Padas 61-72

आजु सखी बन में जु बने प्रंभु नाचते हैं ब्रज मंडन। वैस किसोर जुवति अंसुन पर दियैं विमल भुज दंडन॥ कोंमल कुटिल अलक सुठि सोभित अबलंबित जुग गंडन। मानहु मधुप थकित रस लंपट नील कमल के खंडन॥ हास विलास हरत सबकौ मन काम समूह विहंडन। (जै श्री) हित हरिवंश करत अपनौ जस प्रकट अखिल ब्रह्मंडन॥

āju sakhī bana meṃ ju bane praṃbhu nācate haiṃ braja maṃḍana| vaisa kisora juvati aṃsuna para diyaiṃ vimala bhuja daṃḍana|| koṃmala kuṭila alaka suṭhi sobhita abalaṃbita juga gaṃḍana| mānahu madhupa thakita rasa laṃpaṭa nīla kamala ke khaṃḍana|| hāsa vilāsa harata sabakau mana kāma samūha vihaṃḍana| (jai śrī) hita harivaṃśa karata apanau jasa prakaṭa akhila brahmaṃḍana||

खेलत रास दुलहिनी दूलहु। सुनहु न सखी सहित ललितादिक, निरखि निरखि नैंननि किन फूलहु॥ अति कल मधुर महा मौंहन धुनि, उपजत हंस सुता के कूलहु। थेई थेई वचन मिथुन मुख निसरत, सुनि सुनि देह दसा किन भुलहु॥ मृदु पद न्यास उठत कुंकुम रज, अदभूत बहत समीर दुकूलहु। कबहुँ स्याम स्यामा दसनांचल- कच कुच हार छुवत भुज मूलहु॥ अति लावन्य, रूप, अभिनय, गुन, नाहिन कोटि काम समतूलहु। भृकुटि विलास हास रस बरषत (जै श्री) हित हरिवंश प्रेम रस झूलहु॥

khelata rāsa dulahinī dūlahu| sunahu na sakhī sahita lalitādika, nirakhi nirakhi naiṃnani kina phūlahu|| ati kala madhura mahā mauṃhana dhuni, upajata haṃsa sutā ke kūlahu| theī theī vacana mithuna mukha nisarata, suni suni deha dasā kina bhulahu|| mṛdu pada nyāsa uṭhata kuṃkuma raja, adabhūta bahata samīra dukūlahu| kabahu~ syāma syāmā dasanāṃcala- kaca kuca hāra chuvata bhuja mūlahu|| ati lāvanya, rūpa, abhinaya, guna, nāhina koṭi kāma samatūlahu| bhṛkuṭi vilāsa hāsa rasa baraṣata (jai śrī) hita harivaṃśa prema rasa jhūlahu||

मोहन मदन त्रिभंगी। मोहन मुनि मन रंगी॥ मोहन मुनि सघन प्रगट परमानँद गुन गंभीर गुपाला। सीस किरीट श्रवण मनि कुंडल उर मंडित बन माला॥ पीतांबर तन धातु विचित्रित कल किंकिनि कटि चंगी। नख मनि तरनि चरन सरसीरूह मोहन मदन त्रिभंगी॥ मोहन बैंनु बजावै। इहिं रव नारि बुलावै॥ आईं ब्रज नारि सुनत बंसी रव गृह पति बंधु विसारे। दरसन मदन गुपाल मनोहर मनसिज ताप निवारे॥ हरषित बदन बैंक अवलोकन सरस मधुर धुनि गाव। मधुमय श्याम समान अधर धरे मोहन बैंनु बजावे॥ रास रचा बन माँही। विमल कलप तरु छाँहीं॥ विमल कलपतरु तीर सुपेशल सरद रैंन वर चंदा। सीतल मंद सुगंध पवन बहै तहाँ खेलत नंद नंदा॥ अदभुत ताल मृदंग मनोहर किंकिनि शब्द कराहीं। जमुना पुलिन रसिक रस सागर रास रच्यो बन माँहि॥ देखत मधुकर केली। मोहे खग मृग बेली॥ मोहे मृगधैंनु सहित सुर सुंदरि प्रेम मगन पट छूटे। उडगन चकित थकित ससि मंडल कोटि मदन मन लूटे॥ अधर पान परिरंभन अति रस आनँद मगन सहेली। (जै श्री) हित हरिवंश रसिक सचु पावत देखत मधुकर केली॥

mohana madana tribhaṃgī| mohana muni mana raṃgī|| mohana muni saghana pragaṭa paramāna~da guna gaṃbhīra gupālā| sīsa kirīṭa śravaṇa mani kuṃḍala ura maṃḍita bana mālā|| pītāṃbara tana dhātu vicitrita kala kiṃkini kaṭi caṃgī| nakha mani tarani carana sarasīrūha mohana madana tribhaṃgī|| mohana baiṃnu bajāvai| ihiṃ rava nāri bulāvai|| āīṃ braja nāri sunata baṃsī rava gṛha pati baṃdhu visāre| darasana madana gupāla manohara manasija tāpa nivāre|| haraṣita badana baiṃka avalokana sarasa madhura dhuni gāva| madhumaya śyāma samāna adhara dhare mohana baiṃnu bajāve|| rāsa racā bana mā~hī| vimala kalapa taru chā~hīṃ|| vimala kalapataru tīra supeśala sarada raiṃna vara caṃdā| sītala maṃda sugaṃdha pavana bahai tahā~ khelata naṃda naṃdā|| adabhuta tāla mṛdaṃga manohara kiṃkini śabda karāhīṃ| jamunā pulina rasika rasa sāgara rāsa racyo bana mā~hi|| dekhata madhukara kelī| mohe khaga mṛga belī|| mohe mṛgadhaiṃnu sahita sura suṃdari prema magana paṭa chūṭe| uḍagana cakita thakita sasi maṃḍala koṭi madana mana lūṭe|| adhara pāna pariraṃbhana ati rasa āna~da magana sahelī| (jai śrī) hita harivaṃśa rasika sacu pāvata dekhata madhukara kelī||

बैंनु माई बाजै बंसीवट सदा बसंत रहत वृंदावन पुलिन पवित्र सुभग यमुना तट॥ जटित क्रीट मकराकृत कुंडल मुखारविंद भँवर मानौं लट। दसननि कुंद कली छवि लज्जित लज्जित कनक समान पीत पट॥ मुनि मन ध्यान धरत नहिं पावत करत विनोद संग बालक भट। दास अनन्य भजन रस कारन हित हरिवंश प्रकट लीला नट॥

baiṃnu māī bājai baṃsīvaṭa sadā basaṃta rahata vṛṃdāvana pulina pavitra subhaga yamunā taṭa|| jaṭita krīṭa makarākṛta kuṃḍala mukhāraviṃda bha~vara mānauṃ laṭa| dasanani kuṃda kalī chavi lajjita lajjita kanaka samāna pīta paṭa|| muni mana dhyāna dharata nahiṃ pāvata karata vinoda saṃga bālaka bhaṭa| dāsa ananya bhajana rasa kārana hita harivaṃśa prakaṭa līlā naṭa||

मूल-मदन मदन धन निकुंज खेलत हरि, राका रुचिर सरद रजनी। यमुना पुलिन तट सुरतरु के निकट, रचित रास चलि मिलि सजनी॥ वाजत मृदु मृदंग नाचत सबै सुधंग; तैं न श्रवन सुन्यौ बैंनु बजनी। (जै श्री) हित हरिवंश प्रभु राधिका रमन, मोकौं भावै माई जगत भगत भजनी॥

mūla-madana madana dhana nikuṃja khelata hari, rākā rucira sarada rajanī| yamunā pulina taṭa surataru ke nikaṭa, racita rāsa cali mili sajanī|| vājata mṛdu mṛdaṃga nācata sabai sudhaṃga; taiṃ na śravana sunyau baiṃnu bajanī| (jai śrī) hita harivaṃśa prabhu rādhikā ramana, mokauṃ bhāvai māī jagata bhagata bhajanī||

विहरत दोऊ प्रीतम कुंज। अनुपम गौर स्याम तन सोभा वन वरषत सुख पुंज॥ अद्भुत खेत महा मनमथ कौ दुंदुभि भूषन राव। जूझत सुभट परस्पर अँग अँग उपजत कोटिक भाव॥ भर संग्राम अमित अति अबला निद्रायत काले नैन। पिय के अंक निसंक तंक तन आलस जुत कृत सैंन लालन मिस आतुर पिय परसद उरु नाभि ऊरजात। अद्भुत छटा विलोकि अवनि पर विथकित वेपथ गात॥ नागरि निरखि मदन विष व्यापित दियौ सुधाधर धीर। सत्वर उठे महामधु पीवत मिलत मीन मिव नीर॥ अवहीं मैं मुख मध्य विलोके बिंबाधर सु रसाल। जागृत त्यौं भ्रम भयौ परयौ मन सत मनसिज कुल जाल॥ सकृदपि मयि अधरामृत मुपनय सुंदरि सहज सनेह। तव पद पंकज को निजु मंदिर पालय सखि मम देह॥ प्रिया कहति कहु कहाँ हुते पिय नव निकुंज वर राज। सुंदर वचन वचन कत वितरत रति लंपट बिनु काज॥ इतनौं श्रवन सुनत मानिनि मुख अंतर रहयौ न धीर। मति कातर विरहज दुख व्यापित बहुतर स्वास समीर॥ (जै श्री) हित हरिवंश भुजनि आकरषे लै राखे उर माँझ। मिथुन मिलत जू कछुक सुख उपज्यौ त्रुटि लव मिव भई साँझ॥

viharata doū prītama kuṃja| anupama gaura syāma tana sobhā vana varaṣata sukha puṃja|| adbhuta kheta mahā manamatha kau duṃdubhi bhūṣana rāva| jūjhata subhaṭa paraspara a~ga a~ga upajata koṭika bhāva|| bhara saṃgrāma amita ati abalā nidrāyata kāle naina| piya ke aṃka nisaṃka taṃka tana ālasa juta kṛta saiṃna lālana misa ātura piya parasada uru nābhi ūrajāta| adbhuta chaṭā viloki avani para vithakita vepatha gāta|| nāgari nirakhi madana viṣa vyāpita diyau sudhādhara dhīra| satvara uṭhe mahāmadhu pīvata milata mīna miva nīra|| avahīṃ maiṃ mukha madhya viloke biṃbādhara su rasāla| jāgṛta tyauṃ bhrama bhayau parayau mana sata manasija kula jāla|| sakṛdapi mayi adharāmṛta mupanaya suṃdari sahaja saneha| tava pada paṃkaja ko niju maṃdira pālaya sakhi mama deha|| priyā kahati kahu kahā~ hute piya nava nikuṃja vara rāja| suṃdara vacana vacana kata vitarata rati laṃpaṭa binu kāja|| itanauṃ śravana sunata mānini mukha aṃtara rahayau na dhīra| mati kātara virahaja dukha vyāpita bahutara svāsa samīra|| (jai śrī) hita harivaṃśa bhujani ākaraṣe lai rākhe ura mā~jha| mithuna milata jū kachuka sukha upajyau truṭi lava miva bhaī sā~jha||

रुचिर राजत वधू कानन किसोरी। सरस षोडस कियें, तिलक मृगमद दियें, मृगज लोचन उबटि अंग सिर खोरी॥ गंड पंडीर मंडित चिकुर चंद्रिका, मेदिनि कबरि गुंथित सुरंग डोरी। श्रवण ताटंक कै. चिबुक पर बिंदु दै, कसूँभी कंचुकी दुरै उरज फल कोरी॥ वलय कंकन दोति, नखन जावक जोति, उदर गुन रेख पट नील कटि थोरी। सुभग जघन स्थली क्वनित किंकिनि भली, कोक संगीत रस सिंधु झक झोरी॥ विविध लीला रचित रहसि हरिवंश हित; रसिक सिरमौर राधा रमन जोरी। भृकुटि निर्जित मदन मंद सस्मित वदन, किये रस विवस घन स्याम पिय गोरी॥

rucira rājata vadhū kānana kisorī| sarasa ṣoḍasa kiyeṃ, tilaka mṛgamada diyeṃ, mṛgaja locana ubaṭi aṃga sira khorī|| gaṃḍa paṃḍīra maṃḍita cikura caṃdrikā, medini kabari guṃthita suraṃga ḍorī| śravaṇa tāṭaṃka kai. cibuka para biṃdu dai, kasū~bhī kaṃcukī durai uraja phala korī|| valaya kaṃkana doti, nakhana jāvaka joti, udara guna rekha paṭa nīla kaṭi thorī| subhaga jaghana sthalī kvanita kiṃkini bhalī, koka saṃgīta rasa siṃdhu jhaka jhorī|| vividha līlā racita rahasi harivaṃśa hita; rasika siramaura rādhā ramana jorī| bhṛkuṭi nirjita madana maṃda sasmita vadana, kiye rasa vivasa ghana syāma piya gorī||

रास में रसिक मोहन बने भामिनी। सुभग पावन पुलिन सरस सौरभ नलिन, मत्त मधुकर निकर सरद की जामिनी॥ त्रिविध रोचक पवन ताप दिनमनि दवन, तहाँ ठाढ़े रमन संग सत कामिनी। ताल बीना मृदंग सरस नाचत सुधंग; एक ते एक संगीत की स्वामिनी॥ राग रागिनि जमी विपिन वरसत अमी, अधर बिंबनि रमी मुरलि अभिरामिनी। लाग कट्टर उरप सप्त सुर सौं सुलप लेति सुंदर सुघर राधिका नामिनी॥ तत्त थेई थेई करत गांव नौतन धरत, पलटि डगमग ढरति मत्त गज गामिनी। धाइ नवरंग धरी उरसि राजत खरी; उभय कल हंस हरिवंश घन दामिनी॥

rāsa meṃ rasika mohana bane bhāminī| subhaga pāvana pulina sarasa saurabha nalina, matta madhukara nikara sarada kī jāminī|| trividha rocaka pavana tāpa dinamani davana, tahā~ ṭhār̤he ramana saṃga sata kāminī| tāla bīnā mṛdaṃga sarasa nācata sudhaṃga; eka te eka saṃgīta kī svāminī|| rāga rāgini jamī vipina varasata amī, adhara biṃbani ramī murali abhirāminī| lāga kaṭṭara urapa sapta sura sauṃ sulapa leti suṃdara sughara rādhikā nāminī|| tatta theī theī karata gāṃva nautana dharata, palaṭi ḍagamaga ḍharati matta gaja gāminī| dhāi navaraṃga dharī urasi rājata kharī; ubhaya kala haṃsa harivaṃśa ghana dāminī||

मोहिनी मोहन रंगे प्रेम सुरंग, मंत्र मुदित कल नाचत सुधगे। सकल कला प्रवीन कल्यान रागिनी लीन, कहत न बनै माधुरी अंग अंगे॥ तरनि तनया तीर त्रिविध सखी समीर। मानौं मुनी व्रत धरयौ कपोती कोकिला कीर॥ नागरि नव किशोर मिथुन मनसि चोर। सरस गावत दोऊ मंजुल मंदर घोर॥ कंकन किंकिनि धुनि मुखर नूपुरनि सुनि। (जै श्री) हित हरिवंश रस वरषत नव तरुनी॥

mohinī mohana raṃge prema suraṃga, maṃtra mudita kala nācata sudhage| sakala kalā pravīna kalyāna rāginī līna, kahata na banai mādhurī aṃga aṃge|| tarani tanayā tīra trividha sakhī samīra| mānauṃ munī vrata dharayau kapotī kokilā kīra|| nāgari nava kiśora mithuna manasi cora| sarasa gāvata doū maṃjula maṃdara ghora|| kaṃkana kiṃkini dhuni mukhara nūpurani suni| (jai śrī) hita harivaṃśa rasa varaṣata nava tarunī||

आजु सँभारत नाँहिन गोरी। फूली फिर मत्त करिनी ज्यौं सुरत समुद्र झकोरी॥ आलस वलित अरुन धूसर मषि प्रगट करत दृग चोरी। पिय पर करुन अमी रस बरषत अधर अरुनता थोरी॥ बाँधत भृंगं उरज अंबुज पर अलकनि बंध किसोरी। संगम किरचि किरचि कंचुकि बँध सिथिल भई कटि डोरी॥ देति असीस निरखि जुवती जन जिनकें प्रीति न थोरी। (जै श्री) हित हरिवंश विपिन भूतल पर संतत अविचल जोरी॥

āju sa~bhārata nā~hina gorī| phūlī phira matta karinī jyauṃ surata samudra jhakorī|| ālasa valita aruna dhūsara maṣi pragaṭa karata dṛga corī| piya para karuna amī rasa baraṣata adhara arunatā thorī|| bā~dhata bhṛṃgaṃ uraja aṃbuja para alakani baṃdha kisorī| saṃgama kiraci kiraci kaṃcuki ba~dha sithila bhaī kaṭi ḍorī|| deti asīsa nirakhi juvatī jana jinakeṃ prīti na thorī| (jai śrī) hita harivaṃśa vipina bhūtala para saṃtata avicala jorī||

स्याम सँग राधिका रास मंडल बनी। बीच नंदलाल ब्रजवाल चंपक वरन, ज्यौंव घन तडित बिच कनक मरकत मनी॥ लेति गति मान तत्त थेई हस्तक भेद, स रे ग म प ध नि ये सप्त सुर नंदिनी। निर्त रस पहिर पट नील प्रगटित छबी, वदन जनु जलद में मकर की चंदिनी॥ राग रागिनि तान मान संगीत मत, थकित राकेश नाम सरद की जामिनी। (जै श्री) हित हरिवंश प्रभु हंस कटि केहरी, दूरि कृत मदन मद मत्त गज गामिनी॥

syāma sa~ga rādhikā rāsa maṃḍala banī| bīca naṃdalāla brajavāla caṃpaka varana, jyauṃva ghana taḍita bica kanaka marakata manī|| leti gati māna tatta theī hastaka bheda, sa re ga ma pa dha ni ye sapta sura naṃdinī| nirta rasa pahira paṭa nīla pragaṭita chabī, vadana janu jalada meṃ makara kī caṃdinī|| rāga rāgini tāna māna saṃgīta mata, thakita rākeśa nāma sarada kī jāminī| (jai śrī) hita harivaṃśa prabhu haṃsa kaṭi keharī, dūri kṛta madana mada matta gaja gāminī||

सुंदर पुलिन सुभग सुख दाइक। नव नव घन अनुराग परस्पर खेलत कुँवर नागरी नांइक। सीतल हंस सुता रस बिचिनु परसि पवन सीकर मृदु वरषत। वर मंदार कमल चंपक कुल सौरभ सरसि मिथुन मन हरषत। सकल सुधंग विलास परावधि नाचत नवल मिले सुर गावत। मृगज मयूर मराल भ्रमर पिक अदभुत कोटि मदन सिर नावत। निर्मित कुसुम सैंन मधु पूरित भजन कनक निकुंज विराजत। रजनी मुख सुख रासि परस्पर सुरत समर दोऊ दल साजत॥ विट कुल नृपति किसोरी कर धृत, बुधि बल नीबी बंधन मोचत। ‘नेति नेति’ वचनामृत बोलत प्रनय कोप प्रीतम नहिं सोचत । (जै श्री) हित हरिवंश रसिक ललितादिक लता भवन रंध्रनि अवलोकत। अनुपम सुख भर भरित विवस असु आनँद वारि कंठ दृग रोकत॥

suṃdara pulina subhaga sukha dāika| nava nava ghana anurāga paraspara khelata ku~vara nāgarī nāṃika| sītala haṃsa sutā rasa bicinu parasi pavana sīkara mṛdu varaṣata| vara maṃdāra kamala caṃpaka kula saurabha sarasi mithuna mana haraṣata| sakala sudhaṃga vilāsa parāvadhi nācata navala mile sura gāvata| mṛgaja mayūra marāla bhramara pika adabhuta koṭi madana sira nāvata| nirmita kusuma saiṃna madhu pūrita bhajana kanaka nikuṃja virājata| rajanī mukha sukha rāsi paraspara surata samara doū dala sājata|| viṭa kula nṛpati kisorī kara dhṛta, budhi bala nībī baṃdhana mocata| ‘neti neti’ vacanāmṛta bolata pranaya kopa prītama nahiṃ socata | (jai śrī) hita harivaṃśa rasika lalitādika latā bhavana raṃdhrani avalokata| anupama sukha bhara bharita vivasa asu āna~da vāri kaṃṭha dṛga rokata||