Bewildered Madhusūdana

कंसारिर् अपि संसार-वासनाबद्ध-शृङ्खलाम् । राधाम् आधाय हृदये तत्याज व्रज-सुन्दरीः

kaṁsārir api saṁsāra-vāsanābaddha-śṛṅkhalām | rādhām ādhāya hṛdaye tatyāja vraja-sundarīḥ

इतस् ततस् ताम् अनुसृत्य राधिकाम् अनङ्ग-बाण-व्रण-खिन्न-मानसः । कृतानुतापः स कलिन्द-नन्दिनी- तटान्त-कुञ्जे विषसाद माधवः

itas tatas tām anusṛtya rādhikām anaṅga-bāṇa-vraṇa-khinna-mānasaḥ | kṛtānutāpaḥ sa kalinda-nandinī- taṭānta-kuñje viṣasāda mādhavaḥ

माम् इयं चलिता विलोक्य वृतं वधू-निचयेन । सापराधतया मयापि न वारिताऽतिभयेन हरि हरि हतादरतया गता सा कुपितेव ॥ध्रुव-पदम् ॥

mām iyaṁ calitā vilokya vṛtaṁ vadhū-nicayena | sāparādhatayā mayāpi na vāritā'tibhayena hari hari hatādaratayā gatā sā kupiteva ||dhruva-padam ||

किं करिष्यति किं वदिष्यति सा चिरं विरहेण । किं धनेन जनेन किं मम जीवितेन गृहेण

kiṁ kariṣyati kiṁ vadiṣyati sā ciraṁ viraheṇa | kiṁ dhanena janena kiṁ mama jīvitena gṛheṇa

चिन्तयामि तद्-आननं कुटिल-भ्रू कोप-भरेण । शोन-पद्मम् इवोपरि-भ्रमताकुलं भ्रमरेण

cintayāmi tad-ānanaṁ kuṭila-bhrū kopa-bhareṇa | śona-padmam ivopari-bhramatākulaṁ bhramareṇa

ताम् अहं हृदि सङ्गताम् अनीशं भृशं रमयामि । किं वनेऽनुसरामि ताम् इह किं वृथा विलपामि

tām ahaṁ hṛdi saṅgatām anīśaṁ bhṛśaṁ ramayāmi | kiṁ vane'nusarāmi tām iha kiṁ vṛthā vilapāmi

तन्वि खिन्नम् असूयया हृदयं तवाकलयामि । तन् न वेद्मि कुतो गतासि न तेन तेऽनुनयामि

tanvi khinnam asūyayā hṛdayaṁ tavākalayāmi | tan na vedmi kuto gatāsi na tena te'nunayāmi

दृश्यसे पुरतो गतागतम् एव मे विदधासि । किं पुरेव ससम्भ्रमं परिरम्भणं न ददासि

dṛśyase purato gatāgatam eva me vidadhāsi | kiṁ pureva sasambhramaṁ parirambhaṇaṁ na dadāsi

क्षम्यताम् अपरं कदापि तवेदृशं न करोमि । देहि सुन्दरि दर्शनं मम मन्मथेन दुनोमि

kṣamyatām aparaṁ kadāpi tavedṛśaṁ na karomi | dehi sundari darśanaṁ mama manmathena dunomi

वर्णितं जयदेवकेन हरेर् इदं प्रवणेन । किन्दुबिल्व-समुद्र-सम्भव-रोहिणी-रमणेन

varṇitaṁ jayadevakena harer idaṁ pravaṇena | kindubilva-samudra-sambhava-rohiṇī-ramaṇena

हृदि बिस-लता-हरो नायं भुजङ्गम-नायकह् कुवलय-दल-श्रेणी कण्ठे न सा गरल-द्युतिः । मलयज-रजो नेदं भस्म प्रिय-रहिते मयि प्रहर न हर-भ्रान्त्याऽनङ्ग क्रुधा किम् उ धावसि

hṛdi bisa-latā-haro nāyaṁ bhujaṅgama-nāyakah kuvalaya-dala-śreṇī kaṇṭhe na sā garala-dyutiḥ | malayaja-rajo nedaṁ bhasma priya-rahite mayi prahara na hara-bhrāntyā'naṅga krudhā kim u dhāvasi

पाणौ मा कुरु चूत-सायकम् अमुं मा चापम् आरोपय कृईडा-निर्जित-वीश्व मूर्च्छित-जनाघातेन किं पौरुषम् । तस्या एव मृगी-दृशो मनसिज प्रेण्खत्-कताक्षाशुग- श्रेणी-जर्जरितं मनाग् अपि मनो नाद्यापि सन्धुक्षते

pāṇau mā kuru cūta-sāyakam amuṁ mā cāpam āropaya kṛīḍā-nirjita-vīśva mūrcchita-janāghātena kiṁ pauruṣam | tasyā eva mṛgī-dṛśo manasija preṇkhat-katākṣāśuga- śreṇī-jarjaritaṁ manāg api mano nādyāpi sandhukṣate

भ्रू-पल्लवं धनुर् अपाङ्ग-तरण्गितानि बाणा गुणः श्रवण-पालिर् इति स्मरेण । तस्याम् अनङ्ग-जय-जङ्गम-देवतायाम् अस्त्राअणि निर्जित-जगन्ति किम् अर्पितानि

bhrū-pallavaṁ dhanur apāṅga-taraṇgitāni bāṇā guṇaḥ śravaṇa-pālir iti smareṇa | tasyām anaṅga-jaya-jaṅgama-devatāyām astrāaṇi nirjita-jaganti kim arpitāni

भ्रू-चापे निहितः कटाक्ष-विशिखो निर्मातु मर्म-व्यथां श्यामात्मा कुटिलः करोतु कबरी-भारोऽपि मारोद्यमम् । मोहं तावद् अयं च तन्वि तनुतां बिम्ब-धरो रागवान् सद्-वृत्तः स्तन-मण्डलस् तव कथं प्राणैर् मम क्रीडति

bhrū-cāpe nihitaḥ kaṭākṣa-viśikho nirmātu marma-vyathāṁ śyāmātmā kuṭilaḥ karotu kabarī-bhāro'pi mārodyamam | mohaṁ tāvad ayaṁ ca tanvi tanutāṁ bimba-dharo rāgavān sad-vṛttaḥ stana-maṇḍalas tava kathaṁ prāṇair mama krīḍati

तानि स्पर्श-सुखानि ते च तरलः स्निग्धा दृशोर् विभ्रमास् तद्-वक्त्राम्बुज-सौरभं स च सुधा-स्यन्दि गिरा- वक्रिमा । स बिम्बाधर-माधुरीति विषयासङ्गेऽपि चेन् मानसं तस्यां लग्न-समाधि हन्त विरह-व्याधिः कथं वर्धते

tāni sparśa-sukhāni te ca taralaḥ snigdhā dṛśor vibhramās tad-vaktrāmbuja-saurabhaṁ sa ca sudhā-syandi girā- vakrimā | sa bimbādhara-mādhurīti viṣayāsaṅge'pi cen mānasaṁ tasyāṁ lagna-samādhi hanta viraha-vyādhiḥ kathaṁ vardhate

तिर्यक्-कण्ठ-विलोल-मौलि-तरलोत्तंसस्य वम्शोच्चरद्- गीत-स्थान-कृतावधान-ललना-लक्षैर् न सम्लक्षिताः । सम्मुग्धे मधुसूदनस्य मधुरे राधा-मुखेन्दौ सुधा- सारे कन्दलिताश् चिरं ददतु वः क्षेमं कटाक्षोर्मयः

tiryak-kaṇṭha-vilola-mauli-taralottaṁsasya vamśoccarad- gīta-sthāna-kṛtāvadhāna-lalanā-lakṣair na samlakṣitāḥ | sammugdhe madhusūdanasya madhure rādhā-mukhendau sudhā- sāre kandalitāś ciraṁ dadatu vaḥ kṣemaṁ kaṭākṣormayaḥ