Aṣṭādaśa Siddhānta · Padas 1-18

राग विभास ज़्यौंही ज़्यौंही तुम राखत हौ त्यौंही त्यौंही रहियत है हो हरि। और तो अचरचे पाँइ धरौं सो तौ कहौं कौन के पैंड़ भरि ।। जद्यपि कियौ चाहौं अपनौ मन भायौ सो तौ कैसे करि सकौं जो तुम राखो पकरि। कहिं श्रीहरिदास पिंजरा के जनावर लौं तरफराइ रह्यौ उड़िवे कौं कितौक करि ।।

rāga vibhāsa zyauṃhī zyauṃhī tuma rākhata hau tyauṃhī tyauṃhī rahiyata hai ho hari| aura to acarace pā~i dharauṃ so tau kahauṃ kauna ke paiṃr̤a bhari || jadyapi kiyau cāhauṃ apanau mana bhāyau so tau kaise kari sakauṃ jo tuma rākho pakari| kahiṃ śrīharidāsa piṃjarā ke janāvara lauṃ tarapharāi rahyau ur̤ive kauṃ kitauka kari ||

राग विभास काहू कौ बस नाहिं तुम्हारी कृपा तें सब होइ बिहारी बिहारनि। और मिथ्या प्रपंच काहे कौं भाखिये सो तौ है हारनि ॥ जाहि तुमसौं हित तासौं तुम हित करौ सब सुख कारनि। श्रीहरिदास के स्वामी स्यामा कुंजबिहारी प्राननि के आधारनि॥

rāga vibhāsa kāhū kau basa nāhiṃ tumhārī kṛpā teṃ saba hoi bihārī bihārani| aura mithyā prapaṃca kāhe kauṃ bhākhiye so tau hai hārani || jāhi tumasauṃ hita tāsauṃ tuma hita karau saba sukha kārani| śrīharidāsa ke svāmī syāmā kuṃjabihārī prānani ke ādhārani||

राग विभास कबहुँ कबहुँ मन इत उत जात यातेंब कौन अधिक सुख। बहुत भाँतिन घत आनि राख्यौ, नाहिं तौ पावतौ दुख ॥ . कोटि काम लावन्य बिहारी ताके, मुँहाचुही सब सुख लियें रहत रुख। श्रीहरिदास के स्वामी स्यामा कुंजबिहारी कौं, दिन देखत रहौं विचित्र मुख ।।

rāga vibhāsa kabahu~ kabahu~ mana ita uta jāta yāteṃba kauna adhika sukha| bahuta bhā~tina ghata āni rākhyau, nāhiṃ tau pāvatau dukha || . koṭi kāma lāvanya bihārī tāke, mu~hācuhī saba sukha liyeṃ rahata rukha| śrīharidāsa ke svāmī syāmā kuṃjabihārī kauṃ, dina dekhata rahauṃ vicitra mukha ||

राग विभास हरि भजि हरि भजि, छाँड़ि न मान नर तन कौं । मति वंछै मति वंछै रे, तिल तिल धन कौं ॥ अनमाँग्यौ आगें आवैगौ, ज्यौं पल लागै पल कौं । कहिं श्रीहरिदास मीच ज्यौं आवै, त्यौं धन है आपन कौं ।।

rāga vibhāsa hari bhaji hari bhaji, chā~r̤i na māna nara tana kauṃ | mati vaṃchai mati vaṃchai re, tila tila dhana kauṃ || anamā~gyau āgeṃ āvaigau, jyauṃ pala lāgai pala kauṃ | kahiṃ śrīharidāsa mīca jyauṃ āvai, tyauṃ dhana hai āpana kauṃ ||

राग बिलावल ए हरि मोसौ न बिगारनि कौं तोसौं न सँवारनि कौं, मोहिं तोहिं परी होड़। कौंन धौं जीतै कौन धौं हारै, पर बदी न छोड़ ॥ तुम्हारी माया बाजी पसारी विचित्र मोहे सुर मुनि का के भूले कोड़ । कहिं श्रीहरिदास हम जीते हारे तुम, तऊ न तोड़ ॥

rāga bilāvala e hari mosau na bigārani kauṃ tosauṃ na sa~vārani kauṃ, mohiṃ tohiṃ parī hor̤a| kauṃna dhauṃ jītai kauna dhauṃ hārai, para badī na chor̤a || tumhārī māyā bājī pasārī vicitra mohe sura muni kā ke bhūle kor̤a | kahiṃ śrīharidāsa hama jīte hāre tuma, taū na tor̤a ||

राग आसावरी बंदे अखतियार भला चित न डुलाव । आव समाधि भीतर, न होहु अगला ॥ न फिर दर-दर, पिदर-दर, न होहु अँधला। कहिं श्रीहरिदास करता किया सो हुआ, सुमेरु अचल चला ॥

rāga āsāvarī baṃde akhatiyāra bhalā cita na ḍulāva | āva samādhi bhītara, na hohu agalā || na phira dara-dara, pidara-dara, na hohu a~dhalā| kahiṃ śrīharidāsa karatā kiyā so huā, sumeru acala calā ||

राग आसावरी हित तौ कीजै कमलनैन सौं, जा हित कै आगें और हित लागै सब फीकौ। कै हित कीजै साधु संगति सौं, ज्यौं कलमष जाइ सब जी कौ ॥ हरि कौ हित ऐसौ, जैसौ रंग मजीठ, ' संसार हित रंग कसूँभ दिन दुती कौ । कहिं श्रीहरिदास हित कीजै बिहारीजू सौं, ओर निबाहू जानि जी कौ ॥

rāga āsāvarī hita tau kījai kamalanaina sauṃ, jā hita kai āgeṃ aura hita lāgai saba phīkau| kai hita kījai sādhu saṃgati sauṃ, jyauṃ kalamaṣa jāi saba jī kau || hari kau hita aisau, jaisau raṃga majīṭha, ' saṃsāra hita raṃga kasū~bha dina dutī kau | kahiṃ śrīharidāsa hita kījai bihārījū sauṃ, ora nibāhū jāni jī kau ||

राग आसावरी तिनुका ज्यौं बयार के बस । ज्यौं चाहै त्यौं उड़ाय लै डारै, अपने रस ॥ ब्रह्मलोक सिवलोक, और लोक अस । कहिं श्रीहरिदास बिचारि देखौ, बिना बिहारी नाहिं जस ॥

rāga āsāvarī tinukā jyauṃ bayāra ke basa | jyauṃ cāhai tyauṃ ur̤āya lai ḍārai, apane rasa || brahmaloka sivaloka, aura loka asa | kahiṃ śrīharidāsa bicāri dekhau, binā bihārī nāhiṃ jasa ||

राग आसावरि संसार समुद्र,मनुष्य-मीन-नक्र-मगर और जीव बहु बंदसि । मन-बयार प्रेरे सनेह फंद फंदसि।। लोभ पिंजर, लोभी मरजिया, पदारथ चारि खंद खंदसि । कहिं श्रीहरिदास तेई जीव पार भए, जे गहि रहे चरन आनंद-नंदसि ॥

rāga āsāvari saṃsāra samudra,manuṣya-mīna-nakra-magara aura jīva bahu baṃdasi | mana-bayāra prere saneha phaṃda phaṃdasi|| lobha piṃjara, lobhī marajiyā, padāratha cāri khaṃda khaṃdasi | kahiṃ śrīharidāsa teī jīva pāra bhae, je gahi rahe carana ānaṃda-naṃdasi ||

राग आसावरी हरि के नाम को आलस कत करत है रे, काल फिरत सर साँधैं । बेर-कुबेर कछु नहिं जानत, चढ्यौ रहत है काँधैं ॥ हीरा बहुत जवाहर संचे, कहा भयौ हस्ती दर बाँधैं । कहिं श्रीहरिदास महल में बनिता बनि ठाढ़ी भई, एकौं न चलत, जब आवत अंत की आँधैं ॥

rāga āsāvarī hari ke nāma ko ālasa kata karata hai re, kāla phirata sara sā~dhaiṃ | bera-kubera kachu nahiṃ jānata, caḍhyau rahata hai kā~dhaiṃ || hīrā bahuta javāhara saṃce, kahā bhayau hastī dara bā~dhaiṃ | kahiṃ śrīharidāsa mahala meṃ banitā bani ṭhār̤hī bhaī, ekauṃ na calata, jaba āvata aṃta kī ā~dhaiṃ ||

राग आसावरी देखौ इन लोगन की लावनि । बूझत नाहिं हरि चरन-कमल कौं मिथ्या जनम गँवावनि ॥ जब जमदूत आनि घेरत, तब करत आप मन-भावनि। कहिं श्रीहरिदास तबहिं चिरजीवौ, जब कुंजबिहारी चितावनि ।।

rāga āsāvarī dekhau ina logana kī lāvani | būjhata nāhiṃ hari carana-kamala kauṃ mithyā janama ga~vāvani || jaba jamadūta āni gherata, taba karata āpa mana-bhāvani| kahiṃ śrīharidāsa tabahiṃ cirajīvau, jaba kuṃjabihārī citāvani ||

राग आसावरी मन लगाइ प्रीति कीजै, कर करुवा सौं, ब्रज-वीथिन दीजै सोहनी । वृन्दावन सौं, बन-उपवन सौं, गुंज-माल हाथ पोहनी ॥ गो गो-सुतन सौं मृगी मृग-सुतन सौं,और तन नेंकु न जोहनी । श्रीहरिदास के स्वामी स्यामा-कुंजबिहारी-सौं चित, ज्यौं सिर पर दोहनी॥

rāga āsāvarī mana lagāi prīti kījai, kara karuvā sauṃ, braja-vīthina dījai sohanī | vṛndāvana sauṃ, bana-upavana sauṃ, guṃja-māla hātha pohanī || go go-sutana sauṃ mṛgī mṛga-sutana sauṃ,aura tana neṃku na johanī | śrīharidāsa ke svāmī syāmā-kuṃjabihārī-sauṃ cita, jyauṃ sira para dohanī||

राग कल्याण हरि कौ ऐसौई सब खेल। मृग तृष्ना जग व्यापि रह्यौ है, कहूं बिजौरौ न बेल। धन-मद, जोवन-मद, राज-मद, ज्यौं पंछिन में डेल। कहिं श्रीहरिदास यहै जिय जानौ, तीरथ कैसौ मेल ॥

rāga kalyāṇa hari kau aisauī saba khela| mṛga tṛṣnā jaga vyāpi rahyau hai, kahūṃ bijaurau na bela| dhana-mada, jovana-mada, rāja-mada, jyauṃ paṃchina meṃ ḍela| kahiṃ śrīharidāsa yahai jiya jānau, tīratha kaisau mela ||

राग कान्हरौ झूँठी बात सांची करि-दिखावत हौ हरि नागर। निस-दिन बुनत-उधेरत जात, प्रपंच कौ सागर॥ ठाठ बनाइ धर्यौ मिहरी कौ, है पुरुष तैं आगर। सुनि श्रीहरिदास यहै जिय जानौ, सपने कौ सौ जागर ॥

rāga kānharau jhū~ṭhī bāta sāṃcī kari-dikhāvata hau hari nāgara| nisa-dina bunata-udherata jāta, prapaṃca kau sāgara|| ṭhāṭha banāi dharyau miharī kau, hai puruṣa taiṃ āgara| suni śrīharidāsa yahai jiya jānau, sapane kau sau jāgara ||

राग कान्हरौ जगत प्रीति करि देखी, नाहिंनें गटी कौ कोऊ । छत्रपति रंक लौं देखे, प्रकृति-विरोध बन्यौ नहीं कोऊ ॥ दिन जो गये बहुत जनमनि के, ऐसैं जाउ जिन कोऊ । कहिं श्रीहरिदास मीत भले पाये बिहारी, ऐसे पावौ सब कोऊ ॥

rāga kānharau jagata prīti kari dekhī, nāhiṃneṃ gaṭī kau koū | chatrapati raṃka lauṃ dekhe, prakṛti-virodha banyau nahīṃ koū || dina jo gaye bahuta janamani ke, aisaiṃ jāu jina koū | kahiṃ śrīharidāsa mīta bhale pāye bihārī, aise pāvau saba koū ||

राग कान्हरौ लोग तौ भूलैं भलैं भूलैं, तुम जिनि भूलौ मालाधारी। अपुनौ पति छँड़ि औरन सौं रति, ज्यौं दारनि में दारी ॥ स्याम कहत ते जीव मोते बिमुख भए, जिन दूसरी करि डारी। कहिं श्रीहरिदास जज्ञ-देवता-पितरन कों श्रद्धा भारी ॥

rāga kānharau loga tau bhūlaiṃ bhalaiṃ bhūlaiṃ, tuma jini bhūlau mālādhārī| apunau pati cha~r̤i aurana sauṃ rati, jyauṃ dārani meṃ dārī || syāma kahata te jīva mote bimukha bhae, jina dūsarī kari ḍārī| kahiṃ śrīharidāsa jajña-devatā-pitarana koṃ śraddhā bhārī ||

राग कान्हरौ जौलौं जीवै तौलौं हरि भज रे मन और बात सब बादि। द्यौस चार के हला-भला में कहा लेइगौ लादि माया-मद, गुन-मद, जोवन-मद भूल्यौ नगर विवादि। कहिं श्रीहरिदास लोभ चरपट भयौ, काहे की लगै फ़िरादि ॥

rāga kānharau jaulauṃ jīvai taulauṃ hari bhaja re mana aura bāta saba bādi| dyausa cāra ke halā-bhalā meṃ kahā leigau lādi māyā-mada, guna-mada, jovana-mada bhūlyau nagara vivādi| kahiṃ śrīharidāsa lobha carapaṭa bhayau, kāhe kī lagai firādi ||

राग कान्हरौ प्रेम-समुद्र रूप-रस गहरे, कैसैं लागैं घाट । बेकार्यौं दै जान कहावत, जानिपन्यौं की कहा परी बाट ।। काहू कौ सर सूधौ न परै, मारत गाल गली-गली हाट । कहिं श्रीहरिदास जानि ठाकुर-बिहारी तकत ओट पाट ॥

rāga kānharau prema-samudra rūpa-rasa gahare, kaisaiṃ lāgaiṃ ghāṭa | bekāryauṃ dai jāna kahāvata, jānipanyauṃ kī kahā parī bāṭa || kāhū kau sara sūdhau na parai, mārata gāla galī-galī hāṭa | kahiṃ śrīharidāsa jāni ṭhākura-bihārī takata oṭa pāṭa ||