Inserts after HV 47.52

Line 1

आर्या कात्यायनी देवी कौशिकी ब्रह्मचारिणी

āryā kātyāyanī devī kauśikī brahmacāriṇī

Line 2

जननी सिद्धसेनस्य दुर्गा वीरा महातपाः

jananī siddhasenasya durgā vīrā mahātapāḥ

Line 3

जया च विजया चैव पुष्टिश् च त्वं क्षमा दया

jayā ca vijayā caiva puṣṭiś ca tvaṃ kṣamā dayā

Line 4

ज्येष्ठा यमस्य भगिनी नीलकौशेयवासिनी

jyeṣṭhā yamasya bhaginī nīlakauśeyavāsinī

Line 5

बहुरूपा विरूपा च अनेकविधरूपिणी

bahurūpā virūpā ca anekavidharūpiṇī

Line 6

विरूपाक्षी विशालाक्षी भक्तानां परिरक्षणी

virūpākṣī viśālākṣī bhaktānāṃ parirakṣaṇī

Line 7

पर्वताग्रेषु घोरेषु नदीषु च गुहासु च

parvatāgreṣu ghoreṣu nadīṣu ca guhāsu ca

Line 8

वासस् तव महादेवि वनेषूपवनेषु च

vāsas tava mahādevi vaneṣūpavaneṣu ca

Line 9

शबरैर् बर्बरैश् चैव पुलिन्दैश् च सुपूजिता

śabarair barbaraiś caiva pulindaiś ca supūjitā

Line 10

मयूरपक्षध्वजिनी लोकान् क्रामसि सर्वशः

mayūrapakṣadhvajinī lokān krāmasi sarvaśaḥ

Line 11

कुक्कुटैश् छागलैर् मेषैः सिंहैर् व्याघ्रैः समाकुला

kukkuṭaiś chāgalair meṣaiḥ siṃhair vyāghraiḥ samākulā

Line 12

घण्टानिनादबहुला विश्रुता विन्ध्यवासिनी

ghaṇṭāninādabahulā viśrutā vindhyavāsinī

Line 13

त्रिशूलपट्टिसधरा सूर्यचन्द्रपताकिनी

triśūlapaṭṭisadharā sūryacandrapatākinī

Line 14

नवमी कृष्णपक्षस्य शुक्लस्यैकादशी प्रिया

navamī kṛṣṇapakṣasya śuklasyaikādaśī priyā

Line 15

भगिनी वासुदेवस्य रजनी कलहप्रिया

bhaginī vāsudevasya rajanī kalahapriyā

Line 16

आवासः सर्वभूतानां निष्ठा च परमा गतिः

āvāsaḥ sarvabhūtānāṃ niṣṭhā ca paramā gatiḥ

Line 17

नन्दगोपसुता चैव देवानां विजयावहा

nandagopasutā caiva devānāṃ vijayāvahā

Line 18

चीरवासाः सुवासाश् च रौद्री संध्या त्वम् एव च

cīravāsāḥ suvāsāś ca raudrī saṃdhyā tvam eva ca

Line 19

प्रकीर्णकेशी मृत्युश् च तथा मांसौदनप्रिया

prakīrṇakeśī mṛtyuś ca tathā māṃsaudanapriyā

Line 20

लक्ष्मीर् अलक्ष्मीरूपेण दानवानां वधाय च

lakṣmīr alakṣmīrūpeṇa dānavānāṃ vadhāya ca

Line 21

सावित्री चापि देवानां माता भूतगणस्य च

sāvitrī cāpi devānāṃ mātā bhūtagaṇasya ca

Line 22

अन्तर्वेदी च यज्ञानाम् ऋत्विजां चैव दक्षिणा

antarvedī ca yajñānām ṛtvijāṃ caiva dakṣiṇā

Line 23

सिद्धिः सांयात्रिकाणां च वेला सागरयायिनाम्

siddhiḥ sāṃyātrikāṇāṃ ca velā sāgarayāyinām

Line 24

यक्षाणां प्रथमा यक्षी नागानां सुरसेति च

yakṣāṇāṃ prathamā yakṣī nāgānāṃ suraseti ca

Line 25

ब्रह्मवादिन्य् अथो दीक्षा शोभा च परमा तथा

brahmavādiny atho dīkṣā śobhā ca paramā tathā

Line 26

ज्योतिषां त्वं प्रभा देवि नक्षत्राणां च रोहिणी

jyotiṣāṃ tvaṃ prabhā devi nakṣatrāṇāṃ ca rohiṇī

Line 27

राजद्वारेषु तीर्थेषु नदीनां संगमेषु च

rājadvāreṣu tīrtheṣu nadīnāṃ saṃgameṣu ca

Line 28

पूर्णे च पूर्णिमाचन्द्रे कृत्तिवासा इति स्मृता

pūrṇe ca pūrṇimācandre kṛttivāsā iti smṛtā

Line 29

सरस्वती च वाल्मीकेः स्मृतिर् द्वैपायने तथा

sarasvatī ca vālmīkeḥ smṛtir dvaipāyane tathā

Line 30

सुरदेवी च भूतेषु स्तूयसे त्वं स्वकर्मभिः

suradevī ca bhūteṣu stūyase tvaṃ svakarmabhiḥ

Line 31

इन्द्रस्य चारुदृष्टिस् त्वं सहस्रनयनेति च

indrasya cārudṛṣṭis tvaṃ sahasranayaneti ca

Line 32

ऋषीणां धर्मबुद्धिस् तु देवानाम् अदितिस् तथा

ṛṣīṇāṃ dharmabuddhis tu devānām aditis tathā

Line 33

कर्षकानां च सीतेति भूतानां धरणीति च

karṣakānāṃ ca sīteti bhūtānāṃ dharaṇīti ca

Line 34

तापसानां च देवी त्वम् अरणी चाग्निहोत्रिणाम्

tāpasānāṃ ca devī tvam araṇī cāgnihotriṇām

Line 35

क्षुधा च सर्वभूतानां तृप्तिस् त्वं च दिवौकसाम्

kṣudhā ca sarvabhūtānāṃ tṛptis tvaṃ ca divaukasām

Line 36

स्वाहा तुष्टिर् धृतिर् मेधा वसूनां त्वं वसूमती

svāhā tuṣṭir dhṛtir medhā vasūnāṃ tvaṃ vasūmatī

Line 37

आशा त्वं मानुषाणां तु तुष्टिश् च कृतकर्मणाम्

āśā tvaṃ mānuṣāṇāṃ tu tuṣṭiś ca kṛtakarmaṇām

Line 38

दिशश् च विदिशश् चैव तथा ह्य् अग्निशिखा प्रभा

diśaś ca vidiśaś caiva tathā hy agniśikhā prabhā

Line 39

शकुनी पूतना च त्वं रेवती च सुदारुणा

śakunī pūtanā ca tvaṃ revatī ca sudāruṇā

Line 40

निद्रा च सर्वभूतानां मोहनी क्षत्रिया तथा

nidrā ca sarvabhūtānāṃ mohanī kṣatriyā tathā

Line 41

विद्यानां ब्रह्मविद्या त्वम् ओंकारो ऽस्थ वषट् तथा

vidyānāṃ brahmavidyā tvam oṃkāro 'stha vaṣaṭ tathā

Line 42

नारीणां पार्वती च त्वं पौराणीम् ऋषयो विदुः

nārīṇāṃ pārvatī ca tvaṃ paurāṇīm ṛṣayo viduḥ

Line 43

अरुन्धत्य् एकभर्तॄणां प्रजापतिवचो यथा

arundhaty ekabhartṝṇāṃ prajāpativaco yathā

Line 44

पर्यायनामभिर् दिव्यैर् इन्द्राणी चेति विश्रुता

paryāyanāmabhir divyair indrāṇī ceti viśrutā

Line 45

त्वया व्याप्तम् इदं सर्वं जगत् स्थावरजंगमम्

tvayā vyāptam idaṃ sarvaṃ jagat sthāvarajaṃgamam

Line 46

संग्रामेषु च सर्वेषु अग्निप्रज्वलितेषु च

saṃgrāmeṣu ca sarveṣu agniprajvaliteṣu ca

Line 47

नदीतीरेषु घोरेषु कान्तारेषु भयेषु च

nadītīreṣu ghoreṣu kāntāreṣu bhayeṣu ca

Line 48

प्रवासे राजबन्धे च शत्रूणां च प्रमर्दने

pravāse rājabandhe ca śatrūṇāṃ ca pramardane

Line 49

प्राणात्ययेषु सर्वेषु त्वं हि रक्षा न संशयः

prāṇātyayeṣu sarveṣu tvaṃ hi rakṣā na saṃśayaḥ

Line 50

त्वयि मे हृदयं देवि त्वयि बुद्धिर् मनस् त्वयि

tvayi me hṛdayaṃ devi tvayi buddhir manas tvayi

Line 51

रक्ष मां सर्वपापेभ्यः प्रसादं च करिष्यसि

rakṣa māṃ sarvapāpebhyaḥ prasādaṃ ca kariṣyasi

Line 52

इमं देव्याः स्तवं दिव्यम् इतिहाससमन्वितम्

imaṃ devyāḥ stavaṃ divyam itihāsasamanvitam

Line 53

यः पठेत् प्रातर् उत्थाय शुचिः प्रयतमानसः

yaḥ paṭhet prātar utthāya śuciḥ prayatamānasaḥ

Line 54

त्रिभिश् च काङ्क्षितं मासैः फलं वै संप्रयच्छति

tribhiś ca kāṅkṣitaṃ māsaiḥ phalaṃ vai saṃprayacchati

Line 55

षद्भिर् मासैर् वरिष्ठं तु वरम् एकं प्रयच्छति

ṣadbhir māsair variṣṭhaṃ tu varam ekaṃ prayacchati

Line 56

अस्र्चिता नवभिर् मासैर् दिव्यं चक्षुः प्रयच्छति

asrcitā navabhir māsair divyaṃ cakṣuḥ prayacchati

Line 57

संवत्सरेण सिद्धिं तु यथाकामं प्रयच्छति

saṃvatsareṇa siddhiṃ tu yathākāmaṃ prayacchati

Line 58

सत्यं च ब्रह्मचर्यं च द्वैपायनवचो यथा

satyaṃ ca brahmacaryaṃ ca dvaipāyanavaco yathā