरज राजत है। मुकताहल वारन गोपन के सु तौ बूँदन की छबि छाजत है। ब्रजबाल नदी उमही रसखानि मयंकबधू दुति लाजत है। यह आवन श्री मनभावन की बरषा जिमि आज बिराजत है

damakaiṃ ravi kuṃḍala dāmini se dhuravā jimi goraja rājata hai| mukatāhala vārana gopana ke su tau bū~dana kī chabi chājata hai| brajabāla nadī umahī rasakhāni mayaṃkabadhū duti lājata hai| yaha āvana śrī manabhāvana kī baraṣā jimi āja birājata hai

मोर किरीट नवीन लसै मकराकृत कुंडल लोल की डोरनि। ज्‍यों रसखान घने घन में दमकै बिबि दामिनि चाप के छोरनि। मारि है जीव तो जीव बलाय बिलोक बजाय लौंनन की को‍रनि। कौन सुभाय सों आवत स्‍याम बजावत बैनु नचावत मौरनि

mora kirīṭa navīna lasai makarākṛta kuṃḍala lola kī ḍorani| jyoṃ rasakhāna ghane ghana meṃ damakai bibi dāmini cāpa ke chorani| māri hai jīva to jīva balāya biloka bajāya lauṃnana kī korani| kauna subhāya soṃ āvata syāma bajāvata bainu nacāvata maurani

दोउ कानन कुंडल मोरपखा सिर सोहै दुकूल नयो चटको। मनिहार गरे सुकुमार धरे नट-भेस अरे पिय को टटको। सुभ काछनी बैजनी पावन आवन मैन लगै झटको। वह सुंदर को रसखानि अली जु गलीन मैं आइ अबैं अटको

dou kānana kuṃḍala morapakhā sira sohai dukūla nayo caṭako| manihāra gare sukumāra dhare naṭa-bhesa are piya ko ṭaṭako| subha kāchanī baijanī pāvana āvana maina lagai jhaṭako| vaha suṃdara ko rasakhāni alī ju galīna maiṃ āi abaiṃ aṭako

काटे लटे की लटी लकुटी दुपटी सुफटी सोउ आधे कँधाहीं। भावते भेष सबै रसखान न जानिए क्‍यों अँखियाँ ललचाहीं। तू कछू जानत या छबि कों यह कौन है साँबरिया बनमाहीं। जोरत नैंन मरोरत भौंह निहोरत सैन अमेठत बाँही

kāṭe laṭe kī laṭī lakuṭī dupaṭī suphaṭī sou ādhe ka~dhāhīṃ| bhāvate bheṣa sabai rasakhāna na jānie kyoṃ a~khiyā~ lalacāhīṃ| tū kachū jānata yā chabi koṃ yaha kauna hai sā~bariyā banamāhīṃ| jorata naiṃna marorata bhauṃha nihorata saina ameṭhata bā~hī

कैसो मनोहर बानक मोहन सोहन सुंदर काम ते आली। जाहि बिलोकत लाज तजी कुल छूटो है नैननि की चल आली। अधरा मुसकान तरंग लसै रसखनि सुहाइ महाछबि छाली। कुंज गली मधि मोहन सोहन देख्यौ सखी वह रूप-रसीली

kaiso manohara bānaka mohana sohana suṃdara kāma te ālī| jāhi bilokata lāja tajī kula chūṭo hai nainani kī cala ālī| adharā musakāna taraṃga lasai rasakhani suhāi mahāchabi chālī| kuṃja galī madhi mohana sohana dekhyau sakhī vaha rūpa-rasīlī

मोहन छबि रसखानि लखि, अब दृग अपने नाहिं। ऐंचे आवत धनुष से, छूटे सर से जाहिं

mohana chabi rasakhāni lakhi, aba dṛga apane nāhiṃ| aiṃce āvata dhanuṣa se, chūṭe sara se jāhiṃ

या छबि पै रसखानि अब वारौं कोटि मनोज। जाकी उपमा कविन नहिं रहे सु खोज

yā chabi pai rasakhāni aba vārauṃ koṭi manoja| jākī upamā kavina nahiṃ rahe su khoja

कदम करीर तरि पूछनि अधीर गोपी आनन रुखोर गरों खरोई भरोहों सो। चोर हो हमारो प्रेम-चौंतरा मैं हार्यौ गराविन में निकसि भाज्‍यौ है करि लजैरौं सो। ऐसे रूप ऐसो भेष हमैहूं दिखैयौ, देखि। देखत ही रसखानि नेननि चुभेरौं सो। मुकुट झुकोहों हास हियरा हरौहों कटि, फेटा पिपरोहों अंगरंग साँवरौहौं सौ

kadama karīra tari pūchani adhīra gopī ānana rukhora garoṃ kharoī bharohoṃ so| cora ho hamāro prema-cauṃtarā maiṃ hāryau garāvina meṃ nikasi bhājyau hai kari lajairauṃ so| aise rūpa aiso bheṣa hamaihūṃ dikhaiyau, dekhi| dekhata hī rasakhāni nenani cubherauṃ so| mukuṭa jhukohoṃ hāsa hiyarā harauhoṃ kaṭi, pheṭā piparohoṃ aṃgaraṃga sā~varauhauṃ sau

भौंह भरी सुथरी बरुनी अति ही अधरानि रच्‍यौ रंग रातो। कुंडल लोल कपोल महाछबि कुंजन तैं निकस्‍यौ मुसकातो।। छूटि गयौ रसखानि लखै उर भूलि गई तन की सुधि सातो। फूटि गयौ सिर तैं दधि भाजन टूटिगौ नैनन लाज को नातो

bhauṃha bharī sutharī barunī ati hī adharāni racyau raṃga rāto| kuṃḍala lola kapola mahāchabi kuṃjana taiṃ nikasyau musakāto|| chūṭi gayau rasakhāni lakhai ura bhūli gaī tana kī sudhi sāto| phūṭi gayau sira taiṃ dadhi bhājana ṭūṭigau nainana lāja ko nāto

जात हुती जमुना जल कौं मनमोहन घेरि लयौ मग आइ कै। मोद भर्यौ लपटाइ लयौ पट घूँघट ढारि दयौ चित चाइ कै। और कहा रसखानि कहौं मुख चूमत घातन बात बनाइ कै। कैसे निभै कुल-कानि रही हिये साँवरी मूरति की छबि छाइ कै

jāta hutī jamunā jala kauṃ manamohana gheri layau maga āi kai| moda bharyau lapaṭāi layau paṭa ghū~ghaṭa ḍhāri dayau cita cāi kai| aura kahā rasakhāni kahauṃ mukha cūmata ghātana bāta banāi kai| kaise nibhai kula-kāni rahī hiye sā~varī mūrati kī chabi chāi kai

जा दिनतें निरख्यौ नँद-नंदन, कानि तजी घर बन्धन छूट्यो॥ चारु बिलोकनिकी निसि मार, सँभार गयी मन मारने लूट्यो॥ सागरकौं सरिता जिमि धावति रोकि रहे कुलकौ पुल टूट्यो। मत्त भयो मन संग फिरै, रसखानि सुरूप सुधा-रस घूट्यो

jā dinateṃ nirakhyau na~da-naṃdana, kāni tajī ghara bandhana chūṭyo|| cāru bilokanikī nisi māra, sa~bhāra gayī mana mārane lūṭyo|| sāgarakauṃ saritā jimi dhāvati roki rahe kulakau pula ṭūṭyo| matta bhayo mana saṃga phirai, rasakhāni surūpa sudhā-rasa ghūṭyo

सुधि होत बिदा नर नारिन की दुति दीहि परे बहियाँ पर की। रसखान बिलोकत गुंज छरानि तजैं कुल कानि दुहूँ घर की। सहरात हियौ फहरात हवाँ चितबैं कहरानि पितंबर की। यह कौन खरौ इतरात गहै बलि की बहियाँ छहियाँ बर की

sudhi hota bidā nara nārina kī duti dīhi pare bahiyā~ para kī| rasakhāna bilokata guṃja charāni tajaiṃ kula kāni duhū~ ghara kī| saharāta hiyau phaharāta havā~ citabaiṃ kaharāni pitaṃbara kī| yaha kauna kharau itarāta gahai bali kī bahiyā~ chahiyā~ bara kī

ए सजनी मनमोहन नागर आगर दौर करी मन माहीं। सास के त्रास उसास न आवत कैसे सखी ब्रजवास बसाहीं। माखी भई मधु की तरुनी बरनीन के बान बिंधीं कित जाहीं। बीथिन डोलति हैं रसखानि रहैं निज मंदिर में पल नाहीं

e sajanī manamohana nāgara āgara daura karī mana māhīṃ| sāsa ke trāsa usāsa na āvata kaise sakhī brajavāsa basāhīṃ| mākhī bhaī madhu kī tarunī baranīna ke bāna biṃdhīṃ kita jāhīṃ| bīthina ḍolati haiṃ rasakhāni rahaiṃ nija maṃdira meṃ pala nāhīṃ

सखि गोधन गावत हो इक ग्‍वार लख्‍यौ वहि डार गहें बट की। अलकावलि राजति भाल बिसाल लसै बनमाल हिये टटकी। जब तें वह तानि लगी रसखानि निवारै को या मग हौं भटकी। लटकी लट मों दृग-मीननि सों बनसी जियवा नट की अटकी

sakhi godhana gāvata ho ika gvāra lakhyau vahi ḍāra gaheṃ baṭa kī| alakāvali rājati bhāla bisāla lasai banamāla hiye ṭaṭakī| jaba teṃ vaha tāni lagī rasakhāni nivārai ko yā maga hauṃ bhaṭakī| laṭakī laṭa moṃ dṛga-mīnani soṃ banasī jiyavā naṭa kī aṭakī

गाइ सुहाइ न या पैं कहूँ न कहूँ, यह मेरी गरी निकर्यौ है। धीरसमीर कलिंदी के तीर खर्यौ रटै आजु री डीठि पर्यौ है। जा रसखानि बिलोकत ही सहसा ढरि राँग सो आँग ढर्यौ है। गाइन घेरत हेरत सो पट फेरत टेरत आनि पर्यौ है

gāi suhāi na yā paiṃ kahū~ na kahū~, yaha merī garī nikaryau hai| dhīrasamīra kaliṃdī ke tīra kharyau raṭai āju rī ḍīṭhi paryau hai| jā rasakhāni bilokata hī sahasā ḍhari rā~ga so ā~ga ḍharyau hai| gāina gherata herata so paṭa pherata ṭerata āni paryau hai