Inserts after HV 13.73

Line 1

इत्य् एते पितरो देवा देवाश् च पितरः पुनः

ity ete pitaro devā devāś ca pitaraḥ punaḥ

Line 2

अन्योन्यं पितरो ह्य् एते देवाश् च पितरश् च ह

anyonyaṃ pitaro hy ete devāś ca pitaraś ca ha

Line 3

त्रयो मूर्तिम् ऋते तात चत्वारस् तु समूर्तयः

trayo mūrtim ṛte tāta catvāras tu samūrtayaḥ

Line 4

तेषां श्राद्धानि सत्कृत्य देवाः कुर्वन्ति यत्नतः

teṣāṃ śrāddhāni satkṛtya devāḥ kurvanti yatnataḥ

Line 5

भक्ताः प्राञ्जलयश् चैव देवास् तद्गतमानसाः

bhaktāḥ prāñjalayaś caiva devās tadgatamānasāḥ

Line 6

विश्वे च सिकताश् चैव पृश्नयः शृङ्गिणस् तथा

viśve ca sikatāś caiva pṛśnayaḥ śṛṅgiṇas tathā

Line 7

कृष्णा विश्वा अजाश् चैव विधिवत् पूजयन्त्य् उत

kṛṣṇā viśvā ajāś caiva vidhivat pūjayanty uta

Line 8

प्रजास् तु वातरशना दिवाकीर्त्यास् तथैव च

prajās tu vātaraśanā divākīrtyās tathaiva ca

Line 9

मेघाश् च मरुतश् चैव ब्रह्माद्याश् च दिवौकसः

meghāś ca marutaś caiva brahmādyāś ca divaukasaḥ

Line 10

भृग्वङ्गिरोत्रिप्रमुखा ऋषयः सर्व एव च

bhṛgvaṅgirotripramukhā ṛṣayaḥ sarva eva ca

Line 11

यक्षा नागाः सुपर्णाश् च किंनराश् चारणैः सह

yakṣā nāgāḥ suparṇāś ca kiṃnarāś cāraṇaiḥ saha

Line 12

पूजयन्ति पितॄन् एते सर्व एव फलार्थिन

pūjayanti pitṝn ete sarva eva phalārthina

Line 13

एवम् एते महात्मानः श्राद्धैः सत्कृत्य पूजिताः

evam ete mahātmānaḥ śrāddhaiḥ satkṛtya pūjitāḥ

Line 14

सर्वान् कामान् प्रयच्छन्ति शतशो ऽथ सहस्रशः

sarvān kāmān prayacchanti śataśo 'tha sahasraśaḥ

Line 15

हित्वा त्रैलोक्यसंसारं जरामृत्युभयं तथा

hitvā trailokyasaṃsāraṃ jarāmṛtyubhayaṃ tathā

Line 16

मोक्षयोगं प्रयच्छन्ति ऐश्वर्यं च पितामहाः

mokṣayogaṃ prayacchanti aiśvaryaṃ ca pitāmahāḥ

Line 17

मोक्षोपायम् अथैश्वर्यं सूक्ष्मदेहम् अदेहताम्

mokṣopāyam athaiśvaryaṃ sūkṣmadeham adehatām

Line 18

कृत्स्नं वैराग्यम् आनन्त्यं प्रयच्छन्ति पितामहाः

kṛtsnaṃ vairāgyam ānantyaṃ prayacchanti pitāmahāḥ

Line 19

ऐश्वर्यविहितं योगम् ऐश्वर्यं योग उच्यते

aiśvaryavihitaṃ yogam aiśvaryaṃ yoga ucyate

Line 20

योगैश्वर्यम् ऋते मोक्षः कथंचिन् नोपपद्यते

yogaiśvaryam ṛte mokṣaḥ kathaṃcin nopapadyate

Line 21

अपक्षस्येव गमनम् अन्तरिक्षे पतत्रिणः

apakṣasyeva gamanam antarikṣe patatriṇaḥ

Line 22

वरिष्ठः सर्वधर्माणां मोक्षधर्मः सनातनः

variṣṭhaḥ sarvadharmāṇāṃ mokṣadharmaḥ sanātanaḥ

Line 23

पितॄणां संप्रदानेन प्राप्यते सुमहात्मनाम्

pitṝṇāṃ saṃpradānena prāpyate sumahātmanām

Line 24

मुक्तावैडूर्यवासांसि वाजिनागा युगानि च

muktāvaiḍūryavāsāṃsi vājināgā yugāni ca

Line 25

कोटिशश् चैव रत्नानि प्रयच्छन्ति पितामहाः

koṭiśaś caiva ratnāni prayacchanti pitāmahāḥ

Line 26

हंससारसयुक्तानि मुक्तावैडूर्यवन्ति च

haṃsasārasayuktāni muktāvaiḍūryavanti ca

Line 27

किंकिणीजालयुक्तानि सदापुष्पफलानि च

kiṃkiṇījālayuktāni sadāpuṣpaphalāni ca

Line 28

विमानानां सहस्राणि जुष्टान्य् अप्सरसां गणैः

vimānānāṃ sahasrāṇi juṣṭāny apsarasāṃ gaṇaiḥ

Line 29

सर्वकामप्रवृद्धानि प्रयच्छन्ति पितामहाः

sarvakāmapravṛddhāni prayacchanti pitāmahāḥ

Line 30

प्रजां पुष्टिं धृतिं मेधां राज्यम् आरोग्यम् एव च

prajāṃ puṣṭiṃ dhṛtiṃ medhāṃ rājyam ārogyam eva ca

Line 31

प्रीता नित्यं प्रयच्छन्ति मानुषाणां पितामहाः

prītā nityaṃ prayacchanti mānuṣāṇāṃ pitāmahāḥ