Carefree Keśava

विहरति वने राधा साधारण-प्रणये हरौ विगलित-निजोत्कर्षाद् ईर्ष्या-वशेन गताऽन्यतः । क्वचिद् अपि लता-कुञ्जे गुञ्जन्-मधु-व्रत-मण्डली मुखर-शिखरे लीन दीनाप्य् उवाच रहः सखीम्

viharati vane rādhā sādhāraṇa-praṇaye harau vigalita-nijotkarṣād īrṣyā-vaśena gatā'nyataḥ | kvacid api latā-kuñje guñjan-madhu-vrata-maṇḍalī mukhara-śikhare līna dīnāpy uvāca rahaḥ sakhīm

सञ्चरद्-अधर-सुधा-मधुर-ध्वनि-मुखरित-मोहन-वंशम् । चलित-धृग्-अञ्चल-चञ्चल-मौलि-कपोल-विलोल-वतंसम् । रासे हरिम् इह विहित-विलास्ं स्मरति मनो मम कृत-परिहासम् ॥ध्रुव-पदम्

sañcarad-adhara-sudhā-madhura-dhvani-mukharita-mohana-vaṁśam | calita-dhṛg-añcala-cañcala-mauli-kapola-vilola-vataṁsam | rāse harim iha vihita-vilāsṁ smarati mano mama kṛta-parihāsam ||dhruva-padam

चन्द्रक-चारु-मयूर-शिखण्डक-मण्डल-वलयित-केशम् । प्रचुर-पुरन्दर-धनुर्-अनुरञ्जित-मेदुर-मुदिर-सुवेशम्

candraka-cāru-mayūra-śikhaṇḍaka-maṇḍala-valayita-keśam | pracura-purandara-dhanur-anurañjita-medura-mudira-suveśam

गोप-कदम्ब-नितम्बवती-मुख-चुम्बन-लम्भित-लोभम् । बन्धुजीव-मधुराधर-पल्लवम् उल्लसित-स्मित-शोभम्

gopa-kadamba-nitambavatī-mukha-cumbana-lambhita-lobham | bandhujīva-madhurādhara-pallavam ullasita-smita-śobham

विपुल-पुलक-भुज-पल्लव-वलयित-बल्लव-युवति-सहस्रम् । कर-चरणोरसि मणि-गण-भूषण-किरण-विभिन्न-तमिस्रम्

vipula-pulaka-bhuja-pallava-valayita-ballava-yuvati-sahasram | kara-caraṇorasi maṇi-gaṇa-bhūṣaṇa-kiraṇa-vibhinna-tamisram

जलद-पटल-चलद्-इन्दु-विनिन्दक-चन्दन-तिलक-ललाटम् । पीन-पयोधर-परिसर-मर्दन-निर्दय-हृदय-कपाटम्

jalada-paṭala-calad-indu-vinindaka-candana-tilaka-lalāṭam | pīna-payodhara-parisara-mardana-nirdaya-hṛdaya-kapāṭam

मणि-मय-मकर-मनोहर-कुण्डल-मण्डित-गण्डम् उदारम् । पीत-वसनम् अनुगत-मुनि-मनुज-सुरासुर-वर-परिवारम्

maṇi-maya-makara-manohara-kuṇḍala-maṇḍita-gaṇḍam udāram | pīta-vasanam anugata-muni-manuja-surāsura-vara-parivāram

विशद-कदम्ब-तले मिलितं कलि-कलुष-भयं शमयन्तम् । माम् अपि किम् अपि तरल-तरङ्गद्-अनङ्ग-दृशा मनसा रमयन्तम्

viśada-kadamba-tale militaṁ kali-kaluṣa-bhayaṁ śamayantam | mām api kim api tarala-taraṅgad-anaṅga-dṛśā manasā ramayantam

श्री-जयदेव-भणितम् अतिसुन्दर-मोहन-मधु-रिपु-रूपम् । हरि-चरण-स्मरणं प्रति सम्प्रति पुण्यवताम् अनुरूपम्

śrī-jayadeva-bhaṇitam atisundara-mohana-madhu-ripu-rūpam | hari-caraṇa-smaraṇaṁ prati samprati puṇyavatām anurūpam

गणयति गुण-ग्रामं भ्रामं भ्रामाद् अपि नेहते वहति च परितोषं दोषं विमुञ्चति दूरतः । युवतिषु वलत्-तृष्णे कृष्णे विहरति मां विना पुनर् अपि मनो वामं कामं करोति करोमि किम्

gaṇayati guṇa-grāmaṁ bhrāmaṁ bhrāmād api nehate vahati ca paritoṣaṁ doṣaṁ vimuñcati dūrataḥ | yuvatiṣu valat-tṛṣṇe kṛṣṇe viharati māṁ vinā punar api mano vāmaṁ kāmaṁ karoti karomi kim

निभृत-निकुञ्ज-गृहं गतया निशि रहसि निलीय वसन्तम् । चकीत-विलोकित-सकल-दिशा रति-रभस-भरेण हसन्तम् सखि हे केशी-मथनम् उदारम् रमय मया सह मदन-मनोरथ-भावितया स-विकारम् ॥ध्रुवम् ॥

nibhṛta-nikuñja-gṛhaṁ gatayā niśi rahasi nilīya vasantam | cakīta-vilokita-sakala-diśā rati-rabhasa-bhareṇa hasantam sakhi he keśī-mathanam udāram ramaya mayā saha madana-manoratha-bhāvitayā sa-vikāram ||dhruvam ||

प्रथम-समागम-लज्जितया पटु-चाटु-शतैर् अनुकूलम् । मृदु-मधुर-स्मित-भाषितया शिथिली-कृत-जघन-दुकूलम्

prathama-samāgama-lajjitayā paṭu-cāṭu-śatair anukūlam | mṛdu-madhura-smita-bhāṣitayā śithilī-kṛta-jaghana-dukūlam

कीसल-शयन-निवेशितया चिरम् उरसि ममैव शयानम् । कृत-परिरम्भण-चुम्बनया परिरभ्य कृताधर-पानम्

kīsala-śayana-niveśitayā ciram urasi mamaiva śayānam | kṛta-parirambhaṇa-cumbanayā parirabhya kṛtādhara-pānam

अलस-निमीलित-लोचनया पुलकावलि-ललित-कपोलम् । श्रम-जल-सकल-कलेवरया वर-मदन-मदाद् अतिलोलम्

alasa-nimīlita-locanayā pulakāvali-lalita-kapolam | śrama-jala-sakala-kalevarayā vara-madana-madād atilolam

कोकिल-कल-रव-कूजितया जित-मनसिज-तन्त्र-विचारम् । श्लथ-कुसुमाकुल-कुन्तलया नकह-लिखित-घन-स्तन-भारम्

kokila-kala-rava-kūjitayā jita-manasija-tantra-vicāram | ślatha-kusumākula-kuntalayā nakaha-likhita-ghana-stana-bhāram

चरण-रणित-मणि-नूपुरया परिपूरित-सुरत-वितानम् । मुखर-विशृङ्खल-मेखलया सकच-ग्रह-चुम्बन-दानम्

caraṇa-raṇita-maṇi-nūpurayā paripūrita-surata-vitānam | mukhara-viśṛṅkhala-mekhalayā sakaca-graha-cumbana-dānam

रति-सुख-समय-रसालसया दर-मुकुलित-नयन-सरोजम् । निःसह-निपतित-तनु-लतया मधुसूदनम् उदित-मनोजम्

rati-sukha-samaya-rasālasayā dara-mukulita-nayana-sarojam | niḥsaha-nipatita-tanu-latayā madhusūdanam udita-manojam

श्रि-जयदेव-भणितम् इदम् अतिशय-मधु-रिपु-निधुवन-शीलम् । सुखम् उत्कण्ठित-गोप-वधू-कथितं वितनोतु सलिलं

śri-jayadeva-bhaṇitam idam atiśaya-madhu-ripu-nidhuvana-śīlam | sukham utkaṇṭhita-gopa-vadhū-kathitaṁ vitanotu salilaṁ

हस्त-स्रस्त-विलास-वंशम् अनृजु-भ्रू-वल्लिमद्-बल्लवी- वृन्दोत्सारि-दृगन्त-वीक्षितम् अतिस्वेदार्द्र-गण्ड-स्थलम् । माम् उद्वीक्ष्य विलज्जितं स्मृत-सुधा-मुग्धानन-कानने गोविन्दं व्रज-सुन्दरी-गण-वृतं पश्यामि हृष्यामि च

hasta-srasta-vilāsa-vaṁśam anṛju-bhrū-vallimad-ballavī- vṛndotsāri-dṛganta-vīkṣitam atisvedārdra-gaṇḍa-sthalam | mām udvīkṣya vilajjitaṁ smṛta-sudhā-mugdhānana-kānane govindaṁ vraja-sundarī-gaṇa-vṛtaṁ paśyāmi hṛṣyāmi ca

दुरालोक-स्तोक-स्तवक-नवकशोक-लतिका- विकासः कासारोपवन-पवनोऽपि व्यथयति । अपि भ्राम्यद्-भृङ्गी-रणित-रमनीया न मुकुल- प्रसूतिश् चूतानां सखि शिखरिणीयं सुखयति

durāloka-stoka-stavaka-navakaśoka-latikā- vikāsaḥ kāsāropavana-pavano'pi vyathayati | api bhrāmyad-bhṛṅgī-raṇita-ramanīyā na mukula- prasūtiś cūtānāṁ sakhi śikhariṇīyaṁ sukhayati

सकूत-स्मितम् अकुलाकुल-गलद्-धम्मिल्लम् उल्लासित- भ्रू-वल्लीकम् अलीक-दर्शित-भुजा-मूलोर्ध्व-हस्त-स्तनम् । गोपीनां निभृतं निरीक्ष्य गमिताकाङ्क्षश् चिरं चिन्तयन्न् अन्तर् मुग्ध-मनोहरं हरतु वः क्लेशं नवः केशवः

sakūta-smitam akulākula-galad-dhammillam ullāsita- bhrū-vallīkam alīka-darśita-bhujā-mūlordhva-hasta-stanam | gopīnāṁ nibhṛtaṁ nirīkṣya gamitākāṅkṣaś ciraṁ cintayann antar mugdha-manoharaṁ haratu vaḥ kleśaṁ navaḥ keśavaḥ