Padas 25-36

ब्रज जुवति जूथ में रूप अरु चतुरई, सील सिंगार गुन सबनितें आगरी ॥ कमल दक्षिण भुजा बाम भुज अंस सखि, गाँवती सरस मिलि मधुर सुर राग री । सकल विद्या विदित रहसि ‘हरिवंश हित’, मिलत नव कुंज वर स्याम बड़ भाग री॥

braja juvati jūtha meṃ rūpa aru caturaī, sīla siṃgāra guna sabaniteṃ āgarī || kamala dakṣiṇa bhujā bāma bhuja aṃsa sakhi, gā~vatī sarasa mili madhura sura rāga rī | sakala vidyā vidita rahasi ‘harivaṃśa hita’, milata nava kuṃja vara syāma bar̤a bhāga rī||

मोहनी मदन गोपाल की बाँसुरी । माधुरी श्रवन पुट सुनत सुनु राधिके, करत रतिराज के ताप कौ नासुरी ॥ सरद राका रजनी विपिन वृंदा सजनि, अनिल अति मंद सीतल सहित बासु री । परम पावन पुलिन भृंग सेवत नलिन, कल्पतरु तीर बलवीर कृत रासु री ॥ सकल मंडल भलीं तुम जु हरि सौं मिलीं, बनी वर वनित उपमा कहौं कासु री । तुम जु कंचन तनी लाल मरकत मनी, उभय कल हंस ‘हरिवंश’ बलि दासुरी॥

mohanī madana gopāla kī bā~surī | mādhurī śravana puṭa sunata sunu rādhike, karata ratirāja ke tāpa kau nāsurī || sarada rākā rajanī vipina vṛṃdā sajani, anila ati maṃda sītala sahita bāsu rī | parama pāvana pulina bhṛṃga sevata nalina, kalpataru tīra balavīra kṛta rāsu rī || sakala maṃḍala bhalīṃ tuma ju hari sauṃ milīṃ, banī vara vanita upamā kahauṃ kāsu rī | tuma ju kaṃcana tanī lāla marakata manī, ubhaya kala haṃsa ‘harivaṃśa’ bali dāsurī||

मधुरितु वृन्दावन आनन्द न थोर । राजत नागरि नव कुसल किशोर ॥ जूथिका जुगल रूप मञ्जरी रसाल । विथकित अलि मधु माधवी गुलाल ॥ चंपक बकुल कुल विविध सरोज । केतकि मेदनि मद मुदित मनोज ॥ रोचक रुचिर बहै त्रिविध समीर । मुकुलित नूत नदित पिक कीर ॥ पावन पुलिन घन मंजुल निकुंज । किसलय सैन रचित सुख पुंज ॥ मंजीर मुरज डफ मुरली मृदंग । बाजत उपंग बीना वर मुख चंग ॥ मृगमद मलयज कुंकुम अबीर । बंदन अगरसत सुरँगित चीर ॥ गावत सुंदरी हरी सरस धमारि । पुलकित खग मृग बहत न वारि ॥ (जै श्री) हित हरिवंश हंस हंसिनी समाज । ऐसे ही करौ मिलि जुग जुग राज॥

madhuritu vṛndāvana ānanda na thora | rājata nāgari nava kusala kiśora || jūthikā jugala rūpa mañjarī rasāla | vithakita ali madhu mādhavī gulāla || caṃpaka bakula kula vividha saroja | ketaki medani mada mudita manoja || rocaka rucira bahai trividha samīra | mukulita nūta nadita pika kīra || pāvana pulina ghana maṃjula nikuṃja | kisalaya saina racita sukha puṃja || maṃjīra muraja ḍapha muralī mṛdaṃga | bājata upaṃga bīnā vara mukha caṃga || mṛgamada malayaja kuṃkuma abīra | baṃdana agarasata sura~gita cīra || gāvata suṃdarī harī sarasa dhamāri | pulakita khaga mṛga bahata na vāri || (jai śrī) hita harivaṃśa haṃsa haṃsinī samāja | aise hī karau mili juga juga rāja||

राधे देखि वन की बात । रितु बसंत अनंत मुकुलित कुसुम अरु फल पात ॥ बैंनू धुनि नंदलाल बोली, सुनिव क्यौं अर सात । करत कतव विलंब भामिनि वृथा औसर जात ॥ लाल मरकत मनि छबीलौ तुम जु कंचन गात । बनी (श्री) हित हरिवंश जोरी उभै गुन गन मात॥

rādhe dekhi vana kī bāta | ritu basaṃta anaṃta mukulita kusuma aru phala pāta || baiṃnū dhuni naṃdalāla bolī, suniva kyauṃ ara sāta | karata katava vilaṃba bhāmini vṛthā ausara jāta || lāla marakata mani chabīlau tuma ju kaṃcana gāta | banī (śrī) hita harivaṃśa jorī ubhai guna gana māta||

ब्रज नव तरुनी कदंब मुकुट मनि स्यामा आजु बनी । नख सिख लौं अंग अंग माधुरी मोहे स्याम धनी॥ यौं राजत कबरी गुंथित कच कनक कंज वदनी । चिकुर चंद्रिकनि बीच अरध बिधु मानौं ग्रसित फनी ॥ सौभग रस सिर स्त्रवत पनारी पिय सीमंत ठनी । भृकुटि काम कोदंड नैंन सर कज्जल रेख अनी ॥ तरल तिलक तांटक गंड पर नासा जलज मनी । दसन कुंद सरसाधर पल्लव प्रीतम मन समनी ॥ चिबुक मध्य अति चारु सहज सखि साँवल बिंदु कनी । प्रीतम प्रान रतन संपुट कुच कंचुकि कसिब तनी भुज मृनाल वल हरत वलय जुत परस सरस श्रवनी स्याम सीस तरु मनौं मिडवारी रची रुचिर रवनी ॥ नाभि गम्भीर मीन मोहन मन खेलत कौं हृदनी । कृस कटि पृथु नितंब किंकिनि वृत कदलि खंभ जघनी ॥ पद अंबुज जावक जुत भूषन प्रीतम उर अवनी । नव नव भाइ विलोभि भाम इभ विहरत वर कारिनी ॥ (जै श्री) हित हरिवंश प्रसंसिता स्यामा कीरति विसद घनी । गावत श्रवननि सुनत सुखाकर विस्व दुरित दवनी॥

braja nava tarunī kadaṃba mukuṭa mani syāmā āju banī | nakha sikha lauṃ aṃga aṃga mādhurī mohe syāma dhanī|| yauṃ rājata kabarī guṃthita kaca kanaka kaṃja vadanī | cikura caṃdrikani bīca aradha bidhu mānauṃ grasita phanī || saubhaga rasa sira stravata panārī piya sīmaṃta ṭhanī | bhṛkuṭi kāma kodaṃḍa naiṃna sara kajjala rekha anī || tarala tilaka tāṃṭaka gaṃḍa para nāsā jalaja manī | dasana kuṃda sarasādhara pallava prītama mana samanī || cibuka madhya ati cāru sahaja sakhi sā~vala biṃdu kanī | prītama prāna ratana saṃpuṭa kuca kaṃcuki kasiba tanī bhuja mṛnāla vala harata valaya juta parasa sarasa śravanī syāma sīsa taru manauṃ miḍavārī racī rucira ravanī || nābhi gambhīra mīna mohana mana khelata kauṃ hṛdanī | kṛsa kaṭi pṛthu nitaṃba kiṃkini vṛta kadali khaṃbha jaghanī || pada aṃbuja jāvaka juta bhūṣana prītama ura avanī | nava nava bhāi vilobhi bhāma ibha viharata vara kārinī || (jai śrī) hita harivaṃśa prasaṃsitā syāmā kīrati visada ghanī | gāvata śravanani sunata sukhākara visva durita davanī||

देखत नव निकुंज सुनु सजनी लागत है अति चारु । माधविका केतकी लता ले रच्यौ मदन आंगारु ॥ सरद मास राका निसि सजनी सीतल मंद सुगंध समीर। परिमल लुब्ध मधुव्रत विथकित नदित कोकिला कीर॥ वहु विध रङ्ग मृदुल किसलय दल निर्मित पिय सखि सेज । भाजन कनक विविध मधु पूरित धरे धरनी पर हेज ॥ तापर कुसल किसोर किसोरी करत हास परिहास । प्रीतम पानि उरज वर परसत प्रिया दुरावति वास ॥ कामिनि कुटिल भृकुटि अवलोकत दिन प्रतिपद प्रतिकूल । आतुर अति अनुराग विवस हरि धाइ धरत भुज मूल ॥ नगर नीवी बन्धन मोचत एंचत नील निचोल । बधू कपट हठ कोपि कहत कल नेति नेति मधु बोल ॥ परिरंभन विपरित रति वितरत सरस सुरत निजु केलि । इंद्रनील मनिनय तरु मानौं लसन कनक की बेली ॥ रति रन मिथुन ललाट पटल पर श्रम जल सीकर संग । ललितादिक अंचल झकझोरति मन अनुराग अभंग ॥ (जै श्री) हित हरिवंश जथामति बरनत कृष्ण रसामृत सार । श्रवन सुनत प्रापक रति राधा पद अंबुज सुकुमार॥

dekhata nava nikuṃja sunu sajanī lāgata hai ati cāru | mādhavikā ketakī latā le racyau madana āṃgāru || sarada māsa rākā nisi sajanī sītala maṃda sugaṃdha samīra| parimala lubdha madhuvrata vithakita nadita kokilā kīra|| vahu vidha raṅga mṛdula kisalaya dala nirmita piya sakhi seja | bhājana kanaka vividha madhu pūrita dhare dharanī para heja || tāpara kusala kisora kisorī karata hāsa parihāsa | prītama pāni uraja vara parasata priyā durāvati vāsa || kāmini kuṭila bhṛkuṭi avalokata dina pratipada pratikūla | ātura ati anurāga vivasa hari dhāi dharata bhuja mūla || nagara nīvī bandhana mocata eṃcata nīla nicola | badhū kapaṭa haṭha kopi kahata kala neti neti madhu bola || pariraṃbhana viparita rati vitarata sarasa surata niju keli | iṃdranīla maninaya taru mānauṃ lasana kanaka kī belī || rati rana mithuna lalāṭa paṭala para śrama jala sīkara saṃga | lalitādika aṃcala jhakajhorati mana anurāga abhaṃga || (jai śrī) hita harivaṃśa jathāmati baranata kṛṣṇa rasāmṛta sāra | śravana sunata prāpaka rati rādhā pada aṃbuja sukumāra||

आजु अति राजत दम्पति भोर । सुरत रंग के रस में भीनें नागरि नवल किशोर ॥ अंसनि पर भुज दियें विलोकत इंदु वदन विवि ओर । करत पान रस मत्त परसपर लोचन तृषित चकोर ॥ छूटी लटनि लाल मन करष्यौ ये याके चित चोर । परिरंभन चुंबन मिलि गावत सुर मंदर कल घोर ॥ पग डगमगत चलत बन विहरन रुचिर कुंज घन खोर । (जै श्री) हित हरिवंश लाल ललना मिलि हियौ सिरावत मोर॥

āju ati rājata dampati bhora | surata raṃga ke rasa meṃ bhīneṃ nāgari navala kiśora || aṃsani para bhuja diyeṃ vilokata iṃdu vadana vivi ora | karata pāna rasa matta parasapara locana tṛṣita cakora || chūṭī laṭani lāla mana karaṣyau ye yāke cita cora | pariraṃbhana cuṃbana mili gāvata sura maṃdara kala ghora || paga ḍagamagata calata bana viharana rucira kuṃja ghana khora | (jai śrī) hita harivaṃśa lāla lalanā mili hiyau sirāvata mora||

आजु बन क्रीडत स्यामा स्याम सुभग बनी निसि सरद चाँदनी, रुचिर कुंज अभिराम ॥ खंडत अधर करत पारिरंभन, एेंचत जघन दुकूल । उर नख पात तिरीछी चितवन, दंपति रस सम तूल ॥ वे भुज पीन पयोधर परसत, वाम दृशा पिय हार । वसननि पीक अलक आकरषत, समर श्रमित सत मार ॥ पलु पलु प्रवल चौंप रस लंपट, अति सुंदर सुकुमार । (जै श्री) हित हरिवंश आजु तृन टूटत हौं बलि विसद विहार॥

āju bana krīḍata syāmā syāma subhaga banī nisi sarada cā~danī, rucira kuṃja abhirāma || khaṃḍata adhara karata pāriraṃbhana, eeṃcata jaghana dukūla | ura nakha pāta tirīchī citavana, daṃpati rasa sama tūla || ve bhuja pīna payodhara parasata, vāma dṛśā piya hāra | vasanani pīka alaka ākaraṣata, samara śramita sata māra || palu palu pravala cauṃpa rasa laṃpaṭa, ati suṃdara sukumāra | (jai śrī) hita harivaṃśa āju tṛna ṭūṭata hauṃ bali visada vihāra||

आजु बन राजत जुगल किसोर । नंद नँदन वृषभानु नंदिनी उठे उनीदें भोर ॥ डगमगात पग परत सिथिल गति परसत नख ससि छोर । दसन बसन खंडित मषि मंडित गंड तिलक कछु थोर॥ दुरत न कच करजनि के रोकें अरुन नैन अलि चोर । (जै श्री) हित हरिवंश सँभार न तन मन सुरत समुद्र झकोर॥

āju bana rājata jugala kisora | naṃda na~dana vṛṣabhānu naṃdinī uṭhe unīdeṃ bhora || ḍagamagāta paga parata sithila gati parasata nakha sasi chora | dasana basana khaṃḍita maṣi maṃḍita gaṃḍa tilaka kachu thora|| durata na kaca karajani ke rokeṃ aruna naina ali cora | (jai śrī) hita harivaṃśa sa~bhāra na tana mana surata samudra jhakora||

बन की कुंजनि कुंजनि डोलनि । निकसत निपट साँकरी बीथिनु, परसत नाँहि निचोलनि ॥ प्रात काल रजनी सब जागे, सूचत सुख दृग लोलनि । आलसवंत अरुन अति व्याकुल, कछु उपजत गति गोलनि ॥ निर्तनि भृकुटि वदन अंबुज मृदु, सरस हास मधु बोलनि । अति आसक्त लाल अलि लंपट, बस कीने बिनु मोलनि ॥ विलुलित सिथिल श्याम छूटी लट, राजत रुचिर कपोलनि । रति विपरित चुंबन आलिंगन, चिबुक चारु टक टोलनि ॥ कबहुँ श्रमित किसलय सिज्या पर, मुख अंचल झकझोलनि । दिन हरिवंश दासि हिय सींचत, वारिधि केलि कलोलनि॥

bana kī kuṃjani kuṃjani ḍolani | nikasata nipaṭa sā~karī bīthinu, parasata nā~hi nicolani || prāta kāla rajanī saba jāge, sūcata sukha dṛga lolani | ālasavaṃta aruna ati vyākula, kachu upajata gati golani || nirtani bhṛkuṭi vadana aṃbuja mṛdu, sarasa hāsa madhu bolani | ati āsakta lāla ali laṃpaṭa, basa kīne binu molani || vilulita sithila śyāma chūṭī laṭa, rājata rucira kapolani | rati viparita cuṃbana āliṃgana, cibuka cāru ṭaka ṭolani || kabahu~ śramita kisalaya sijyā para, mukha aṃcala jhakajholani | dina harivaṃśa dāsi hiya sīṃcata, vāridhi keli kalolani||

झूलत दोऊ नवल किसोर । रजनी जनित रंग सुख सुचत अंग अंग उठि भोर ॥ अति अनुराग भरे मिलि गावत सुर मंदर कल घोर । बीच बीच प्रीतम चित चोरति प्रिया नैंन की कोर ॥ अबला अति सुकुमारि डरत मन वर हिंडोर झँकोर। पुलकि पुलकि प्रीतम उर लागति दे नव उरज अँकोर॥ अरुझी विमल माल कंकन सौं कुंडल सौं कच डोर । वेपथ जुत क्यों बनै विवेचत आनँद बढ़यौ न थोर ॥ निरखि निरखि फूलतीं ललितादिक विवि मुख चंद चकोर । दे असीस हरिवंश प्रसंसत करि अंचल की छोर॥

jhūlata doū navala kisora | rajanī janita raṃga sukha sucata aṃga aṃga uṭhi bhora || ati anurāga bhare mili gāvata sura maṃdara kala ghora | bīca bīca prītama cita corati priyā naiṃna kī kora || abalā ati sukumāri ḍarata mana vara hiṃḍora jha~kora| pulaki pulaki prītama ura lāgati de nava uraja a~kora|| arujhī vimala māla kaṃkana sauṃ kuṃḍala sauṃ kaca ḍora | vepatha juta kyoṃ banai vivecata āna~da bar̤hayau na thora || nirakhi nirakhi phūlatīṃ lalitādika vivi mukha caṃda cakora | de asīsa harivaṃśa prasaṃsata kari aṃcala kī chora||

आजु बन नीकौ रास बनायौ । पुलिन पवित्र सुभग जमुना तट मोहन बैंनु बजायौ ॥ कल कंकन किंकिनि नूपुर धुनि सुनि खग मृग सचु पायौ । जुवतिनु मंडल मध्य स्याम घन सारँग राग जमायौ ॥ ताल मृदङ्ग उपंग मुरज डफ मिलि रससिंधु बढ़ायौ । विविध विशद वृषभानु नंदिनी अंग सुघंग दिखायौ ॥ अभिनय निपुन लटकि लट लोचन भृकुटि अनंग नचायौ । ताता थेई ताथेई धरत नौतन गति पति ब्रजराज रिझायौ ॥ सकल उदार नृपति चूड़ामनि सुख वारिद वरषायौ । परिरंभन चुंबन आलिंगन उचित जुवति जन पायौ ॥ वरसत कुसुम मुदित नभ नाइक इन्द्र निसान बजायौ । (जै श्री) हित हरिवंश रसिक राधा पति जस वितान जग छायौ॥

āju bana nīkau rāsa banāyau | pulina pavitra subhaga jamunā taṭa mohana baiṃnu bajāyau || kala kaṃkana kiṃkini nūpura dhuni suni khaga mṛga sacu pāyau | juvatinu maṃḍala madhya syāma ghana sāra~ga rāga jamāyau || tāla mṛdaṅga upaṃga muraja ḍapha mili rasasiṃdhu bar̤hāyau | vividha viśada vṛṣabhānu naṃdinī aṃga sughaṃga dikhāyau || abhinaya nipuna laṭaki laṭa locana bhṛkuṭi anaṃga nacāyau | tātā theī tātheī dharata nautana gati pati brajarāja rijhāyau || sakala udāra nṛpati cūr̤āmani sukha vārida varaṣāyau | pariraṃbhana cuṃbana āliṃgana ucita juvati jana pāyau || varasata kusuma mudita nabha nāika indra nisāna bajāyau | (jai śrī) hita harivaṃśa rasika rādhā pati jasa vitāna jaga chāyau||