Inserts after HV 51.12

Line 1

अतिप्रसक्तौ क्रीडायां कृष्णसंकर्षणौ मुहुः

atiprasaktau krīḍāyāṃ kṛṣṇasaṃkarṣaṇau muhuḥ

Line 2

क्वचिद् वेश्मनि निर्गत्य नवनीतं च गृह्णतः

kvacid veśmani nirgatya navanītaṃ ca gṛhṇataḥ

Line 3

संक्षोभ्य तक्रं बहुशो दारकौ दारकैः सह

saṃkṣobhya takraṃ bahuśo dārakau dārakaiḥ saha

Line 4

अन्वभूताम् ततो राजन् घटांश् च परिजघ्नतुः

anvabhūtām tato rājan ghaṭāṃś ca parijaghnatuḥ

Line 5

दधि पीत्वा तु देवेशौ तान् घटांश् च पिपेषतुः

dadhi pītvā tu deveśau tān ghaṭāṃś ca pipeṣatuḥ

Line 6

शिक्यं च परिजग्राह कृष्णो दारकवेषवान्

śikyaṃ ca parijagrāha kṛṣṇo dārakaveṣavān

Line 7

भित्त्वा छित्त्वा च गोविन्दः पपौ क्षीराणि सर्वशः

bhittvā chittvā ca govindaḥ papau kṣīrāṇi sarvaśaḥ

Line 8

तच् छिष्टं चैव देवेशः क्षितौ च समवाक्षिपत्

tac chiṣṭaṃ caiva deveśaḥ kṣitau ca samavākṣipat

Line 9

पायसं च समानीय गृहाद् अन्यत्र विक्षिपन्

pāyasaṃ ca samānīya gṛhād anyatra vikṣipan

Line 10

दारखेभ्यस् तदा कृष्णो ददौ स्वं च समाचरन्

dārakhebhyas tadā kṛṣṇo dadau svaṃ ca samācaran

Line 11

शिक्याच् च घटम् आदाय दध्नां दारकसत्तमः

śikyāc ca ghaṭam ādāya dadhnāṃ dārakasattamaḥ

Line 12

निर्भिद्याच्छिद्य भूमौ तु निष्पपेष स केशवः

nirbhidyācchidya bhūmau tu niṣpapeṣa sa keśavaḥ

Line 13

दारकौ तौ तु सहसा वत्सानां च परंतप

dārakau tau tu sahasā vatsānāṃ ca paraṃtapa

Line 14

दाम्नां विमोचनं कृत्वा वत्सान् धेनूर् अपायताम्

dāmnāṃ vimocanaṃ kṛtvā vatsān dhenūr apāyatām

Line 15

प्रतिवेश्म तदा तौ तु व्यसनं पर्यकुर्वताम्

prativeśma tadā tau tu vyasanaṃ paryakurvatām

Line 16

अतिप्रसक्तौ तौ दृष्ट्वा सर्वव्रजविचारिणौ

atiprasaktau tau dṛṣṭvā sarvavrajavicāriṇau

Line 17

न च शक्तो वारयितुं नन्दगोपः सुदुर्मदौ

na ca śakto vārayituṃ nandagopaḥ sudurmadau

Line 18

ततस् तु दारकैः सार्धं कृष्णश् चक्षुश् च तद्गतम्

tatas tu dārakaiḥ sārdhaṃ kṛṣṇaś cakṣuś ca tadgatam

Line 19

एकस्य तु तदा कृष्णो दारकस्य महीपते

ekasya tu tadā kṛṣṇo dārakasya mahīpate

Line 20

प्रच्छाद्य तरसान्यं तु दारकं प्रत्युवाच ह

pracchādya tarasānyaṃ tu dārakaṃ pratyuvāca ha

Line 21

गच्छ वत्स यथान्यत्र तथा दृष्टैश् च दारकैः

gaccha vatsa yathānyatra tathā dṛṣṭaiś ca dārakaiḥ

Line 22

यदि दृष्टस् त्वम् अन्यैस् तु जितो दण्डधरो मम

yadi dṛṣṭas tvam anyais tu jito daṇḍadharo mama

Line 23

इत्य् उक्त्वा बलभद्रं तु तं द्रष्टुं प्रैषयद् बली

ity uktvā balabhadraṃ tu taṃ draṣṭuṃ praiṣayad balī

Line 24

स गत्वा बलभद्रस् तु गृहीत्वा दारकं बलात्

sa gatvā balabhadras tu gṛhītvā dārakaṃ balāt

Line 25

केशवाय ददौ तं तु त्वं जितः केशवो ऽब्रवीत्

keśavāya dadau taṃ tu tvaṃ jitaḥ keśavo 'bravīt

Line 26

कीलकं च समानीय विक्षिप्य भुवि गूहितम्

kīlakaṃ ca samānīya vikṣipya bhuvi gūhitam

Line 27

आहूय दारकान् सर्वान् इदम् आह जगत्पतिः

āhūya dārakān sarvān idam āha jagatpatiḥ

Line 28

शक्तश् चेद् भवतां कश्चित् कीलं गृह्णातु पश्यतः

śaktaś ced bhavatāṃ kaścit kīlaṃ gṛhṇātu paśyataḥ

Line 29

मम पार्श्वगतो भूत्वा दण्डो देयश् च तस्य ह

mama pārśvagato bhūtvā daṇḍo deyaś ca tasya ha

Line 30

तच् छ्रुत्वा दारकाः सर्वे तं द्रष्टुं यत्नम् आस्थिताः

tac chrutvā dārakāḥ sarve taṃ draṣṭuṃ yatnam āsthitāḥ

Line 31

नाशक्नुवंश् च ते सर्वे जितांस् तान् अब्रवीद् इति

nāśaknuvaṃś ca te sarve jitāṃs tān abravīd iti

Line 32

एवम् आद्यानि गोविन्दो बालक्रीडनकानि वै

evam ādyāni govindo bālakrīḍanakāni vai

Line 33

चकार मतिमान् कृष्णो दारकैः सह गोकुले

cakāra matimān kṛṣṇo dārakaiḥ saha gokule