Chapter 91

अथैकनवतितमोऽध्यायः श्रीभगवानुवाच निषेकेन परिष्वङ्गो विभेदस्तेन वा भवेत् । क्षणेन दर्शनं तेन निषेकः केन वार्यते ।। १ ।। गमनागमनार्थ चाप्युद्धवः कथयिष्यति । प्रस्थापयामि तं शीघ्रं विज्ञास्यसि ततः पितः ।। २ ।। यशोदां रोहिणीं चैव गोपिकां गोपबालकान् । प्राणाधिकां राधिकां तां गत्वा संबोधयिष्यति ।। ३ ।। एतस्मिन्नन्तरे तत्र वसुदेवश्च देवकी । बलदेवश्चोद्धवश्च तथाऽक्रूरश्च सत्वरम् ।। ४ ।। वसुदेव उवाच नन्द त्वं बलवाञ्ज्ञानी सद्बन्धुश्च सखा मम । त्यज मोहं गृहं गच्छ वत्सस्तेऽयं यथा मम ।। ५ ।। दूरीभूता गोकुलाच्च मथुरा नास्ति बान्धव । महोत्सवे सदानन्दे नन्द द्रक्ष्यसि पुत्रकम् ।। ६ ।। देवक्युवाच यथाऽयमावयोः पुत्रस्तथैव भवतो ध्रुवम् । सालसः केन हे नन्द शुचा देहो हि लक्ष्यते ।। ७ ।। एकादशाब्दं सबलः स्थित्वा ते मन्दिरे सुखम् । कथं स्वल्पदिनेनैव शोकग्रस्तो भविष्यसि ।। ८ ।। तिष्ठ पुत्रेण सार्धं च मथुरायां कियद्दिनम् । पूर्णचन्द्राननं पश्य जन्म त्वं सफलं कुरु ।। ९ ।। श्रीभगवानुवाच घच्छोद्धव सुखं भद्रं भविष्यति तव प्रियम् । प्रहर्ष गोकुलं गत्वा यशोदां रोहिणीं प्रसूम् ।। १० ।। गोपवालसमूहं च राधिकां गोपिकागणम् । प्रबोधयाऽऽध्यात्मिकेन मद्दत्तेन शुचश्छिदा ।। ११ ।। नन्दस्तिष्ठतु सानन्दं मन्मातुराज्ञया शुचा । नन्दस्थितिं सद्विनयं यशोदां कथयिष्यसि ।। १२ ।। इत्येवमुक्त्वा श्रीकृष्णः पित्रा मात्रा बलेन च । अक्रूरेण समं तूर्ण ययावभ्यन्तरं गृहम् ।। १३ ।। उद्धवो रजनीं स्थित्वा मथुरायां च नारद । प्रभाते प्रययौ शीघ्रं रम्यं वृन्दावनं वनम् ।। १४ ।। इति श्रीब्रह्मo महाo श्रीकृष्णजन्मखo उत्तo नारदानाo एकनव- तितमोऽध्यायः ।। ९१ ।।

athaikanavatitamo'dhyāyaḥ śrībhagavānuvāca niṣekena pariṣvaṅgo vibhedastena vā bhavet | kṣaṇena darśanaṃ tena niṣekaḥ kena vāryate || 1 || gamanāgamanārtha cāpyuddhavaḥ kathayiṣyati | prasthāpayāmi taṃ śīghraṃ vijñāsyasi tataḥ pitaḥ || 2 || yaśodāṃ rohiṇīṃ caiva gopikāṃ gopabālakān | prāṇādhikāṃ rādhikāṃ tāṃ gatvā saṃbodhayiṣyati || 3 || etasminnantare tatra vasudevaśca devakī | baladevaścoddhavaśca tathā'krūraśca satvaram || 4 || vasudeva uvāca nanda tvaṃ balavāñjñānī sadbandhuśca sakhā mama | tyaja mohaṃ gṛhaṃ gaccha vatsaste'yaṃ yathā mama || 5 || dūrībhūtā gokulācca mathurā nāsti bāndhava | mahotsave sadānande nanda drakṣyasi putrakam || 6 || devakyuvāca yathā'yamāvayoḥ putrastathaiva bhavato dhruvam | sālasaḥ kena he nanda śucā deho hi lakṣyate || 7 || ekādaśābdaṃ sabalaḥ sthitvā te mandire sukham | kathaṃ svalpadinenaiva śokagrasto bhaviṣyasi || 8 || tiṣṭha putreṇa sārdhaṃ ca mathurāyāṃ kiyaddinam | pūrṇacandrānanaṃ paśya janma tvaṃ saphalaṃ kuru || 9 || śrībhagavānuvāca ghacchoddhava sukhaṃ bhadraṃ bhaviṣyati tava priyam | praharṣa gokulaṃ gatvā yaśodāṃ rohiṇīṃ prasūm || 10 || gopavālasamūhaṃ ca rādhikāṃ gopikāgaṇam | prabodhayā''dhyātmikena maddattena śucaśchidā || 11 || nandastiṣṭhatu sānandaṃ manmāturājñayā śucā | nandasthitiṃ sadvinayaṃ yaśodāṃ kathayiṣyasi || 12 || ityevamuktvā śrīkṛṣṇaḥ pitrā mātrā balena ca | akrūreṇa samaṃ tūrṇa yayāvabhyantaraṃ gṛham || 13 || uddhavo rajanīṃ sthitvā mathurāyāṃ ca nārada | prabhāte prayayau śīghraṃ ramyaṃ vṛndāvanaṃ vanam || 14 || iti śrībrahmao mahāo śrīkṛṣṇajanmakhao uttao nāradānāo ekanava- titamo'dhyāyaḥ || 91 ||