Padas 73-84

खंजन मीन मृगज मद मेंटत, कहा कहौं नैननिं की बातैं। सनी सुंदरी कहाँ लौं सिखईं, मोहन बसीकरन की घातैं। बंक निसंक चपल अनियारे, अरुन स्याम सित रचे कहाँ तैं। डरत न हरत परयौ सर्वसु मृदु मधुमिव मादिक दृग पातैं॥ नैंकु प्रसन्न दृष्टि पूरन करि, नहिं मोतन चितयौ प्रमदा तैं। (जै श्री) हित हरिवंश हंस कल गामिनि, भावै सो करहु प्रेम के नातैं॥

khaṃjana mīna mṛgaja mada meṃṭata, kahā kahauṃ nainaniṃ kī bātaiṃ| sanī suṃdarī kahā~ lauṃ sikhaīṃ, mohana basīkarana kī ghātaiṃ| baṃka nisaṃka capala aniyāre, aruna syāma sita race kahā~ taiṃ| ḍarata na harata parayau sarvasu mṛdu madhumiva mādika dṛga pātaiṃ|| naiṃku prasanna dṛṣṭi pūrana kari, nahiṃ motana citayau pramadā taiṃ| (jai śrī) hita harivaṃśa haṃsa kala gāmini, bhāvai so karahu prema ke nātaiṃ||

काहे कौं मान बढ़ावतु है बालक मृग लोचनि। हौंब डरनि कछु कहि न सकति इक बात सँकोचनी । मत्त मुरली अंतर तव गावत जागृत सैंन तवाकृति सोचनि। (जै श्री) हित हरिवंश महा मोहन पिय आतुर विट विरहज दुख मोचनि॥

kāhe kauṃ māna bar̤hāvatu hai bālaka mṛga locani| hauṃba ḍarani kachu kahi na sakati ika bāta sa~kocanī | matta muralī aṃtara tava gāvata jāgṛta saiṃna tavākṛti socani| (jai śrī) hita harivaṃśa mahā mohana piya ātura viṭa virahaja dukha mocani||

हौं जु कहति इक बात सखी, सुनि काहे कौं डारत? प्रानरमन सौं क्यौंऽब करत, आगस बिनु आरत॥ पिय चितवत तुव चंद वदन तन, तूँ अधमुख निजु चरन निहारति। वे मृदु चिबुक प्रलोइ प्रबोधत, तूँ भामिनि कर सौं कर टारति॥ विबस अधीर विरह अति कतर सर औसर कछुवै न विचारति। (जै श्री) हित हरिवंश रहसि प्रीतम मिलि, तृषित नैंन काहे न प्रतिपारति॥

hauṃ ju kahati ika bāta sakhī, suni kāhe kauṃ ḍārata? prānaramana sauṃ kyauṃ'ba karata, āgasa binu ārata|| piya citavata tuva caṃda vadana tana, tū~ adhamukha niju carana nihārati| ve mṛdu cibuka praloi prabodhata, tū~ bhāmini kara sauṃ kara ṭārati|| vibasa adhīra viraha ati katara sara ausara kachuvai na vicārati| (jai śrī) hita harivaṃśa rahasi prītama mili, tṛṣita naiṃna kāhe na pratipārati||

नागरीं निकुंज ऐंन किसलय दल रचित सैंन, कोक कला कुसल कुँवरि अति उदार री। सुरत रंग अंग अंग हाव भाव भृकुटि भंग, माधुरी तरंग मथत कोटि मार री। मुखर नूपुरनि सुभाव किंकनी विचित्र राव, विरमि विरमि नाथ वदत वर विहार री। लाड़िली किशोर राज हंस हंसिनी समाज, सींचत हरिवंश नैंन सुरस सार री॥

nāgarīṃ nikuṃja aiṃna kisalaya dala racita saiṃna, koka kalā kusala ku~vari ati udāra rī| surata raṃga aṃga aṃga hāva bhāva bhṛkuṭi bhaṃga, mādhurī taraṃga mathata koṭi māra rī| mukhara nūpurani subhāva kiṃkanī vicitra rāva, virami virami nātha vadata vara vihāra rī| lār̤ilī kiśora rāja haṃsa haṃsinī samāja, sīṃcata harivaṃśa naiṃna surasa sāra rī||

लटकति फिरति जुवति रस फूली। लता भवन में सरस सकल निसि, पिय सँग सुरत हिंडोरे झूली॥ जद्दपि अति अनुराग रसासव पान विवस नाहिंन गति भूली। आलस वलित नैंन विगलित लट, उर पर कछुक कंचुकी खूली॥ मरगजी माल सिथिल कटि बंधन, चित्रित कज्जल पीक दुकूली। (जै श्री) हित हरिवंश मदन सर जरजर , विथकित स्याम सँजीवन मूली॥

laṭakati phirati juvati rasa phūlī| latā bhavana meṃ sarasa sakala nisi, piya sa~ga surata hiṃḍore jhūlī|| jaddapi ati anurāga rasāsava pāna vivasa nāhiṃna gati bhūlī| ālasa valita naiṃna vigalita laṭa, ura para kachuka kaṃcukī khūlī|| maragajī māla sithila kaṭi baṃdhana, citrita kajjala pīka dukūlī| (jai śrī) hita harivaṃśa madana sara jarajara , vithakita syāma sa~jīvana mūlī||

सुधंग नाचत नवल किसोरी। थेई थेई कहति चहति प्रीतम दिसि, वदन चंद मनौं त्रिषित चकोरी॥ तान बंधान मान में नागरि देखत स्याम कहत हो हो होरी। (जै श्री) हित हरिवंश माधुरी अँग अँग, बरवस लियौ मोहन चित चोरी॥

sudhaṃga nācata navala kisorī| theī theī kahati cahati prītama disi, vadana caṃda manauṃ triṣita cakorī|| tāna baṃdhāna māna meṃ nāgari dekhata syāma kahata ho ho horī| (jai śrī) hita harivaṃśa mādhurī a~ga a~ga, baravasa liyau mohana cita corī||

रहसि रहसि मोहन पिय के संग री, लड़ैती अति रस लटकति। सरस सुधंग अंग में नागरि, थेई थेई कहति अवनि पद पटकति॥ कोक कला कुल जानि सिरोमनि, अभिनय कुटिल भृकुटियनि मटकति। विवस भये प्रीतम अलि लंपट, निरखि करज नासा पुट चटकति ॥ गुन गनु रसिक राइ चूड़ामनि रिझवति पदिक हार पट झटकति। (जै श्री) हित हरिवंश निकट दासीजन, लोचन चषक रसासव गटकति॥

rahasi rahasi mohana piya ke saṃga rī, lar̤aitī ati rasa laṭakati| sarasa sudhaṃga aṃga meṃ nāgari, theī theī kahati avani pada paṭakati|| koka kalā kula jāni siromani, abhinaya kuṭila bhṛkuṭiyani maṭakati| vivasa bhaye prītama ali laṃpaṭa, nirakhi karaja nāsā puṭa caṭakati || guna ganu rasika rāi cūr̤āmani rijhavati padika hāra paṭa jhaṭakati| (jai śrī) hita harivaṃśa nikaṭa dāsījana, locana caṣaka rasāsava gaṭakati||

वल्लवी सु कनक वल्लरी तमाल स्याम संग, लागि रही अंग अंग मनोभिरामिनी। वदन जोति मनौं मयंक अलका तिलक छबि कलंक, छपति स्याम अंक मनौं जलद दामिनी॥ विगत वास हेम खंभ मनौं भुवंग वैनी दंड, पिय के कंठ प्रेम पुंज कुंज कामिनी। (जै श्री) सोभित हरिवंश नाथ साथ सुरत आलस वंत, उरज कनक कलस राधिका सुनामिनी॥

vallavī su kanaka vallarī tamāla syāma saṃga, lāgi rahī aṃga aṃga manobhirāminī| vadana joti manauṃ mayaṃka alakā tilaka chabi kalaṃka, chapati syāma aṃka manauṃ jalada dāminī|| vigata vāsa hema khaṃbha manauṃ bhuvaṃga vainī daṃḍa, piya ke kaṃṭha prema puṃja kuṃja kāminī| (jai śrī) sobhita harivaṃśa nātha sātha surata ālasa vaṃta, uraja kanaka kalasa rādhikā sunāminī||

वृषभानु नंदिनी मधुर कल गावै। विकट औंघर तान चर्चरी ताल सौं, नंदनंदन मनसि मोद उपजावै॥ प्रथम मज्जन चारु चीर कज्जल तिलक, श्रवण कुंडल वदन चंदनि लजावै। सुभग नकबेसरी रतन हाटक जरी, अधर बंधूक दसन कुंद चमकावै॥ वलय कंकन चारु उरसि राजत हारु, कटिव किंकिनी चरन नूपुर बजावै। हंस कल गामिनी मथति मद कामिनी, नखनि मदयंतिका रंग रुचि द्यावे ॥ निर्त्त सागर रभसि रहसि नागरि नवल, चंद चाली विविध भेदनि जनावै। कोक विद्या विदित भाइ अभिनय निपुन, भू विलासनि मकर केतनि नचावै॥ निविड़ कानन भवन बाहु रंजित रवन, सरस आलाप सुख पुंज बरसावै। उभै संगम सिंधु सुरत पूषन बधु, द्रवत मकरंद हरिवंश अली पावै॥

vṛṣabhānu naṃdinī madhura kala gāvai| vikaṭa auṃghara tāna carcarī tāla sauṃ, naṃdanaṃdana manasi moda upajāvai|| prathama majjana cāru cīra kajjala tilaka, śravaṇa kuṃḍala vadana caṃdani lajāvai| subhaga nakabesarī ratana hāṭaka jarī, adhara baṃdhūka dasana kuṃda camakāvai|| valaya kaṃkana cāru urasi rājata hāru, kaṭiva kiṃkinī carana nūpura bajāvai| haṃsa kala gāminī mathati mada kāminī, nakhani madayaṃtikā raṃga ruci dyāve || nirtta sāgara rabhasi rahasi nāgari navala, caṃda cālī vividha bhedani janāvai| koka vidyā vidita bhāi abhinaya nipuna, bhū vilāsani makara ketani nacāvai|| nivir̤a kānana bhavana bāhu raṃjita ravana, sarasa ālāpa sukha puṃja barasāvai| ubhai saṃgama siṃdhu surata pūṣana badhu, dravata makaraṃda harivaṃśa alī pāvai||

नागरता की राशि किसोरी। नव नागर कुल मौलि साँवरी, वर बस कियो चितै मुख मोरी॥ रूप रुचिर अंग अंग माधुरी, विनु भूषन भूषित ब्रज गोरी। छिन छिन कुसल सुधंग अंग में, कोक रमस रस सिंधु झकोरी। चंचल रसिक मधुप मौंहन मन. राखे कनक कमल कुच कोरी। प्रीतम नैंन जुगल खंजन खग, बाँधे विविध निबंध डोरी। अवनी उदर नाभि सरसी में, मनौं कछुक मदिक मधु घोरी। (जै श्री) हित हरिवंश पिवत सुंदर वर, सींव सुदृढ़ निगमनि की तोरी॥

nāgaratā kī rāśi kisorī| nava nāgara kula mauli sā~varī, vara basa kiyo citai mukha morī|| rūpa rucira aṃga aṃga mādhurī, vinu bhūṣana bhūṣita braja gorī| china china kusala sudhaṃga aṃga meṃ, koka ramasa rasa siṃdhu jhakorī| caṃcala rasika madhupa mauṃhana mana. rākhe kanaka kamala kuca korī| prītama naiṃna jugala khaṃjana khaga, bā~dhe vividha nibaṃdha ḍorī| avanī udara nābhi sarasī meṃ, manauṃ kachuka madika madhu ghorī| (jai śrī) hita harivaṃśa pivata suṃdara vara, sīṃva sudṛr̤ha nigamani kī torī||

छाँड़िदैं मानिनी मान मन धरिबौ। प्रनत सुंदर सुघर प्रानवल्लभ नवल, वचन आधीन सौं इतौ कत करिबौं। । जपत हरि विवस तव नाम प्रतिपद विमल, मनसि तव ध्यान ते निमिष नहिं टरिबौ। घटति पलु पलु सुभग सरद की जामीनी, भामिनी सरस अनुराग दिसि ढरिबौ॥ हौं जु कहति निजु बात सुनो मनि सखि, सुमुखि बिनु काज घन विरह दुख भरी वै। मिलत हरिवंश हित’ कुंज किसलय सयन, करत कल केलि सुख सिंधु में तिरिबौ॥

chā~r̤idaiṃ māninī māna mana dharibau| pranata suṃdara sughara prānavallabha navala, vacana ādhīna sauṃ itau kata karibauṃ| | japata hari vivasa tava nāma pratipada vimala, manasi tava dhyāna te nimiṣa nahiṃ ṭaribau| ghaṭati palu palu subhaga sarada kī jāmīnī, bhāminī sarasa anurāga disi ḍharibau|| hauṃ ju kahati niju bāta suno mani sakhi, sumukhi binu kāja ghana viraha dukha bharī vai| milata harivaṃśa hita’ kuṃja kisalaya sayana, karata kala keli sukha siṃdhu meṃ tiribau||

आजुब देखियत है हो प्यारी रंग भरी। मोपै न दुरति चोरी वृषभानु की किशोरी; सिथिल कटि की डोरी,नंद के लालन सौं सुरत लरी॥ मोतियन लर टूटी चिकुर चंद्रिका छूटी रहसि रसिक लूटी गंडनि पीक परी। नैननि आलस बस अधर बिंब निरस; पुलक प्रेम परस हित हरिवंश री राजत खरी॥

ājuba dekhiyata hai ho pyārī raṃga bharī| mopai na durati corī vṛṣabhānu kī kiśorī; sithila kaṭi kī ḍorī,naṃda ke lālana sauṃ surata larī|| motiyana lara ṭūṭī cikura caṃdrikā chūṭī rahasi rasika lūṭī gaṃḍani pīka parī| nainani ālasa basa adhara biṃba nirasa; pulaka prema parasa hita harivaṃśa rī rājata kharī||