Kelimālā · Padas 71-80

राग सारंग प्यारी तेरी पुतरी काजर हू तें कारी मानौं द्वै भँवर उड़े री बराबरि। चंपे की डार बैठे कुंद अलि लागी है जेब अराअरि॥ जब आनि घेरत कटक काम कौ तब जिय होत डराडरि। श्रीहरिदास के स्वामी स्यामा कुंजबिहारी दोऊ मिलि लरत झराझरि।।

rāga sāraṃga pyārī terī putarī kājara hū teṃ kārī mānauṃ dvai bha~vara ur̤e rī barābari| caṃpe kī ḍāra baiṭhe kuṃda ali lāgī hai jeba arāari|| jaba āni gherata kaṭaka kāma kau taba jiya hota ḍarāḍari| śrīharidāsa ke svāmī syāmā kuṃjabihārī doū mili larata jharājhari||

राग सारंग स्यामकिसोर जू तुम कौं दोऊ रंग रंगित पीतांबर चूनरी। ऐसौ रूप कहाँ तुम पायौ अहरनिस सोच उधेर बूनरी॥ मनमोहन सुर ज्ञान सिरोमनि सब अंगनि अंग कोक निपून री। श्रीहरिदास के स्वामी स्यामा तुम्हारी विचित्रताई प्रेम सौं पाइयत रस सूनरी॥

rāga sāraṃga syāmakisora jū tuma kauṃ doū raṃga raṃgita pītāṃbara cūnarī| aisau rūpa kahā~ tuma pāyau aharanisa soca udhera būnarī|| manamohana sura jñāna siromani saba aṃgani aṃga koka nipūna rī| śrīharidāsa ke svāmī syāmā tumhārī vicitratāī prema sauṃ pāiyata rasa sūnarī||

राग सारंग चौकी कहाँ बदलि परी हो प्यारे हरि। लाल पाट की हुती जंगाली ल्याए वरि॥ वह तौ हुती हीरनि खचित पै यह दुरंग पन्ना लालहि मिलि लैहौं लरि। श्रीहरिदास के स्वामी स्यामा कुंजबिहारी की चतुराई रही भरि॥

rāga sāraṃga caukī kahā~ badali parī ho pyāre hari| lāla pāṭa kī hutī jaṃgālī lyāe vari|| vaha tau hutī hīrani khacita pai yaha duraṃga pannā lālahi mili laihauṃ lari| śrīharidāsa ke svāmī syāmā kuṃjabihārī kī caturāī rahī bhari||

राग सारंग आऔ लाल ऐसे मद पीजै तेरौ झगा मेरी अँगिया धरि। कुच की सुराही नैननि के प्याले दारू द्यौंगी यौं अंकौं भरि॥ अधरनि चुवाइ लेउ सब रस तनिकौ न जानि देउ इत उत ढरि। श्रीहरिदास के स्वामी स्यामा कुंजबिहारी की सुहबति असर जहाँ आपुन हरि॥

rāga sāraṃga āau lāla aise mada pījai terau jhagā merī a~giyā dhari| kuca kī surāhī nainani ke pyāle dārū dyauṃgī yauṃ aṃkauṃ bhari|| adharani cuvāi leu saba rasa tanikau na jāni deu ita uta ḍhari| śrīharidāsa ke svāmī syāmā kuṃjabihārī kī suhabati asara jahā~ āpuna hari||

राग सारंग डोल झूलत बिहारी बिहारिनि पुहुप वृष्टि होति। सुर पुर पुर गंधर्व और पुर तिनकी नारि देखति वारति लर मोति॥ घेरा करति परस्पर सब मिलि कहूँ न देखी ऐसी जुवती जोति। श्रीहरिदास के स्वामी स्यामा कुंजबिहारिनि सादा चुरी खुभी पोति॥

rāga sāraṃga ḍola jhūlata bihārī bihārini puhupa vṛṣṭi hoti| sura pura pura gaṃdharva aura pura tinakī nāri dekhati vārati lara moti|| gherā karati paraspara saba mili kahū~ na dekhī aisī juvatī joti| śrīharidāsa ke svāmī syāmā kuṃjabihārini sādā curī khubhī poti||

राग विभास प्यारी जू बोलति नाहीं कै तू सूता उनींदी किधौं काहू कछु कह्यौ कै तेरौ ऐसौई सुभाव। मोहिं तेरे देखे बिनु कल न परै कै तू छाँड़ि कुभाव॥ काहू की झुकि हमैं देत री उपजत दुभाव। श्रीहरिदास के स्वामी स्याम कहत ताके बस परे प्रगटत जु भाव॥

rāga vibhāsa pyārī jū bolati nāhīṃ kai tū sūtā unīṃdī kidhauṃ kāhū kachu kahyau kai terau aisauī subhāva| mohiṃ tere dekhe binu kala na parai kai tū chā~r̤i kubhāva|| kāhū kī jhuki hamaiṃ deta rī upajata dubhāva| śrīharidāsa ke svāmī syāma kahata tāke basa pare pragaṭata ju bhāva||

राग विभास आलस भीजे री नैन जँभाति आछी भाँति सुदेस। कर सौं कर टेकि अँगुरिन पेंच मानौं ससि मंडल बैठ्यो अति भाँति सुदेस।॥। मन के हरिवे कौं और सुख नाहिंने कोऊ प्यारी नख सिख भाँति सुदेस। श्रीहरिदास के स्वामी स्याम छाती सों छाती लगायें अंग अंग सुदेस।।

rāga vibhāsa ālasa bhīje rī naina ja~bhāti āchī bhā~ti sudesa| kara sauṃ kara ṭeki a~gurina peṃca mānauṃ sasi maṃḍala baiṭhyo ati bhā~ti sudesa|||| mana ke harive kauṃ aura sukha nāhiṃne koū pyārī nakha sikha bhā~ti sudesa| śrīharidāsa ke svāmī syāma chātī soṃ chātī lagāyeṃ aṃga aṃga sudesa||

राग विभास प्यारी जू एक बात कौ मोहिं डर आवत है री मति कबहूँ कुमया करि जाति। पल पल हित वंछत हौं री मति परे भाँति॥ यह सचु ऐसेई रहौ री जिनि टरौ तेरी घाति। श्रीहरिदास के स्वामी स्याम कहत यौं बाढ़ौ ज्यौं पुरइनि जल की रीति तोहिं लौं सांति॥

rāga vibhāsa pyārī jū eka bāta kau mohiṃ ḍara āvata hai rī mati kabahū~ kumayā kari jāti| pala pala hita vaṃchata hauṃ rī mati pare bhā~ti|| yaha sacu aiseī rahau rī jini ṭarau terī ghāti| śrīharidāsa ke svāmī syāma kahata yauṃ bār̤hau jyauṃ puraini jala kī rīti tohiṃ lauṃ sāṃti||

राग विभास प्यारी जू हम तुम दोऊ एक कुंज के सखा रूसें क्यौं बनें। इहाँ न कोऊ हितू मेरौ न तेरौ जो यह पीर जनें।। हौं तेरौ वसीठ तू मेरौ और न बीच बनें । श्रीहरिदास के स्वामी स्यामा कुंजबिहारी कहत प्रीति पनें॥

rāga vibhāsa pyārī jū hama tuma doū eka kuṃja ke sakhā rūseṃ kyauṃ baneṃ| ihā~ na koū hitū merau na terau jo yaha pīra janeṃ|| hauṃ terau vasīṭha tū merau aura na bīca baneṃ | śrīharidāsa ke svāmī syāmā kuṃjabihārī kahata prīti paneṃ||

राग विभास चूनरी में जाड़ौ लागत है री कीजिये सुख सैन। घरी घरी कै रूसने पहर मनावत जात मीठे मीठे बैन।। उठि सदकें बलाइ लेऊॅं प्रकृति यौं न चाहियै चाहियै ज्यौं मैन। श्रीहरिदास के स्वामी स्यामा कुंजबिहारी गहि लपटाइ रहे मानि सबै सुख चैन।।

rāga vibhāsa cūnarī meṃ jār̤au lāgata hai rī kījiye sukha saina| gharī gharī kai rūsane pahara manāvata jāta mīṭhe mīṭhe baina|| uṭhi sadakeṃ balāi leūॅṃ prakṛti yauṃ na cāhiyai cāhiyai jyauṃ maina| śrīharidāsa ke svāmī syāmā kuṃjabihārī gahi lapaṭāi rahe māni sabai sukha caina||