Kelimālā · Padas 21-30

राग कान्हरौ जोवन रंग रंगीली सोने से गात ढरारे नैना कंठ पोति मखतूली। अंग अंग अनंग झलकत सोहत काननि बीरें सोभा देत देखत ही बनें जौन्ह में जौन्ह सी फूली॥ तनसुख सारी लाही अँगिया अतलस अतरौटा छबि चारि चारि चूरी पहुँचनि पहुँची खमकि बनी नकफूल जेब मुख बीरा चौका कौंधे संभ्रम भूली। ऐसी नित्य बिहारिनि श्रीबिहारीलाल संग अति आधीन आतुर लटपटात ज्यौं तरु तमाल कुंजमहल हरिदासी जोरी सुरति हिंडोरे झूली।।

rāga kānharau jovana raṃga raṃgīlī sone se gāta ḍharāre nainā kaṃṭha poti makhatūlī| aṃga aṃga anaṃga jhalakata sohata kānani bīreṃ sobhā deta dekhata hī baneṃ jaunha meṃ jaunha sī phūlī|| tanasukha sārī lāhī a~giyā atalasa atarauṭā chabi cāri cāri cūrī pahu~cani pahu~cī khamaki banī nakaphūla jeba mukha bīrā caukā kauṃdhe saṃbhrama bhūlī| aisī nitya bihārini śrībihārīlāla saṃga ati ādhīna ātura laṭapaṭāta jyauṃ taru tamāla kuṃjamahala haridāsī jorī surati hiṃḍore jhūlī||

राग कान्हरौ राधे दुलारी मान तजि। प्रान पायौ जात है री मेरौ सजि॥ अपनौ हाथ मेरे माथे धरि अभै दान दै अजि। श्रीहरिदास के स्वामी स्याम कहत री प्यारी रंग रुचि सौं बलि लजि॥

rāga kānharau rādhe dulārī māna taji| prāna pāyau jāta hai rī merau saji|| apanau hātha mere māthe dhari abhai dāna dai aji| śrīharidāsa ke svāmī syāma kahata rī pyārī raṃga ruci sauṃ bali laji||

राग कान्हरौ गुन की बात राधे तेरे आगे को जानें जो जानें सो कछु उनहारि। नृत्य गीत ताल भेदनि के विभेद जानें कहूँ जिते किते देखे झारि॥ तत्त्व सुद्ध स्वरूप रेख परमान जे विज्ञ सुघर ते पचे भारि। श्रीहरिदास के स्वामी स्यामा कुंजबिहारी नैंक तुम्हारी प्रकृति के अंग अंग और गुनी परे हारि॥

rāga kānharau guna kī bāta rādhe tere āge ko jāneṃ jo jāneṃ so kachu unahāri| nṛtya gīta tāla bhedani ke vibheda jāneṃ kahū~ jite kite dekhe jhāri|| tattva suddha svarūpa rekha paramāna je vijña sughara te pace bhāri| śrīharidāsa ke svāmī syāmā kuṃjabihārī naiṃka tumhārī prakṛti ke aṃga aṃga aura gunī pare hāri||

राग कान्हरौ सुघर भये हो बिहारी याही छाँह तें। जे जे सुघर सुर जानपन्यौं की ते ते याही बाँह तें।। हुते तौ अधिक बढ़े सब ही तें पै इनकी कस न खटात याह तें। श्रीहरिदास के स्वामी स्यामा कुंजबिहारी ज़कि रहे चाह तें।

rāga kānharau sughara bhaye ho bihārī yāhī chā~ha teṃ| je je sughara sura jānapanyauṃ kī te te yāhī bā~ha teṃ|| hute tau adhika bar̤he saba hī teṃ pai inakī kasa na khaṭāta yāha teṃ| śrīharidāsa ke svāmī syāmā kuṃjabihārī zaki rahe cāha teṃ|

राग कान्हरौ राधा रसिक कुंजबिहारी कहत जु हौं न कहूँ गयौ सुनि सुनि राधे तेरी सौं । मोहिं न पत्याहु तो संग हरिदासी हुती बूझि देखि भटू कहि धौं कहा भयौ मेरी सौं॥। प्यारी तोहिं गठोंद न प्रतीति छाँड़ि छिया जानि दै इतनीब एरी सौं। गहि लपटाइ रहे छैल दोऊ छाती सौं छाती लगाइ फेरा फेरी सौं।।

rāga kānharau rādhā rasika kuṃjabihārī kahata ju hauṃ na kahū~ gayau suni suni rādhe terī sauṃ | mohiṃ na patyāhu to saṃga haridāsī hutī būjhi dekhi bhaṭū kahi dhauṃ kahā bhayau merī sauṃ||| pyārī tohiṃ gaṭhoṃda na pratīti chā~r̤i chiyā jāni dai itanība erī sauṃ| gahi lapaṭāi rahe chaila doū chātī sauṃ chātī lagāi pherā pherī sauṃ||

राग कान्हरौ प्यारी तेरी महिमा वरनी न जाय जिहिं आलस काम बस कीन। ताकौं दंड हमैं लागत है री भए आधीन॥ साढ़े ग्यारह ज्यौं औटि दूजे नवसत साजि सहज ही तामें जवादि कर्पूर कस्तूरी कुमकुम के रंग भीन। श्रीहरिदास के स्वामी स्यामा कुंजबिहारी रस बस करि लीन॥

rāga kānharau pyārī terī mahimā varanī na jāya jihiṃ ālasa kāma basa kīna| tākauṃ daṃḍa hamaiṃ lāgata hai rī bhae ādhīna|| sār̤he gyāraha jyauṃ auṭi dūje navasata sāji sahaja hī tāmeṃ javādi karpūra kastūrī kumakuma ke raṃga bhīna| śrīharidāsa ke svāmī syāmā kuṃjabihārī rasa basa kari līna||

राग कान्हरौ श्रम जल कन नाहीं होत मोती माला कौ देहु। देखे बहुत अमोल मोल नहीं तन मन धन न्यौछावर लेहु।। रति विपरीत प्रीति कौ आलस नाहीं नायक तेरे मधि एहु। श्रीहरिदास के स्वामी स्यामा कुंजबिहारी प्रीति वर मिलए वेहु॥

rāga kānharau śrama jala kana nāhīṃ hota motī mālā kau dehu| dekhe bahuta amola mola nahīṃ tana mana dhana nyauchāvara lehu|| rati viparīta prīti kau ālasa nāhīṃ nāyaka tere madhi ehu| śrīharidāsa ke svāmī syāmā kuṃjabihārī prīti vara milae vehu||

राग कान्हरौ नील लाल गौर के ध्यान बैठे श्रीकुंजबिहारी। ज्यौं ज्यौं सुख पावत नाहीं त्यौं त्यौं दुख भयौ भारी॥ अरबराइ प्रगट भई जु सुख भयौ बहुत हिया री। श्रीहरिदास के स्वामी स्यामा कुंजबिहारी करि मनुहारी॥

rāga kānharau nīla lāla gaura ke dhyāna baiṭhe śrīkuṃjabihārī| jyauṃ jyauṃ sukha pāvata nāhīṃ tyauṃ tyauṃ dukha bhayau bhārī|| arabarāi pragaṭa bhaī ju sukha bhayau bahuta hiyā rī| śrīharidāsa ke svāmī syāmā kuṃjabihārī kari manuhārī||

राग कान्हरौ आजु की बानिक प्यारे तेरी प्यारी तुम्हारी वरनी न जाइ छबि। इनकी स्यामता तुम्हारी गौरता जैसे सित असित बेनी रही भुवंगम ज्यौं दबि॥ इनकौ पीताम्बर तुम्हारी नील निचोल ज्यौं ससि कुंदन जेब रवि। श्रीहरिदास के स्वामी स्यामा कुंजबिहारी की सोभा वरनी न जाय जो मिलैं रसिक कोटि कवि ।।

rāga kānharau āju kī bānika pyāre terī pyārī tumhārī varanī na jāi chabi| inakī syāmatā tumhārī gauratā jaise sita asita benī rahī bhuvaṃgama jyauṃ dabi|| inakau pītāmbara tumhārī nīla nicola jyauṃ sasi kuṃdana jeba ravi| śrīharidāsa ke svāmī syāmā kuṃjabihārī kī sobhā varanī na jāya jo milaiṃ rasika koṭi kavi ||

राग कान्हरौ देखि देखि फूल भई। प्रेम के प्रकास प्रीति के आगे ह्वै जु लई॥ सुनि री सखी बागौ बन्यौ आजु तुम पर तृन टूटत है जु नई। श्रीहरिदास के स्वामी स्यामा कुंजबिहारी सकल गुन निपुन ताताथेई ताथेई गति जु ठई ।।

rāga kānharau dekhi dekhi phūla bhaī| prema ke prakāsa prīti ke āge hvai ju laī|| suni rī sakhī bāgau banyau āju tuma para tṛna ṭūṭata hai ju naī| śrīharidāsa ke svāmī syāmā kuṃjabihārī sakala guna nipuna tātātheī tātheī gati ju ṭhaī ||