The Adroit Four-Armed Lord

अत्रान्तरेऽमसृण-रोष-वशाम् अपार- निःश्वास-निःसह-मुखीं सुमुखीम् उपेत्य । सव्रीडम् ईक्षित-सखी-वदनां दिनान्ते सानन्द-गद्गद-पदं हरिर् इत्य् उवच

atrāntare'masṛṇa-roṣa-vaśām apāra- niḥśvāsa-niḥsaha-mukhīṁ sumukhīm upetya | savrīḍam īkṣita-sakhī-vadanāṁ dinānte sānanda-gadgada-padaṁ harir ity uvaca

वदसि यदि किञ्चिद् अपि दन्त-रुचि-कौमुदी हरति दर-तिमिरम् अतिघोरम् । स्फुरद्-अधर-सीधवे तव वदन-चन्द्रमा रोचयतु लोचन-चकोरं प्रिये चारु-शीले मुञ्च मयि मानम् अनिदानं । सपदि मदनानलो दहति मम मानसम् देहि मुख-कमल-मधु-पानं ॥ध्रुव-पदं ॥

vadasi yadi kiñcid api danta-ruci-kaumudī harati dara-timiram atighoram | sphurad-adhara-sīdhave tava vadana-candramā rocayatu locana-cakoraṁ priye cāru-śīle muñca mayi mānam anidānaṁ | sapadi madanānalo dahati mama mānasam dehi mukha-kamala-madhu-pānaṁ ||dhruva-padaṁ ||

सत्यम् एवासि यदि सुदति मयि कोपिनी देहि खर-नखर-शर-घातम् । घटय भुज-बन्धनं जनय रद-खण्डनं येन वा भवति सुख-जातं

satyam evāsi yadi sudati mayi kopinī dehi khara-nakhara-śara-ghātam | ghaṭaya bhuja-bandhanaṁ janaya rada-khaṇḍanaṁ yena vā bhavati sukha-jātaṁ

त्वम् असि मम भूषणं त्वम् असि मम जीवनं त्वम् असि मम भव-जलधि-रत्नम् । भवतु भवतीह मयि सततम् अनुरोधिनी तत्र मम हृदयम् अतियत्नं

tvam asi mama bhūṣaṇaṁ tvam asi mama jīvanaṁ tvam asi mama bhava-jaladhi-ratnam | bhavatu bhavatīha mayi satatam anurodhinī tatra mama hṛdayam atiyatnaṁ

नील-नलिनाभम् अपि तन्वि तव लोचनं धारयति कोक-नद-रूपं । कुसुम-शर-बाण-भावेन यदि रञ्जयसि कृष्णम् इदम् एतद् अनुरूपम्

nīla-nalinābham api tanvi tava locanaṁ dhārayati koka-nada-rūpaṁ | kusuma-śara-bāṇa-bhāvena yadi rañjayasi kṛṣṇam idam etad anurūpam

स्फुरतु कुच-कुम्भयोर् उपरि मणि-मञ्जरी रञ्जयतु तव हृदय-देशम् । रसतु रशनापि तव घन-जघन-मण्डले घोषयतु मन्मथ-निदेशम्

sphuratu kuca-kumbhayor upari maṇi-mañjarī rañjayatu tava hṛdaya-deśam | rasatu raśanāpi tava ghana-jaghana-maṇḍale ghoṣayatu manmatha-nideśam

स्थल-कमल-गञ्जनं मम हृदय-रञ्जनं जनित-रति-रङ्ग-परभागम् । भण मसृण-वाणि करवाणि चरण-द्वयं सरस-लसद्-अलक्तक-रागम्

sthala-kamala-gañjanaṁ mama hṛdaya-rañjanaṁ janita-rati-raṅga-parabhāgam | bhaṇa masṛṇa-vāṇi karavāṇi caraṇa-dvayaṁ sarasa-lasad-alaktaka-rāgam

स्मर-गरल-खण्डनं मम शिरसि मण्डनं देहि पद-पल्लवम् उदारम् । ज्वलति मयि दारुणो मदन-कदनारुणो हरतु तद्-उपाहित-विकारम्

smara-garala-khaṇḍanaṁ mama śirasi maṇḍanaṁ dehi pada-pallavam udāram | jvalati mayi dāruṇo madana-kadanāruṇo haratu tad-upāhita-vikāram

इति चटुल-चाटु-पटु-चारु मुर-वैरिणो राधिकाम् अधि वचन-जातम् । जयतु जयदेव-कवि-भारती-भूषितं मानिनी-जन-जनित-शातम्

iti caṭula-cāṭu-paṭu-cāru mura-vairiṇo rādhikām adhi vacana-jātam | jayatu jayadeva-kavi-bhāratī-bhūṣitaṁ māninī-jana-janita-śātam

परिहर कृतातङ्के शङ्कां त्वया सततं घन- स्तन-जघनयाक्रान्ते स्वान्ते परान्-अवकाशिनी । विशति वितनोर् अन्यो धन्यो न कोऽपि ममान्तरं प्रणयिनि परीरम्भारम्भे विधेहि विधेयताम्

parihara kṛtātaṅke śaṅkāṁ tvayā satataṁ ghana- stana-jaghanayākrānte svānte parān-avakāśinī | viśati vitanor anyo dhanyo na ko'pi mamāntaraṁ praṇayini parīrambhārambhe vidhehi vidheyatām

मुग्धे विधेहि मयि निर्दय-दन्त-दंश- दोर्-वल्लि-बन्ध-निविड-स्तन-पीडनानि । चण्डि त्वम् एव मुदम् उद्वह पञ्च-बाण- चाण्डाल-काण्ड-दलनाद् असवः प्रयान्ति

mugdhe vidhehi mayi nirdaya-danta-daṁśa- dor-valli-bandha-niviḍa-stana-pīḍanāni | caṇḍi tvam eva mudam udvaha pañca-bāṇa- cāṇḍāla-kāṇḍa-dalanād asavaḥ prayānti

शशि-मुखि तव भाति भङ्गुर-भ्रूर् युव-जन-मोह-कराल-काल-सर्पी । तद्-उदित-भय-भञ्जनाय यूनां त्वद्-अधर-सीधु-सुधैव सिद्ध-मन्त्रः

śaśi-mukhi tava bhāti bhaṅgura-bhrūr yuva-jana-moha-karāla-kāla-sarpī | tad-udita-bhaya-bhañjanāya yūnāṁ tvad-adhara-sīdhu-sudhaiva siddha-mantraḥ

व्यथयति वृथा मौनं तन्वि प्रपञ्चय पञ्चमं तरुणि मधुरालापैस् तापं विनोदय दृष्टिभिः । सुमुखि विमुखी-भावं तावद् विमुञ्च न मुञ्च मां स्वयम् अतिशय-स्निग्धो मुग्धे प्रियोऽयम् उपस्थितः

vyathayati vṛthā maunaṁ tanvi prapañcaya pañcamaṁ taruṇi madhurālāpais tāpaṁ vinodaya dṛṣṭibhiḥ | sumukhi vimukhī-bhāvaṁ tāvad vimuñca na muñca māṁ svayam atiśaya-snigdho mugdhe priyo'yam upasthitaḥ

बन्धूक-द्युति-बान्धवोऽयम् अधरः स्निग्धो मधूक-च्छविर् गण्डश् चण्डि चकास्ति नील-नलिन-श्री-मोचनं लोचनम् । नासाभ्येति तिल-प्रसून-पदवीं कुन्दाभ-दन्ति प्रिये प्रायस् त्वन्-मुख-सेवया विजयते विश्वं स पुष्पायुधः

bandhūka-dyuti-bāndhavo'yam adharaḥ snigdho madhūka-cchavir gaṇḍaś caṇḍi cakāsti nīla-nalina-śrī-mocanaṁ locanam | nāsābhyeti tila-prasūna-padavīṁ kundābha-danti priye prāyas tvan-mukha-sevayā vijayate viśvaṁ sa puṣpāyudhaḥ

दृशौ तव मदालसे वदनम् इन्दु-सन्दीपनं गतिर् जन-मनोरमा विजितारम्भं ऊरु-द्वयम् । रतिस् तव कलावती रुचिर-चित्र-लेखे भ्रुवाव् अहो विबुध-यौवतं वहसि तन्वि पृथ्वी-गता

dṛśau tava madālase vadanam indu-sandīpanaṁ gatir jana-manoramā vijitārambhaṁ ūru-dvayam | ratis tava kalāvatī rucira-citra-lekhe bhruvāv aho vibudha-yauvataṁ vahasi tanvi pṛthvī-gatā

स प्रीतिं तनुतां हरिः कुवलयापीडेन सार्धं रणे राधा-पीन-पयोधर-स्मरण-कृत्-कुम्भेन सम्भेदवान् । यत्र स्विद्यति मीलति क्षणम् अपि क्षिप्रं तद्-आलोकन- व्यामोहेन जितं जितं जितम् अभूत् कंसस्य कोलाहलः

sa prītiṁ tanutāṁ hariḥ kuvalayāpīḍena sārdhaṁ raṇe rādhā-pīna-payodhara-smaraṇa-kṛt-kumbhena sambhedavān | yatra svidyati mīlati kṣaṇam api kṣipraṁ tad-ālokana- vyāmohena jitaṁ jitaṁ jitam abhūt kaṁsasya kolāhalaḥ