Padas 1-12

जोई-जोई प्यारौ करै सोई मोहि भावै, भावै मोहि जोई सोई-सोई करै प्यारे । मोकों तो भावती ठौर प्यारे के नैंनन में, प्यारौ भयौ चाहै मेरे नैंनन के तारे ॥ मेरे तन मन प्राण हूँ ते प्रीतम प्रिय, अपने कोटिक प्राण प्रीतम मोंसों हारे । जय श्रीहित हरिवंश हंस-हंसिनी साँवल-गौर, कहौ कौन करै जल-तरंगनी न्यारे॥

joī-joī pyārau karai soī mohi bhāvai, bhāvai mohi joī soī-soī karai pyāre | mokoṃ to bhāvatī ṭhaura pyāre ke naiṃnana meṃ, pyārau bhayau cāhai mere naiṃnana ke tāre || mere tana mana prāṇa hū~ te prītama priya, apane koṭika prāṇa prītama moṃsoṃ hāre | jaya śrīhita harivaṃśa haṃsa-haṃsinī sā~vala-gaura, kahau kauna karai jala-taraṃganī nyāre||

प्यारे बोली भामिनी आजु नीकी जामिनी, भेंट नवीन मेघ सों दामिनी । मोहन रसिक-राइरी माई, तासौं जु-मान करै, ऐसी कौन कामिनी । (जै श्री) हित हरिवंश श्रवण सुनत प्यारी, राधिका रवन सों मिली गज-गामिनी॥

pyāre bolī bhāminī āju nīkī jāminī, bheṃṭa navīna megha soṃ dāminī | mohana rasika-rāirī māī, tāsauṃ ju-māna karai, aisī kauna kāminī | (jai śrī) hita harivaṃśa śravaṇa sunata pyārī, rādhikā ravana soṃ milī gaja-gāminī||

प्रात समय दोऊ रस लंपट, सूरत-जुद्ध जय-जुत अति फूल । श्रम वारिज घनविन्दु वदन पर, भूषण अंगहि अंग विकूल ॥ कछु रह्यौ तिलक शिथिल अलकावलि, वदन कमल मानौं अलि भूल । (जै श्री) हित हरिवंश मदन-रंग रँगि रहे, नैंन बैंन कटि शिथिल दुकूल॥

prāta samaya doū rasa laṃpaṭa, sūrata-juddha jaya-juta ati phūla | śrama vārija ghanavindu vadana para, bhūṣaṇa aṃgahi aṃga vikūla || kachu rahyau tilaka śithila alakāvali, vadana kamala mānauṃ ali bhūla | (jai śrī) hita harivaṃśa madana-raṃga ra~gi rahe, naiṃna baiṃna kaṭi śithila dukūla||

आजु तौ जुवति तेरौ, वदन आनन्द भरयौ, पिय के संगम के सूचत सुख चैंन । आलस-वलित बोल, सुरंग रँगे कपोल, विथकित अरुण उनींदे दोऊ नैंन ॥ रुचिर तिलक-लेश, किरत कुसुम-केश, सिर सीमंत भूषित मानौं तैं न । करुणाकर उदार, राखत कछु न सार, दसन-वसन लागत जब देंन ॥ काहे कौं दुरत भीरु, पलटे प्रीतम चीर, बस किये श्याम सिखै सत मैंन । गलित उरसि माल, सिथिल किंकिनी जाल, (जै श्री) हित हरिवंश लता-गृह सैंन॥

āju tau juvati terau, vadana ānanda bharayau, piya ke saṃgama ke sūcata sukha caiṃna | ālasa-valita bola, suraṃga ra~ge kapola, vithakita aruṇa unīṃde doū naiṃna || rucira tilaka-leśa, kirata kusuma-keśa, sira sīmaṃta bhūṣita mānauṃ taiṃ na | karuṇākara udāra, rākhata kachu na sāra, dasana-vasana lāgata jaba deṃna || kāhe kauṃ durata bhīru, palaṭe prītama cīra, basa kiye śyāma sikhai sata maiṃna | galita urasi māla, sithila kiṃkinī jāla, (jai śrī) hita harivaṃśa latā-gṛha saiṃna||

आजु प्रभात लता-मंदिर में, सुख बरसत अति हरषि युगल वर । गौर श्याम अभिराम रंगभरे, लटकि-लटकि पग धरत अवनि पर ॥ कुच-कुमकुम रंजित मालावलि, सुरत नाथ श्रीश्याम धाम घर । प्रिया प्रेम के अंक अलंकृत, चित्रित चतुर-शिरोमणि निजकर ॥ दम्पति अति अनुराग मुदित कल, गान करत मन हरत परस्पर । (जैश्री) हित हरिवंश प्रशंस-परायण, गायन अलि सुर देत मधुर तर॥

āju prabhāta latā-maṃdira meṃ, sukha barasata ati haraṣi yugala vara | gaura śyāma abhirāma raṃgabhare, laṭaki-laṭaki paga dharata avani para || kuca-kumakuma raṃjita mālāvali, surata nātha śrīśyāma dhāma ghara | priyā prema ke aṃka alaṃkṛta, citrita catura-śiromaṇi nijakara || dampati ati anurāga mudita kala, gāna karata mana harata paraspara | (jaiśrī) hita harivaṃśa praśaṃsa-parāyaṇa, gāyana ali sura deta madhura tara||

कौन चतुर जुवती प्रिया, जाहि मिलन लाल चोर है रैन । दुरवत क्यों अब दूरै सुनि प्यारे, रंग में गहले चैन में नैन ॥ उर नख चंद विराने पट, अटपटे से बैन । (जै श्री) हित हरिवंश रसिक राधापति, प्रमथीत मैन॥

kauna catura juvatī priyā, jāhi milana lāla cora hai raina | duravata kyoṃ aba dūrai suni pyāre, raṃga meṃ gahale caina meṃ naina || ura nakha caṃda virāne paṭa, aṭapaṭe se baina | (jai śrī) hita harivaṃśa rasika rādhāpati, pramathīta maina||

आजु निकुंज मंजु में खेलत, नवल किशोर नवीन किशोरी । अति अनुपम अनुराग परस्पर, सुनि अभूत भूतल पर जोरी ॥ विद्रुम फटिक विविध निर्मित धर, नव कर्पूर पराग न थोरी । कौमल किसलय सयन सुपेसल, तापर श्याम निवेसित गोरी ॥ मिथुन हास-परिहास परायण, पीक कपोल कमल पर झोरी । गौर श्याम भुज कलह मनोहर, नीवी-बंधन मोचत डोरी ॥ हरि-उर-मुकुर विलोकि अपनपौ, विभ्रम विकल मान-जुत भोरी । चिबुक सुचारु प्रलोइ प्रबोधत, पिय-प्रतिबिंब जनाय निहोरी ॥ नेति-नेति बचनामृत सुनि-सुनि, ललितादिक देखत दुरि चोरी । (जै श्री) हित हरिवंश करत कर धूनन, प्रणयकोप मालावलि तोरी॥

āju nikuṃja maṃju meṃ khelata, navala kiśora navīna kiśorī | ati anupama anurāga paraspara, suni abhūta bhūtala para jorī || vidruma phaṭika vividha nirmita dhara, nava karpūra parāga na thorī | kaumala kisalaya sayana supesala, tāpara śyāma nivesita gorī || mithuna hāsa-parihāsa parāyaṇa, pīka kapola kamala para jhorī | gaura śyāma bhuja kalaha manohara, nīvī-baṃdhana mocata ḍorī || hari-ura-mukura viloki apanapau, vibhrama vikala māna-juta bhorī | cibuka sucāru praloi prabodhata, piya-pratibiṃba janāya nihorī || neti-neti bacanāmṛta suni-suni, lalitādika dekhata duri corī | (jai śrī) hita harivaṃśa karata kara dhūnana, praṇayakopa mālāvali torī||

अति ही अरुन तेरे नैन नलिन री । आलस जुत इतरात रंगमगे, भये निशि जागर मषिन मलिन री ॥ शिथिल पलक में उठत गोलक गति, बिंध्यौ मोहन मृग सकत चलि न री । (जै श्री)हित हरिवंश हंस कल गामिनि, संभ्रम देत भ्रमरनि अलिन री॥

ati hī aruna tere naina nalina rī | ālasa juta itarāta raṃgamage, bhaye niśi jāgara maṣina malina rī || śithila palaka meṃ uṭhata golaka gati, biṃdhyau mohana mṛga sakata cali na rī | (jai śrī)hita harivaṃśa haṃsa kala gāmini, saṃbhrama deta bhramarani alina rī||

बनी श्रीराधा मोहन जू की जोरी । इंद्रनीलमणि श्याम मनोहर, सातकुम्भ तनु गोरी ॥ भाल बिशाल तिलक हरि कामिनी, चिकुर चन्द्र बिच रोरी । गज-नायक प्रभु चाल गयंदनी, गति बृषभानु किसोरी ॥ नील निचोल जुवती, मोहन पट, पीत अरुन सिर खोरी. ( जै श्री ) हित हरिवंश रसिक राधापति, सूरत रंग में बोरी॥

banī śrīrādhā mohana jū kī jorī | iṃdranīlamaṇi śyāma manohara, sātakumbha tanu gorī || bhāla biśāla tilaka hari kāminī, cikura candra bica rorī | gaja-nāyaka prabhu cāla gayaṃdanī, gati bṛṣabhānu kisorī || nīla nicola juvatī, mohana paṭa, pīta aruna sira khorī. ( jai śrī ) hita harivaṃśa rasika rādhāpati, sūrata raṃga meṃ borī||

आजु नागरी-किशोर, भाँवती विचित्र जोर, कहा कहौं अंग-अंग परम माधुरी । करत केलि कंठ मेलि, बाहुदंड, गंड – गंड, परस, सरस रास लास मंडली जुरी ॥ श्या- सुन्दरी बिहार, बाँसुरी मृदंग तार, मधुर घोष नूपुरादि किंकिनी चुरी । (जै श्री) देखत हरिवंश आलि, निर्तनी सुघंग चाल, वारी फेरी देत प्राण देह सौं दुरी॥

āju nāgarī-kiśora, bhā~vatī vicitra jora, kahā kahauṃ aṃga-aṃga parama mādhurī | karata keli kaṃṭha meli, bāhudaṃḍa, gaṃḍa – gaṃḍa, parasa, sarasa rāsa lāsa maṃḍalī jurī || śyā- sundarī bihāra, bā~surī mṛdaṃga tāra, madhura ghoṣa nūpurādi kiṃkinī curī | (jai śrī) dekhata harivaṃśa āli, nirtanī sughaṃga cāla, vārī pherī deta prāṇa deha sauṃ durī||

मंजुल कल कुंज देश, हरि विशद वेश, राका नभ कुमुद – बंधु, शरद जामिनी । साँवल दुति कनक अंग, बिहरत मिलि एक संग, नीरद मनौ नील मध्य, लसत दामिनी ॥ अरुण पीत नव दुकुल, अनुपम अनुराग मूल, सौरभयुत सीत अनिल, मंद गामिनी । किसलय दल रचित शैन, बोलत पिय चाटु बैंन, मान सहित प्रतिपद, प्रतिकूल कामिनी ॥ मोहन मन मथत मार, परसत कुच-नीवी-हार, वेपथयुत नेति नेति, बदति भामिनी ॥ नरवाहन प्रभु सुकेलि, बहुविधि भर भरत झेलि, सौरत रस रूप नदी जगत पावनी॥

maṃjula kala kuṃja deśa, hari viśada veśa, rākā nabha kumuda – baṃdhu, śarada jāminī | sā~vala duti kanaka aṃga, biharata mili eka saṃga, nīrada manau nīla madhya, lasata dāminī || aruṇa pīta nava dukula, anupama anurāga mūla, saurabhayuta sīta anila, maṃda gāminī | kisalaya dala racita śaina, bolata piya cāṭu baiṃna, māna sahita pratipada, pratikūla kāminī || mohana mana mathata māra, parasata kuca-nīvī-hāra, vepathayuta neti neti, badati bhāminī || naravāhana prabhu sukeli, bahuvidhi bhara bharata jheli, saurata rasa rūpa nadī jagata pāvanī||

चलहि राधिके सुजान, तेरे हित सुख निधान, रास रच्यौ श्याम तट कलिंद-नन्दिनी । निर्तत युवती समूह, राग रंग अति कुतूह, बाजत रसमूल मुरलिका अनन्दिनी । वंशीवट निकट जहाँ, परम रमणि भूमि तहाँ, सकल सुखद मलय बहै वायु मन्दिनी । जाती ईषद विकास, कानन अतिसय सुवास, राका निशि शरद मास, विमल चन्दिनी ॥ नरवाहन प्रभु निहारि, लोचन भरि घोष-नारि, नख-सिख सोन्दर्य काम-दुख-निकन्दिनी । विलसहु भुज ग्रीव मेलि, भामिनि सुख-सिन्धु झेलि, नव निकुंज श्याम केलि जगत वन्दिनी॥

calahi rādhike sujāna, tere hita sukha nidhāna, rāsa racyau śyāma taṭa kaliṃda-nandinī | nirtata yuvatī samūha, rāga raṃga ati kutūha, bājata rasamūla muralikā anandinī | vaṃśīvaṭa nikaṭa jahā~, parama ramaṇi bhūmi tahā~, sakala sukhada malaya bahai vāyu mandinī | jātī īṣada vikāsa, kānana atisaya suvāsa, rākā niśi śarada māsa, vimala candinī || naravāhana prabhu nihāri, locana bhari ghoṣa-nāri, nakha-sikha sondarya kāma-dukha-nikandinī | vilasahu bhuja grīva meli, bhāmini sukha-sindhu jheli, nava nikuṃja śyāma keli jagata vandinī||