Kelimālā · Padas 1-10

राग कान्हरौ माई री सहज जोरी प्रगट भई जु रंग की गौर स्याम घन दामिनि जैसें। प्रथमहूँ हुती अबहूँ आगे हूँ रहिहै न टरिहै तैसें॥ अंग अंग की उजराई सुघराई चतुराई सुंदरता ऐसें। श्रीहरिदास के स्वामी स्यामा कुंजबिहारी सम वैस वैसें ॥

rāga kānharau māī rī sahaja jorī pragaṭa bhaī ju raṃga kī gaura syāma ghana dāmini jaiseṃ| prathamahū~ hutī abahū~ āge hū~ rahihai na ṭarihai taiseṃ|| aṃga aṃga kī ujarāī sugharāī caturāī suṃdaratā aiseṃ| śrīharidāsa ke svāmī syāmā kuṃjabihārī sama vaisa vaiseṃ ||

राग कान्हरौ रुचि के प्रकास परस्पर खेलन लागे। राग रागिनी अलौकिक उपजत नृत्य संगीत अलग लाग लागे॥ राग ही में रंग रह्यौ रंग के समुद्र में दोऊ झागे । श्रीहरिदास के स्वामी स्यामा कुंजबिहारी पै रंग रह्यौ रस ही में पागे।।

rāga kānharau ruci ke prakāsa paraspara khelana lāge| rāga rāginī alaukika upajata nṛtya saṃgīta alaga lāga lāge|| rāga hī meṃ raṃga rahyau raṃga ke samudra meṃ doū jhāge | śrīharidāsa ke svāmī syāmā kuṃjabihārī pai raṃga rahyau rasa hī meṃ pāge||

राग कान्हरौ ऐसेई देखत रहौं जनम सुफल करि मानौं। प्यारे की भाँवती भाँवती के प्यारे जुगल किसोरहि जानौं॥ छिनु न टरौ पल होहु न इत उत रहौ एक ही तानौं। श्रीहरिदास के स्वामी स्यामा कुंजबिहारी मन रानौं॥

rāga kānharau aiseī dekhata rahauṃ janama suphala kari mānauṃ| pyāre kī bhā~vatī bhā~vatī ke pyāre jugala kisorahi jānauṃ|| chinu na ṭarau pala hohu na ita uta rahau eka hī tānauṃ| śrīharidāsa ke svāmī syāmā kuṃjabihārī mana rānauṃ||

राग कान्हरौ जोरी विचित्र बनाई री माई काहू मन के हरन कौं। चितवत दृष्टि टरत नहिं इत उत मन वच क्रम याही संग भरन कौं॥ ज्यौं घन दामिनि संग रहत नित बिछुरत नाहिंन और वरन कौं। श्रीहरिदास के स्वामी स्यामा कुंजबिहारी न टरन कौं॥

rāga kānharau jorī vicitra banāī rī māī kāhū mana ke harana kauṃ| citavata dṛṣṭi ṭarata nahiṃ ita uta mana vaca krama yāhī saṃga bharana kauṃ|| jyauṃ ghana dāmini saṃga rahata nita bichurata nāhiṃna aura varana kauṃ| śrīharidāsa ke svāmī syāmā kuṃjabihārī na ṭarana kauṃ||

राग कान्हरौ इत उत काहे कौं सिधारति मेरी आँखिन आगे ही तू आव। प्रीति कौ हित हौं तौ तेरौ जानौं ऐसौई राखि सुभाव॥ अमृत से वचन जिय की प्रकृति सौं मिले ऐसौई दे दाव। श्रीहरिदास के स्वामी स्याम कहत री प्यारी प्रीति कौ मंगल गाव॥

rāga kānharau ita uta kāhe kauṃ sidhārati merī ā~khina āge hī tū āva| prīti kau hita hauṃ tau terau jānauṃ aisauī rākhi subhāva|| amṛta se vacana jiya kī prakṛti sauṃ mile aisauī de dāva| śrīharidāsa ke svāmī syāma kahata rī pyārī prīti kau maṃgala gāva||

राग कान्हरौ प्यारी जू जैसे तेरी आँखिन में हौं अपनपौ देखत हौं ऐसे तुम देखति हौं किधौं नाहीं। हौं तोसौं कहौं प्यारे आँखि मूँदि रहौं तौ लाल निकसि कहाँ जाहीं। मोकौं निकसिवे कौं ठौर बतावौ साँची कहौ बलि जाऊँ लागौं पाँहीं। श्रीहरिदास के स्वामी स्यामा तुमहिं देख्यौ चाहत और सुख लागत काहीं॥

rāga kānharau pyārī jū jaise terī ā~khina meṃ hauṃ apanapau dekhata hauṃ aise tuma dekhati hauṃ kidhauṃ nāhīṃ| hauṃ tosauṃ kahauṃ pyāre ā~khi mū~di rahauṃ tau lāla nikasi kahā~ jāhīṃ| mokauṃ nikasive kauṃ ṭhaura batāvau sā~cī kahau bali jāū~ lāgauṃ pā~hīṃ| śrīharidāsa ke svāmī syāmā tumahiṃ dekhyau cāhata aura sukha lāgata kāhīṃ||

राग कान्हरौ प्यारी तेरौ वदन अमृत की पंक तामें बींधें नैन द्वै। चित चल्यौ काढ़नि कौं विकच संधि संपुट में रह्यौ भ्बै॥ बहुत उपाइ आही री प्यारी पै न करत स्वै। श्रीहरिदास के स्वामी स्यामा कुञ्जबिहारी ऐसेई रहौ ह्वै।।

rāga kānharau pyārī terau vadana amṛta kī paṃka tāmeṃ bīṃdheṃ naina dvai| cita calyau kār̤hani kauṃ vikaca saṃdhi saṃpuṭa meṃ rahyau bhbai|| bahuta upāi āhī rī pyārī pai na karata svai| śrīharidāsa ke svāmī syāmā kuñjabihārī aiseī rahau hvai||

राग कान्हरौ आवत जात बजावत नूपुर। मेरौ तेरौ न्याव दई के आगे जो कछु करौ सो हमारे सिर ऊपर॥ निपट निकट मवास ह्वै रही प्यारी पैंड दूपर। श्रीहरिदास के स्वामी स्यामा कुंजबिहारी विलसत निहचल धूपर।।

rāga kānharau āvata jāta bajāvata nūpura| merau terau nyāva daī ke āge jo kachu karau so hamāre sira ūpara|| nipaṭa nikaṭa mavāsa hvai rahī pyārī paiṃḍa dūpara| śrīharidāsa ke svāmī syāmā kuṃjabihārī vilasata nihacala dhūpara||

राग कान्हरौ दृष्टि चेंप वर फंदा मन पिंजरा राख्यौ लै पंछी बिहारी। चुनों सुभाव प्रेम जल अंग श्रवत पीवत न अघात रहे मुख निहारी॥ प्यारी प्यारी रटत रहत छिन ही छिन याके और न कछू हिया री। सुनि हरिदास पंछी नाना रंग देखत ही देखत प्यारी जू न हारी॥

rāga kānharau dṛṣṭi ceṃpa vara phaṃdā mana piṃjarā rākhyau lai paṃchī bihārī| cunoṃ subhāva prema jala aṃga śravata pīvata na aghāta rahe mukha nihārī|| pyārī pyārī raṭata rahata china hī china yāke aura na kachū hiyā rī| suni haridāsa paṃchī nānā raṃga dekhata hī dekhata pyārī jū na hārī||

राग कान्हरौ भूलै भूलै हूं मान न करि री प्यारी तेरी भौहैं मैली देखत प्रान न रहत तन । ज्यौं न्यौछावर करौं प्यारी तोपै काहे तें तू मूकी कहत स्याम घन ॥ तोहिं ऐसें देखत मोहिंब कल कैसे होइ जु प्रान धन। सुनि श्रीहरिदास काहे न कहत यासों छाँड़िब छाँड़ि अपनौ पन।

rāga kānharau bhūlai bhūlai hūṃ māna na kari rī pyārī terī bhauhaiṃ mailī dekhata prāna na rahata tana | jyauṃ nyauchāvara karauṃ pyārī topai kāhe teṃ tū mūkī kahata syāma ghana || tohiṃ aiseṃ dekhata mohiṃba kala kaise hoi ju prāna dhana| suni śrīharidāsa kāhe na kahata yāsoṃ chā~r̤iba chā~r̤i apanau pana|