Inserts after HV 108.5

Line 1

ततो ऽन्तरिक्षाद् एवाशु प्रासादोपरि विष्ठिता

tato 'ntarikṣād evāśu prāsādopari viṣṭhitā

Line 2

प्राद्युम्निं वचनं प्राह श्लक्ष्णं मधुरया गिरा

prādyumniṃ vacanaṃ prāha ślakṣṇaṃ madhurayā girā

Line 3

चक्षुर् दत्त्वा तु सा तस्मै कृत्वा चात्मनिदर्शनम्

cakṣur dattvā tu sā tasmai kṛtvā cātmanidarśanam

Line 4

तं विविक्ते तु वै देशे सा वाक्यम् इदम् अब्रवीत्

taṃ vivikte tu vai deśe sā vākyam idam abravīt

Line 5

अपि ते कुशलं वीर सर्वत्र यदुनन्दन

api te kuśalaṃ vīra sarvatra yadunandana

Line 6

अहस् तावत्प्रदोषो वा कच्चिद् गच्छति ते सुखम्

ahas tāvatpradoṣo vā kaccid gacchati te sukham

Line 7

शृणुष्व त्वं महाबाहो विज्ञप्तिं मे रतीसुत

śṛṇuṣva tvaṃ mahābāho vijñaptiṃ me ratīsuta

Line 8

उषाया मम सख्यास् तु वाक्यं वक्ष्यामि तत्त्वतः

uṣāyā mama sakhyās tu vākyaṃ vakṣyāmi tattvataḥ

Line 9

स्वप्ने तु या त्वया दृष्टा स्त्रीभावं चापि लम्भिता

svapne tu yā tvayā dṛṣṭā strībhāvaṃ cāpi lambhitā

Line 10

बिभर्ति हृदयेन त्वां तया संप्रेषितास्म्य् अहम्

bibharti hṛdayena tvāṃ tayā saṃpreṣitāsmy aham

Line 11

रुदती जृम्भती चैव निःश्वसन्ती मुहुर् मुहुः

rudatī jṛmbhatī caiva niḥśvasantī muhur muhuḥ

Line 12

त्वद्दर्शनपरा सौम्य कामिनी परितप्यते

tvaddarśanaparā saumya kāminī paritapyate

Line 13

यदि त्वं यास्यसे वीर धारयिष्यति जीवितम्

yadi tvaṃ yāsyase vīra dhārayiṣyati jīvitam

Line 14

अदर्शनेन मरणं तस्या नास्त्य् अत्र संशयः

adarśanena maraṇaṃ tasyā nāsty atra saṃśayaḥ

Line 15

यदि नारीसहस्रं ते हृदिस्थं यदुनन्दन

yadi nārīsahasraṃ te hṛdisthaṃ yadunandana

Line 16

स्त्रियाः कामयमानायाः कर्तव्या हस्तधारणा

striyāḥ kāmayamānāyāḥ kartavyā hastadhāraṇā

Line 17

त्वं च तस्या वरोत्सर्गे देव्या दत्तो मनोरथः

tvaṃ ca tasyā varotsarge devyā datto manorathaḥ

Line 18

चित्रपट्टं मया दत्तं त्वच् चिह्नं वीक्ष्य जीवति

citrapaṭṭaṃ mayā dattaṃ tvac cihnaṃ vīkṣya jīvati

Line 19

सानुक्रोशो यदुश्रेष्ठ भव तस्या मनोरथे

sānukrośo yaduśreṣṭha bhava tasyā manorathe

Line 20

उषा ते पतते मूर्ध्ना वयं च यदुनन्दन

uṣā te patate mūrdhnā vayaṃ ca yadunandana

Line 21

श्रूयतां चोद्भवस् तस्याः कुलं शीलं च यादृशम्

śrūyatāṃ codbhavas tasyāḥ kulaṃ śīlaṃ ca yādṛśam

Line 22

संस्थानं प्रकृतिं चास्याः पितरं च ब्रवीमि ते

saṃsthānaṃ prakṛtiṃ cāsyāḥ pitaraṃ ca bravīmi te

Line 23

वैरोचनिसुतो वीरो बाणो नाम महासुरः

vairocanisuto vīro bāṇo nāma mahāsuraḥ

Line 24

स राजा शोणितपुरे तस्य त्वाम् इच्छते सुता

sa rājā śoṇitapure tasya tvām icchate sutā

Line 25

त्वद्भावगतचित्ता सा त्वाम् ऋते न हि जीवति

tvadbhāvagatacittā sā tvām ṛte na hi jīvati

Line 26

मनोरथकृतो भर्ता देव्या दत्तो न संशयः

manorathakṛto bhartā devyā datto na saṃśayaḥ

Line 27

त्वत्संगमात् सा सुश्रोणी प्राणान् धारयते शुभा

tvatsaṃgamāt sā suśroṇī prāṇān dhārayate śubhā

Line 28

चित्रलेखावचः श्रुत्वा सो ऽनिरुद्धो ऽब्रवीद् इदम्

citralekhāvacaḥ śrutvā so 'niruddho 'bravīd idam

Line 29

दृष्टा स्वप्ने मया सा हि तन्मत्तः शृणु शोभने

dṛṣṭā svapne mayā sā hi tanmattaḥ śṛṇu śobhane

Line 30

रूपं कान्तिं मतिं चैव संयोगं रुदितं तथा

rūpaṃ kāntiṃ matiṃ caiva saṃyogaṃ ruditaṃ tathā

Line 31

एवं सर्वम् अहोरात्रं मुह्यामि परिचिन्तयन्

evaṃ sarvam ahorātraṃ muhyāmi paricintayan

Line 32

यद्य् अहं समनुग्राह्यो यदि सख्यं त्वम् इच्छसि

yady ahaṃ samanugrāhyo yadi sakhyaṃ tvam icchasi

Line 33

नयस्व चित्रलेखे मां द्रष्टुम् इच्छाम्य् अहं प्रियाम्

nayasva citralekhe māṃ draṣṭum icchāmy ahaṃ priyām

Line 34

कामसंतापसंतप्तः प्रियासंगमकातरः

kāmasaṃtāpasaṃtaptaḥ priyāsaṃgamakātaraḥ

Line 35

एषो ऽञ्जलिर् मया बद्धः सत्यं स्वप्नं कुरुष्व मे

eṣo 'ñjalir mayā baddhaḥ satyaṃ svapnaṃ kuruṣva me

Line 36

तस्य तद् वचनं श्रुत्वा चित्रलेखा वराप्सराः

tasya tad vacanaṃ śrutvā citralekhā varāpsarāḥ

Line 37

सफलो ऽद्य मम क्लेशः सख्या मे यत् प्रयाचितम्

saphalo 'dya mama kleśaḥ sakhyā me yat prayācitam

Line 38

ईप्सितं तस्य विज्ञाय अनिरुद्धस्य भामिनी

īpsitaṃ tasya vijñāya aniruddhasya bhāminī

Line 39

चित्रलेखा ततस् तुष्टा तथेति च तम् अब्रवीत्

citralekhā tatas tuṣṭā tatheti ca tam abravīt