Inserts after HV 91.52

Line 1

शङ्खं प्राध्मापयाम् आस शार्ङ्गधन्वा गदाधरः

śaṅkhaṃ prādhmāpayām āsa śārṅgadhanvā gadādharaḥ

Line 2

तस्य शङ्खरवं श्रुत्वा नरको युद्धदुर्मदः

tasya śaṅkharavaṃ śrutvā narako yuddhadurmadaḥ

Line 3

धनुर् आदाय विस्फार्य नादेन महता तदा

dhanur ādāya visphārya nādena mahatā tadā

Line 4

नादयन् रोदसी यायाद् युद्धाय नरको बली

nādayan rodasī yāyād yuddhāya narako balī

Line 5

केशवं पुरतो दृष्ट्वा गदिनं शार्ङ्गिणं तथा

keśavaṃ purato dṛṣṭvā gadinaṃ śārṅgiṇaṃ tathā

Line 6

उवाच नरको दैत्यः को भवान् किम् इहागतः

uvāca narako daityaḥ ko bhavān kim ihāgataḥ

Line 7

दैत्येन्द्रो नरकः प्रष्टा जेता शक्रस्य संयुगे

daityendro narakaḥ praṣṭā jetā śakrasya saṃyuge

Line 8

को ऽयं पक्षी स्थितः पार्श्वे कैषा ते वद सांप्रतम्

ko 'yaṃ pakṣī sthitaḥ pārśve kaiṣā te vada sāṃpratam

Line 9

एनां ग्रहीतुम् इच्छामि जानीयां यदि सांप्रतम्

enāṃ grahītum icchāmi jānīyāṃ yadi sāṃpratam

Line 10

एवम् उक्तो जगन्नाथः प्रहस्य सुचिरं तदा

evam ukto jagannāthaḥ prahasya suciraṃ tadā

Line 11

आलोक्य सत्यभामां तु वचनं चेदम् अब्रवीत्

ālokya satyabhāmāṃ tu vacanaṃ cedam abravīt

Line 12

वासुदेवो ऽस्मि दैत्येन्द्र यदि ते श्रुतिम् आगतः

vāsudevo 'smi daityendra yadi te śrutim āgataḥ

Line 13

एषा सत्राजितः पुत्री भार्या मम यवीयसी

eṣā satrājitaḥ putrī bhāryā mama yavīyasī

Line 14

एष तार्क्ष्यो गरुत्मांस् तु वाहनं मम दैत्यप

eṣa tārkṣyo garutmāṃs tu vāhanaṃ mama daityapa

Line 15

त्वां हन्तुम् इह संप्राप्तो वदामि किम् अतः परम्

tvāṃ hantum iha saṃprāpto vadāmi kim ataḥ param

Line 16

श्रुत्वैतद् दानवो घोरो विहस्य सुचिरं तदा

śrutvaitad dānavo ghoro vihasya suciraṃ tadā

Line 17

वासुदेवो ऽसि संप्राप्तो मां हन्तुं किल यादव

vāsudevo 'si saṃprāpto māṃ hantuṃ kila yādava

Line 18

दिष्ट्या संप्राप्तवान् अद्य चिन्तनीयः सदा मया

diṣṭyā saṃprāptavān adya cintanīyaḥ sadā mayā

Line 19

कदासौ दृश्यते युद्धे हनिष्यामीति मे मतिः

kadāsau dṛśyate yuddhe haniṣyāmīti me matiḥ

Line 20

क्षणं तिष्ठ यदुश्रेष्ठ कुरु युद्धं यदीच्छसि

kṣaṇaṃ tiṣṭha yaduśreṣṭha kuru yuddhaṃ yadīcchasi

Line 21

हत्वा त्वाम् अद्य संप्राप्तम् आनयामि पुरं मम

hatvā tvām adya saṃprāptam ānayāmi puraṃ mama

Line 22

एनां पद्मपलाशाक्षीं युध्यतां किं विलम्बसे

enāṃ padmapalāśākṣīṃ yudhyatāṃ kiṃ vilambase

Line 23

इच्छातः प्रहरस्वेति प्रोवाच यदुनन्दनः

icchātaḥ praharasveti provāca yadunandanaḥ