Inserts at HV 109 (adhyāya-level)

Line 1

यदा बाणपुरे वीरः सो ऽनिरुद्धः सहोषया

yadā bāṇapure vīraḥ so 'niruddhaḥ sahoṣayā

Line 2

संनिरुद्धो नरेन्द्रेण बाणेन बलिसूनुना

saṃniruddho narendreṇa bāṇena balisūnunā

Line 3

तदा देवीं स कौमारीं रक्षार्थं शरणं गतः

tadā devīṃ sa kaumārīṃ rakṣārthaṃ śaraṇaṃ gataḥ

Line 4

यद् गीतम् अनिरुद्धेन देव्याः स्तोत्रम् इदं शृणु

yad gītam aniruddhena devyāḥ stotram idaṃ śṛṇu

Line 5

अनन्तम् अक्षयं दिव्यम् आदिदेवं सनातनम्

anantam akṣayaṃ divyam ādidevaṃ sanātanam

Line 6

नारायणं नमस्कृत्य प्रवरं प्रथमं प्रभुम्

nārāyaṇaṃ namaskṛtya pravaraṃ prathamaṃ prabhum

Line 7

चण्डीं कात्यायनीं देवीम् आर्यां लोकनमस्कृताम्

caṇḍīṃ kātyāyanīṃ devīm āryāṃ lokanamaskṛtām

Line 8

वरदां कीर्तयिष्यामि नामभिर् हरिसंस्तुतैः

varadāṃ kīrtayiṣyāmi nāmabhir harisaṃstutaiḥ

Line 9

ऋसिभिर् दैवतैश् चैव वाक्पुष्पैर् अर्चितां शुभाम्

ṛsibhir daivataiś caiva vākpuṣpair arcitāṃ śubhām

Line 10

तां देवीं सर्वदेहस्थां सर्वदेवनमस्कृताम्

tāṃ devīṃ sarvadehasthāṃ sarvadevanamaskṛtām

Line 11

महेन्द्रविष्णुभगिनीं नमस्यामि हिताय वै

mahendraviṣṇubhaginīṃ namasyāmi hitāya vai

Line 12

मनसा भावशुद्धेन शुचिः स्तोष्ये कृताञ्जलिः

manasā bhāvaśuddhena śuciḥ stoṣye kṛtāñjaliḥ

Line 13

गौतमीं कंसभयदां यशोदानन्दवर्धिनीम्

gautamīṃ kaṃsabhayadāṃ yaśodānandavardhinīm

Line 14

मेध्यां गोकुलसंभूतां नन्दगोपस्य नन्दिनीम्

medhyāṃ gokulasaṃbhūtāṃ nandagopasya nandinīm

Line 15

प्रज्ञां दक्षां शिवां सौम्यां दनुपुत्रप्रमर्दिनीम्

prajñāṃ dakṣāṃ śivāṃ saumyāṃ danuputrapramardinīm

Line 16

तां देवीं सर्वदेहस्थां सर्वभूतनमस्कृताम्

tāṃ devīṃ sarvadehasthāṃ sarvabhūtanamaskṛtām

Line 17

दर्शनीं पूरनीं मायां शशिवक्त्रां शशिप्रभाम्

darśanīṃ pūranīṃ māyāṃ śaśivaktrāṃ śaśiprabhām

Line 18

शान्तिं ध्रुवां च जननीं मोहनीं शोषणीं तथा

śāntiṃ dhruvāṃ ca jananīṃ mohanīṃ śoṣaṇīṃ tathā

Line 19

सेव्यां देवैः सर्षिगणैः सर्वदेवनमस्कृताम्

sevyāṃ devaiḥ sarṣigaṇaiḥ sarvadevanamaskṛtām

Line 20

कालीं कात्यायनीं देवीं भयदां भयनाशनीम्

kālīṃ kātyāyanīṃ devīṃ bhayadāṃ bhayanāśanīm

Line 21

कात्यायनीं कामगमां त्रिनेत्रां ब्रह्मचारिणीम्

kātyāyanīṃ kāmagamāṃ trinetrāṃ brahmacāriṇīm

Line 22

सौदामिनीं मेघरवां वेतालीं विपुलाननाम्

saudāminīṃ megharavāṃ vetālīṃ vipulānanām

Line 23

यूथस्याद्यां महाभागां शकुनीं रेवतीं तथा

yūthasyādyāṃ mahābhāgāṃ śakunīṃ revatīṃ tathā

Line 24

तिथीनां पञ्चमीं षष्ठीं पौर्णमासीं चतुर्दशीम्

tithīnāṃ pañcamīṃ ṣaṣṭhīṃ paurṇamāsīṃ caturdaśīm

Line 25

सप्तविंशति ऋक्षाणि नद्यः सर्वा दिशो दश

saptaviṃśati ṛkṣāṇi nadyaḥ sarvā diśo daśa

Line 26

नगरोपवनोद्यान+ +द्वाराट्टालकवासिनीम्

nagaropavanodyāna+ +dvārāṭṭālakavāsinīm

Line 27

ह्रीं श्रीं गङ्गां च गान्धारीं योगिनीं योगदां सताम्

hrīṃ śrīṃ gaṅgāṃ ca gāndhārīṃ yoginīṃ yogadāṃ satām

Line 28

कीर्तिम् आशां दिशं स्पर्शां नमस्यामि सरस्वतीम्

kīrtim āśāṃ diśaṃ sparśāṃ namasyāmi sarasvatīm

Line 29

वेदानां मातरं चैव सावित्रीं भक्तवत्सलाम्

vedānāṃ mātaraṃ caiva sāvitrīṃ bhaktavatsalām

Line 30

तपस्विनीं शान्तिकरीम् एकानंशां सनातनीम्

tapasvinīṃ śāntikarīm ekānaṃśāṃ sanātanīm

Line 31

कौबेरीं मदिरां चण्डाम् इलां मलयवासिनीम्

kauberīṃ madirāṃ caṇḍām ilāṃ malayavāsinīm

Line 32

भूतधात्रीं भयकरीं कूष्माण्डीं कुसुमप्रियाम्

bhūtadhātrīṃ bhayakarīṃ kūṣmāṇḍīṃ kusumapriyām

Line 33

दारिणीं मदिरावासां विन्ध्यकैलासवासिनीम्

dāriṇīṃ madirāvāsāṃ vindhyakailāsavāsinīm

Line 34

वराङ्गनां सिंहरथां बहुरूपां वृषध्वजाम्

varāṅganāṃ siṃharathāṃ bahurūpāṃ vṛṣadhvajām

Line 35

दुर्लभां दुर्जयां दुर्गां निशुम्भभयदर्शिनीं

durlabhāṃ durjayāṃ durgāṃ niśumbhabhayadarśinīṃ

Line 36

सुरप्रियां सुरां देवीं वज्रपाण्यनुजां शिवाम्

surapriyāṃ surāṃ devīṃ vajrapāṇyanujāṃ śivām

Line 37

किरातीं चीरवसनां चोरसेनानमस्कृताम्

kirātīṃ cīravasanāṃ corasenānamaskṛtām

Line 38

आज्यपां सोमपां सौम्यां सर्वपर्वतवासिनीं

ājyapāṃ somapāṃ saumyāṃ sarvaparvatavāsinīṃ

Line 39

निशुम्भशुम्भमथनीं गजकुम्भोपमस्तनीं

niśumbhaśumbhamathanīṃ gajakumbhopamastanīṃ

Line 40

जननीं सिद्धसेनस्य सिद्धचारणसेविताम्

jananīṃ siddhasenasya siddhacāraṇasevitām

Line 41

वरां कुमारप्रभवां पार्वतीं पर्वतात्मजाम्

varāṃ kumāraprabhavāṃ pārvatīṃ parvatātmajām

Line 42

पञ्चाशद् देवकन्यानां पत्न्यो देवगणस्य च

pañcāśad devakanyānāṃ patnyo devagaṇasya ca

Line 43

कद्रूपुत्रसहस्रस्य पुत्रपौत्रवरस्त्रियः

kadrūputrasahasrasya putrapautravarastriyaḥ

Line 44

माता पिता जगन्मान्या दिवि देवाप्सरोगणैः

mātā pitā jaganmānyā divi devāpsarogaṇaiḥ

Line 45

ऋषिपत्नीगणानां च यक्षगन्धर्वयोषिताम्

ṛṣipatnīgaṇānāṃ ca yakṣagandharvayoṣitām

Line 46

विद्याधराणां नारीषु साध्वीषु मनुजासु च

vidyādharāṇāṃ nārīṣu sādhvīṣu manujāsu ca

Line 47

एवम् एतासु नारीषु सर्वभूताश्रया ह्य् असि

evam etāsu nārīṣu sarvabhūtāśrayā hy asi

Line 48

नमस्कृतासि त्रैलोक्ये किंनरोद्गीतसेविते

namaskṛtāsi trailokye kiṃnarodgītasevite

Line 49

अचिन्त्या ह्य् अप्रमेयासि यासि सासि नमो ऽस्तु ते

acintyā hy aprameyāsi yāsi sāsi namo 'stu te

Line 50

एभिर् नामभिर् अन्यैश् च कीर्तिता ह्य् असि गौतमि

ebhir nāmabhir anyaiś ca kīrtitā hy asi gautami

Line 51

त्वत्प्रसादाद् अविघ्नेन क्षिप्रं मुच्येय बन्धनात्

tvatprasādād avighnena kṣipraṃ mucyeya bandhanāt

Line 52

अवेक्षस्व विशालाक्षि पादौ ते शरणं व्रजे

avekṣasva viśālākṣi pādau te śaraṇaṃ vraje

Line 53

सर्वेषाम् एव बन्धानां मोक्षणं कर्तुम् अर्हसि

sarveṣām eva bandhānāṃ mokṣaṇaṃ kartum arhasi

Line 54

ब्रह्मा विष्णुश् च रुद्रश् च चन्द्रसूर्याग्निमारुताः

brahmā viṣṇuś ca rudraś ca candrasūryāgnimārutāḥ

Line 55

अश्विनौ वसवश् चैव धाता भूमिर् दिशो दश

aśvinau vasavaś caiva dhātā bhūmir diśo daśa

Line 56

गावो नक्षत्रवंशाश् च ग्रहा नद्यो ह्रदास् तथा

gāvo nakṣatravaṃśāś ca grahā nadyo hradās tathā

Line 57

सरितः सागराश् चैव नानाविद्याधरोरगाः

saritaḥ sāgarāś caiva nānāvidyādharoragāḥ

Line 58

तथा नागाः सुपर्णाश् च गन्धर्वाप्सरसां गणाः

tathā nāgāḥ suparṇāś ca gandharvāpsarasāṃ gaṇāḥ

Line 59

कृत्स्नं जगद् इदं प्रोक्तं देव्या नामानुकीर्तनात्

kṛtsnaṃ jagad idaṃ proktaṃ devyā nāmānukīrtanāt

Line 60

देव्याः स्तवम् इमं पुण्यं यः पठेत् सुसमाहितः

devyāḥ stavam imaṃ puṇyaṃ yaḥ paṭhet susamāhitaḥ

Line 61

सा देवी सप्तमे मासि वरम् अग्र्यं प्रयच्छति

sā devī saptame māsi varam agryaṃ prayacchati

Line 62

अष्टादशभुजा देवी दिव्याभरणभूषिता

aṣṭādaśabhujā devī divyābharaṇabhūṣitā

Line 63

हारशोभितसर्वाङ्गी मुकुटोज्ज्वलभूषणा

hāraśobhitasarvāṅgī mukuṭojjvalabhūṣaṇā

Line 64

कात्यायनि स्तूयसे त्वं वरदे वामलोचने

kātyāyani stūyase tvaṃ varade vāmalocane

Line 65

नमो ऽस्तु ते महादेवि सुप्रीता हि भजस्व माम्

namo 'stu te mahādevi suprītā hi bhajasva mām

Line 66

प्रयच्छस्व वरं ह्य् आयुः पुष्टिं चैव क्षमां धृतिम्

prayacchasva varaṃ hy āyuḥ puṣṭiṃ caiva kṣamāṃ dhṛtim

Line 67

एवं स्तुता महादेवी दुर्गा दुर्गपराक्रमा

evaṃ stutā mahādevī durgā durgaparākramā

Line 68

सांनिध्यं कल्पयाम् आस अनिरुद्धस्य बन्धने

sāṃnidhyaṃ kalpayām āsa aniruddhasya bandhane

Line 69

अनिरुद्धहितार्थाय देवी शरणवत्सला

aniruddhahitārthāya devī śaraṇavatsalā

Line 70

बद्धं बाणपुरे वीरम् अनिरुद्धं व्यमोक्षयत्

baddhaṃ bāṇapure vīram aniruddhaṃ vyamokṣayat

Line 71

सान्त्वयाम् आस तं वीरम् अनिरुद्धम् अमर्षणम्

sāntvayām āsa taṃ vīram aniruddham amarṣaṇam

Line 72

प्रसादं दर्शयाम् आस अनिरुद्धस्य बन्धने

prasādaṃ darśayām āsa aniruddhasya bandhane

Line 73

नागपाशेन बद्धस्य तस्योषाहृतचेतसः

nāgapāśena baddhasya tasyoṣāhṛtacetasaḥ

Line 74

स्फोटयित्वा कराग्रेण पन्ञ्जरं वज्रसंनिभम्

sphoṭayitvā karāgreṇa panñjaraṃ vajrasaṃnibham

Line 75

रुद्धं बाणपुरे वीरं सानिरुद्धम् अभाषत

ruddhaṃ bāṇapure vīraṃ sāniruddham abhāṣata

Line 76

सान्त्वयन्ती वचो देवी प्रसादाभिमुखी तदा

sāntvayantī vaco devī prasādābhimukhī tadā

Line 77

चक्रायुधो मोक्षयितानिरुद्ध @

cakrāyudho mokṣayitāniruddha @

Line 78

त्वां बन्धनाद् आशु सहस्व कालम् ।

tvāṃ bandhanād āśu sahasva kālam |

Line 79

छित्त्वा तु बाणस्य सहस्रबाहुं @

chittvā tu bāṇasya sahasrabāhuṃ @

Line 80

पुरीं निजां नेष्यति दैत्यसूदनः ॥

purīṃ nijāṃ neṣyati daityasūdanaḥ ||

Line 81

ततो ऽनिरुद्धः पुनर् एव देवीं @

tato 'niruddhaḥ punar eva devīṃ @

Line 82

तुष्टाव हृष्टः शशिकान्तवक्त्रः ।

tuṣṭāva hṛṣṭaḥ śaśikāntavaktraḥ |

Line 83

नमो ऽस्तु ते देवि वरप्रदे शिवे @

namo 'stu te devi varaprade śive @

Line 84

नमो ऽस्तु ते देवि सुरारिनाशिनि ॥

namo 'stu te devi surārināśini ||

Line 85

नमो ऽस्तु ते कामचरे सदा शिवे @

namo 'stu te kāmacare sadā śive @

Line 86

नमो ऽस्तु ते सर्वहितैषिणि प्रिये ।

namo 'stu te sarvahitaiṣiṇi priye |

Line 87

नमो ऽस्तु ते भीतिकरि द्विषां सदा @

namo 'stu te bhītikari dviṣāṃ sadā @

Line 88

नमो ऽस्तु ते बन्धनमोक्षकारिणि ॥

namo 'stu te bandhanamokṣakāriṇi ||

Line 89

ब्रह्माणीन्द्राणि रुद्राणि भूतभव्यभवे शिवे

brahmāṇīndrāṇi rudrāṇi bhūtabhavyabhave śive

Line 90

त्राहि मां सर्वदुःखेभ्यो नारायणि नमो ऽस्तु ते

trāhi māṃ sarvaduḥkhebhyo nārāyaṇi namo 'stu te

Line 91

नमो ऽस्तु ते जगन्नाथे प्रिये दान्ते महाव्रते

namo 'stu te jagannāthe priye dānte mahāvrate

Line 92

प्रियभक्ते जगन्मातः शैलपुत्रि वसुंधरे

priyabhakte jaganmātaḥ śailaputri vasuṃdhare

Line 93

त्राहि मां त्वं विशालाक्षि नारायणि नमो ऽस्तु ते

trāhi māṃ tvaṃ viśālākṣi nārāyaṇi namo 'stu te

Line 94

त्रायस्व सर्वदुःखेभ्यो दानवानां भयंकरि

trāyasva sarvaduḥkhebhyo dānavānāṃ bhayaṃkari

Line 95

आर्यास्तवम् इमं पुण्यं यः पठेत् सुसमाहितः

āryāstavam imaṃ puṇyaṃ yaḥ paṭhet susamāhitaḥ

Line 96

सर्वपापविनिर्मुक्तो विष्णुलोकं स गच्छति

sarvapāpavinirmukto viṣṇulokaṃ sa gacchati