The Delighted Yellow-Robed Lord

गतवति सखी-वृन्देऽमन्द-त्रपा-भर-निर्भर- स्मर-परवशाकूत-स्फीत-स्मित-स्नपिताधरम् । सरस-मानसं दृष्ट्वा राधां मुहुर् नव-पल्लव- प्रसव-शयने निक्षिप्ताक्षीम् उवाच हरिः प्रियाम्

gatavati sakhī-vṛnde'manda-trapā-bhara-nirbhara- smara-paravaśākūta-sphīta-smita-snapitādharam | sarasa-mānasaṁ dṛṣṭvā rādhāṁ muhur nava-pallava- prasava-śayane nikṣiptākṣīm uvāca hariḥ priyām

किसलयशयन-तले कुरु कामिनि चरण-नलिन-विनिवेशम् । तव पद-पल्लव-वैरि-पराभवम् इदम् अनुभवतु सुवेशं क्षणम् अधुना नारायणम् अनुगतम् अनुसर राधिके ॥ध्रुव॥

kisalayaśayana-tale kuru kāmini caraṇa-nalina-viniveśam | tava pada-pallava-vairi-parābhavam idam anubhavatu suveśaṁ kṣaṇam adhunā nārāyaṇam anugatam anusara rādhike ||dhruva||

कर-कमलेन करोमि चरणम् अहम् आगमितासि विदूरम् । क्षणम् उपकुरु शयनोपरि माम् इव नूपुरम् अनुगति-शूरम्

kara-kamalena karomi caraṇam aham āgamitāsi vidūram | kṣaṇam upakuru śayanopari mām iva nūpuram anugati-śūram

वदन-सुधा-निधि-गलितम् अमृतम् इव रचय वचनम् अनुकूलम् । विरहम् इवापनयामि पयोधर-रोधकम् उरसि दुकूलं

vadana-sudhā-nidhi-galitam amṛtam iva racaya vacanam anukūlam | viraham ivāpanayāmi payodhara-rodhakam urasi dukūlaṁ

प्रिय-परिरम्भण-रभस-वलितम् इव पुलकितम् अतिदुरवापम् । मद्-उरसि कुच-कलशं विनिवेशय शोषय मनसिज-तापम्

priya-parirambhaṇa-rabhasa-valitam iva pulakitam atiduravāpam | mad-urasi kuca-kalaśaṁ viniveśaya śoṣaya manasija-tāpam

अधर-सुधा-रसम् उपनय भामिनि जीवय मृतम् इव दासम् । त्वयि विनिहित-मनसं विरहानल-दग्ध-वपुषम् अविलासम्

adhara-sudhā-rasam upanaya bhāmini jīvaya mṛtam iva dāsam | tvayi vinihita-manasaṁ virahānala-dagdha-vapuṣam avilāsam

शशि-मुखि मुखरय मणि-रशना-गुणम् अनुगुण-कण्ठ-निनादम् । श्रुति-युगले पिक-रुत-विकले मम शमय चिराद् अवसादम्

śaśi-mukhi mukharaya maṇi-raśanā-guṇam anuguṇa-kaṇṭha-ninādam | śruti-yugale pika-ruta-vikale mama śamaya cirād avasādam

माम् अतिविफल-रुषा विकली-कृतम् अवलोकितुम् अधुनेदम् । लज्जितम् इव नयनं तव विरमति विसृज वृथा रति-खेदम्

mām ativiphala-ruṣā vikalī-kṛtam avalokitum adhunedam | lajjitam iva nayanaṁ tava viramati visṛja vṛthā rati-khedam

श्री-जयदेव-भणितम् इदम् अनुपद-निगदित-मधु-रिपु-मोदम् । जनयतु रसिक-जनेषु मनोरम-रति-रस-भाव-विनोदम्

śrī-jayadeva-bhaṇitam idam anupada-nigadita-madhu-ripu-modam | janayatu rasika-janeṣu manorama-rati-rasa-bhāva-vinodam

प्रत्यूह-पुलकाङ्कुरेण निविड-लेश-निमेषेण च क्रीडाकूत-विलोकितेऽधर-सुधा-पाने कथा-केलिभिः । आनन्दाधिगमेन मन्मथ-कला-युद्धेऽपि यस्मिन्न् अभुद् उद्भूतः स तयोर् बभूव सुरतारम्भः प्रियम्भावुकः

pratyūha-pulakāṅkureṇa niviḍa-leśa-nimeṣeṇa ca krīḍākūta-vilokite'dhara-sudhā-pāne kathā-kelibhiḥ | ānandādhigamena manmatha-kalā-yuddhe'pi yasminn abhud udbhūtaḥ sa tayor babhūva suratārambhaḥ priyambhāvukaḥ

दोर्भ्यां संयमितः पयोधर-भरेणापीडितः पाणिजैर् आविद्धो दशनैः क्षताधर-पुटः श्रोणी-तटेनाहतः । हस्तेनानमितः कचेऽधर-मधु-स्यन्देन संमोहितः कान्तः काम् अपि तृप्तिम् आप तद् अहो कामस्य वामा गतिः

dorbhyāṁ saṁyamitaḥ payodhara-bhareṇāpīḍitaḥ pāṇijair āviddho daśanaiḥ kṣatādhara-puṭaḥ śroṇī-taṭenāhataḥ | hastenānamitaḥ kace'dhara-madhu-syandena saṁmohitaḥ kāntaḥ kām api tṛptim āpa tad aho kāmasya vāmā gatiḥ

माराङ्के रति-केलि-सङ्कुल-रणारम्भे तया साहस- प्रायं कान्त-जयाय किंचिद् उपरि प्रारम्भि यत्-सम्भ्रमात् । निष्पन्दा जघन-स्थली शिथिलिता दोर्-वल्लिर् उत्कम्पितं वक्षो मिलितम् अक्षि पौरुष-रसः स्त्रीणां कुतः सिध्यति

mārāṅke rati-keli-saṅkula-raṇārambhe tayā sāhasa- prāyaṁ kānta-jayāya kiṁcid upari prārambhi yat-sambhramāt | niṣpandā jaghana-sthalī śithilitā dor-vallir utkampitaṁ vakṣo militam akṣi pauruṣa-rasaḥ strīṇāṁ kutaḥ sidhyati

तस्याः पाटल-पाणिजाङ्कितम् उरो निद्रा-काषाये दृशौ निर्धौताधर-शोनिमा विलुलित-स्रस्त-स्रजो मूर्ध-जः । काञ्ची-दाम दर-श्लथाञ्चलम् इति प्रातर् निखातैर् दृशोर् एभिः कामशरैस् तद्-अद्भुतम् अभूत् पत्युर् मनः कीलितं

tasyāḥ pāṭala-pāṇijāṅkitam uro nidrā-kāṣāye dṛśau nirdhautādhara-śonimā vilulita-srasta-srajo mūrdha-jaḥ | kāñcī-dāma dara-ślathāñcalam iti prātar nikhātair dṛśor ebhiḥ kāmaśarais tad-adbhutam abhūt patyur manaḥ kīlitaṁ

व्यालोलः केश-पाशस् तरलितम् अलकैः स्वेद-मोक्षौ कपोलौ क्लिष्टा बिम्बाधर-श्रीः कुच-कलश-रुचा हारिता हार-यष्टिः । काञ्ची-कान्तिर् हताशा स्तन-जघन-पदं पाणिनाच्छद्य सद्यः पश्यन्ती सत्रपा सा तद् अपि विलुलिता मुग्ध-कन्तिर् धिनोति

vyālolaḥ keśa-pāśas taralitam alakaiḥ sveda-mokṣau kapolau kliṣṭā bimbādhara-śrīḥ kuca-kalaśa-rucā hāritā hāra-yaṣṭiḥ | kāñcī-kāntir hatāśā stana-jaghana-padaṁ pāṇinācchadya sadyaḥ paśyantī satrapā sā tad api vilulitā mugdha-kantir dhinoti

ईषन्-मीलित-दृष्टि मुग्ध-विलसत्-शीत्कार-धारा-वशाद् अव्यक्ताकुल-केलि-काकु-विकसद्-दन्तांशु-धौताधरम् । शान्त-स्तब्ध-पयोधरं भृश-परिष्वङ्गात् कुरङ्गी-दृशो हर्षोत्कर्ष-विमुक्त-निःसह-तनोर् धन्यो धयत्य् आननं

īṣan-mīlita-dṛṣṭi mugdha-vilasat-śītkāra-dhārā-vaśād avyaktākula-keli-kāku-vikasad-dantāṁśu-dhautādharam | śānta-stabdha-payodharaṁ bhṛśa-pariṣvaṅgāt kuraṅgī-dṛśo harṣotkarṣa-vimukta-niḥsaha-tanor dhanyo dhayaty ānanaṁ

अथ सहसा सुप्रीतं सुरतान्ते सा नितान्त-खिन्नाङ्गि । राधा जगाद सादरम् इदम् आनन्देन गोविन्दम्

atha sahasā suprītaṁ suratānte sā nitānta-khinnāṅgi | rādhā jagāda sādaram idam ānandena govindam

कुरु यदु-नन्दन चन्दन-शिशिरतरेण करेण पयोधरे । मृग-मद-पत्रकम् अत्र मनो-भव-मङ्गल-कलश-सहोदरे निजगाद सा यदु-नन्दने क्रीडति हृदय-नन्दने ॥ध्रुव॥

kuru yadu-nandana candana-śiśiratareṇa kareṇa payodhare | mṛga-mada-patrakam atra mano-bhava-maṅgala-kalaśa-sahodare nijagāda sā yadu-nandane krīḍati hṛdaya-nandane ||dhruva||

अलि-कुल-गञ्जनम् अञ्जनकं रति-नायक-सायक-मोचने । त्वद्-अधर-चुम्बन-लम्बित-कज्जल उज्ज्वलय प्न्य लोचने

ali-kula-gañjanam añjanakaṁ rati-nāyaka-sāyaka-mocane | tvad-adhara-cumbana-lambita-kajjala ujjvalaya pnya locane

नयन-कुरङ्ग-तरङ्ग-विकस-निरास-करे श्रुति-मण्डले । मनसिज-पाश-विलास-धरे शुभ-वेश निवेशय कुण्डले

nayana-kuraṅga-taraṅga-vikasa-nirāsa-kare śruti-maṇḍale | manasija-pāśa-vilāsa-dhare śubha-veśa niveśaya kuṇḍale

भ्रमर-चयं रचयन्तम् उपरि रुचिरं सुचिरं मम सम्मुखे । जित-कमले विमले परिकर्मय नर्म-जनकम् अलकं मुखे

bhramara-cayaṁ racayantam upari ruciraṁ suciraṁ mama sammukhe | jita-kamale vimale parikarmaya narma-janakam alakaṁ mukhe

मृग-मद-रस-वलितं ललितं कुरु तिलकम् अलिक-रजनि-करे । विहित-कलङ्क-कलं कमलानन विश्रमित-श्रम-सीकरे

mṛga-mada-rasa-valitaṁ lalitaṁ kuru tilakam alika-rajani-kare | vihita-kalaṅka-kalaṁ kamalānana viśramita-śrama-sīkare

मम रुचिरे चिकुरे कुरु मानद मनसिज-ध्वज-चामरे । रति-गलिते ललिते कुसुमानि शिखण्डि-शिखण्डक-डामरे

mama rucire cikure kuru mānada manasija-dhvaja-cāmare | rati-galite lalite kusumāni śikhaṇḍi-śikhaṇḍaka-ḍāmare

सरस-घने जघने मम शम्बर-दारण-वारण-कन्दरे । मणि-रशना-वसनाभरणानि शुभाशय वासय सुन्दरे

sarasa-ghane jaghane mama śambara-dāraṇa-vāraṇa-kandare | maṇi-raśanā-vasanābharaṇāni śubhāśaya vāsaya sundare

श्री-जयदेव-वचसि रुचिरे सदयं हृदयं कुरु मण्डने । हरि-चरण-स्मरणामृत-निर्मित-कलि-कलुष-ज्वर-खण्डने

śrī-jayadeva-vacasi rucire sadayaṁ hṛdayaṁ kuru maṇḍane | hari-caraṇa-smaraṇāmṛta-nirmita-kali-kaluṣa-jvara-khaṇḍane

रचय कुचयोश् चित्रं पत्रं कुरुष्व कपोलयोर् घटय जघने काञ्चीं मुग्ध-स्रजा कबरि-भरं । कलय वलय-श्रेणीं पाणौ पदे मणि-नूपुराव् इति निगदितः प्रीतः पिताम्बरोऽपि तथाकरोत्

racaya kucayoś citraṁ patraṁ kuruṣva kapolayor ghaṭaya jaghane kāñcīṁ mugdha-srajā kabari-bharaṁ | kalaya valaya-śreṇīṁ pāṇau pade maṇi-nūpurāv iti nigaditaḥ prītaḥ pitāmbaro'pi tathākarot

पर्यङ्की-कृत-नाग-नायक-फणा-श्रेणी-मणीनां गणे सङ्क्रान्त-प्रतिबिम्ब-सम्वलनया बिभ्रद्-विभु-प्रक्रियाम् । पादाम्भो-रुह-धारि-वारिधि-सुताम् अक्ष्णां दिदृक्षुः शतैः काय-व्यूहम् इव-चरन्न् अपचितौ भूयो हरिः पातु वः

paryaṅkī-kṛta-nāga-nāyaka-phaṇā-śreṇī-maṇīnāṁ gaṇe saṅkrānta-pratibimba-samvalanayā bibhrad-vibhu-prakriyām | pādāmbho-ruha-dhāri-vāridhi-sutām akṣṇāṁ didṛkṣuḥ śataiḥ kāya-vyūham iva-carann apacitau bhūyo hariḥ pātu vaḥ

त्वाम् अप्राप्य मयि स्वयंवर-परां क्षीरोद-तीरोदरे शङ्के सुन्दरि कालकूटम् अपिबन् मूढो मृदानी-पतिः । इत्थं पूर्व-कथाभिर् अन्य-मनसा विक्षिप्य वक्षोऽञ्चलं राधायाः स्तन-कोरकोपरि-मिलन्-नेत्रो हरिः पातु वः

tvām aprāpya mayi svayaṁvara-parāṁ kṣīroda-tīrodare śaṅke sundari kālakūṭam apiban mūḍho mṛdānī-patiḥ | itthaṁ pūrva-kathābhir anya-manasā vikṣipya vakṣo'ñcalaṁ rādhāyāḥ stana-korakopari-milan-netro hariḥ pātu vaḥ

यद् गान्धर्व-कलासु कौशलम् अनुध्यानं च यद् वैष्णवं यच् छृङ्गार-विवेक-तत्त्व-रचना-काव्येषु लीलायितम् । तत् सर्वं जयदेव-पण्डित-कवेः कृष्णैक-तानात्मनः सानन्दाः परिशोधयन्तु सुधियः श्रि-गीत-गोविन्दतः

yad gāndharva-kalāsu kauśalam anudhyānaṁ ca yad vaiṣṇavaṁ yac chṛṅgāra-viveka-tattva-racanā-kāvyeṣu līlāyitam | tat sarvaṁ jayadeva-paṇḍita-kaveḥ kṛṣṇaika-tānātmanaḥ sānandāḥ pariśodhayantu sudhiyaḥ śri-gīta-govindataḥ

साधूनां स्वत एव संमतिर् इह स्याद् एव भक्त्यार्थिनाम् आलोच्य ग्रथन-श्रमं च विदुसाम् अस्मिन् भवेद् आदरः । ये केचित् पर-कृत्य्-उपश्रुति-परास् तान् अर्थये मत्-कृतिं भूयो वीक्ष्य वदन्तो अवद्यम् इह चेत् सा वासना स्थास्यति

sādhūnāṁ svata eva saṁmatir iha syād eva bhaktyārthinām ālocya grathana-śramaṁ ca vidusām asmin bhaved ādaraḥ | ye kecit para-kṛty-upaśruti-parās tān arthaye mat-kṛtiṁ bhūyo vīkṣya vadanto avadyam iha cet sā vāsanā sthāsyati

श्री-भोजदेव-प्रभवस्य रामादेवी-सुत-श्री-जयदेवकस्य । पराशरादि-प्न्य-वर्ग-कण्ठे श्री-गीत-गोविन्द-कवित्वम् अस्तु

śrī-bhojadeva-prabhavasya rāmādevī-suta-śrī-jayadevakasya | parāśarādi-pnya-varga-kaṇṭhe śrī-gīta-govinda-kavitvam astu

साध्वी माध्वीक चिन्ता न भवति भवतः शर्करे कर्कशासि द्राक्षे द्रक्ष्यन्ति के त्वाम् अमृत मृतम् असि क्षीर नीरं रसस्ते । माकन्द क्रन्द कान्ताधर धर न तुलां गच्छ यच्छन्ति भावं यावच् छृङ्गार-सारं शुभम् इव जयदेवस्य वैदग्ध्य-वाचः

sādhvī mādhvīka cintā na bhavati bhavataḥ śarkare karkaśāsi drākṣe drakṣyanti ke tvām amṛta mṛtam asi kṣīra nīraṁ rasaste | mākanda kranda kāntādhara dhara na tulāṁ gaccha yacchanti bhāvaṁ yāvac chṛṅgāra-sāraṁ śubham iva jayadevasya vaidagdhya-vācaḥ

इत्थं केलि-ततिर् विहृत्य यमुना-कूले समं राधया तद्-रोमावलि-मौक्तिकावलि-युगे वेणी-भ्रमं बिभ्रति । तत्राह्लादि-कुच-प्रयाग-फलयोर् लिप्सावतोर् हस्तयोर् व्यापाराअ पुरुषोत्तमस्य ददतु स्फीतां मुदं सम्पदं

itthaṁ keli-tatir vihṛtya yamunā-kūle samaṁ rādhayā tad-romāvali-mauktikāvali-yuge veṇī-bhramaṁ bibhrati | tatrāhlādi-kuca-prayāga-phalayor lipsāvator hastayor vyāpārāa puruṣottamasya dadatu sphītāṁ mudaṁ sampadaṁ