Languishing Mukunda

तम् अथ मन्मथ-खिन्नां रति-रभस-भिन्नां विषाद-सम्पन्नाम् अनुचिन्तित-हरि-चरितां कलहान्तरितम् उवाच रहसि सखी

tam atha manmatha-khinnāṁ rati-rabhasa-bhinnāṁ viṣāda-sampannām anucintita-hari-caritāṁ kalahāntaritam uvāca rahasi sakhī

हरिर् अभिसरति वहति मधु-पवने । किम् अपरम् अधिक-सुखं सखि भवने माधवे मा कुरु मानिनि मानम् अये ॥ध्रुव-पदम् ॥

harir abhisarati vahati madhu-pavane | kim aparam adhika-sukhaṁ sakhi bhavane mādhave mā kuru mānini mānam aye ||dhruva-padam ||

ताल-फलाद् अपि गुरुम् अतिसरसम् । किं विफली-कुरुषे कुच-कलशम्

tāla-phalād api gurum atisarasam | kiṁ viphalī-kuruṣe kuca-kalaśam

कति न कथितम् इदम् अनुपदम् अचिरम् । मा परिहर हरिम् अतीशय-रुचिरम्

kati na kathitam idam anupadam aciram | mā parihara harim atīśaya-ruciram

किम् इति विषीदसि रोदिषि विकला । विहसति युवती-सभा तव सकला

kim iti viṣīdasi rodiṣi vikalā | vihasati yuvatī-sabhā tava sakalā

सजल-नलिनी-दल-शीतल-शयने । हरिम् अवलोकय सफलय नयने

sajala-nalinī-dala-śītala-śayane | harim avalokaya saphalaya nayane

जनयसि मनसि किम् इति गुरु-खेदम् । शृणु मम वचनम् अनीहित-भेदम्

janayasi manasi kim iti guru-khedam | śṛṇu mama vacanam anīhita-bhedam

हरिर् उपयातु वदतु बहु-मधुरम् । किम् इति करोषि हृदयम् अतिविधुरम्

harir upayātu vadatu bahu-madhuram | kim iti karoṣi hṛdayam atividhuram

श्री-जयदेव-भणितम् अतिललितं । सुखयतु रसिक-जनं हरि-चरितं

śrī-jayadeva-bhaṇitam atilalitaṁ | sukhayatu rasika-janaṁ hari-caritaṁ

स्निग्धे यत् परुषासि प्रणमति स्तब्धासि यद् रागिणि द्वेषस्थासि यद् उन्मुखे विमुखतां यातासि तस्मिन् प्रिये । तद् युक्तं विपरीत-कारिणि तव श्री-खण्ड-चर्चा विषं शीतांशुस् तपनो हिमं हुतवहः क्रीडा-मुदो यातनाः

snigdhe yat paruṣāsi praṇamati stabdhāsi yad rāgiṇi dveṣasthāsi yad unmukhe vimukhatāṁ yātāsi tasmin priye | tad yuktaṁ viparīta-kāriṇi tava śrī-khaṇḍa-carcā viṣaṁ śītāṁśus tapano himaṁ hutavahaḥ krīḍā-mudo yātanāḥ

सान्द्रानन्द-पुरं-दरादि-दिविषद्-वृन्दैर् अमन्दादराद् आनम्रैर् मुकुटेन्द्र-नील-मणिभिः सन्दर्शितेन्दिवरम् । स्वच्छन्दं मकरन्द-सुन्दर-गलन्-मन्दाकिनी-मेदुरं श्री-गोविन्द-पदारविन्दम् अशुभ-स्कन्दाय वन्दामहे

sāndrānanda-puraṁ-darādi-diviṣad-vṛndair amandādarād ānamrair mukuṭendra-nīla-maṇibhiḥ sandarśitendivaram | svacchandaṁ makaranda-sundara-galan-mandākinī-meduraṁ śrī-govinda-padāravindam aśubha-skandāya vandāmahe