Padas 49-60

देखि सखी राधा पिय केलि । ये दोउ खोरि खरिक गिरि गहवर, विहरत कुँवर कंठ भुज मेलि ॥ ये दोउ नवल किसोर रूप निधि, विटप तमाल कनक मनौ बेलि । अधर अदन चुंबन परिरंभन, तन पुलकित आनँद रस झेलि ॥ पट बंधन कंचुकि कुच परसत, कोप कपट निरखत कर पेलि । (जै श्री) हित हरिवंश लाल रस लंपट, धाइ धरत उर बीच सँकेलि॥

dekhi sakhī rādhā piya keli | ye dou khori kharika giri gahavara, viharata ku~vara kaṃṭha bhuja meli || ye dou navala kisora rūpa nidhi, viṭapa tamāla kanaka manau beli | adhara adana cuṃbana pariraṃbhana, tana pulakita āna~da rasa jheli || paṭa baṃdhana kaṃcuki kuca parasata, kopa kapaṭa nirakhata kara peli | (jai śrī) hita harivaṃśa lāla rasa laṃpaṭa, dhāi dharata ura bīca sa~keli||

नवल नागरि नवल नागर किसोर मिलि, कुञ्ज कौंमल कमल दलनि सिज्या रची । गौर स्यामल अंग रुचिर तापर मिले, सरस मनि नील मनौं मृदुल कंचन खची ॥ सुरत नीबी निबंध हेत पिय, मानिनी – प्रिया की भुजनि में कलह मोंहन मची । सुभग श्रीफल उरज पानि परसत, रोष – हुंकार गर्व दृग भंगि भामिनि लची ॥ कोक कोटिक रभस रहसि ‘हरिवंश हित’, विविध कल माधुरी किमपि नाँहिन बची । प्रनयमय रसिक ललितादि लोचन चषक, पिवत मकरंद सुख रासि अंतर सची॥

navala nāgari navala nāgara kisora mili, kuñja kauṃmala kamala dalani sijyā racī | gaura syāmala aṃga rucira tāpara mile, sarasa mani nīla manauṃ mṛdula kaṃcana khacī || surata nībī nibaṃdha heta piya, māninī – priyā kī bhujani meṃ kalaha moṃhana macī | subhaga śrīphala uraja pāni parasata, roṣa – huṃkāra garva dṛga bhaṃgi bhāmini lacī || koka koṭika rabhasa rahasi ‘harivaṃśa hita’, vividha kala mādhurī kimapi nā~hina bacī | pranayamaya rasika lalitādi locana caṣaka, pivata makaraṃda sukha rāsi aṃtara sacī||

दान दै री नवल किसोरी । माँगत लाल लाड़िलौ नागर, प्रगट भई दिन दिन की चोरी ॥ नव नारंग कनक हीरावलि, विद्रुम सरस जलज मनि गोरी । पूरित रस पीयूष जुगल घट, कमल कदलि खंजन की जोरी ॥ तोपैं सकल सौंज दामिनि की, कत सतराति कुटिल दृग भोरी । नूपुर रव किंकिनी पिसुन घर, ‘हित हरिवंश’ कहत नहिं थोरी॥

dāna dai rī navala kisorī | mā~gata lāla lār̤ilau nāgara, pragaṭa bhaī dina dina kī corī || nava nāraṃga kanaka hīrāvali, vidruma sarasa jalaja mani gorī | pūrita rasa pīyūṣa jugala ghaṭa, kamala kadali khaṃjana kī jorī || topaiṃ sakala sauṃja dāmini kī, kata satarāti kuṭila dṛga bhorī | nūpura rava kiṃkinī pisuna ghara, ‘hita harivaṃśa’ kahata nahiṃ thorī||

देखौ माई सुंदरता की सीवाँ । व्रज नव तरुनि कदंब नागरी, निरखि करतिं अधग्रिवाँ ॥ जो कोउ कोटि कोटि कलप लगि जीवै रसना कोटिक पावै । तऊ रुचिर वदनारबिंद की सोभा कहत न आवै ॥ देव लोक भूलोक रसातल सुनि कवि कुल मति डरिये । सहज माधुरी अंग अंग की कहि कासौं पटतरिये ॥ (जै श्री) हित हरिवंश प्रताप रूप गुन वय बल स्याम उजागर । जाकी भ्रू विलास बस पसुरिव दिन विथकित रस सागर॥

dekhau māī suṃdaratā kī sīvā~ | vraja nava taruni kadaṃba nāgarī, nirakhi karatiṃ adhagrivā~ || jo kou koṭi koṭi kalapa lagi jīvai rasanā koṭika pāvai | taū rucira vadanārabiṃda kī sobhā kahata na āvai || deva loka bhūloka rasātala suni kavi kula mati ḍariye | sahaja mādhurī aṃga aṃga kī kahi kāsauṃ paṭatariye || (jai śrī) hita harivaṃśa pratāpa rūpa guna vaya bala syāma ujāgara | jākī bhrū vilāsa basa pasuriva dina vithakita rasa sāgara||

देखौ माई अबला के बल रासि अति गज मत्त निरकुंस मोहन ; निरखि बँधे लट पासि ॥ अबहीं पंगु भई मन की गति ; बिनु उद्यम अनियास । तबकी कहा कहौं जब प्रिय प्रति ; चाहति भृकुटि बिलास ॥ कच संजमन व्याज भुज दरसति ; मुसकनि वदन विकास । हा हरिवंश अनीति रीति हित ; कत डारति तन त्रास॥

dekhau māī abalā ke bala rāsi ati gaja matta nirakuṃsa mohana ; nirakhi ba~dhe laṭa pāsi || abahīṃ paṃgu bhaī mana kī gati ; binu udyama aniyāsa | tabakī kahā kahauṃ jaba priya prati ; cāhati bhṛkuṭi bilāsa || kaca saṃjamana vyāja bhuja darasati ; musakani vadana vikāsa | hā harivaṃśa anīti rīti hita ; kata ḍārati tana trāsa||

नयौ नेह नव रंग नयौ रस, नवल स्याम वृषभानु किसोरी। नव पीतांबर नवल चूनरी; नई नई बूँदनि भींजत गोरी॥ नव ‘वृंदावन हरित मनोहर नव चातक बोलत मोर मोरी। नव मुरली जु मलार नई गति; श्रवन सुनत आये घन घोरी॥ नव भूषन नव मुकुट विराजत; नई नई उरप लेत थोरी थोरी। (जै श्री) हित हरिवंश असीस देत मुख चिरजीवौ भूतल यह जोरी॥

nayau neha nava raṃga nayau rasa, navala syāma vṛṣabhānu kisorī| nava pītāṃbara navala cūnarī; naī naī bū~dani bhīṃjata gorī|| nava ‘vṛṃdāvana harita manohara nava cātaka bolata mora morī| nava muralī ju malāra naī gati; śravana sunata āye ghana ghorī|| nava bhūṣana nava mukuṭa virājata; naī naī urapa leta thorī thorī| (jai śrī) hita harivaṃśa asīsa deta mukha cirajīvau bhūtala yaha jorī||

आजु दोउ दामिनि मिलि बहसीं। विच लै स्याम घटा अति नौंतन, ताके रंग रसीं॥ एक चमकि चहुँ ओर सखी री, अपने सुभाइ लसी। आई एक सरस गहनी में, दुहुँ भुज बीच बसी॥ अंबुज नील उमै विधु राजत, तिनकी चलन खसी। (जै श्री) हित हरिवंश लोभ भेटन मन, पूरन सरद ससी॥

āju dou dāmini mili bahasīṃ| vica lai syāma ghaṭā ati nauṃtana, tāke raṃga rasīṃ|| eka camaki cahu~ ora sakhī rī, apane subhāi lasī| āī eka sarasa gahanī meṃ, duhu~ bhuja bīca basī|| aṃbuja nīla umai vidhu rājata, tinakī calana khasī| (jai śrī) hita harivaṃśa lobha bheṭana mana, pūrana sarada sasī||

हौं बलि जाऊँ नागरी स्याम। ऐसौं ही रंग करौ निसि वासर, वृंदा विर्पिन कुटी अभिराम॥ हास विलास सुरत रस सिंचन, पसुपति दग्ध जिवावत काम। (जै श्री) हित हरिवंश लोल लोचन अली, करहु न सफल सकल सुख धाम॥

hauṃ bali jāū~ nāgarī syāma| aisauṃ hī raṃga karau nisi vāsara, vṛṃdā virpina kuṭī abhirāma|| hāsa vilāsa surata rasa siṃcana, pasupati dagdha jivāvata kāma| (jai śrī) hita harivaṃśa lola locana alī, karahu na saphala sakala sukha dhāma||

प्रथम जथामति प्रनऊँ (श्री) वृंदावन अति रम्य। श्रीराधिका कृपा बिनु सबके मननि अगम्य॥ वर जमुना जल सींचन दिनहीं सरद बसंत। विविध भाँति सुमनसि के सौरभ अलिकुल मंत॥ अरुन नूत पल्लव पर कूँजत कोकिल कीर। निर्तनि करत सिखी कुल अति आनंद अधीर॥ बहत पवन रुचि दायक सीतल मंद सुगंध। अरुन नील सित मुकुलित जहँ तहँ पूषन बंध । अति कमनीय विराजत मंदिर नवल निकुंज। सेवत सगन प्रीतिजुत दिन मीनध्वज पुंज॥ रसिक रासि जहँ खेलत स्यामा स्याम किसोर। उभे बाहु परिरंजित उठे उनींदे भोर॥ कनक कपिस पट सोभित सुभग साँवरे अंग। नील वसन कामिनि उर कंचुकि कसुँभी सुरंग।॥। ताल रबाब मुरज उफ बाजत मधुर मृदंग। सरस उकति गति सूचत वर बँसुरी मुख चंग॥ दोउ मिलि चाँचरि गावत गौरी राग अलापि। मानस मृग बल वेधत भृकुटि धनुष दृग चापि॥ दोऊ कर तारिनु पटकत लटकत इत उत जात। हो हो होरी बोलत अति आनंद कुलकात॥ रसिक लाल पर मेलति कामिनि बंधन धूरि। पिय पिचकारिनु छिरकत तकि तकि कुंकुम पूरि॥ कबहुँ कबहुँ चंदन तरु निर्मित तरल हिंडोल। चढ़ि दोऊ जन झूलत फूलत करत किलो॥ वर हिंडोर झँकोरनी कामिनि अधिक डरात। पुलकि पुलकि वेपथ अँग प्रीतम उर लपटात॥ हित चिंतक निजु चेरिनु उर आनँद न समात। निरखि निपट नैंननि सुख तृन तोरतिं वलि जात॥ अति उदार विवि सुंदर सुरत सूर सुकुमार। (जै श्री) हित हरिवंश करौ दिन दोऊ अचल विहार॥

prathama jathāmati pranaū~ (śrī) vṛṃdāvana ati ramya| śrīrādhikā kṛpā binu sabake manani agamya|| vara jamunā jala sīṃcana dinahīṃ sarada basaṃta| vividha bhā~ti sumanasi ke saurabha alikula maṃta|| aruna nūta pallava para kū~jata kokila kīra| nirtani karata sikhī kula ati ānaṃda adhīra|| bahata pavana ruci dāyaka sītala maṃda sugaṃdha| aruna nīla sita mukulita jaha~ taha~ pūṣana baṃdha | ati kamanīya virājata maṃdira navala nikuṃja| sevata sagana prītijuta dina mīnadhvaja puṃja|| rasika rāsi jaha~ khelata syāmā syāma kisora| ubhe bāhu pariraṃjita uṭhe unīṃde bhora|| kanaka kapisa paṭa sobhita subhaga sā~vare aṃga| nīla vasana kāmini ura kaṃcuki kasu~bhī suraṃga|||| tāla rabāba muraja upha bājata madhura mṛdaṃga| sarasa ukati gati sūcata vara ba~surī mukha caṃga|| dou mili cā~cari gāvata gaurī rāga alāpi| mānasa mṛga bala vedhata bhṛkuṭi dhanuṣa dṛga cāpi|| doū kara tārinu paṭakata laṭakata ita uta jāta| ho ho horī bolata ati ānaṃda kulakāta|| rasika lāla para melati kāmini baṃdhana dhūri| piya picakārinu chirakata taki taki kuṃkuma pūri|| kabahu~ kabahu~ caṃdana taru nirmita tarala hiṃḍola| car̤hi doū jana jhūlata phūlata karata kilo|| vara hiṃḍora jha~koranī kāmini adhika ḍarāta| pulaki pulaki vepatha a~ga prītama ura lapaṭāta|| hita ciṃtaka niju cerinu ura āna~da na samāta| nirakhi nipaṭa naiṃnani sukha tṛna toratiṃ vali jāta|| ati udāra vivi suṃdara surata sūra sukumāra| (jai śrī) hita harivaṃśa karau dina doū acala vihāra||

तेरे हित लैंन आई, बन ते स्याम पठाई: हरति कामिनि घन कदन काम कौ। काहे कौं करत बाधा, सुनि री चतुर राधा; भैंटि कैं मैंटि री माई प्रगट जगत भौं॥ देख रजनी नीकी, रचना रुचिर पी की; पुलिन नलिन नव उदित रौंहिनी धौ। तू तौ अब सयानी; तैं मेरी एकौ न मानी; हौं तोसौं कहत हारी जुवति जुगति सौं॥ मोंहनलाल छबीलौ, अपने रंग रंगीलौ; मोहत विहंग पसु मधुर मुरली रौ। वे तो अब गनत तन जीवन जौवन तब; (जै श्री) हित हरिवंश हरि भजहि भामिनि जौ॥

tere hita laiṃna āī, bana te syāma paṭhāī: harati kāmini ghana kadana kāma kau| kāhe kauṃ karata bādhā, suni rī catura rādhā; bhaiṃṭi kaiṃ maiṃṭi rī māī pragaṭa jagata bhauṃ|| dekha rajanī nīkī, racanā rucira pī kī; pulina nalina nava udita rauṃhinī dhau| tū tau aba sayānī; taiṃ merī ekau na mānī; hauṃ tosauṃ kahata hārī juvati jugati sauṃ|| moṃhanalāla chabīlau, apane raṃga raṃgīlau; mohata vihaṃga pasu madhura muralī rau| ve to aba ganata tana jīvana jauvana taba; (jai śrī) hita harivaṃśa hari bhajahi bhāmini jau||

यह जु एक मन बहुत ठौर करि, कहु कौनें सचु पायौ। जहँ तहँ विपति जार जुवती लौं, प्रगट पिंगला गायौ। द्वै तुरंग पर जोरि चढ़त हठि, परत कौन पै धायौ। कहिधौं कौन अंक पर राखै, जो गनिका सुत जायौ॥ (जै श्री) हित हरिवंश प्रपंच बंच सब काल व्याल कौ खायौ। यह जिय जानि स्याम स्यामा पद कमल संगि सिर नायौ॥

yaha ju eka mana bahuta ṭhaura kari, kahu kauneṃ sacu pāyau| jaha~ taha~ vipati jāra juvatī lauṃ, pragaṭa piṃgalā gāyau| dvai turaṃga para jori car̤hata haṭhi, parata kauna pai dhāyau| kahidhauṃ kauna aṃka para rākhai, jo ganikā suta jāyau|| (jai śrī) hita harivaṃśa prapaṃca baṃca saba kāla vyāla kau khāyau| yaha jiya jāni syāma syāmā pada kamala saṃgi sira nāyau||

कहा कहौं इन नैननि की बात। ये अलि प्रिया वदन अंबुज रस अटके अनत न जात॥ जब जब रुकत पलक संपुट लट अति आतुर अकुलात। लंपट लव निमेष अंतर ते अलप कलप सत सात॥ श्रुति पर कंज दृगंजन कुच बिच मृग मद हवै् न समात। (जै श्री) हित हरिवंश नाभि सर जलचर जाँचत साँवल गात॥

kahā kahauṃ ina nainani kī bāta| ye ali priyā vadana aṃbuja rasa aṭake anata na jāta|| jaba jaba rukata palaka saṃpuṭa laṭa ati ātura akulāta| laṃpaṭa lava nimeṣa aṃtara te alapa kalapa sata sāta|| śruti para kaṃja dṛgaṃjana kuca bica mṛga mada havai na samāta| (jai śrī) hita harivaṃśa nābhi sara jalacara jā~cata sā~vala gāta||