Blissful Dāmodara

सुचिरम् अनुनयेन प्रीणयित्वा मृगाक्षीं गतवति कृतवेशे केशवे कुञ्ज-शय्याम् । रचित-रुचिर-भूषां दृष्टि-मोषे प्रदोषे स्फुरति निरवसादं कापि राधां जगाद

suciram anunayena prīṇayitvā mṛgākṣīṁ gatavati kṛtaveśe keśave kuñja-śayyām | racita-rucira-bhūṣāṁ dṛṣṭi-moṣe pradoṣe sphurati niravasādaṁ kāpi rādhāṁ jagāda

विरचित-चाटु-वचन-रचनं चरणे रचित-प्रणिपातम् । सम्प्रति मञ्जुल-वञ्जुल-सीमनि केलि-शयनम् अनुयातं मुग्धे मधु-मथनम् अनुगतम् अनुसर राधिके ॥ध्रुव॥

viracita-cāṭu-vacana-racanaṁ caraṇe racita-praṇipātam | samprati mañjula-vañjula-sīmani keli-śayanam anuyātaṁ mugdhe madhu-mathanam anugatam anusara rādhike ||dhruva||

घन-जघन-स्तन-भार-भरे दर-मन्थर-चरण-विहारम् । मुखरित-मणि-मञ्जीरम् उपैहि विधेहि मराल-विकारम्

ghana-jaghana-stana-bhāra-bhare dara-manthara-caraṇa-vihāram | mukharita-maṇi-mañjīram upaihi vidhehi marāla-vikāram

शृणु रमणीयतरं तरुणी-जन-मोहन-मधुप-विरावम् । कुसुम-शरासन-शासन-बन्दिनि पिक-निकरे भज भावम्

śṛṇu ramaṇīyataraṁ taruṇī-jana-mohana-madhupa-virāvam | kusuma-śarāsana-śāsana-bandini pika-nikare bhaja bhāvam

अनिल-तरल-किसलय-निकरेण करेण लता-निकुरम्बम् । प्रेरणम् इव करभोरु करोति गतिं प्रति मुन्च विलम्बम्

anila-tarala-kisalaya-nikareṇa kareṇa latā-nikurambam | preraṇam iva karabhoru karoti gatiṁ prati munca vilambam

स्फुरितम् अनङ्ग-तरङ्ग-वशाद् इव सूचित-हरि-परिरम्भम् । पृच्छ मनोहर-हार-विमल-जल-धारम् अमुं कुच-कुम्भम्

sphuritam anaṅga-taraṅga-vaśād iva sūcita-hari-parirambham | pṛccha manohara-hāra-vimala-jala-dhāram amuṁ kuca-kumbham

अधिगतम् अखिल-सखीभिर् इदं तव वपुर् अपि रति-रण-सज्जम् । चण्डि रसित-रशना-रव-डिण्डिमम् अभिसर सरसम् अलज्जम्

adhigatam akhila-sakhībhir idaṁ tava vapur api rati-raṇa-sajjam | caṇḍi rasita-raśanā-rava-ḍiṇḍimam abhisara sarasam alajjam

स्मर-शर-सुभग-नखेन सखीम् अवलम्ब्य करेण सलीलम् । चल वलय-क्वणितैर् अवबोधय हरिम् अपि निज-गति-शीलं

smara-śara-subhaga-nakhena sakhīm avalambya kareṇa salīlam | cala valaya-kvaṇitair avabodhaya harim api nija-gati-śīlaṁ

श्री-जयदेव-भणितम् अधरीकृत-हारम् उदासित-वामम् । हरि-विनिःइत-मनसाम् अधितिष्ठतु कण्ठ-तटीम् अविरामम्

śrī-jayadeva-bhaṇitam adharīkṛta-hāram udāsita-vāmam | hari-viniḥita-manasām adhitiṣṭhatu kaṇṭha-taṭīm avirāmam

सा मां द्रक्ष्यति वक्ष्यति स्मर-कथां प्रत्य्-अङ्गम् आलिङ्गनैः प्रीतिं यास्यति रंस्यते सखि समागत्येति चिन्ताकुलः । स त्वां पश्याति वेपते पुलकयत्य् आनन्दति स्विद्यति प्रत्युद्गच्छति मूर्च्छति स्थिर-तमह्-पुञ्जे निकुञ्जे प्रीयः

sā māṁ drakṣyati vakṣyati smara-kathāṁ praty-aṅgam āliṅganaiḥ prītiṁ yāsyati raṁsyate sakhi samāgatyeti cintākulaḥ | sa tvāṁ paśyāti vepate pulakayaty ānandati svidyati pratyudgacchati mūrcchati sthira-tamah-puñje nikuñje prīyaḥ

अक्ष्णोर् निक्षिपद् अञ्जनं श्रवणयोस् तापिच्छ-गुच्छावलिं मूर्ध्नि श्याम-सरोज-दाम कुचयोः कस्तूरिका-पत्रकम् । धूर्तानाम् अभिसर-सम्भ्रम-जूषां विष्वङ्-निकुञ्जे सखि ध्वान्तं नील-निचोल-चारु सुदृशां प्रत्य्-अङ्गम् अलिङ्गति

akṣṇor nikṣipad añjanaṁ śravaṇayos tāpiccha-gucchāvaliṁ mūrdhni śyāma-saroja-dāma kucayoḥ kastūrikā-patrakam | dhūrtānām abhisara-sambhrama-jūṣāṁ viṣvaṅ-nikuñje sakhi dhvāntaṁ nīla-nicola-cāru sudṛśāṁ praty-aṅgam aliṅgati

काश्मीर-गौर-वपुषम् अभिसारिकानां आबद्ध-रेखम् अभितो रुचि मञ्जरीभिः । एतत् तमाल-दल-नीलतमं तमिस्रं तत्-प्रेम-हेम-निकषोपलतां तनोति

kāśmīra-gaura-vapuṣam abhisārikānāṁ ābaddha-rekham abhito ruci mañjarībhiḥ | etat tamāla-dala-nīlatamaṁ tamisraṁ tat-prema-hema-nikaṣopalatāṁ tanoti

हारावली-तरल-काञ्चन-काञ्चि-दाम केयूर-कङ्कण-मणि-द्युति-दीपितस्य । द्वारे निकुञ्ज-निलयस्य हरिं निरीक्ष्य ब्रीडावतिम् अथ सखीं ईयम् इत्य् उवच

hārāvalī-tarala-kāñcana-kāñci-dāma keyūra-kaṅkaṇa-maṇi-dyuti-dīpitasya | dvāre nikuñja-nilayasya hariṁ nirīkṣya brīḍāvatim atha sakhīṁ īyam ity uvaca

मञ्जुतर-कुञ्ज-तल-केलि-सदने । विलस रति-रभस-हसित-वदने प्रविश राधे माधव-समीपम् इह ॥ध्रुव-पदं ॥

mañjutara-kuñja-tala-keli-sadane | vilasa rati-rabhasa-hasita-vadane praviśa rādhe mādhava-samīpam iha ||dhruva-padaṁ ||

नव-लसद्-अशोक-दल-शयन-सारे । विलस कुच-कलश-तरल-हारे

nava-lasad-aśoka-dala-śayana-sāre | vilasa kuca-kalaśa-tarala-hāre

कुसुम-चय-रचित-शुचि-वास-गेहे । विलस कुसुम-सुकुमार-देहे

kusuma-caya-racita-śuci-vāsa-gehe | vilasa kusuma-sukumāra-dehe

मृदु-चल-मलय-पवन-सुरभि-शीते । विलस मदन-शर-निकर-भीते

mṛdu-cala-malaya-pavana-surabhi-śīte | vilasa madana-śara-nikara-bhīte

वितत-बहु-वल्लि-नव-पल्लव-घने । विलस चिरम् अलस-पीन-जघने

vitata-bahu-valli-nava-pallava-ghane | vilasa ciram alasa-pīna-jaghane

मधु-मुदित-मधुप-कुल-कलित-रावे । विलस मदन-रस-सरस-भावे

madhu-mudita-madhupa-kula-kalita-rāve | vilasa madana-rasa-sarasa-bhāve

मधुरतर-पीक-निकर-निनद-मुखरे । विलस दशन-रुचि-रुचिर-शिखरे

madhuratara-pīka-nikara-ninada-mukhare | vilasa daśana-ruci-rucira-śikhare

विहित-पद्मावति-सुख-समाजे । कुरु मुरारे मङ्गल-शतानि । भणति जयदेव-कवि-राज-राजे

vihita-padmāvati-sukha-samāje | kuru murāre maṅgala-śatāni | bhaṇati jayadeva-kavi-rāja-rāje

त्वं चित्तेन चिरं वहन्न् अयम् अतिश्रान्तो भृशं तापितः कन्दर्पेण च पातुम् इच्छति सुधा-सम्बाध-बिम्बाधरम् । अस्याङ्कं तद् अलङ्कुरु क्षणम् इह भ्रू-क्षेप-लक्ष्मी-लव- क्रीते दास इवोपसेवित-पदाम्भोजे कुतः सम्भ्रमः

tvaṁ cittena ciraṁ vahann ayam atiśrānto bhṛśaṁ tāpitaḥ kandarpeṇa ca pātum icchati sudhā-sambādha-bimbādharam | asyāṅkaṁ tad alaṅkuru kṣaṇam iha bhrū-kṣepa-lakṣmī-lava- krīte dāsa ivopasevita-padāmbhoje kutaḥ sambhramaḥ

स ससाध्वस-सानन्दं गोविन्दे लोल-लोचना । सिञ्जान-मञ्जु-मञ्जीरं प्रविवेशाभिवेशनम्

sa sasādhvasa-sānandaṁ govinde lola-locanā | siñjāna-mañju-mañjīraṁ praviveśābhiveśanam

राधा-वदन-विलोकन-विकसित-विविध-विकार-विभङ्गम् । जल-निधिम् इव विधु-मण्डल-दर्शन-तरलित-तुङ्ग-तरङ्गम् हरिम् एक-रसं चिरम् अभिलषित-विलासम् । सा ददर्श गुरु-हर्ष-वशंवद-वदनम् अनङ्ग-निवासं ॥ध्रुव॥

rādhā-vadana-vilokana-vikasita-vividha-vikāra-vibhaṅgam | jala-nidhim iva vidhu-maṇḍala-darśana-taralita-tuṅga-taraṅgam harim eka-rasaṁ ciram abhilaṣita-vilāsam | sā dadarśa guru-harṣa-vaśaṁvada-vadanam anaṅga-nivāsaṁ ||dhruva||

हारम् अमलतर-तारम् उरसि दधतं परिलम्ब्य विदूरम् । स्फुटतर-फेन-कदम्ब-करम्बितम् इव यमुना-जल-पूरम्

hāram amalatara-tāram urasi dadhataṁ parilambya vidūram | sphuṭatara-phena-kadamba-karambitam iva yamunā-jala-pūram

श्यामल-मृदुल-कलेवर-मण्डलम् अधिगत-गौर-दुकूलम् । नील-नलिनम् इव पित-पराग-पटल-भर-वलयित-मूलम्

śyāmala-mṛdula-kalevara-maṇḍalam adhigata-gaura-dukūlam | nīla-nalinam iva pita-parāga-paṭala-bhara-valayita-mūlam

तरल-दृग्-अञ्चल-चलन-मनोहर-वदन-जनित-रति-रागम् । स्फुट-कमलोदर-खेलित-खञ्जन-युगम् इव शरदि तडागम्

tarala-dṛg-añcala-calana-manohara-vadana-janita-rati-rāgam | sphuṭa-kamalodara-khelita-khañjana-yugam iva śaradi taḍāgam

वदन-कमल-परिशीलन-मिलित-मिहिर-सम-कुण्डल-शोभम् । स्मित-रुचि-रुचिर-समुल्लसिताधर-पल्लव-कृत-रति-लोभम्

vadana-kamala-pariśīlana-milita-mihira-sama-kuṇḍala-śobham | smita-ruci-rucira-samullasitādhara-pallava-kṛta-rati-lobham

शशि-किरण-च्छुरितोदर-जलधर-सुन्दर-सकुसुम-केशम् । तिमिरोदित-विधु-मण्डल-निर्मल-मलयज-तिलक-निवेशम्

śaśi-kiraṇa-cchuritodara-jaladhara-sundara-sakusuma-keśam | timirodita-vidhu-maṇḍala-nirmala-malayaja-tilaka-niveśam

वीपुल-पुलक-भर-दन्तुरितं रति-केलि-कलाभिर् अधीरं । मणि-गण-किरण-समूह-समुज्ज्वल-भूषण-सुभग-शरीरम्

vīpula-pulaka-bhara-danturitaṁ rati-keli-kalābhir adhīraṁ | maṇi-gaṇa-kiraṇa-samūha-samujjvala-bhūṣaṇa-subhaga-śarīram

श्री-जयदेव-भणित-विभव-द्विगुणीकृत-भूषण-भारम् । प्रणमत हृदि विनिधाय हरिं सुचिरं सुकृतोदय-सारम्

śrī-jayadeva-bhaṇita-vibhava-dviguṇīkṛta-bhūṣaṇa-bhāram | praṇamata hṛdi vinidhāya hariṁ suciraṁ sukṛtodaya-sāram

अतिक्रम्यापाङ्गं श्रवण-पथ-पर्यन्त-गमन- प्रयासेनेवाक्ष्णोस् तरलतर-तारं गमितयोः । इदानीं राधायाः प्रियतम-समालोक-समये पपात स्वेदाम्बु-प्रसर इव हर्षाश्रु-निकरः

atikramyāpāṅgaṁ śravaṇa-patha-paryanta-gamana- prayāsenevākṣṇos taralatara-tāraṁ gamitayoḥ | idānīṁ rādhāyāḥ priyatama-samāloka-samaye papāta svedāmbu-prasara iva harṣāśru-nikaraḥ

भजन्त्यास् तल्पान्तं कृत-कपट-कण्टूति-पिहित- स्मितं याते गेहाद् बहिर् अवहिताली-परिजने । प्रियास्यं पश्यन्त्याः स्मर-परवशाकूत-सुभगं सलज्जा-लज्जापि व्यगमद् इव दूरं मृग-दृशः

bhajantyās talpāntaṁ kṛta-kapaṭa-kaṇṭūti-pihita- smitaṁ yāte gehād bahir avahitālī-parijane | priyāsyaṁ paśyantyāḥ smara-paravaśākūta-subhagaṁ salajjā-lajjāpi vyagamad iva dūraṁ mṛga-dṛśaḥ

सानन्दं नन्द-सूनुर् दिशतु मितपरं संमदं मन्द-मन्दं राधाम् आधाय बाह्वोर् विवरम् अनु द्र्ढं पीडयन् प्रीति-योगात् । तुङ्गौ तस्या उरोजाव् अतनु-वरतनोर् निर्गतौ मा स्म भूतां पृष्ठं निर्भिद्य तस्माद् बहिर् इति वलित-ग्रीवम् आलोकयन् वः

sānandaṁ nanda-sūnur diśatu mitaparaṁ saṁmadaṁ manda-mandaṁ rādhām ādhāya bāhvor vivaram anu drḍhaṁ pīḍayan prīti-yogāt | tuṅgau tasyā urojāv atanu-varatanor nirgatau mā sma bhūtāṁ pṛṣṭhaṁ nirbhidya tasmād bahir iti valita-grīvam ālokayan vaḥ

जय-श्री-विन्यस्तैर् महित इव मन्दार-कुसुमैः स्वयं सिन्दूरेण द्विप-रण-मुदा मुद्रित इव । भुजापीड-क्रीडा-हत-कुवलयापीड-करिणः प्रकीर्णासृग्-बिन्दुर् जयति भुज-दण्डो मुरजितः

jaya-śrī-vinyastair mahita iva mandāra-kusumaiḥ svayaṁ sindūreṇa dvipa-raṇa-mudā mudrita iva | bhujāpīḍa-krīḍā-hata-kuvalayāpīḍa-kariṇaḥ prakīrṇāsṛg-bindur jayati bhuja-daṇḍo murajitaḥ

सौन्दर्यैक-निधेर् अनङ्ग-ललना-लावण्य-लीला-जुषो राधाया हृदि पल्वले मनसिज-क्रीडैक-रङ्ग-स्थले । रम्योरोज-सरोज-खेलन-रसित्वाद् आत्मनः ख्यापयन् ध्यातुर् मानस-राज-हंस-निभतां देयान् मुकुन्दो मुदम्

saundaryaika-nidher anaṅga-lalanā-lāvaṇya-līlā-juṣo rādhāyā hṛdi palvale manasija-krīḍaika-raṅga-sthale | ramyoroja-saroja-khelana-rasitvād ātmanaḥ khyāpayan dhyātur mānasa-rāja-haṁsa-nibhatāṁ deyān mukundo mudam