Kelimālā · Padas 101-110

राग वसंत अबकैं बसंत न्यारेई खेलैं काहू सौं मिलि खेलैं न री तेरी सौं। दुचिते भये कछू न सचु पाइयत तू काहू सखी सों मिलि न री मेरी सौं॥ देखैगी जु रंग उपजैगौ परस्पर राग रागिनीन के फेराफेरी सौं। श्रीहरिदास के स्वामी स्यामा कुंजबिहारी राग ही में रंग उपजेगौ एरी सौं॥

rāga vasaṃta abakaiṃ basaṃta nyāreī khelaiṃ kāhū sauṃ mili khelaiṃ na rī terī sauṃ| ducite bhaye kachū na sacu pāiyata tū kāhū sakhī soṃ mili na rī merī sauṃ|| dekhaigī ju raṃga upajaigau paraspara rāga rāginīna ke pherāpherī sauṃ| śrīharidāsa ke svāmī syāmā kuṃjabihārī rāga hī meṃ raṃga upajegau erī sauṃ||

राग वसंत रहौ रहौ बिहारी जू मेरी आँखिन में बूका मेलत(हौ) कित अंतर होत मुख अवलोकन कौ। और भाँवती तिहारी मिल्यौ चाहत मिस कैं पैयाँ लागौं पन पन कौ॥ गावत खेलत जो सुख उपजत सु तो कोटि वर है तन कौ। श्रीहरिदास के स्वामी कौ मिलत खेलत कौ सुखक हाँ पाइयत ऐसौ सुख मन कौ॥

rāga vasaṃta rahau rahau bihārī jū merī ā~khina meṃ būkā melata(hau) kita aṃtara hota mukha avalokana kau| aura bhā~vatī tihārī milyau cāhata misa kaiṃ paiyā~ lāgauṃ pana pana kau|| gāvata khelata jo sukha upajata su to koṭi vara hai tana kau| śrīharidāsa ke svāmī kau milata khelata kau sukhaka hā~ pāiyata aisau sukha mana kau||

राग गौरी सौंधे न्हाय बैठी पहिरि पट सुंदरि जहाँ फुलवारी तहाँ सुखवति अलकैं। कर नख सोभा कल केस सँवारति । मानौं नव घन में उड़गन झलकैं।। विविध सिंगार लियै आगें ठाढ़ी प्रियसखी भयौ भरु आनि रतिपति दल दलकैं। श्रीहरिदास के स्वामी स्यामा कुंजबिहारी की छबि निरखत लागत नाहीं पलकैं॥

rāga gaurī sauṃdhe nhāya baiṭhī pahiri paṭa suṃdari jahā~ phulavārī tahā~ sukhavati alakaiṃ| kara nakha sobhā kala kesa sa~vārati | mānauṃ nava ghana meṃ ur̤agana jhalakaiṃ|| vividha siṃgāra liyai āgeṃ ṭhār̤hī priyasakhī bhayau bharu āni ratipati dala dalakaiṃ| śrīharidāsa ke svāmī syāmā kuṃjabihārī kī chabi nirakhata lāgata nāhīṃ palakaiṃ||

राग गौरी चलौ सखी कुंजबिहारी सौं चित दै मिलि देखैं उनकी भाँवती। सुंदर सौं सुंदरि मिलि खेलत कैसैं धौं गाँवती॥ औचक आइ परी सखी तहाँ पिय पै पाँइ चँपाँवती। श्रीहरिदास के स्वामी स्याम सौं मिलि पौंढ़ी तन मन राँवती ।।

rāga gaurī calau sakhī kuṃjabihārī sauṃ cita dai mili dekhaiṃ unakī bhā~vatī| suṃdara sauṃ suṃdari mili khelata kaisaiṃ dhauṃ gā~vatī|| aucaka āi parī sakhī tahā~ piya pai pā~i ca~pā~vatī| śrīharidāsa ke svāmī syāma sauṃ mili pauṃr̤hī tana mana rā~vatī ||

राग गौरी राधा रसिक कुंजबिहारी खेलत फाग सब जुवती जन कहत हो हो होरी। भरत परस्पर काहू की काहू न सुधि हँसिकैं मन हरत मोहन गोरी॥ कर सौं करब जोरि कटि सौं कटिब मोरि करत नृत्य काहू न रुचि थोरी। श्रीहरिदास के स्वामी स्यामा फिरत न्यारेई न्यारे सब सखियनि की दृष्टि-बचावत तकि तब खोरी॥

rāga gaurī rādhā rasika kuṃjabihārī khelata phāga saba juvatī jana kahata ho ho horī| bharata paraspara kāhū kī kāhū na sudhi ha~sikaiṃ mana harata mohana gorī|| kara sauṃ karaba jori kaṭi sauṃ kaṭiba mori karata nṛtya kāhū na ruci thorī| śrīharidāsa ke svāmī syāmā phirata nyāreī nyāre saba sakhiyani kī dṛṣṭi-bacāvata taki taba khorī||

राग गौरी नव निकुंज ग्रह नवल आगे नवल वीना मध्य राग गौरी ठटी। मनों दस इंदु पीयूष वरषत सुखद चपल करजावली दृष्टि पिय की जटी॥ रीझि रीझि पिय देत भूषन वसन दास उर रसन दसननि धरत निरखि सारंग कटी। रसद श्रीहरिदास बिहारी अंग अंग मिलत अतन उदोत करत सुरति आरंभटी॥

rāga gaurī nava nikuṃja graha navala āge navala vīnā madhya rāga gaurī ṭhaṭī| manoṃ dasa iṃdu pīyūṣa varaṣata sukhada capala karajāvalī dṛṣṭi piya kī jaṭī|| rījhi rījhi piya deta bhūṣana vasana dāsa ura rasana dasanani dharata nirakhi sāraṃga kaṭī| rasada śrīharidāsa bihārī aṃga aṃga milata atana udota karata surati āraṃbhaṭī||

राग गौरी झूलत डोल दोऊ जन ठाढ़े। हॉंगत जोर सहित जैसौ जाके डाँडींब गहैं गाढ़े।। बिच बिच प्रीति रहसि रस रीति की राग रागिनीन के जूथ बाढ़े। श्रीहरिदास के स्वामी स्यामा कुंजबिहारी राग ही के रंग रंगि काढ़े।।

rāga gaurī jhūlata ḍola doū jana ṭhār̤he| haॉṃgata jora sahita jaisau jāke ḍā~ḍīṃba gahaiṃ gār̤he|| bica bica prīti rahasi rasa rīti kī rāga rāginīna ke jūtha bār̤he| śrīharidāsa ke svāmī syāmā kuṃjabihārī rāga hī ke raṃga raṃgi kār̤he||

राग गौरी झूलत डोल श्रीकुंजबिहारी। दूसरी ओर रसिक राधावर नागरि नवल दुलारी॥ राखे न रहत हँसत कहि कहि प्रिया बिलबिलात पिय भारी। श्रीहरिदास के स्वामी स्याम कहत री प्यारी अबकैं राखि हहा री।।

rāga gaurī jhūlata ḍola śrīkuṃjabihārī| dūsarī ora rasika rādhāvara nāgari navala dulārī|| rākhe na rahata ha~sata kahi kahi priyā bilabilāta piya bhārī| śrīharidāsa ke svāmī syāma kahata rī pyārī abakaiṃ rākhi hahā rī||

राग नट कौन प्रकृति तिहारी छिया तुमही मिलत बेगि भोर द्वै जात। अथवत निमेष होइ पह फाटी देखियत पहिली सह मात द्वै जात।। आवत जात भारौ परै पीतौ मरि जात। श्रीहरिदास के स्वामी तुम्हारे माथे तृन कितौक सुख जात॥

rāga naṭa kauna prakṛti tihārī chiyā tumahī milata begi bhora dvai jāta| athavata nimeṣa hoi paha phāṭī dekhiyata pahilī saha māta dvai jāta|| āvata jāta bhārau parai pītau mari jāta| śrīharidāsa ke svāmī tumhāre māthe tṛna kitauka sukha jāta||

राग नट जुव कवनी वैस किसोर दोऊ निकसि ठाढ़े भए सघन वन तें। तन तन में बसत मन मन में लसत सोभा बाढ़ी दुहँ दिसि मानों प्रगट भई दामिनि घन घन तें।। मोहन गहर गंभीर वदत पिक वानी उपजत मानौं प्रिया के वचन तें। श्रीहरिदास के स्वामी स्यामा कुंजबिहारी ऐसौ को जासौं मन लागै अनतें।।

rāga naṭa juva kavanī vaisa kisora doū nikasi ṭhār̤he bhae saghana vana teṃ| tana tana meṃ basata mana mana meṃ lasata sobhā bār̤hī duha~ disi mānoṃ pragaṭa bhaī dāmini ghana ghana teṃ|| mohana gahara gaṃbhīra vadata pika vānī upajata mānauṃ priyā ke vacana teṃ| śrīharidāsa ke svāmī syāmā kuṃjabihārī aisau ko jāsauṃ mana lāgai anateṃ||